Iesusna Up Aŋgɨrena Ramtaɨrta Aiŋna Nininina Timbigta Kap
Outna kam
Gan timbigta kapca, anna up aŋgɨrena ramtaɨrta aiŋna ninininan, na anna Luka tiratna kam wembaŋ laŋna timbigta kapca eacrena kammo ma memetmbaca nininia mboprina. Na gan timbigta kap toco, Luka ndo tiratnan. Aintik gan timbigta kapca aia watnandet, Ŋeroŋ Ratta up aŋgɨrena ramtaɨrmo taup wandaca mina Iesusna kam wembaŋ laŋna kammo wiwitia mboprena, “An Ierusalemna meikramtaɨrmo an kam wembaŋ laŋ an wiwiti te, Iudiana pitrik waŋna inikna auŋembapa, Samariana auŋembapa, mon tawan ŋgoinna auŋembca gan tiacarpaik ndeacrenanmo, gan kam wembaŋ laŋmo kocnai metmbaci mbopi taŋraŋ.” Anmo sapta 1 wes 8na inikca wat.
Na Iesusna Up Aŋgɨrena Ramtaɨrta Aiŋna Nininina Timbigta Kapca, ma Iesusna rɨtɨpaikta meikramtaɨrta tumbunna Iudana rɨk naŋgepca iŋmbaia ma acnaiatna, ri, ma gan tiacarpaikna auŋembmo tamtamma taŋri. Na Luk toco, ma gainda wandacna moca, Karaisna aiŋapa meikramtaɨrta tɨpemb kirarir laiŋga morena tip kirara manmo raŋgairenan, anna ma atua Raraŋ Aetaniaca Israelnaŋgepmo babuatna reikca moa mɨnna tɨkatna.
Na reac aniac ianna Iesusna Up Aŋgɨrena Ramtaɨrta Aiŋna Nininina Timbigta Kapca mboprenan, anna Ŋeroŋ Ratna aiŋ, na anna Raraŋ Aetaniacna Ŋeroŋ. Na out ŋgoinna Ŋeroŋ Ratta Iesusna iŋa raŋgairena ramtaɨrmo Pentikosna ra mbuŋa kɨpatna. Ri, iŋmbaia Ŋeroŋ Ratta minmo gargar neaŋga, mina iroarmo tiŋara mori, mina Raraŋ Aetaniacna aiŋira moa taŋrina.
Na gan timbigta kap toca aia watnande, ma kam tɨp roctir wɨtta up aŋgɨrena ramtaɨra Iesusna kam wembaŋ laŋmo kabena meikramtaɨrmo wiwitica minmo mboprina. Na aia watrinanna, meikramtaɨr wɨtta an kam wembaŋ laŋmo raŋgairenan, na Iesusna rɨtɨpacna tumbunna ŋgepca magagrat.
Na Iesusna Up Aŋgɨrena Ramtaɨrta Aiŋna Nininina Timbigta Kapca ma up aŋgɨrena ramtaɨr wɨtna nininiarap, na Pitaapa Pol mbaniŋna morina reikta nininiar wɨtta an ndeacrena. Na Pita ma Iesusap raŋgairina ramoot ian. Na Pol tikca ma ŋgaua Iesusmo mba raŋgaiatke, wanaiŋ ŋgoin. Ma Iesusna rɨtɨpaikta meikramtaɨrta tumbunmo, mo irikna aiŋ aniaca moatna. Na Iesusa Polmo aca mamo moca ma out ŋgoinna laruca mana aiŋa moatna ramoot.
Na gan timbigta kapna kɨdrɨkar ndeida, Luka ma Pol ndaruatna reikta nininia moatnanna, ma gan kam tɨpap mboprena “Aiap.” Na landamŋina ramtaɨr ndeida mina gaind ndamŋiatna, Luka ma ndo ŋgoinna Polapmo kɨdrɨk ndeidap taŋrina, aintik ma aindopatna, “Aia” na an kam tɨpca gan timbigta kapna kɨdrɨkar ndeida eacrena.
Up aŋgɨrena ramtaɨra Iesusna kammo Ierusalemma tɨkca mbopca laruatna
1
(1.1—8.3)
Iesusa baburinanna ma Ŋeroŋ Ratmo mbagɨrica kɨpnande
1-2 Mk 16.19, na Lk 1.1-4, na 24.49-51Tiopilus, an timbigta kapca ŋgaua aku tirca neaŋga kɨpatnanna, anna Iesusna mandeb ŋgepca moatna reikta kambapa, ma meikramtaɨrmo mimitpac neaŋgatna kambca, ma an mɨnna tɨkca moa kɨpca Raraŋ Aetaniaca manmo tamuŋna auŋ mac nda aŋgɨa taŋgatna mɨn mbuŋna reik. Na aku an tirca neaŋga kɨpatna. Na an mɨnna tɨkca kɨp, kɨpca Raraŋ Aetaniaca manmo mac nda aŋgɨra gacatna ra mbuŋ. Ma taŋga ndona up aŋgɨrena ramtaɨr tambuŋ ndarurina, na an ramtaɨra ma ndo larapacrina. Na Ŋeroŋ Ratna gargar mbuŋa ma minmo reac, reacna aiŋira momona kam ndopca maiatke. Iŋmbaia Raraŋ Aetaniaca manmo tamuŋna auŋ mac nda aŋgɨrca magat.*Luka gan Iesusna Up Aŋgɨrena Ramtaɨrta Aiŋna Nininina Timbigta Kap tirrinan. Na an kabena timbigta kapca ma ŋgaua tirca mboprenanna, anna ma ndo tirrina Kam Wembaŋ Laŋ. 3 Mt 28.17, na Mk 16.12, na Lk 24.36-49, na Up 10.41, na 1 Ko 15.5-7Na ma tamuŋna auŋa taŋ ŋgocor ndeacri, outmbaica, ma gɨrgɨr bagaraniac aŋgɨca menaca, mutoca eaca. Iŋmbaia ma wat mac nda aŋgɨca ma ŋgepca ndona up aŋgɨrena ramtaɨr tambuŋ ndaruca minapmo ainta reac, reac mamori, mimo ndo nagaraca gaind ndamŋina moca, gidik, ma mac nda maŋgepri. Aintik ma minapmo rai 40na mɨn ndeaca ma minmo Raraŋ Aetaniacna Bubuocna kam mambopat. 4 Lk 24.49, na In 14.16-17, na Up 2.33Na an mɨn, ma minap eacri, na ma minmo kam gargar mbuŋa gaindopatna, “Ne Ierusalem auŋ aniacmo kai tawi tɨkcarica taŋ teac, aku nemo ŋgaua ndopatna reacmo, Aetta nenmo neaŋ ndopca babuatna reaca ma neaŋnande. 5 Mt 3.11, na Mk 1.8, na Lk 3.16, na In 1.33, na Up 11.16Na Ion, ma meikramtaɨrmo kɨtac pukca, puk mbuŋa morena, na rocotta mba tɨkitndai, raeniŋ mai te, ne Ŋeroŋ Rat mbuŋa kɨtac puk aŋgɨnande.”
6 Ais 1.26, na Emo 9.11, na Mt 24.3, na Lk 24.21Na an mɨn mbuŋa mana up aŋgɨrena ramtaɨra kɨpca punica mamo gainda digiatna, “Kacoot, u mandeaca Israelna tiacarpaikna bubuoca minmo mac nda neaŋit ki, wanaiŋ?”†Atu ŋgoinna Israelna ramtaɨr koinda ndorita gagrirta ramtaɨrmo, mo laruca eacrina. Na mina minmo bubuocrina. Na Iesusna mɨn mbuŋa Israelnaŋgepca Romna pitrikna kaŋgauk ndeacrina. Ainda moca Iesusa laruatna kɨdrɨkca, meikramtaɨr wɨtta gaind ndamŋiatna, ma Romnaŋgepmo mo kecarinandet. Na Israelnaŋgepta wiwitna gagrirta ramtaɨrmo mac mo ŋgepnande. 7 Mt 24.36, na Mk 13.32, na 1 Te 5.1Ri, ma mina kammo gainda nda rutiatna, “Anna nena reaca wanaiŋ. Ne an raiapa ŋgaŋganŋgɨ Aetnan ndamŋina, anna mana reac, ma ndo kabe ndamŋirena. Anna mana landamŋina ŋginaŋna kaŋgauk ndeacrenan. 8 Mt 28.19, na Mk 16.15, na Lk 24.47-48, na In 15.27, na Up 2.32, na 3.15, na 5.32Na iŋmbaia an mɨn Ŋeroŋ Ratta ndo kɨpca nenap eac te, ne gagrar aŋgɨnande. Te, ne ŋgepca aukna morina reikta kambmo, Ierusalemna meikramtaɨrmo an kam wembaŋ laŋ an wiwiti te, Iudiana pitrik waŋna inikna auŋembapa Samarianandapa, mon tawan ŋgoinna auŋembca gan tiacarpaik ndeacrenanmo, gan kam wembaŋ laŋmo kocnai metmbaci mbopi taŋraŋ.”
Iesusa tamuŋna auŋ magat
(Mak 16.19 na Luk 24.50-53)
9 Mk 16.19, na Lk 24.50-51, na In 6.62, na 20.17Karica Iesusa an kam ndopacarica, mina watrinan mbuŋa, Raraŋ Aetaniaca manmo aŋgɨra magari, na magari wawɨrpaikca kɨpca manmo, aŋgɨra iŋgorocatke, mina mamo mba mac watatke. 10 Mt 28.3, na Mk 16.5, na Lk 24.4, na In 20.12, na Up 10.3, na 10.30Ma taŋgacariatke, mina wɨtɨkca riac tamuŋmo an motemmo, mataua ŋginaŋikca eacri. Na tik ŋgapaoc gogokapna ramooteniŋa tawi ŋgoin motemma, mina kɨtɨm ndarua mawɨtɨkat. 11 Mt 24.30, na 26.64, na Lk 21.27, na In 14.3, na 1 Te 1.10, na 4.16, na KIEK 1.7Maniŋa gaindopatna, “Ne Galilina ramtaɨr, tida moca ne wɨtɨkca riac tamuŋmo ŋginaŋikca eacre? An ramoot Iesus, ma nen tɨkcarica mandeaca Raraŋ Aetaniaca mamo tamuŋna auŋ naaŋgɨra magari, na ma gade gacpeke, ne watapekna kirar, mana gan tiacarpaikca nda kɨkɨpa, ne manmo aind mbatnandet.”
Mina Iudasna taup aŋgɨna ramoot ian larapacatna
12 Lk 24.50Karica up aŋgɨrena ramtaɨra, mina Olip ŋgacrina takur tɨkcarica, mina ŋgepca Ierusalemma nda mataŋgat. Na an Olip Takur ŋgetacndiŋa, Ierusalemma tataŋa tawan ŋgoinna wanaiŋ. 13 Mt 10.2-4, na Mk 3.16-19, na Lk 6.14-16Ri, mina taŋga Ierusalem auŋ aniacna inikca mbukca taŋga ndorita ŋgau ndeacrina kacna tamuŋmbaina diabca mbukna morina, an ramtaɨrta irembca gade, ianna Pita, na ianna Ion, na ianna Iemis, na ianna Andru, na ianna Pilip, na ianna Tomas, na ianna Batolomiu, na ianna Matiu, na ianna Iemis, ma Alpiusna nuoc, na ianna Saimon ma Selotna barna ramoot ian, na ianna Iudas ma Iemisna nuoc. 14 Mt 13.55, na Lk 23.49, na 23.55, na 24.10, na In 6.42, na 7.5An ramtaɨra ndorimo aŋgɨra iro kabea tɨkca, memetmbaca ndorimo aŋgɨra punica mbendeirena, na meik ndeidapa Iesusna aem Mariaapa mana laipitik, mitoco memetmbaca kɨpca minap tɨkca mbendeirena.
15 Na an mɨnna kɨpca puniatna, Iesusa rɨpacrena laiplacarta ŋgaŋganŋgɨa 120na mɨn. Ri, Pita mina rɨkca wɨtɨkca minmo gaindopatna, 16 Ŋap 41.9“Min aukna laiplacar, Ŋeroŋ Ratta Dewitmo iro neaŋga ma atu ndopatna kambca, Raraŋ Aetaniacna Timbigta Kapna inik ndeacrena kambca, ma Iudasna kam ndopatna. An ramoot Iudas, ma or ikca mina kɨpca Iesusmo utiŋgatna. Dewitta aindopatna kamna gagamma ma amna reac aŋgɨnandet, na mandeaca mana gagamma ande ma malaruri. 17 Mt 10.4, na Lk 6.16, na Up 1.25Na an ramoot Iudas, ma aiap aiŋ kabea morina tumbunna ramoot ian, ŋgaua ma toco ma ai aŋgɨrca morina aiŋna aiŋa morina ramoot ian.”
18 Mt 26.15, na 2 Pi 2.15Mt 27.3-8Karica an ramoot Iudasa ndo moatna tɨp ŋgoreacna aiŋna opoikna kituknduk aŋgɨca, an mbuŋa pitrik waŋ emtem ŋgoikca. Iŋmbaia ma an pitrik ŋgirikca keca gadaup titaca mimuŋapa larkamapa an pitrik mairikat.‡U Iudasmo kaina reaca larurinanna matau lamŋi garacna mo te, u Matiu sapta 27 wes 5na timbigta kapna inikca wat. 19 Ainda moca iŋmbaia Ierusalemna inik ndeacrina meikramtaɨr, mina muruŋa an kam anna waraca malamŋiat. Ainda moca mina ndorita auŋna kam mbuŋa an pitrik umbummo gaind ŋgacrina, Akeldama. An i Akeldama mana mɨnɨŋa gaind, “Racaindta Pitrik Umbum.”
20 Ŋap 69.25, na 109.8Karica Pita gaind mac mbopatna, “An kambca mina Ŋaparta timbigta kapna inikca tirca eacrena kambca gaind, ‘Mana eacatna kac mananna kabena ramoot ianna mana kaca kai aŋgɨ teac, an kaca watcarica ma wanaiŋ ndeac, na u an kacmo kai watcarica ramoot ianna kai aŋgɨ teac.’ Na an timbigta kapna kam tɨp ian toco gaind mac mbopatna, ‘Kabena ramoot ianmo watcarica ma mana taup rutica ma morina aiŋ aŋgɨca mo.’
21 “Aintik aia mandeaca Kacoot Iesusa aina inikca aiap eacri, memetmbac taŋ kɨp tɨkrina, ramtaɨrta ianna watca manmo larapaca, ma Iudasna taup aŋgɨ. 22 Mt 3.16, na Mk 1.9, na 16.19, na Lk 3.21, na 24.51, na In 15.27, na Up 4.33Na an larapacna ramoot, ma Ionna mandeb ŋgepca meikramtaɨrmo kɨtac pukca moatna aiŋapa, Iesusna aiŋa mandeba aŋgɨra ŋgepca, moa kɨpca Raraŋ Aetaniacna ŋganŋgɨatna mɨn ndaruri, Raraŋ Aetaniaca manmo aŋgɨca ma ai tɨkcarica tamuŋna auŋ naaŋgɨca magat, na an reikca watatna ramoot ianna, aia ainta ramoot larapaca, ma ai ŋgotaca Iesusna menaca mac nda ŋgepatna kam wembaŋ laŋ wiwitina.”
23 Pita aindopatke, mina ŋgepca ramoot mbuniŋmo lamarapacat ianna Iosep, mana i ianna Barsabas, na mana i ian toco Iastus. Na ramoot ianna ia Matias. 24 1 Sml 16.7, na Ier 11.20, na In 2.25, na KIEK 2.23Karica mina gaind mambendeiat, “Kacoot, u gan ramtaɨrta iroar inkar teacrena landamŋiara, u malamŋireke, gan ramootniŋmo u ndo maniŋmo, aimo ian wandaca mbop. 25 Te, ma up aŋgɨrena ramoot ian ndaruca, Iudasna taup aŋgɨna. Iudasa an aiŋ an tɨkcarica. Na ma taŋga ndona eacrina auŋ, an mac nda mataŋri.” 26 Ri, mina ŋgepca matɨp rocot, na gegerei ian tocna gegerei nagereica wattatnanna, Matiasa ndo aŋgɨatna mbatca, mina manmo aŋgɨra parniŋapa mbut kabe ndeacrena up aŋgɨrena ramtaɨrta inik matɨkat.
1:1-2 Mk 16.19, na Lk 1.1-4, na 24.49-51
*1:1-2 Luka gan Iesusna Up Aŋgɨrena Ramtaɨrta Aiŋna Nininina Timbigta Kap tirrinan. Na an kabena timbigta kapca ma ŋgaua tirca mboprenanna, anna ma ndo tirrina Kam Wembaŋ Laŋ.
1:3 Mt 28.17, na Mk 16.12, na Lk 24.36-49, na Up 10.41, na 1 Ko 15.5-7
1:4 Lk 24.49, na In 14.16-17, na Up 2.33
1:5 Mt 3.11, na Mk 1.8, na Lk 3.16, na In 1.33, na Up 11.16
1:6 Ais 1.26, na Emo 9.11, na Mt 24.3, na Lk 24.21
†1:6 Atu ŋgoinna Israelna ramtaɨr koinda ndorita gagrirta ramtaɨrmo, mo laruca eacrina. Na mina minmo bubuocrina. Na Iesusna mɨn mbuŋa Israelnaŋgepca Romna pitrikna kaŋgauk ndeacrina. Ainda moca Iesusa laruatna kɨdrɨkca, meikramtaɨr wɨtta gaind ndamŋiatna, ma Romnaŋgepmo mo kecarinandet. Na Israelnaŋgepta wiwitna gagrirta ramtaɨrmo mac mo ŋgepnande.
1:7 Mt 24.36, na Mk 13.32, na 1 Te 5.1
1:8 Mt 28.19, na Mk 16.15, na Lk 24.47-48, na In 15.27, na Up 2.32, na 3.15, na 5.32
1:9 Mk 16.19, na Lk 24.50-51, na In 6.62, na 20.17
1:10 Mt 28.3, na Mk 16.5, na Lk 24.4, na In 20.12, na Up 10.3, na 10.30
1:11 Mt 24.30, na 26.64, na Lk 21.27, na In 14.3, na 1 Te 1.10, na 4.16, na KIEK 1.7
1:12 Lk 24.50
1:13 Mt 10.2-4, na Mk 3.16-19, na Lk 6.14-16
1:14 Mt 13.55, na Lk 23.49, na 23.55, na 24.10, na In 6.42, na 7.5
1:16 Ŋap 41.9
1:17 Mt 10.4, na Lk 6.16, na Up 1.25
1:18 Mt 26.15, na 2 Pi 2.15
1:18 Mt 27.3-8
‡1:18 U Iudasmo kaina reaca larurinanna matau lamŋi garacna mo te, u Matiu sapta 27 wes 5na timbigta kapna inikca wat.
1:20 Ŋap 69.25, na 109.8
1:22 Mt 3.16, na Mk 1.9, na 16.19, na Lk 3.21, na 24.51, na In 15.27, na Up 4.33
1:24 1 Sml 16.7, na Ier 11.20, na In 2.25, na KIEK 2.23