Pola Timotimo tiratna outna timbiŋ rapar
Outna kam
Timoti tikca ma Iesusa rɨpacrena laiplacar ŋgam ian, na ma Listara auŋ aniacnan. Na Listara auŋ aniaca ma Galesiana pitrikca eacrena. Na mana aemma ma Iudanaŋgepta wiwitnan, na mana aetta ma Giriknanta wiwitnan. Na Pola ma Timotimo aŋgɨa manap Raraŋ Aetaniacna aiŋa mona taŋrina, na Iesusna Up Aŋgɨrena Ramtaɨrta Aiŋna Nininina Timbigta Kapna sapta 16 wes 1 taŋca wes 3na inikca wat. Na Timoti tikca ma Epesusna Iesusna rɨtɨpaikta meikramtaɨrta tumbunna ramoot paŋanna kirar toc ndarurina, aintik Pola manmo gan timbiŋ rapara tirra neaŋga taŋrina.
Na gan timbiŋ raparna outna kambca, ma Timotimo gaindoprina, ma ndomo matau wat, moca ramtaɨr ndeida anna meikramtaɨrta rɨtɨpaikca mo ŋgocrai nari. Na an ramtaɨra mina kabena iro landamŋiarap, na anna gaind, gan tiacarpaikna reikca mina laiŋga wanaiŋ. Aintik ramootta eteacna wat gidikca aŋgɨna mo te, ma amta reik ndeidmo wandɨk tɨknandet, na ma mba laŋgoitndait.
Na gan timbiŋ raparna kabena kambca gaindoprina, anna mbembendeina tɨpemb kirarirmo mataua bubuocnanapa, Iesusna rɨtɨpaikta meikramtaɨrta tumbunmo mataua bubuocna. Na mandaia Iesusna rɨtɨpaikta meikramtaɨrta tumbunna ŋginaŋa mona ramoot paŋan ndarunan, co, Iesusna rɨtɨpaikta meikramtaɨrta tumbunna aiŋna ramoot ndarunan, an kamb toco ma mboprinan.
Na gan timbiŋ raparna mamamaina kambca ma Timotimo Iesus Karaisna aiŋa momona ramoot laŋ ndeacna kammap. Na an kam toco, ma Timotimo titocna tɨpemb kirarira Iesusna rɨtɨpaikta meikramtaɨrta tumbunna kabe, kabemo mo ndopna kammap.
Timoti ma ndona tɨpemb kirarirmo matau wat, na Iesusna rɨtɨpaikta meikramtaɨrta tumbun motocmo matau wat
1
(1—6)
1 Kol 1.27Aku Pol, Karais Iesusna up aŋgɨrena ramoot. Na Raraŋ Aetaniaca ai mac nda aŋgɨna ramootapa, Karais Iesus, ai mac nda aŋgɨna ramoot, aia lambirenan, maniŋna kam gargar mbuŋa aukmo gaindoprina, “U up aŋgɨrena ramoot ian.”
2 Up 16.1, na Ta 1.4Na u Timoti, u aukna rɨtɨpacna nuoc laŋ ŋgoin, aintik aku umo gan timbiŋ rapara tirra neaŋga aindopek, aina Raraŋ Aetaniacapa, aina Kacoot Karais Iesusa, nenmo kadmaiapa, kakadmaina opotacapa, nena iroar inkarmo, moi wewettaca laŋ ndeacnandet.
Aia paparuna kambmo moi irik
3 Gal 1.6, na Pil 2.24Na aku toŋgorinanna, u Epesus auŋ aniac ndeac te, aku Masedoniana pitrik inikna auŋembmo mbukca taŋna. Aintik aku umo gagraca mambopek, te, u ramtaɨr ndeidmo u gagraca mbopca, mina paparuna kambca kai ripti teac. 4 1 Ti 4.7, na 2 Ti 2.14-16, na Ta 1.14Na an wanaiŋa ninirena kammapa, ndorita nicar ŋgamrirta irembta kam ndoprena tɨpna kirara tɨkcari. Na an kambca mina iroar inkara moca paurirena, na minmo mba otaca mina Raraŋ Aetaniacmo mba rɨpacitndai. Na an reik laiŋga Raraŋ Aetaniaca minmo mo ndoprinanna, mina mba matau lamŋi garacitndai. 5 Ro 13.8-10, na Gal 5.14, na 2 Ti 2.22Na an aiŋa Raraŋ Aetaniaca aimo mo ndoprinan, anna ma meikramtaɨrmo moca mina Iesusmo gidik ŋgoinna toŋgona, te, mina Raraŋ Aetaniacna lamnɨacmo wandoŋ rat ndeacnande. Te, mina lamŋinandet, mina Raraŋ Aetaniacmo tɨpemb ŋgorik kocor. Aintik an tɨpemb kirarir muruŋa minmo moca mina kabena meikramtaɨrmo matŋinande. 6 Ainda moca mina ndeida an tɨpemb kirarirmo tɨkcarica, mina an kamma, mɨnɨŋ kocortanna raŋgairina. 7 1 Ti 6.4, na 6.20, na Ta 1.10Na mina ndorimo tɨpemb wandik tamŋirena ramtaɨr ndaruna mori. Aintik mina ndorita mboprena reikta kambapa, ndorita mboprena kambca, mina mba mataua lamŋia garacrina.
8 Ro 7.12, na 7.16, na 7.22Na aia lamŋirenan, aia Tɨp Wandɨkmo wattacarica Raraŋ Aetaniaca manmo larapacrina aiŋa mo te, anna ma reac laŋ. 9 Gal 3.19, na 5.23Na ai toco gainda lamŋirena, Tɨp Wandɨkna aiŋa ma meikramtaɨr wandoik laiŋ tiŋgiktanna wanaiŋ. Na Tɨp Wandɨk toco, ma tɨpemb ŋgorikta makukara morena meikramtaɨrapa, paŋaind garuruarta meikramtaɨrtan, na ma toca Raraŋ Aetaniacmo mba rɨpacrena meikramtaɨrapa, meikramtaɨra Raraŋ Aetaniacmo tɨpemb ŋgorikca morenanmo, ma minan. Na Tɨp Wandɨk toco, ma Raraŋ Aetaniacmo meikramtaɨr wandoik wanaiŋapa, reik ratmo peperenanapa, mandaibinna ndorita aem, co, aetta mo menacrinanapa, kabena meikramtaɨrmo pica menacrenanna, an toco ma minan. 10 RL 19.4-5, na 1 Ti 6.3, na 2 Ti 4.3, na Ta 1.9Na Tɨp Wandɨk toco, ma an meacramootna kaŋtertaapna tɨp kirara morenan, na meikramtaɨrtanapa, ramootniŋ, co, meacniŋa tɨp ŋgadudukca morena, an toco ma minan. Na Tɨp Wandɨk toco ma tuombta aiŋir kamndera morena meikramtaɨrmo oikca aŋgɨca aiŋa morena ramtaɨrapa, paparuna kammo ndada mbopca taŋrenanapa, kaina tɨpemb kirarira ripti laŋmo nda ipuŋrena meikramtaɨra, Tɨp Wandɨk toco anna ma minan. 11 Gal 2.7, na Kol 1.25, na 1 Te 2.4, na 1 Ti 6.15Na gan kam gidikca Raraŋ Aetaniaca aukmo neaŋrina kam wembaŋ laŋna kirara, aku an wiwitirenan. Na an kam wembaŋ laŋa aia aindoprina, Raraŋ Aetaniaca ma ndona memetacna tac gargar aniacap eacrenan. Na ma tamuŋ ŋgoin, na aia mana imo memetmbaca aŋgɨ ŋgepraŋ.
Pola Raraŋ Aetaniacmo kam laŋ neaŋrina ma manmo kadmairina
12 Up 9.15, na Gal 1.15-16Aintik aku, aina Kacoot Karais Iesusmo kam laŋ neaŋri, ma rɨpaca lamŋirena, aku mana aiŋa mona mɨn. Ainda moca ma aukmo an aiŋa mona moca aukmo larapacrina. Aintik ma aukmo gargar neaŋgatna. 13 Up 3.17, na 8.3, na 9.4-5, na 1 Ko 15.9-10, na Gal 1.13Na aku ndomo morina reikca aku mba lamŋirinan, na aku rɨtɨpac kocor. Na ŋgaua aku Iesusmo peperena kamb ŋgorikca mboprinan, na tɨp ŋgoreaca morinan, na nikkatrina ramoot, na Iesusa ma anna ndamŋirina, ma aukmo kakadmaina opotaca morina. 14 Lk 7.47, na Ro 5.20, na 1 Ko 15.10, na 2 Ti 1.13Ainda moca aina Kacoot Iesus Karais, ma aukna moca kakadmai aniacap tik, ma aukmo otaca aku mana rɨpaca, kabena meikramtaɨrmo matŋirena.
15 Lk 15.2, na 19.10, na Ro 5.8, na 1 Ti 3.1, na 4.9, na 2 Ti 2.11, na 1 Io 3.5Na gan kamma aku mbopeknanna, anna kam gidik ŋgoin. Ainda moca meikramtaɨra muruŋa an kammo waraca rɨpacnandet. Na an kamma gaind, Karais Iesusa, gan tiacarpaikca kɨpca aimo tɨpemb ŋgorikta makukara morena meikramtaɨrmo mac nda aŋgɨnandet. Na aku kakadmai ŋgoin, aku ndona tɨpemb ŋgorikta makukar momoca tamuŋ ŋgoin, ainda moca aku nemo tɨpemb ŋgorikta makukara momoca nemo outmbaica taŋrena ramoot. 16 Aintik Karais Iesusa ma toŋgorenanna, meikramtaɨra gainda matau lamŋina, meikramtaɨra tɨpemb ŋgorikta makukara morenanmo Karaisa ma laŋanna eaca mina lambirena. Ainda moca ma aukmo out ŋgoinna, kadmaia opotaca morina. Aintik ne aukmo wat garacna, an reikca ma aukmo morinan, mina watca, mitoco rɨpaca, iarwarna eteacna wat aŋgɨna. 17 Dan 7.14, na In 1.18, na Ro 16.27, na Ib 11.27, na 1 Io 4.12Na ma iarwar ndeacrena Gagrirta Ramoot Paŋan, na aia meikramtaɨra mamo mba watrena, na ma mba menacrena. Ma ndo kabe ŋgoinna Raraŋ Aetaniac. Aintik aia muruŋa memetmbaca iarwara mana i aniac aŋgɨca ŋgepraŋ te, mamo out ŋgoinna tɨkraŋnande. Anna gidik.
Timoti ma gagara ruŋca tɨpemb ŋgorikta makukara mo irik
18 1 Ti 6.12, na Iu 1.3Na aukna nuoc Timoti, gan mimitpacna kamma, aku umo neaŋgeknanna, anna mina ŋgaua, unmo rambca morina tɨpna kirarna moca moatna. Te, u mina raŋgai te, u runduŋ laŋa moca tɨpemb ŋgorikta makukara moi iriknandet. 19 1 Ti 3.9, na 6.9Aintik u Iesusmo matau rɨpac, na u lamŋirena, u Raraŋ Aetaniacmo makukar kocor. Na ramtaɨr ndeida anna raŋgaina kariri, ainda moca mina rɨtɨpaca laŋgumma waut nagaca ŋgocrairina kirar toc. 20 1 Ko 5.5, na 2 Ti 2.17-18, na 4.14-15Na mina ndeida ainda morinanna, anna Eimeneusapa, Aleksander. Aintik aku maniŋmo Ramoot Mbɨkna para tɨkrinan, te, maniŋa iro laŋ aŋgɨca, Raraŋ Aetaniacmo peperena kam ŋgoreaca mba mbopitndai.
1:1 Kol 1.27
1:2 Up 16.1, na Ta 1.4
1:3 Gal 1.6, na Pil 2.24
1:4 1 Ti 4.7, na 2 Ti 2.14-16, na Ta 1.14
1:5 Ro 13.8-10, na Gal 5.14, na 2 Ti 2.22
1:7 1 Ti 6.4, na 6.20, na Ta 1.10
1:8 Ro 7.12, na 7.16, na 7.22
1:9 Gal 3.19, na 5.23
1:10 RL 19.4-5, na 1 Ti 6.3, na 2 Ti 4.3, na Ta 1.9
1:11 Gal 2.7, na Kol 1.25, na 1 Te 2.4, na 1 Ti 6.15
1:12 Up 9.15, na Gal 1.15-16
1:13 Up 3.17, na 8.3, na 9.4-5, na 1 Ko 15.9-10, na Gal 1.13
1:14 Lk 7.47, na Ro 5.20, na 1 Ko 15.10, na 2 Ti 1.13
1:15 Lk 15.2, na 19.10, na Ro 5.8, na 1 Ti 3.1, na 4.9, na 2 Ti 2.11, na 1 Io 3.5
1:17 Dan 7.14, na In 1.18, na Ro 16.27, na Ib 11.27, na 1 Io 4.12
1:18 1 Ti 6.12, na Iu 1.3
1:19 1 Ti 3.9, na 6.9
1:20 1 Ko 5.5, na 2 Ti 2.17-18, na 4.14-15