Matiu tiratna Kam Wembaŋ Laŋ
Outna kam
Matiu tiratna kam wembaŋ laŋ. Na anna gaind, aia aŋgɨrinanna, ma an timbigta kap paura Iesusa gan tiacarpaik ndeaca larurina nininina outna timbigta kap. Na gan timbigta kapca, ma out ŋgoinna Maria Iesusa mɨrrina reik larurinanapa, taŋga Iesusa menacrina, nininina nininia morina. Na ma muk ndiŋa mac nda ŋgeprinanapa, ma ndona wiwitnanmo, tɨkcarica tamuŋna auŋ magat.
Na reac aniac ianna Matiua wandacna morinanna, anna gaind, Iesusa ŋgaua Raraŋ Aetaniaca bababuara ma moa mɨnna tɨkrina. Na anna mina atuna kam leacrina timbigta kapca tirrinan. Na Raraŋ Aetaniaca ma baburina ramoot ianna ma kɨpca Israelnaŋgepmo, mac nda aŋgɨnandet. Na gan timbigta kapca ma gainda wandacrina, Iesusa ma an ramoot niŋgik. Na Matiuna timbigta kapna tɨpemb wɨtta Iesusa moatna reikta kamb wandacrina, anna an atuna Raraŋ Aetaniacna rambca morina ramtaɨra wiwitirinanmo, moa mɨnna tɨkrina. Na u gan timbigta kapna sapta 1 wes 22 taŋca wes 23, na sapta 2 wes 4 taŋca wes 6, na sapta 2 wes 14 taŋca wes 15, na sapta 2 wes 23, na sapta 4 wes 13 taŋca wes 16, na sapta 8 wes 16 taŋca wes 17, na sapta 12 wes 15 taŋca wes 21, na sapta 13 wes 34 taŋca wes 35, na sapta 21 wes 2 taŋca wes 5, na sapta 21 wes 16, na sapta 26 wes 24, na sapta 26 wes 31, na sapta 26 wes 54, na sapta 27 wes 6 taŋca wes 10na inikca wat.
Na kabena reac aniaca Matiuna timbigta kapca mboprinanna, anna Raraŋ Aetaniacna tamuŋna auŋna bubuoc, co, Raraŋ Aetaniacna bubuoc. Na Iesusna aiŋ mbuŋa, Raraŋ Aetaniaca ma meikramtaɨr muruŋcamiŋna gagrirta ramoot paŋan ŋgoinna ndarurina, na ma toŋgorinanna, meikramtaɨr muruŋcamiŋa mana toŋtoŋa raŋgairaŋna.
Na Matiuna timbigta kapna inikna, kamb tip parmbaia Iesusa wiwitia mboprina kamb roctir koind. Na outta gan timbigta kapna sapta 5 ndiŋa tɨkca taŋi sapta 7na inikca wat. Na anna Iesusa takur ianna tɨkca wiwitiatna kambap. Na an kambca ma meikramtaɨrta tɨpemb kirarirmo wandacrina, mina Raraŋ Aetaniacna wiwitna meikramtaɨr koind. Na kabena kam tɨp rocotta ma sapta 10na inik ndeacrena. Na an mbuŋa ma ndona iŋa raŋgairena ramtaɨrmo kam neaŋrina, te, an mɨnna mina taŋca kabena meikramtaɨrmo, Iesusna kambca wiwiti te, mina an reikca mona.
Na an ndambuŋna kam tɨp rocotta, ma sapta 13na inik ndeacrena. Iesusa meikramtaɨrmo kamb rour puŋga wiwiti te, mina Raraŋ Aetaniacna bubuocna tɨpemb kirarirmo wandacna. Na an ndambuŋna, kabena kam tɨp rocotta, ma sapta 18na inik ndeacrena. Na anna Iesusa meikramtaɨra mana iŋa raŋgairena ramtaɨr toc ŋgoin, ndeacna kambmo wiwitirina. Na an ndambuŋna mamamaina kam tɨp rocotta, ma sapta 24apa 25na inik ndeacrena. Na anna gan tiacarpaikna mamamaina ra lataruna reikta kamb toprina.
Na gan timbigta kap ŋgoinna, ma gan timbigta kap tirrina ramootna kamma mba mbopa waekeri. Na gan timbigta kapca gan ia aŋgɨrina, Matiu tiratna Kam Wembaŋ Laŋ. Na anna mina gan Matiuna ndamŋirena, an ramootta ma kitcartukar iurena ramoot. U sapta 9 wes 9 taŋca wes 13na inikca wat.
Iesusa gan tiacarpaik nakɨpatna
1
(1.1—4.16)
Iesusna nicar ŋgamrirta iremb
(Luk 3.23-38)
1 RL 22.18, na 1 Nin 17.11Na ganna ande, Iesus Karaisna nicar ŋgamrirta wiwit.
Na Iesus Karaisa ma Dewitna wiwitnan,
na Dewitta ma Abraamna wiwitnan.
2 Na Abraamma ma Aisakna aet,
na Aisaka ma Iakopna aet,
na Iakopa ma Iudaapa mana laiplacarta aet.
3 RL 38.29-30, na Rut 4.18-22Na Iudana nuocniŋa Peresapa Sera, na maniŋna aemma Tamar.
Na Peresa ma Esronna aet,
na Esron ma Ramna aet.
4 Na Ramma ma Aminadapna aet,
na Aminadap ma Nasonna aet,
na Nason ma Salmonna aet.
5 Na Salmon ma Boasna aet, na mana aemma Reap,
na Boasa ma Obetna aet, na mana aemma Rut,
na Obet ma Iesina aet,
6 2 Sml 12.24na Iesi tikca ma gagrirta ramoot paŋan Dewitna aet.
Na Dewitta ma Solomonna aet, na Solomonna aemma, outta ma Uraia laŋgoca eacrina.
7 1 Nin 3.10-16Na Solomonna ma Reaboamna aet,
na Reaboamma ma Abiana aet,
na Abia ma Asana aet.
8 Na Asa ma Iosapatna aet,
na Iosapatta ma Ioramna aet,
na Ioramma ma Usiana aet.
9 Na Usia ma Iotamna aet,
na Iotam ma Acasna aet,
na Acas ma Aesekaina aet.
10 Na Aesekaia ma Manasana aet,
na Manasa ma Emonna aet,
na Emon ma Iosaiana aet.
11 2 GRP 24.14-15, na 1 Nin 3.15, na 2 Nin 36.10, na Ier 27.20Na Iosaia ma Iekoiakinapa mana laiplacarta aet, na an kɨdrɨkca Babilonnanda, Israelnanap ruŋga minmo tuomb naaŋgɨca Babilonna tɨkrina.
12 Esr 3.2Karica mina taŋga Babilonna inikca mbukca, anna eacatna nicarta wiwitta, gade,
Iekoiakina ma Sialtielna aet,
na Sialtiel ma Serubabelna aet.
13 Na Serubabela ma Abiutna aet,
na Abiut ma Eliakimna aet,
na Eliakimma ma Asorna aet.
14 Na Asora ma Sadokna aet,
na Sadokca ma Akimna aet,
na Akimma ma Eliutna aet.
15 Na Eliuta ma Eleasarna aet,
na Eleasar ma Matanna aet,
na Matan ma Iakopna aet.
16 Na Iakopa ma Iosepna aet, na Iosepa ma Mariana kaŋgait.
Na Maria ma Iesusa mɨratna meac, na Iesusa ma Karais.
17 Ainda moca an Abraamna wiwitta muruŋa kɨpca Dewitna wiwitna mɨnna tɨkatnanna, anna parniŋapa mbutremb paurna mɨn, na Dewitna mɨnna tɨkca kɨpca Babilonnanda, minmo tuomb naaŋgɨatna mɨnna, an toco parniŋapa mbutremb paurna mɨn, na Babilonnanda minmo tuomb naaŋgɨa kɨpca Karaisna mɨn toco, anna parniŋapa mbutremb paurna mɨn.
Maria Iesus Karaisa mɨratna
(Luk 2.1-7)
18 Lk 1.27, na 1.35Na Iesus Karaisa mɨratna nininia gaind, mana aemma Maria, mina manmo Iosep laŋgona moca mababuat. Na an mɨnna maniŋa laŋgo ŋgocor ndeacri, mina wattatnanna Maria, Raraŋ Aetaniacna Ŋeroŋ Ratna gargar mbuŋa ma niktan. 19 TW 24.1Ri, mana kaŋgait Iosep, ma ramoot wandoŋ laŋ tik, ma Mariamo numbir neaŋ narica, mana tɨki mona iroarta moca ma gaind mamoat, ma manmo laŋanna tɨkcarina moca ma ndona iro mamoat. 20 Ainda moca Iosepa an iroap eacri, Kacoot Raraŋ Aetaniacna mbaiŋna aiŋa morena ŋeroŋa manmo tamram mbuŋ nakɨpca manmo gaind mambopat, “Iosep, Dewitna ŋgamaɨr, u ndona meac aŋgɨca laŋgona kai nanambi teac, u warac, an mooŋnuoca mana nikinik ndeacrenanna, anna Raraŋ Aetaniacna Ŋeroŋ Rat neaŋrina. 21 Lk 1.31, na 2.21, na Up 4.12, na 13.23, na 13.38Na ma Nuocna mooŋnuoca mɨrnande, te, u mana imo Iesus ŋgacnande, na an ina mɨnɨŋa gaind, ma ndona meikramtaɨrta tɨpemb ŋgorikta makukara mo kecarica, minmo mac nda aŋgɨnande.”*An i Iesus, anna Girikna kam. Na an i Iosua anna Iburuna kam. Na maniŋa mɨnɨŋ kabe. Na an i niŋna mɨnɨŋa gaind, “Kacootta meikramtaɨr mac nda aŋgɨna ramoot.”
22 Aintik an kirarira larurinanna, anna Kacootta ndona ramma morina ramootna kamma moi mɨnna tɨkna moca. Na mana ramma morina ramootta gaindopatna, 23 Ais 7.14“Meac ianna ma ramootap ŋgoŋgortanna, ma nik tɨkca nuocna mooŋnuoc ianna mɨrnande. Te, mina manmo Emanuel ŋgacnandet.” Na an ina mɨnɨŋa gaind, “Raraŋ Aetaniaca aiap eacnandet.”
24 Ri, Iosepa ma ŋgoca maica ŋgepatke, ma an Kacoot Raraŋ Aetaniacna mbaiŋna aiŋa morena ŋeroŋa mbopatna iroa, ma ndona baburina meacmo malaŋgoat. 25 Lk 2.7, na 2.21Ainda moca ma ndona meacapa mba ŋgori, taŋca an mɨn, mana meaca mooŋnuoca mɨratke, Iosepa manmo an i Iesus matɨkat.
1:1 RL 22.18, na 1 Nin 17.11
1:3 RL 38.29-30, na Rut 4.18-22
1:6 2 Sml 12.24
1:7 1 Nin 3.10-16
1:11 2 GRP 24.14-15, na 1 Nin 3.15, na 2 Nin 36.10, na Ier 27.20
1:12 Esr 3.2
1:18 Lk 1.27, na 1.35
1:19 TW 24.1
1:21 Lk 1.31, na 2.21, na Up 4.12, na 13.23, na 13.38
*1:21 An i Iesus, anna Girikna kam. Na an i Iosua anna Iburuna kam. Na maniŋa mɨnɨŋ kabe. Na an i niŋna mɨnɨŋa gaind, “Kacootta meikramtaɨr mac nda aŋgɨna ramoot.”
1:23 Ais 7.14
1:25 Lk 2.7, na 2.21