1 Dan 7.2-3, na 7.7, na KIEK 12.3, na 17.3, na 17.7-12Na aku watrinanna, raŋna amna ŋgoaem kun ianna macait ndiŋa larurinan. Na ma paŋaind parmbaiapa mbut mbuniŋap, na parniŋna mɨnna lacarpaika mana an paŋaindmo laruca eacrenan. Na gagrirta ramtaɨrta paŋainda atuoca eacrena reik parniŋa, mana lacarpaik nambatta eacrenan. Na mana paŋaindpaik nambatta irembap eacrenan. Na an irembta mɨnɨŋa anna gaind, anna Raraŋ Aetaniacna imo peperena kamb ŋgorikap eacrenan. 2 Dan 7.4-6, na KIEK 12.4, na 12.9, na 16.10Na an raŋna amna ŋgoaem kunna ma lepet toc, na ma pusi aniacna kirar toc. Na mana orniŋa, anna amna ŋgoaem aniac beana orniŋna kirar toca watnandet, na mana upa anna pusi aniac laionna upna kirar toc. Na an nduop aniaca ma ndona gargarmo, manmo neaŋrinan. Na ma manmo ndona kirara laruna moca manmo gagrirta ramoot paŋanna morina, na manmo gargar aniaca neaŋrinan. 3 KIEK 13.12-14, na 17.8Na an raŋna amna ŋgoaem kunna paŋan ianna, mina rɨŋga ndim neaŋga manmo moa menacatna kirar toc. Na an ndimma mac kobeca, ma mac nda ŋgepca eacrena. Ri, meikramtaɨra muruŋa an raŋna amna ŋgoaem kunna watca mina ŋgep ŋgoreac naŋgepca, mina manmo maraŋgaiat. 4 KIEK 18.18Na meikramtaɨra lamŋirenan, an nduop aniaca ma ndona gargarmo, manmo neaŋgatna, aintik mina an nduop aniacmo tutpemb rɨmbɨtca manmo mbendeirena. Na mina an raŋna amna ŋgoaem kun motocmo tutpemb rɨmbɨtca mbendeirenan. Na mina aindoprenan, “Mandaia ndo, an raŋna amna ŋgoaem kunna kirar toc? Na mandaia manap ruŋna mɨn?”

5 KIEK 11.2, na 12.6Dan 7.8, na 7.25, na 11.36Ainda moca Raraŋ Aetaniaca an raŋna amna ŋgoaem kunmo wattacarica, ma kambmo kunda mboprena, na Raraŋ Aetaniacmo peperena kamb ŋgorik toprena. Na karwai 42na mɨnna, ma an tɨpembta kirarira mona gargarap. 6 KIEK 12.12Aintik an raŋna amna ŋgoaem kunna, ndona up gootca Raraŋ Aetaniacmo peperena kam ŋgoreac ndoprenan. Na ma Raraŋ Aetaniacna iapa, mana tamuŋna auŋapa, mana wiwitta tamuŋna auŋa eacrenanmo, ma minmo peperena kamb ŋgorik toprena. 7 Dan 7.21, na KIEK 11.7, na 11.18, na 12.17, na 17.15Na Raraŋ Aetaniaca an raŋna amna ŋgoaem kunmo wattacarica, ma Raraŋ Aetaniacna meikramtaɨrap ruŋrinan, na ma minap ruŋga minmo moa irikrina. Ainda moca ma gargar aniacmo maaŋgɨatna, aintik meikramtaɨr muruŋapa, kabena pitrik waŋnandapa, kabena kambnandapa, titocna tiknanna mina muruŋa mana kaŋgaukca eacnandet. 8 NA 32.32, na Ŋap 69.28, na Dan 12.1, na Pil 4.3, na KIEK 3.5, na 5.6, na 17.8, na 20.12-15, na 21.27Na gan tiacarpaikna meikramtaɨr muruŋa an mɨnna Raraŋ Aetaniaca gan tiacarpaikca mo ŋgocor ndeacri, na mina irembca iarwarna eteacna watna timbigta kapca eac ŋgocortanna, mina an raŋna amna ŋgoaem kunmo tutpemb rɨmbɨtca mbendeinandet. Na an iarwarna timbigta kapca anna Sipsip Nuocnan, ŋgaua mina manmo mo menacrinan.

9 Na ramootta koarapnanna, ma an kambmo matau ŋgoinna warac. 10 Ais 33.1, na Ier 15.2, na 43.11, na Mt 26.52, na KIEK 14.12Na Raraŋ Aetaniaca ramoot ianmo kac ŋgoreaca mbukna larapac te, ma kac ŋgoreaca mbuknandet. Na ma ramoot ianmo bugrim mbuŋa mo menacna larapaca te, mina manmo an mbuŋa mo menacnandet. Na an kɨdrɨkca an reikca laru te, Raraŋ Aetaniacna meikramtaɨra wɨtɨk gagraca ndorita rɨtɨpacmo utiŋnandet.

11 KIEK 11.7Karica aku mac watrinanna, kabena raŋna amna ŋgoaem kunna tiacarpaik ndiŋa laruca garina. Na mana paŋanna lac mbuniŋa eacrenan, anna sipsipna mooŋnuocna lacna kirar toc, na mana mboprena kambca anna nduop aniac ianna kamb toc. 12 Na an mɨnna an iŋmbaina raŋna amna ŋgoaemma, outna raŋna amna ŋgoaem kunap eacrina, ma mana gagrarmo muruŋ maaŋgɨat. Na ma aiŋ gargar aniaca morinan, te, gan tiacarpaikapa mana eacrena meikramtaɨra an outna raŋna amna ŋgoaem kunna, ŋgaua ndim ŋgoreaca aŋgɨca menacna mɨn ŋgoin, na mandeaca mana an ndimma koberinanna, mina manmo tutpemb rɨmbɨtca manmo mbendeirena. 13 TW 13.1-3, na 1 GRP 18.24-39, na 2 GRP 1.10-12, na Mt 24.24, na 2 Te 2.9Na an raŋna amna ŋgoaem kun iŋmbainanna, ma ainta ŋgagatracar anikca morina. Na ŋgagatrac ianna gaind. Ma meikramtaɨrta lamnik ŋgoutmo, ma taca moa laruca, tamuŋna auŋ ndiŋa gan tiacarpaikca irikrinan. 14 TW 13.1, na 13.4, na 2 Te 2.9-10, na KIEK 12.9, na 19.20Na Raraŋ Aetaniaca manmo wattacarica, ma an outna raŋna amna ŋgoaem kunna lamnɨac ŋgoutmo ainta ŋgagatracara morinan. Na an tɨpna kirar mbuŋa ma gan tiacarpaikna meikramtaɨrmo parurena. Na ma meikramtaɨrmo gaindoprina, “Ne an outna raŋna amna ŋgoaem kunna da ianna mo. Ŋgaua mina bugrim mbuŋa mo menacrinanna, na mandeaca ma maeacreke.” 15 Dan 3.4-6, na KIEK 16.2, na 19.20, na 20.4Ri, Raraŋ Aetaniaca manmo wattacarica, ma an raŋna amna ŋgoaem kunna, ndamo eteacna watta neaŋrinan, na ma kam ndoprena. Na meikramtaɨr ndeida an raŋna amna ŋgoaem kunna ndamo tutpemb rɨmbɨtca mbendei ŋgocor te, ma minmo mo menacna gargarap.

16 KIEK 14.9, na 19.20, na 20.4Ainda moca an raŋna amna ŋgoaem kun iŋmbainanna, mbopca mina ŋgagatrac ianmo meikramtaɨra irembapnan, co, wanaiŋ, co, laimnembapnan, co, meikramtaɨr ndaekpemb, co, tuombta aiŋir kamndera morenan, co, tuombta aiŋir kamndera mo ŋgocortan, ma mina par umbai, co, mina ŋgopaŋanmo, an ŋgagatraca tɨkrina. 17 KIEK 14.9-11, na 15.2, na 16.2, na 19.20, na 20.4Na meikramtaɨra an raŋna amna ŋgoaem kunna ŋgagatracna iremb kocor, co, mana ina ŋgaŋganŋgɨ ŋgocor te, mina kabena meikramtaɨrta reikmo mba oikitndait, na mina reikmo, mina mba oikitndait. 18 KIEK 15.2, na 17.9, na 21.17Na ramootta iro laŋapnan, ma an reacmo lamŋi garacnandet. Na landamŋiapna ramoot, ma an raŋna amna ŋgoaem kunna ŋgaŋganŋgɨna mɨnɨŋmo ore watnandet. Na an ŋgaŋganŋgɨa anna ramoot kabena ŋgaŋganŋgɨ, na mana ŋgaŋganŋgɨa 666.