Iesusa gɨrgɨr aŋgɨca menaca ma mac nda ŋgepatna
26
(26—28)
Ramtaɨr paŋainda Iesusmo mo menacna kam leacatna
(Mak 14.1-2 na Luk 22.1-2 na Ion 11.45-53)
1 Karica Iesusa an kambca muruŋa mbopa maica, ma ndona iŋa raŋgairena ramtaɨrmo gaindopatna, 2 NA 12.1-27, na Mt 20.18, na Mk 14.1, na Lk 22.1, na In 13.1“Ne lamŋirena ra mbuniŋ niŋgikca eacrena, na an Pasowana Ra aniaca makɨpek. Te, mina Ramootna Nuocmo puŋnaŋgepta para tɨkca, mina mamo ik nakeracnandet.”*Pasowana Ra: Na Pasowana Rana mɨnɨŋa gaind, an Ra Israelnanda Isip Ndeacri, Raraŋ Aetaniaca Minmo Otaca Aŋgɨca Larurina Ra Aniac ndamŋina moatna.
3 Na an kɨdrɨkca taup ndamtaɨr paŋaindapa, Israelna ramtaɨr paŋainda mina taŋga taup ndamoot paŋan aniac Kaiapasna kac mapuniat. 4 Karica mina kam leaca, Iesusmo titoca tɨkca utiŋca manmo mo menacna, te, meikramtaɨra mba lamŋiitndait. 5 Ri, mina aindopatna, “Aia an reaca mona mo te, aia Raraŋ Aetaniacna mbembendeina rai anikta inikca kai mo teac, moca meikramtaɨra an mbatca nikembkatca, kaega monandet.”
Meac ianna iŋpai laŋna tabaɨra Iesusna paŋanna ruŋkiatna
(Mak 14.3-9 na Ion 12.1-8)
6 Lk 7.37-38Na an mɨnna Iesusa taŋga Betani auŋ ndaruca, ma taŋga Saimonna kac maeacat. Na Saimon tikca ma ŋgaua ma roumb lepaapnan. 7 Ri, meac ianna mina waut mbuŋa morina tabaɨra rurena reac laŋa, iŋpai laŋapna tabaɨra kituknduk aniac mbuŋa oikrenanmo, aŋgɨca kɨpca ma anmo Iesusna paŋan maruŋkiat. Na an kɨdrɨkca Iesusa amba eacri. 8 Ainda moatke, mana iŋa raŋgairena ramtaɨra an mbatca, mina nikkatta aindopatna, “Kaina moca ma an tabaɨrmo wanaiŋa ruŋkirena? 9 Aia anmo mbik oikrena taupca tɨkca mina oik co, aia kituknduk aniac aŋgɨca, an mbuŋa meikramtaɨr ndaekpembca neaŋna mɨn.”
10 Karica mina aindopatke, ma mina iroara malamŋiat, ri, ma minmo gaindopatna, “Kaina moca ne an meacmo kekelamun kerena? Ma aukmo tɨp kirar laŋa morinan. 11 TW 15.11, na In 12.8, na 14.19, na 17.11Na reik kocorta meikramtaɨra memetmbaca nenap eacraŋnandet. Na aku memetmbaca nenap mba eacitndai. 12 Aintik an meaca an iŋpai laŋna tabaɨra aukna tikca ruŋkiri, ma aukna waɨrmo aŋgɨa ŋgobaca mutocna kocrorina. 13 Ainda moca auk nemo gidik ŋgoinna aindopnande, gan tiacarpaikca mina gan kam wembaŋ laŋmo wiwiti taŋ te, mina gan meaca morina reacna kambmo nininandet. Te, mina man moatna reacna ndamŋiraŋnandet.”
Iudasa Iesusmo ramtaɨr paŋaindta para tɨkna babuatna
(Mak 14.10-11 na Luk 22.3-6)
14 In 11.57Karica an mɨnna mana iŋa raŋgairena ramtaɨrpaikna ianna ma taup ndamtaɨr paŋaind tambuŋa taŋri. Na mana ia Iudas Iskariot. 15 Sek 11.12, na Mt 27.3Na ma minmo gainda digirina, “Aku Iesusmo nena para tɨk te, ne aukmo kaina reac neaŋit?” Ri, mina mamo 30na mɨnna silwana kitukndukar nduca mamo maneaŋgat. 16 Aintik an kɨdrɨk mbuŋa taŋri, ma taupembta ŋgoreca Iesusmo aŋgɨca mina para tɨkna morina.
Iesusa ndona iŋa raŋgairena ramtaɨrap ambatna
(Mak 14.12-21 na Luk 22.7-14 na 22.21-23 na Ion 13.21-30)
17 NA 12.6, na 12.14-20, na Mk 14.12, na Lk 22.7-9Karica an Isap Kuri Ŋgocorta Tapacna Ra Aniaca, malaruri, na mana iŋa raŋgairena ramtaɨra man ndambuŋa kɨpca mamo gainda digiri, “U toŋgorinanna gan, Pasowana ndamŋina amna reacmo aia tenna tɨkca kocroit?” 18 Mt 21.3Ri, ma mina kamma nda rutica, aindopatna, “Ne auŋ aniac Ierusalemma taŋca, an ramootta wat te, mamo aindop, ‘Ririptia, aindoprina, mana ŋganŋgɨrina ra kɨpca marambuŋairi, aintik manapa mana iŋa raŋgairena ramtaɨra, una kaca tɨkca an Pasowana amtiam amna! Te, an Pasowana Rana ndamŋina.’ ” 19 Ainda moca ma minmo mbopatna kirara mina anna raŋgaiatke. Na maniŋa Pasowana amta reikmo makocrori.
20 Karica wigwac ŋgoin mbuŋa ma ndona parniŋapa mbut mbuniŋna ramtaɨrap ambrena taup mambiracri. 21 Na mina ambrinan mbuŋa ma minmo gaindopatna, “Aku nenmo gidik ŋgoinna mbopnandet, nena ianna aukmo, puŋnaŋgepta para tɨknandet.” 22 Na ma aindopatke, mina kakadmaica aŋgɨca, mina ŋgepca, kabe, kabea manmo gaind mambopat, “Kacoot, u auk ki, ndopre ki?” 23 Ŋap 41.9, na Lk 22.21, na In 13.18Ri, ma rutica aindopatna, “Nena ianna aukap gan tuoŋa ambrena ramootta, aukmo puŋnaŋgepta para tɨknandet. 24 Ais 53, na Dan 9.26, na Mk 9.12, na In 17.12Aintik Raraŋ Aetaniacna timbigta kapca mboprinan, Ramootna Nuoca ma menacnande. Na an ramootta, Ramootna Nuocmo puŋnaŋgepta para tɨkrinan, man mbaina kakadmai ŋgoin, ma makuk aniac ŋgoin aŋgɨnande. Na mana aemma, mamo mɨr ŋgocor co, an reaca manmo mba laru mbe.” 25 Ri, an ramootta manmo puŋnaŋgepta para tɨkna ramoot, Iudasa, ma manmo gainda digiatna, “Riripti, u auk ki ndopre ki?” Ri, ma mamo gaind mambopat, “U ndo ande mambopek.”
Iesusa wain pukapa tapacmo ndona iŋa raŋgairena ramtaɨra neaŋgatna
(Mak 14.22-26 na Luk 22.15-20 na 1 Korin 11.23-25)
26 Mt 14.19, na 1 Ko 10.16Karica mina mbiraca amba eacri, Iesusa tapac ian aŋgɨca, Raraŋ Aetaniacmo mbendeica, kam laŋ neaŋga, ma rɨmbɨtca ndona iŋa raŋgairena ramtaɨrmo neaŋga, ma aindopatna, “Ne aŋgɨca am, anna aukna tikbuit.” 27 Ainda moca ma wain kabna puk aŋgɨca, Raraŋ Aetaniacmo mbendeica, kam laŋ neaŋga, ma mimo maneaŋri. Na ma aindopatna, “Ne muruŋa an aŋgɨca am. 28 NA 24.8, na Ier 31.31-34, na Sek 9.11, na Ro 5.15, na 1 Ko 10.16, na Ib 9.22Anna aukna racaindpaik, na an mbuŋa ne Raraŋ Aetaniacap kam leacrina. Na aukna racaindpaikca aku meikramtaɨr wɨt muruŋna tɨpemb ŋgorikta makukara mo kecarina. 29 Mk 14.25, na Lk 22.18, na Up 10.41Aintik aku nemo aindopek, aku wain pukca mba ammit, taŋi an mɨnna aku nenapmo aukna Aetna bubuocna inikmo wain puk ŋgam amnandet.”
30 Lk 22.39, na In 18.1Karica mina ŋap ian ŋgumbca, mina ŋgepca auŋ aniac Ierusalem tɨkcarica mina Olip Takur mac nda taŋrina.
Iesusa aindopatna Pita
mamo iŋ neaŋnande
mamo iŋ neaŋnande
(Mak 14.27-31 na Luk 22.31-34 na Ion 13.36-38)
31 Sek 13.7, na In 16.32Ri, Iesusa ma ndona iŋa raŋgairena ramtaɨrpaikmo aindopatna, “Raraŋ Aetaniacna timbigta kapca ma gan kammap, ‘Raraŋ Aetaniaca sipsipna ŋginaŋa morena ramootmo mo menac te, mina tamtamma kɨpcarica taŋnandet. Aintik gan mouŋa aukmo laruekna reikca ne muruŋa watca, nena muruŋna rɨtɨpaikca iriknande.’ 32 Mt 28.7, na 28.16, na Mk 14.28Na aku muk ndiŋ mac ŋgepca nenmo outta Galilia taŋnandet.” 33 Ri, Pita, ma mana kammo gainda rutirina, “Aku mba nduitndai, mina muruŋna rɨtɨpaikca irik te, na mina unmo tɨkcari te, aku unmo mba tɨkcariitndai.” 34 Mt 26.69-75Ri, ma mamo gaindopatna, “Aku umo gidik ŋgoinna aindopnandet, mandeac mouŋa kackurap ŋgocor, u kɨdrɨkar mbonkaca aindopnande, u aukmo mba lamŋireke.” 35 Mt 26.56Ri, ma mana kammo rutica aindopatna, “Wanaiŋ ŋgoin, aku unap menacnandet, na aku ainda mba mbopitndai. Aku umo mba lamŋirena!” Na mana iŋa raŋgairena ramtaɨra muruŋa an kam kirar kabe mambopat.
Iesusa Getsemani warɨŋ inikca tɨkca mbendeiatna
(Mak 14.32-42 na Luk 22.39-46)
36 Karica Iesusapa mana iŋa raŋgairena ramtaɨra Getsemani ŋgacrena taupca taŋgatke. Ma minmo gaindopatna, “Ne ganna mbiraca eac, na aku monmbaica taŋca mbendeina.” 37 Ri, ma Pitaapa Sebedina nuocniŋap aŋgɨca mina mataŋgat. Na mana iro nikinikca ma kakadmaiapa iroara pauririna. 38 In 12.27Ri, ma minmo aindopatna, “Aukna iro nikinikca makuk ŋgoin, na aku menacnan toc, aintik ne gan ndeaca aukna ŋginaŋa moca, aukmo otaca mbendeina.” 39 Mt 6.10, na 20.22, na In 6.38, na Ib 5.7-8Na ma min tɨkcarica emtemma taŋga mandaca, ma pitrik ŋgirikca ndona paŋanmo pitrikca tɨkca ma gainda mbendeirina, “Aukna Aet, u mɨn ecte, aku toŋgorina, u gan gɨgɨrara, auk ndambuŋnan aŋgɨca mo kecari! Na u, aukna toŋtoŋa kai raŋgai teac, u ndona toŋtoŋ niŋgikca raŋgai.”
40 Ainda moca ma ndona iŋa raŋgairena ramtaɨr mbonkac ndambuŋa nda taŋga, ma wattatnanna, mina maŋgori. Na ma Pitamo aindopatna, “Tida moca ne aukmo ŋgaŋganŋgɨa kabena mɨnna watti eacna mɨnna wanaiŋ ki? 41 Mt 6.13, na Epe 6.18, na Ib 2.14, na 4.15Ne ndoritake, watca mbendeica eacraŋ. Moca totowaiara nenmo laru te, ne anna irik nari. Na anna gidik, nena iroar inkara reikca mona toŋtoŋgarap, na tikca ma toŋtoŋgar kocor.”
42 Ri, ma mac taŋga gainda mbendeirina, “Aukna Aet, gan gɨgɨrar aukmo iukaina mɨnna wanaiŋ, na aku aŋgɨna te, u ndona toŋtoŋ niŋgikca raŋgai.” 43 Ri, ma min tambuŋa mac nda kɨpca wattatnanna, mina ŋgoca eacri, na anna gaind, mina lamnikca ŋgona numbacarica. 44 2 Ko 12.8Karica ma min, tɨkcarica ma kɨdrɨk mbonkacna mbembendeina mona mac mataŋri. Na ma an outta morina mbembendeina kirar kabe mamori.
45 In 12.27, na 13.1, na 14.31Ainda moca iŋmbaia ma kɨpca minmo gaindopatna, “Ne warac, ne ŋgoreke, na wɨk laŋ maaŋgɨreke? Na Ramootna Nuocmo mina tɨpemb ŋgorikta makukara morena ramtaɨrta para tɨkna ŋgaŋganŋgɨna mɨnna malaruri. 46 Ne wat! Aukmo mina para tɨkna ramootta ma kɨpca rambuŋairina, aintik ne ŋgepca aia taŋ.”
Iudasa Iesusmo puŋnaŋgepta para tɨkatna
(Mak 14.43-50 na Luk 22.47-53 na Ion 18.3-12)
47 Na Iesusa kam ndoprenan mbuŋa Iudasa ramtaɨrta tumbun aniacap kɨpca malarucat, na ma Iesus ndambuŋ mataŋgat. Na an ramootta ma Iesusna iŋa raŋgairena parniŋapa mbut mbuniŋna ramtaɨrta ramoot ian. Na an ramtaɨrta tumbun aniaca mina bugrimbapa ikir tɨpembap utiŋga kɨprinan. Na an ramtaɨrmo, taup ndamtaɨr paŋaindapa, meikramtaɨrta ramtaɨr paŋaindap, minmo Iudasap mbagɨrica mina kɨpatna. 48 Na an ramootta mamo mina para tɨk ndoprina ramoot, ma minmo ŋgagatrac ianna mona gaindoprina, “Aku an ramootmo pipopot te, ande an ramoot, ma Iesus, na ne manmo muoc utiŋ.” 49 Ri, tawi ŋgoinna, ma man ndambuŋa kɨpca, aindopatna, “Mouŋ laŋ riripti,” karica ma manmo pica mapopotacat. 50 Ainda moca ma manmo gaindopatna, “Ramoot, an reaca u mona kɨprinanna, u tawi mo.” Ri, mina kɨpca mamo muoca mautiŋgat.
51 In 18.26Na ramoot ianna manap eacrinan, ma ŋgepca ndona bugrim wɨŋga laruca, ma an mbuŋa taup ndamoot paŋan aniacna tuomna aiŋ kamainda morena ramootna koara waca kataca koar waŋga mairikat. 52 RL 9.6, na KIEK 13.10Ri, Iesusa an ramootmo gaindopatna, “Una bugrimma mana taupca nda tɨk. Na mandaibinna bugrim mbuŋa ruŋrenan, mina bugrim mbuŋa menacnandet. 53 2 GRP 6.17, na Dan 7.10Na u mba lamŋireke? Aku ndona Aetmo digi te, ma ndona mbaiŋna aiŋa morena ŋerŋgaur wɨt aniac ŋgoinna, mbagɨrica, mina kɨpca aukmo otacnandet. 54 Ais 53.7, na Mt 26.56, na Mk 14.49Aintik aku ainda mo te, an Raraŋ Aetaniacna timbigta kapna inik ndeacrena kamma, ma mboprena kirar gidikca mba laruitndai. Na Raraŋ Aetaniacna timbigta kapca ma aindoprina, an reikca aukmo larunande.”
55 Lk 19.47, na 21.37Karica an kɨdrɨk ŋgoinna ma an ramtaɨrmo aindopatna, “Ne aukmo muoc utiŋna kɨprinanna, ne bugrimarapa paraiŋap aŋgɨca kɨpatna. Anmo macmakɨm, co, ruŋrena ramoot ianna muocna kɨprinan ki? Na memetmbaca aku ra, ra katuca Raraŋ Aetaniacna Kacna wuocna inikca mbiraca meikramtaɨrmo riptirena. Na kaina moca ne aukmo an mɨnna muocna karirina? 56 Mt 26.31Ainda moca an rambca morina ramtaɨra Raraŋ Aetaniacna timbigta kapca tirca eacrenanna, mina gidikca larunandet.”
Ri, mana iŋa raŋgairena ramtaɨra muruŋa man tɨkcarica kɨpcaririna.
Mina Iesusmo ritri waparaca moatna
(Mak 14.53-65 na Luk 22.54-55 na 22.63-71 na Ion 18.13-14 na 18.19-24)
57 Karica an ramtaɨra Iesusmo utiŋrinanna, manmo taup ndamoot paŋan aniac Kaiapasna kac naaŋgɨca mataŋgat. Na tɨpemb wandik tamŋirena ramtaɨrapa ramtaɨr paŋainda anna punica eacrenan. 58 Ainda moca Pita, ma Iesusna moca mana iŋa, iŋ mbumbutukca minmo raŋgaica mataŋri. Na ma an kacna wuoca mbukca ma taŋga anna ŋginaŋna aiŋa morena ramtaɨrap mambiracri. Te, ma watna kaina reaca Iesusmo laruit.
59 Karica taup ndamtaɨr paŋaindapa ninik waŋgora muruŋa, ramtaɨr ndeidmo aca kɨpca, mina Iesusa moatna paparuna tɨpna kirarna kamb topna. Te, mina taupembta korena, ma reac ianna katti mo te, mina manmo mo menacna. 60-61 TW 19.15, na Ŋap 27.12, na Mt 27.40, na Mk 14.55, na In 2.19, na Up 6.13Ainda mori, ramtaɨr wɨtta kɨpca mamo ndoŋrapacrina. Na mina man morina makuk ianna ore laru ŋgocor, te, manmo mo menacna. Ri, ramoot mbuniŋa kɨpca aindopatna, “An ramootta, ma gaindoprina, ‘Aku Raraŋ Aetaniacna Kacmo waŋarca, rai mbonkac niŋgikna inikca mac aŋgɨ wɨtɨkna mɨn.’ ”
62 Karica taup ndamoot paŋan aniaca ŋgepca wɨtɨkca, manmo gaindopatna, “U aina kam ian rutina karirinan ki? Na an kambca mina umo mboprenan anna titoc?” 63 Ais 53.7, na Mt 27.12Ri, ma kam ianna mba mbopri. Ainda moca an taup ndamoot paŋan aniaca aindopatna, “U, Raraŋ Aetaniacna iarwarna eteacna watapna i mbuŋa, u mandeaca kam gidik ndop, u an ramootta Raraŋ Aetaniaca babuca mbagɨrica kɨpca aimo mac nda aŋgɨna ramoot, ki? Na u Raraŋ Aetaniacna Nuoc, ki?”
64 Ŋap 110.1, na Dan 7.13, na Mt 24.30, na Lk 21.27, na Up 7.55, na 1 Te 4.16, na KIEK 1.7Karica ma manmo nda rutica aindopatna, “Ore, u ndo mbuŋa mambopri. Na aku nemo muruŋa aindopnandet, iŋmbaia ne watnandet, Ramootna Nuoca ma Raraŋ Aetaniacna gargarapna par umbaia mbiracnande. Te, ma tamuŋna auŋna dimirpaik anna mbiraca kɨpnande.” 65 Mk 14.63, na Up 14.14TN 24.16Ri, an taup ndamoot paŋan aniaca an kamna moca, ma ŋgep ŋgoreac naŋgepca ndona tik ŋgapaoca wɨŋga titacatke, ma aindopatna, “Ma Raraŋ Aetaniacna taup aŋgɨna morena. Na aia kabena ramootmo kai aca, manmo mana tɨpembta moca kai ore teac? Na mandebanna aia waracpeknanna, ma ndomo Raraŋ Aetaniacna taup aŋgɨna ndoprena. 66 In 19.7Aintik ne tit ndamŋirena, na aia mamo kaica moit?” Ri, mina mana kammo gainda rutirina, “Ma makukap, ma menacnandet.”
67-68 Ais 50.6, na 53.5, na Mt 27.30, na In 19.3Aindopatke, mina mana inpaŋanmo taber iuri, na mana kapgɨn ŋgapri, na mamo parmuŋgup mbuŋa piatna. Na mina mamo aindopatna, “Raraŋ Aetaniaca umo babuca mbagɨrica mana meikramtaɨr mac nda aŋgɨna ramoot te, u mandeaca u ramma moca u mbop. An ramootta umo pirinanna anna mandai ki?”
Pita aindopatna ma Iesusmo lamŋi ŋgocor
(Mak 14.66-72 na Luk 22.56-62 na Ion 18.15-18 na 18.25-27)
69 Na Pita ma wuocna inikna, an mina punica eacrena kacmo raekmbaia mbiraca eacri. Na an taup ndamoot paŋan aniacna mbaiŋna aiŋa morena meac ianna kɨpca aindoprina, “U toco an Galilina pitrik waŋna Iesusap eacrenan.” 70 Ri, Pita, ma mina muruŋna lamnik ŋgoutmo aindopatna, “Aku un mboprina kamma mba lamŋirenan.” 71 Karica ma ŋgepca an wuocna tɨŋkamna kac tekernoca taŋga mbiracri, kabena mbaiŋna aiŋa morena meac ianna mana watca, anna meikramtaɨrmo aindopatna, “An ramootta ma Nasaret auŋna Iesusap eacrina.” 72 Ri, Pita mana kammo an out ndoprina kirar mac mambopat, “Gidik, gidik, ŋgoin! Aku an ramootmo lamŋi ŋgocor.” 73 Na eaca mandaca, an rambuŋa wɨtɨkca eacrena ramtaɨra kɨpca manmo aindopatna, “Gidik ŋgoin, u an wiwitna ramoot ian, una logotna kamma unmo mbopca malaruri.” 74 Mk 14.71Karica ma gagraca aindopatna, “Gidik ŋgoin, aku an ramootmo mba lamŋirena. Na aku gidikca mbop ŋgocor te, Raraŋ Aetaniaca aukmo mo ŋgocraina mɨn.” Na ma aindopatke, kackura anduna maapat. 75 Mt 26.34, na Mk 14.30, na Lk 22.61-62, na In 13.38Ri, ma Iesusa mbopatna, kamna moca malamŋiat, “Kackura ap ŋgocor te, u kɨdrɨk mbonkaca aindopnande, u aukmo mba lamŋireke.” Ainda moca ma laruca taŋga mba weteica aeri.
26:2 NA 12.1-27, na Mt 20.18, na Mk 14.1, na Lk 22.1, na In 13.1
*26:2 Pasowana Ra: Na Pasowana Rana mɨnɨŋa gaind, an Ra Israelnanda Isip Ndeacri, Raraŋ Aetaniaca Minmo Otaca Aŋgɨca Larurina Ra Aniac ndamŋina moatna.
26:6 Lk 7.37-38
26:11 TW 15.11, na In 12.8, na 14.19, na 17.11
26:14 In 11.57
26:15 Sek 11.12, na Mt 27.3
26:17 NA 12.6, na 12.14-20, na Mk 14.12, na Lk 22.7-9
26:18 Mt 21.3
26:23 Ŋap 41.9, na Lk 22.21, na In 13.18
26:24 Ais 53, na Dan 9.26, na Mk 9.12, na In 17.12
26:26 Mt 14.19, na 1 Ko 10.16
26:28 NA 24.8, na Ier 31.31-34, na Sek 9.11, na Ro 5.15, na 1 Ko 10.16, na Ib 9.22
26:29 Mk 14.25, na Lk 22.18, na Up 10.41
26:30 Lk 22.39, na In 18.1
26:31 Sek 13.7, na In 16.32
26:32 Mt 28.7, na 28.16, na Mk 14.28
26:34 Mt 26.69-75
26:35 Mt 26.56
26:38 In 12.27
26:39 Mt 6.10, na 20.22, na In 6.38, na Ib 5.7-8
26:41 Mt 6.13, na Epe 6.18, na Ib 2.14, na 4.15
26:44 2 Ko 12.8
26:45 In 12.27, na 13.1, na 14.31
26:51 In 18.26
26:52 RL 9.6, na KIEK 13.10
26:53 2 GRP 6.17, na Dan 7.10
26:54 Ais 53.7, na Mt 26.56, na Mk 14.49
26:55 Lk 19.47, na 21.37
26:56 Mt 26.31
26:60-61 TW 19.15, na Ŋap 27.12, na Mt 27.40, na Mk 14.55, na In 2.19, na Up 6.13
26:63 Ais 53.7, na Mt 27.12
26:64 Ŋap 110.1, na Dan 7.13, na Mt 24.30, na Lk 21.27, na Up 7.55, na 1 Te 4.16, na KIEK 1.7
26:65 Mk 14.63, na Up 14.14
26:65 TN 24.16
26:66 In 19.7
26:67-68 Ais 50.6, na 53.5, na Mt 27.30, na In 19.3
26:74 Mk 14.71
26:75 Mt 26.34, na Mk 14.30, na Lk 22.61-62, na In 13.38