4
Mina Pitaapa Ion mbaniŋmo ramtaɨr paŋaindta out naaŋgɨra larua mawɨtɨkat
Lk 22.4, na 22.52Karica Pitaapa Ionna meikramtaɨrmo Raraŋ Aetaniaca mbopatna kamb topca eacrinan mbuŋa, taup ndamtaɨr ndeidapa, Sadisina tumbunna ramtaɨr ndeidapa, Raraŋ Aetaniacna Kacna wuocna inikna ŋginaŋa morena lapoca ruŋrena ramoot paŋanap, mina muruŋa maniŋ ndambuŋ makɨpat.* Raraŋ Aetaniacna Kacna wuocna inikca tɨkca ŋginaŋa morena lapoca ruŋrena ramoot paŋan, anna ma taup ndamoot ian. Na ma an Liwaina ramtaɨra Raraŋ Aetaniacna Kacna wuocna inikmo, piraŋna aiŋa morenanmo ma minmo bubuocrena. Mt 22.23, na Up 23.8Mina gaind ndamŋiatna, maniŋa meikramtaɨrmo gainda riptiatna, Iesusa menaca mutocatnanna ma mac nda maŋgepri, na an menaca mutocrena meikramtaɨra mina Iesusa mac nda ŋgepatna kirara mitoco, aind mac nda ŋgepnande. Sadisinanda mina tumbun ian, na Karaisna mɨnna mina i aniacapa gargarap. Na mina Tɨp Wandɨkna gagraca raŋgairena, aintik mina an timbigta kap bagarna timbigta kapna moca mba gɨwac rɨpacrena. Na mina ndeida taup ndamtaɨr. Na mina ndeid toco taup ndamtaɨr paŋaind ndeacrena, na ndeida tɨpemb wandik tamŋina ramtaɨr ndeacrena. Na an Sadisina tumbunna mina memenacna ramtaɨrmo, mac nda ŋgeŋgepca mina mba rɨpacrenan, na mbaiŋna aiŋa morena ŋerŋgaurmo eteaca mina mba rɨpacrenanapa, mina Ramoot Mbɨk motoco eteaca mba rɨpacrenan. Aintik mina maniŋmo nikembkatacarica, mina ŋgepca maniŋmo utiŋga, maniŋna mbopatna kambca ritri waparac ndopca moatnanna, ra maiatna mbatca, mina maniŋmo kac ŋgoreacna inik naaŋgɨra mbukca tɨŋ kaptikica leaca tɨkcamacariat. Na ŋorapmbai te, mina maniŋna kambca waracnande. Up 2.41Na an meikramtaɨr wɨt aniaca, maniŋna mbopatna kam wembaŋ laŋa waraca, Iesusa rɨpacatna. Na ramtaɨrta ŋgaŋganŋgɨa 5,000na mɨn malaruat.
Mina Pitaapa Ion mbaniŋmo ninik waŋgorapna ramtaɨrta lamnɨac ŋgout naaŋgɨra larua mawɨtɨkat
Karica kabena ra mbuŋa Iudana ramtaɨr paŋaindapa, minmo outmbaica taŋrina ramtaɨr paŋaindapa, Iudana tɨpemb wandik tamŋirena ramtaɨrap, mina muruŋa Ierusalem mapuniat. Na an puniatna ramtaɨra anna Iudananta ninik waŋgor. Na mina aiŋa mina Iudana meikramtaɨrta mbibiracapa, eteac wandoŋairena. Ri, taup ndamoot paŋan aniac, Anasapa mana barna taup ndamtaɨra an makɨpat, na an ramtaɨra ande, Kaiapasapa, Ionapa Aleksanderap, na mina barna taup ndamtaɨrta tumbunna ramtaɨr ndeidap, mina muruŋ nakɨpca punica maica. Mt 21.23, na Up 7.27Karica mina an up aŋgɨrena ramootniŋ, Pitaapa Ionmo, aŋgɨra larua an ramtaɨr paŋaindta lamnik ŋgoutta wɨtɨkca, mina maniŋmo aind madigiat, “Oŋgo titocna gargar aŋgɨca, an reikmo ainda moca taŋrenan? Oŋgo mandaina i mbuŋa ainda moca mbopca taŋrenan, a?”
Mt 10.19-20Ri, Pitamo Ŋeroŋ Ratta mbukca mɨnna tɨkca ma minmo aindopatna, “Ne Israelnaŋgepta ramtaɨr anikapa ramtaɨr paŋaind, ne mandeaca gan aŋga otacapekna or ŋgoreacna ramootna digia, anna landamŋi aŋgɨna morena. Ne ndorimo mana landamŋi aŋgɨna moca, ma tida moapeke ma laŋa moapekna. 10  Up 2.24, na 3.6, na 3.13-16Aind, nenapa Israelnanda, ne muruŋcamiŋa gaind ŋgoin ndamŋi, gan or ŋgoreacna ramoot, ma Nasaretna ramoot Iesus Karaisna i mbuŋa ma laŋ mamori, mandeaca ma nena meacramoot muruŋna lamnɨacmo, ma ŋgepca wɨtɨkatna. Na an ramoot Iesus, ne manmo aŋgɨra ik nakeraca ma menacatnanna, Raraŋ Aetaniaca manmo mac nda mukca tɨkca moa maŋgepri.§ Na an ninik waŋgor, mina ndori, Pailatmo Iesusa mo menacna kam ndopatna. Luk sapta 22 wes 66 taŋca sapta 23 wes 5na inikca wat. Na Iesusa menacri, mina meikramtaɨrmo mana rɨtɨpaca mina mba toŋgori. 11  Ŋap 118.22, na Ais 28.16, na Mt 21.42Na an ramoot Iesus ma kaca morena wautna wit ian, na an wautna witta kaca morena ramtaɨra anmo ŋgoreac ndopca aŋgɨra roumbmbai nakecarica eacrena wautta, mandeaca ma kacna witta moca paŋanmbaia wɨtɨkca gagraca maeacreke. 12  Mt 1.21, na Up 10.43Na ai mac nda aŋtaŋgɨna ramoot ian ŋgocor. Wanaiŋ ŋgoin. An ramootta Iesus niŋgik, Raraŋ Aetaniaca mamo babuatna, man niŋgik, ma ndo ai mac nda aŋgɨnande. Mana i mbuŋa aia gan tiacarpaikna meacramootta, muruŋa mataui eacna mɨn.”
13 Ainda moca ramtaɨr paŋainda malamŋiat, Pitaapa Ion mbaniŋa landamŋi aŋgɨrena taup ianna taŋga anna ripti ianna aŋgɨ ŋgocor, aintik maniŋa landamŋiar kocorta ramootniŋ. Na mina watri, maniŋa rugutta mo ŋgocor, maniŋna mboprina kambca gargar ŋgoin, ri, mina tamtam ndamŋia taŋga malamŋiat. Ŋgaua maniŋa Iesusap eacrina ramootniŋ. 14 Ri, mina wattatnanna, an moa laŋa moatna ramootta Pitaapa Ionap wɨtɨkca eacri. Na mina maniŋmo nda ruti, mbopna kamb kocor.
15 Ainda moca an ramtaɨr paŋainda maniŋmo aindopatna, “Oŋgo gan kambca ritri waparacrena kacna inik tɨkcarica raekmbai pac laruca lambi.” Aindopca maniŋa taŋgatke. Mina kam leaca aind mambopat, 16  In 11.47, na Up 3.9-10“Aia an ramootniŋmo tida tɨki moit? Maniŋa ŋgagatrac ianna Ierusalemma tɨkca moa laruapekke, meikramtaɨra muruŋcamiŋa anna watta mamairi, na aia minmo wawri mbopna towanaiŋ. 17 Ainda moca an kammo, ŋarikca meikramtaɨr muruŋa warac nari. Aintik aia maniŋmo gagra mbopca maniŋa kai kabena meikramtaɨrmo Iesusna i mbuŋa reikta kambca kai mac nini mbopi taŋ teac, kari ŋgoin ndacari.” 18  Up 5.28, na 5.40Karica mina maniŋmo aca kɨpca maniŋmo wandɨk matɨkat, oŋgo kai Iesusna i mbuŋa meikramtaɨrmo an reikta kambca kai riptica mbop teac.
19  Up 5.29Ri, Pitaapa Ion, maniŋa mina kammo gainda nda rutica mambopat, “Ne titoc ndamŋire, titna tɨp kirara ndo Raraŋ Aetaniacna lamnɨacmo laŋ ndaruit? Aŋga Raraŋ Aetaniacna kam mbarac naki, co, aŋga nena kam mbaracit, ki? Ne ndori an kamniŋmo ritrica wat. 20  Up 1.8, na 22.15, na 1 Io 1.1-3Na aŋga mba mac karitndai, aŋga ndoniŋ watri, waracrina reikta kambca, aŋga memetmbac ndopca taŋraŋnande.”
21-22 Karica ninik waŋgorta ramtaɨra maniŋmo kabena kam gargar mbuŋa mac tagagarica mbopacarica, mina meikramtaɨr tarica rugut mocarica mina maniŋmo wattacarica maniŋa mataŋgat. Na an ramoot, maniŋa man mbuŋa ŋgagatraca moatna ramoot, mana guiarpaika 40na mɨn mbuŋ, ma an or ŋgoreacna roumbap eaca kɨpca guiarpaika 40na mɨnna tɨkatke, maniŋa manmo moa laŋa moatna. Ri, meikramtaɨra an Raraŋ Aetaniacna moapekna ŋgagatraca watca, mina muruŋ ŋgoinna mana i aŋgɨra ŋgepatke, na an ramtaɨr paŋainda maniŋa tɨki mona taupembtake, moa tambacarica toawanaiŋ.
Mina mbendeica gargar aŋgɨca Iesusna moatna reikta kam ndopna moca mambendeiat
23 Karica ninik waŋgorapna ramtaɨra, Pitaapa Ionmo watcariatke, maniŋa nda taŋga ndoniŋna tumbun ndambuŋ ndaruca. Maniŋa minmo taup ndamtaɨr paŋaindapa, ramtaɨr paŋaind mbopatna kambca, minmo an maniniat. 24  NA 20.11, na Nei 9.6, na Ŋap 146.6Ri, mina muruŋa waraca maica, karica mina ŋgepca aŋgɨra iro kabea tɨkca Raraŋ Aetaniacmo gaind mambendeiat, “Gagrirta Kacoot Aniac, u riac tamuŋapa tiacarpaikapa, macaitapa min nambat ndeacrena reikca un moatna. 25  Ŋap 2.1-2Na aina nicau Dewit, ma una aiŋna ramoot, atua Ŋeroŋ Ratta, iro neaŋga ma kam ianmo gaindopatna,
 
‘Kaina moca Iudana meikramtaɨr wanaiŋa
muruŋa nikemb katreke?
Na kaina moca an meikramtaɨra
tɨpemb ŋgorikca mona moca
anna kamma wanaiŋa leacrena?
26 Na gan tiacarpaik ndeacrena gagrirta ramtaɨr paŋainda
ruŋna kocroca eacreke.
Mina ramtaɨr paŋainda muruŋ naaŋgɨra punica,
Raraŋ Aetanaic Kacootapa mana babuca mbagɨrica
ndona meikramtaɨr mac nda aŋgɨna ramoot,
mina maniŋmo ruŋna moca.’
 
27  Mt 27.1-2, na Mk 15.1, na Lk 23.1, na 23.7-11, na In 18.28-29, na Up 3.13“Anna gidik ŋgoin, aintik Erotapa Pontius Pailatap, Iudana meikramtaɨr wanaiŋapa Israelnandap, mina muruŋa an auŋ aniac Ierusalemma punica Iesusa mo menacna moca lambirina, an aiŋna ramoot Iesus, ma una aiŋna ramoot rat, atua u mamo ndona aiŋa mona moca larapacatna ramoot. 28  Up 2.23, na 3.18 Na mina ainda moatna reikca anna mina una iroapa toŋtoŋ niŋgikca raŋgairena. Una gargar mbuŋa atu ŋgoinna u kam leacatna, an reikmo mo laru ndopatna. 29  Up 9.27, na 13.46, na 19.8, na Epe 6.19Aintik Raraŋ Aetaniac Kacoot, u mandeaca lamŋirina mina mboprena kambca, anna mina aimo moi nanambina ndoprenanna, u aimo una mbaiŋna aiŋa morena ramtaɨrmo otac. Te, aia mba nanambitndai, aia una kam wembaŋ laŋna kam ndopna moca paŋanmbaia mbukraŋnande. 30 Te, u ndona gargarmo neaŋ te, meikramtaɨrmo, mo laŋa monande, u Iesusna i mbuŋa ŋgagatracara moi laruraŋ te, mina tamtam ndamŋiraŋnandet, ma una aiŋna ramoot, rat ŋgoin!”
31  Up 2.4, na 4.29, na 16.26Mina mbendeia maiatke, mina punica eacrina kaca warak mamoat, ri, Ŋeroŋ Ratta minmo mbukca lacakeca, mina Raraŋ Aetaniacna kam wembaŋ laŋmo kam aniaca tɨkca mawiwitiat, na mina mba nanambiatke.
Meacramoota muruŋa kabena meacramootmo ndiarna tɨpca mo
32  Up 2.44-45, na 2 Ko 13.11, na 1 Pi 3.8Meikramtaɨra muruŋa Iesusa rɨpaceknanna, mina iroar inkara wewettar laiŋ ndeac te, iro kabe aŋgɨca iro landamŋi kabe ŋgoin ndeac. Te, mina kabe, kabena reikca mina ianna an reik mbatca gainda mba lamŋitndai, an reiki anna mannan. Wanaiŋ. Mina gaind ndamŋinande, an reikca anna mina muruŋcamiŋnan. 33  Up 1.8, na 1.22, na 2.45-47Ri, Kacoot Iesusna up aŋgɨrena ramtaɨra, mana nda ŋgeŋgepna kam wiwitiri, an kam minanna gargar bagaraniacap. Ainda moca Raraŋ Aetaniaca min ŋgopotacna toŋtoŋ bagaraniacap. Aintik ma minmo muruŋcamiŋmo reik laiŋga mataua morena. 34  Up 2.45Ainda mori, an meikramtaɨrta ianna mba amna reac nake, mba koteteri. Mina mandaia ndorita pitrikapnan, co kaikapnan, mina muruŋa an reikmo aŋgɨra mbik tɨkca oikrena taupca tɨkca mina oikca aŋgɨr te, minmo anna kituknduk neaŋ te. Mina an kitukndukar aŋgɨra kɨpca, 35 up aŋgɨrena ramtaɨrmo neaŋ te. Mina an kitukndukar aŋgɨca, an koteterina meikramtaɨrmo mabiŋaiat.
36  Up 11.22-26, na 13.2-3Ri, mina inik ndeacrina ramoot ianna, mana ia Iosep. Ma Liwainanta ian, ma Saiprus mutna ramoot. Na up aŋgɨrena ramtaɨra mana i Iosep ŋgetrikica, manmo i Banambas matɨkat. Na an i Banambas, mana mɨnɨŋa gan ina kirar, “Iroa moa Gagararena Ramoot.” 37 Ma ndona pitrik waŋ emtemmo mbik tɨkca oikrena taupca tɨkca ramoot ianna oikatna mbatca, ma an kitukndukar aŋgɨa kɨpca up aŋgɨrena ramtaɨrta par matɨkat.

4:1 Lk 22.4, na 22.52

*4:1 Raraŋ Aetaniacna Kacna wuocna inikca tɨkca ŋginaŋa morena lapoca ruŋrena ramoot paŋan, anna ma taup ndamoot ian. Na ma an Liwaina ramtaɨra Raraŋ Aetaniacna Kacna wuocna inikmo, piraŋna aiŋa morenanmo ma minmo bubuocrena.

4:2 Mt 22.23, na Up 23.8

4:2 Sadisinanda mina tumbun ian, na Karaisna mɨnna mina i aniacapa gargarap. Na mina Tɨp Wandɨkna gagraca raŋgairena, aintik mina an timbigta kap bagarna timbigta kapna moca mba gɨwac rɨpacrena. Na mina ndeida taup ndamtaɨr. Na mina ndeid toco taup ndamtaɨr paŋaind ndeacrena, na ndeida tɨpemb wandik tamŋina ramtaɨr ndeacrena. Na an Sadisina tumbunna mina memenacna ramtaɨrmo, mac nda ŋgeŋgepca mina mba rɨpacrenan, na mbaiŋna aiŋa morena ŋerŋgaurmo eteaca mina mba rɨpacrenanapa, mina Ramoot Mbɨk motoco eteaca mba rɨpacrenan.

4:4 Up 2.41

4:5 Na an puniatna ramtaɨra anna Iudananta ninik waŋgor. Na mina aiŋa mina Iudana meikramtaɨrta mbibiracapa, eteac wandoŋairena.

4:7 Mt 21.23, na Up 7.27

4:8 Mt 10.19-20

4:10 Up 2.24, na 3.6, na 3.13-16

§4:10 Na an ninik waŋgor, mina ndori, Pailatmo Iesusa mo menacna kam ndopatna. Luk sapta 22 wes 66 taŋca sapta 23 wes 5na inikca wat. Na Iesusa menacri, mina meikramtaɨrmo mana rɨtɨpaca mina mba toŋgori.

4:11 Ŋap 118.22, na Ais 28.16, na Mt 21.42

4:12 Mt 1.21, na Up 10.43

4:16 In 11.47, na Up 3.9-10

4:18 Up 5.28, na 5.40

4:19 Up 5.29

4:20 Up 1.8, na 22.15, na 1 Io 1.1-3

4:24 NA 20.11, na Nei 9.6, na Ŋap 146.6

4:25 Ŋap 2.1-2

4:27 Mt 27.1-2, na Mk 15.1, na Lk 23.1, na 23.7-11, na In 18.28-29, na Up 3.13

4:28 Up 2.23, na 3.18

4:29 Up 9.27, na 13.46, na 19.8, na Epe 6.19

4:31 Up 2.4, na 4.29, na 16.26

4:32 Up 2.44-45, na 2 Ko 13.11, na 1 Pi 3.8

4:33 Up 1.8, na 1.22, na 2.45-47

4:34 Up 2.45

4:36 Up 11.22-26, na 13.2-3