Iburunaŋgepta timbiŋ rapar
Outna kam
Gan timbiŋ rapara mina tiratnanna, anna kabena Iesusa rɨpacrena laiplacar ndeida, mina ndorita rɨtɨpaikca mo irikna mori, na anna gaind, ramtaɨr ndeida mina rɨtɨpaikmo, mo irikrina, na minmo makukara neaŋrina. Na gan timbiŋ rapara ma mina rɨtɨpaikca mo gagrana. Ainda moca ma aiŋir anikca Raraŋ Aetaniaca Karais Iesusa morinanna kamb ndoprenan. Na Karais, ma ndo niŋgikca aimo Raraŋ Aetaniacna tɨpemb kirarir gidkar wandacrena.
Na gan timbiŋ rapara ma reik anik mbonkacna kamb ndoprena. Out ŋgoinna ma gaindoprina, Iesusa ma Raraŋ Aetaniacna Nuoc ŋgoin. Na an mɨnna ma gan tiacarpaikca eacrinanna, ma makukarapa gɨgɨrar wɨtta aŋgɨatna. Na an tɨpna kirar mbuŋa Raraŋ Aetaniaca Iesusmo moca ma meikramtaɨrmo otacna outna ramoot ŋgoin ndarurina. U gan timbiŋ raparna sapta 2 wes 10na inikca wat. Ainda moca Iesusa ma an atuna rambca morina ramtaɨrapa, mbaiŋna aiŋa morena ŋerŋgaurapa, Moses ŋgoin tocmo, ma minmo kunda tamuŋmbai. Na anna iŋmbaia ma aindoprina, Raraŋ Aetaniac, ndo ŋgoinna Iesusmo larapaca ma iarwarna taup ndamootta eacraŋnandet, na ma Iudana taup ndamtaɨrmo kunda tamuŋmbai. Na mana mamaia ma aindoprina, Iesusa ma tamuŋna auŋna taup ndamoot paŋan aniac ndeacrenan, na meikramtaɨra manmo rɨpacrenanmo, ma minmo mac nda aŋgɨna mɨn ŋgoin. Na Tɨp Wandɨkca mbembendeina tɨpemb kirarirna kambca mboprenanna, anna mina an aiŋir anikca Iesusa moatna kam roor nakerena.
Na gan timbiŋ rapara ma meikramtaɨrta rɨtɨpaca moi gagarana. Aintik ma atuna Israelna meikramtaɨrta rɨtɨpac gagarana kamb wɨtmo wandacrina. Na u gan timbiŋ raparna sapta 11na inikca wat. Na ma aindoprina, titocna makukca minmo laru te, mina ndorita rɨtɨpacmo utiŋa taŋca mina menacnandet. Na mina Iesusmo watrapaca mana tɨpemb kirarirmo raŋgairaŋ. Na an makukarapa, gɨgɨrarap mina aŋgɨrenanmo, mina anmo iukairaŋ.
Iesusa mbaiŋna aiŋa morena ŋerŋgaurmo tamuŋmbai ŋgoin
1
(1—2)
Raraŋ Aetaniacna Nuoca ma aimo kambca neaŋrinan
1 Atu ŋgoinna kɨdrɨkar wɨtapa, tɨpemb kirarir wɨt puŋga Raraŋ Aetaniaca aina nicar ŋgamrirmo, kambmo rambca morina ramtaɨrta para tɨkca mina mbopatna. 2 Ŋap 2.8, na In 1.3, na Epe 1.10Na mandeacna mɨn mbuŋ, reik mamaina raipaik, Raraŋ Aetaniaca ma kammo ndona Nuocna para tɨkca aimo mboprinan. Na ma reikmo muruŋcamiŋa aŋgɨna moca, ma an Nuocmo ma larapacatna. Na Raraŋ Aetaniacapa, mana Nuocna par mbuŋa gan tiacarpaikapa, riac motocmo moca laruatna. 3 Up 2.33-34, na 2 Ko 4.4, na Kol 1.15-17, na 1.20, na Ib 8.1, na KIEK 4.11Na an Nuoca ma Raraŋ Aetaniacna memetacna tac aniac wandacrinan. Na ma ndo ŋgoinna Raraŋ Aetaniacna kirar toc. Na mana kamma ma gargarap, na an kam mbuŋa ma reikmo muruŋcamiŋa moca, mina gagraca eacrenan. Na ma meikramtaɨrta tɨpemb ŋgorikta makukarmo, moa kecarica minmo ratta mona, na ma ndona aiŋa moa korwirinan. Ri, ma taŋga par umbaina Gagrirta Ramoot Paŋanna mbiracrena auŋ tamuŋna taupca mbiracrinan.
Raraŋ Aetaniacna Nuoca mbaiŋna aiŋa morena ŋerŋgaurmo tamuŋmbai ŋgoin
4 Epe 1.21, na Pil 2.9-10Na Aetta ma ndona Nuocmo an i neaŋrinan, an ia anna ma laŋ ŋgoin, na ma mbaiŋna aiŋa morena ŋerŋgaurta irembmo kunda tamuŋ ŋgoin ndeacrena. Ainda moca ma an Nuocmo, Kacoot ŋgacatna, na mina mana kaŋgauk ndeacrena. 5 2 Sml 7.14, na 1 Nin 17.13, na Ŋap 2.7, na 89.26-27, na Up 13.33, na Ib 5.5Na atua Raraŋ Aetaniaca ma ndona Nuocmo gaindopatna,
“U aukna Nuoc.
Na mandeaca aku una Aet ndarurina.”
Ri, ma gaind mac mambopat, “Na aku mana Aet ndeacraŋnandet, na ma aukna Nuoc ndeacraŋnandet.” Ainda moca Raraŋ Aetaniaca titocna mbaiŋna aiŋa morena ŋeroŋ ianmo aintocna kam ndopatna? Wanaiŋ ŋgoin. 6 TW 32.43, na Ŋap 97.7, na Ro 8.29, na Kol 1.18, na 1 Pi 3.22, na KIEK 1.5Na an mɨnna ma ndona guina Nuocmo gan tiacarpaik naaŋgɨa kɨprinanna, Raraŋ Aetaniaca ma gaindopatna, “Raraŋ Aetaniacna mbaiŋna aiŋa morena ŋerŋgaura muruŋcamiŋa manmo tutpemb rɨmbɨtca mana imo aŋgɨ ŋgep.” 7 Ŋap 104.4Na Raraŋ Aetaniaca ma an mbaiŋna aiŋa morena ŋerŋgaurta moca ma minmo gaind malamŋiat, na ma kammo gaind mambopat,
“Ma ndona mbaiŋna aiŋa morena ŋerŋgaurmo
watna kirar toca moca
mina aintan toco ndarurina.
Na ma ndona aiŋa morena ramtaɨrmo
tacna mimna kirar toca moca larurenan.”
8 Ŋap 45.6-7Na ma Nuocmo gaindopatna,
“Raraŋ Aetaniac,
u gagrirta ramoot,
u memetmbaca iarwara eacraŋnandet.
Na u ndona meikramtaɨrmo
tɨpemb kirarir wandoik
laiŋ tiŋgik mbuŋa bubuocrenan.
9 Ais 61.1, na Up 4.27, na 10.38Na u tɨpemb kirarir wandoik laiŋ tiŋgikca toŋgorenan,
na tɨpemb kirarir ŋgorikmo,
u mba toŋgorenan ŋgoin.
Aintik una Raraŋ Aetaniaca
ma ndo una paŋanmo tabaɨrmo ruŋkirinan,
na unmo ma larapacatna,
moca u irembapna ramootna kirar toc ndaruatna.
Na anna ndo unmo moca
u toŋtoŋ ŋgoin.
Na una aikora
mina un toŋgorena mɨnna mba toŋgoitndai.”
10 Ŋap 102.25-27Na ma Nuocmo gaind mac mambopat,
“Kacoot, atu ŋgoinna
u gan tiacarpaikca moca
ma eacrenan.
Na una par mbuŋ ŋgoinna,
u tamuŋna auŋna reikapa riacmo u moatnan.
11 Ais 34.4, na Mt 24.35, na 2 Pi 3.7, na 3.10Na gan tiacarpaikapa riaca
mainandet,
na u memetmbaca eacraŋnandet.
Na maniŋa
raraŋit bagarna kirar toc ndaruca
mumutacarinande.
12 Na u maniŋmo
racaep toco rukumnandet.
Na u maniŋmo ramootta
tik ŋgapaoc toc ŋgetrikirena kirar toc.
Na u aind niŋgik ndeacraŋnandet,
u mba ŋgetrikirenan.
Na u mba menacitndait.”
13 Ŋap 110.1, na Mt 22.44, na Mk 12.36, na Lk 20.42Na atua Raraŋ Aetaniaca mana Nuocmo gaindopatna,
“U aukna par umbaia mbirac te,
aku una puŋnaŋgepmo
una kaŋgaukca tɨknande.”
Na Raraŋ Aetaniaca titocna mbaiŋna aiŋa morena ŋerŋgaurta ianmo an kam ndoprinan? Wanaiŋ ŋgoin. 14 Ŋap 34.7, na 91.11, na Mt 18.10, na Up 12.7, na Ro 8.17, na Ie 2.5, na 1 Pi 3.7Na mbaiŋna aiŋa morena ŋerŋgaura, mina ŋerŋgaur tiŋgik, na mina Raraŋ Aetaniacna aiŋa morenan. Na ma minmo mandaca mina taŋga an meikramtaɨra, ma minmo nda aŋgɨnanmo otacrenan.
1:2 Ŋap 2.8, na In 1.3, na Epe 1.10
1:3 Up 2.33-34, na 2 Ko 4.4, na Kol 1.15-17, na 1.20, na Ib 8.1, na KIEK 4.11
1:4 Epe 1.21, na Pil 2.9-10
1:5 2 Sml 7.14, na 1 Nin 17.13, na Ŋap 2.7, na 89.26-27, na Up 13.33, na Ib 5.5
1:6 TW 32.43, na Ŋap 97.7, na Ro 8.29, na Kol 1.18, na 1 Pi 3.22, na KIEK 1.5
1:7 Ŋap 104.4
1:8 Ŋap 45.6-7
1:9 Ais 61.1, na Up 4.27, na 10.38
1:10 Ŋap 102.25-27
1:11 Ais 34.4, na Mt 24.35, na 2 Pi 3.7, na 3.10
1:13 Ŋap 110.1, na Mt 22.44, na Mk 12.36, na Lk 20.42
1:14 Ŋap 34.7, na 91.11, na Mt 18.10, na Up 12.7, na Ro 8.17, na Ie 2.5, na 1 Pi 3.7