ଯୋହନଙ୍କ ଦ୍ୱିତୀୟ ପତ୍ର
ଜହନ୍ନେ ଦୁତିୟ ଉଲିଆଃ
ଜହନ୍ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ଜହନ୍ ଗୁଆର୍କ୍ନେ ଦିତିୟ ଉଲିଆ ଜିସୁ କ୍ରିସ୍ଟ ଜନମ୍ ବାନ୍ ୫୦ ବାନ୍ ୧୦୦ କ୍ରିସ୍ଟାବ୍ଦ ବିତ୍ରେ ପ୍ରେରିତ୍ ଜହନ୍ନେ ବାନ୍ ଗୁଆର୍ ବକେ । ଜହନ୍ ନିଜେକେ ଗୁଆର୍କ୍ନେଣ୍ଡ୍ରେ ବାବ୍ରେ ପରିଚୟ୍ ଆବିକେ ଣ୍ତୁ ଆତାନ୍ ବାଦୁଲ୍ରେ ମେଁ ନିଜେକେ ବାୱିର୍ ଡାଗ୍ଚେ ସ୍ନାମୁଁଆଃ ବିଃଡିଂକେ । ଜହନ୍ନେ ଦିତିୟ ଉଲିଆନେ ସାମୁଆଁ ଏତେ ଜହନ୍ ଗୁଆର୍କ୍ନେ ନିମାଣ୍ଡାସାମୁଆଁନ୍ନିଆ ଲେଃକ୍ନେ ସାମୁଆଁଇଂ ଏତେ ସମାନ୍ । ଏନ୍ ସତ୍ ବାବ୍ରେ ଜିସୁକେ ଡିରକମ୍ ବାବ୍ରେ ମେଁ ମୁଇଂଜା ବାର୍ମୁଇଂଜାକେ ଆଲାଦ୍ ଡିଙ୍ଗ୍ନେ ବିସୟ୍ରେ ଜିସୁନେ ଆଦେସ୍କେ ଦ୍ୟାନ୍ ବିଡିଙ୍କେ ଦେତ୍ ବାବ୍ରେ ଜିସୁନେ ଆଦେସ୍ ପାଲନ୍ ଡିଙ୍ଗ୍ନେ ଡିଙ୍ଗ୍କେ ଆମେକେ ଆଲାଦ୍ ଡିଙ୍ଗ୍ନେ ୧:୫-୬; ଜହନ୍ ୧୫:୯-୧୦ ।
ଏନ୍ ବିସ୍ବାସ୍ ଡିଙ୍ଗ୍ଆର୍ଏ ଜେ ଜହନ୍ ଉଡ଼ି ବେଲା ଏପିସିୟନ୍ନିଆ ବାସା ଲେଃକେ ଜହନ୍ ନିମାଣ୍ଡାସାମୁଆଁ ଏତେ ଜହନ୍ନେ ଞ୍ଜିକ୍ଲିଗ୍ ଉଲିଆ ଡିଗ୍ ଗୁଆର୍ ବକେ ଆତେନ୍ଇଂ, ୧ ଜହନ୍ ୨ ଜହନ୍ ବାରି ୩ ଜହନ୍ । ଜହନ୍ ଏନ୍ ଉଲିଆନ୍ନିଆ ସ୍ରିକ୍ନେ ସେଲାମ୍ବୁଏଃ ବାରି ମେଁନେ ଉଂଡେଇଂ ଡାଗ୍ଚେ ବାବେଚେ ମଣ୍ତଲିକେ ଉଲିଆ ଗୁଆର୍ ବକେ । ଜହନ୍ନେ ଏନ୍ ଉଲିଆ ଗୁଆର୍ନେ କାରନ୍ ଡିଙ୍ଗ୍କେ ବିସ୍ବାସିଇଂକେ ସାଆସ୍ ବିନେ ବାରି ମିଚ୍ ଗୁରୁଇଂନେ ବାନ୍ ତରକ୍ ଲେଃନ୍ସା ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ଜହନ୍ ଏନ୍ ଉଲିଆ ଜାଣ୍ତେ ନ୍ସା ଗୁଆର୍ଡିଂକେ ଏନ୍ ବାସଙ୍ଗ୍ଚେ ମେଁନେ ଗ୍ରଅନ୍ ଡିଙ୍ଗ୍ଣ୍ଡ୍ରେକେ ସାର୍ଲ ଡିଙ୍ଗ୍କେ । ୧:୧-୩
୨. ଜହନ୍ ମଣ୍ତଲିକେ ସାଆସ୍ ବିଚେ ମ୍ନା ଆଦେସ୍ ବିସୟ୍ରେ ମନେ ତ୍ଲାଗ୍ ବିଃଡିଂକେ । ୧:୪-୬
୩. ମେଁ ମିଚ୍ ଗୁରୁଇଂନେ ବିସୟ୍ରେ ତରକ୍ ଆଡିଙ୍ଗ୍କେ । ୧:୭-୧୧
୪. ମେଁ ଆଣ୍ଡି ଡାଗ୍ରା ବାସା ଲେଃକେ ଆତ୍ ଅରିଆନେ ବିସ୍ବାସିଇଂକେ ସାର୍ଲଚେଃ ଗୁଆର୍କ୍ନେ ବନ୍ଦ୍ ଆଡିଙ୍ଗ୍କେ । ୧:୧୨-୧୩
୧
୧ ଦର୍ମ ନେତା ଜହନ୍ ଜେ ନେଙ୍ଗ୍ ମୁଇଂ ସ୍ରିକ୍ନେ ଦରମ୍ ସେଲାମ୍ବୁଏ ବାରି ମେଁନେ ଉଂଡେଇଂନେ ଡାଗ୍ରା ଉଲିଆ ଗୁଆର୍ ଣ୍ଡିଂକେ । ଆପେକେ ନେଙ୍ଗ୍ନେ ଆଲାଦ୍ ଆଃ ଅଁ ଣ୍ଡିଂକେ ବାରି ନେଙ୍ଗ୍ ମେନ୍ସା ଜାଣ୍ତେଇଂ ସତ୍ନେ ଗଡ଼େଇଂ ବାଲେଃଆର୍କେ ସାପାରେ ଆପେକେ ଆଲାଦ୍ ଡିଂଆର୍ଏ ।
୨ ନେ ଡାଗ୍ରା ଆତାନ୍ ସତ୍ ଲେଃକେ ବାରି କାଲାଆଃ ଲେଃଏ ।
୩ ଆବା ଇସ୍ପର୍ ବାରି ମେଁନେ ଉଙ୍ଗ୍ଡେ ଜିସୁ କିସ୍ଟ ଆନେକେ ଲିବିସ ବାରି ସାନ୍ତି ବିଚେ ସତ୍ ବାରି ଆଲାଦ୍ରେ ଆସିର୍ବାଦ ଡିଙ୍ଗ୍ଏ ।
ସତ୍ ବାରି ଆଲାଦ୍
୪ ଇସ୍ପର୍ନେ ଆଦେସ୍ ସୁଗୁଆ ପେନେ ଉଡ଼ି ଗଡ଼େଇଂ ଜେ ସତ୍ ଆଡ଼ାତ୍ରା ପାରାନ୍କେ ବାଦ୍ଲେ ଆର୍ଡିଂକେ ଏନ୍ ସାମୁଆଁ ମ୍ୟାଚେ ନେଙ୍ଗ୍ ମ୍ନା ସାର୍ଦା । ୫ ✡ଜହନ୍ ୧୩:୩୪; ୧୫:୧୨,୧୭.ନିଜର୍ ସେଲାମ୍ବୁଏ ଆନାକେ ନେଙ୍ଗ୍ ବାସଙ୍ଗ୍ନେ ସାମୁଆଁ ନେ ସାପାରେକେ ଆଲାଦ୍ ଡିଙ୍ଗ୍ନେ ଦର୍କାର୍ । ଆକେନ୍ ମୁଇଙ୍ଗ୍ ତ୍ମି ଆଦେସ୍ ଣ୍ତୁ ଅଃସେବାନ୍ ନେ ଆକେନ୍ ଆଦେସ୍ ବାନେଲେଃକେ । ୬ ଆଣ୍ଡିନେ ଆଲାଦ୍ ସାମୁଆଁ ଏନ୍ ଡାଗ୍ରା ନେଙ୍ଗ୍ ଗୁଆର୍ ମ୍ୱକେ ମେଁନେ ଅର୍ତ ଡିଙ୍ଗ୍ଗେ ପାରାନ୍ରେ ଇସ୍ପର୍ନେ ସାମୁଆଁ ମାନେଃନେ । ଆତେନ୍ ସାମୁଆଁ ମେଃନେ ପେ ଅଃସେଆଃ ଅଁପେଲେକେ ଆତେନ୍ ଡିଙ୍ଗ୍ଡିଙ୍କେ ନେ ସାପାରେ ନିଜର୍ ନିଜର୍ ବିତ୍ରେ ଆଲାଦ୍ନ୍ନିଆ ଗାଗ୍ଚେ ଲେଃନେ ଦର୍କାର୍ ।
୭ ଗୁଲୁଏ ବଣ୍ତବାବବାଦି ଏବେ ମଞ୍ଚ୍ପୁର୍ନ୍ନିଆ ତାର୍ଲେଃଆର୍କେ । ଜିସୁ କିସ୍ଟ ରେମୁଆଁ ଗାଗ୍ଡ଼େନ୍ନିଆ ଜନମ୍ ଡିଙ୍ଗ୍ଲେକେ ଡାଗ୍ଚେ ମେଇଂ ଗ୍ରଅନ୍ ଆଡିଙ୍ଗ୍ଆର୍ ଣ୍ତୁ । ଦେକ୍ରକମ୍ ରେମୁଆଁ ଡିଲାଡିଗ୍ ବଣ୍ତ ମେଁ କିସ୍ଟନେ ସତ୍ରୁ । ୮ ଏନ୍ସା ତରକ୍ ଲାଲାପା ନେ ପେନ୍ସା ମେଁନେ ଡିଙ୍ଗ୍ ନେଡିଙ୍ଗ୍କେ ଆତେନ୍ ମାଆବଃଚେ ଡିରକମ୍ ସମାନ୍ ବାବ୍ରେ ପୁରସ୍କାର୍ ବାପା ।
୯ ଜାଣ୍ଡେକି କିସ୍ଟନେ ସିକ୍ୟାନେ ବୁଦି ବିତ୍ରେ ମାଲେଃଚେ ବାଏରେ ୱେଏ ମେଁ ଇସ୍ପର୍ନେ ବାନ୍ ସ୍ଲ ଲେଃକେ । ଜାଣ୍ଡେକି କ୍ରିସ୍ଟନେ ସିକ୍ୟାରେ ଦ୍ୟାନ୍ ଲେଃଏ ମେଁ ଇସ୍ପର୍ ବାରି ମେଁନେ ଉଙ୍ଗ୍ଡେ ମ୍ୱାୟାନେ ଏତେ ସମାନ୍ ବାବ୍ରେ ଲେଃଏ । ୧୦ ଜାଣ୍ଡେ ଜଦି ଏନ୍ ସିକ୍ୟା ଡୁଗ୍ୱେଚେ ପେନେ ଡାଗ୍ରା ଆପାଙ୍ଗ୍ ଣ୍ତୁ ଆମେକେ ପେନେ ଡୁଆ ଆୱାଗେପା “ପେନେ ସାନ୍ତି ଡିଙ୍ଗ୍ଲେ” ଡାଗ୍ଚେ ବାସଙ୍ଗ୍ଚେ ଆମେକେ ଆସାର୍ଲଗ୍ପା । ୧୧ ଜାଣ୍ଡେକି ମେଁନେ ସାନ୍ତି ଇକ୍ଚା ଡିଙ୍ଗ୍ଏ, ମେଁ ମେଁନେ ଦଦ୍ୟାନ୍ନିଆ ବାଗ୍ ଡିଙ୍ଗ୍ଏ ।
ସାରାସାରି ସାମୁଆଁ
୧୨ ନେଙ୍ଗ୍ନେ ଆପେକେ ଗୁଲୁଏ ସାମୁଆଁ ବାସଙ୍ଗ୍ନେ ଲେଃକେ ଡାଗ୍ଲା କାଗଜ୍ ବାରି ଏଲେଃସନ୍ନିଆ ଆତେନ୍ ସାପା ଏବେ ନେଙ୍ଗ୍ ବାସଙ୍ଗ୍ନେ ଚାଏଁନାଡିଙ୍ଗ୍କେ ଣ୍ତୁ । ପେଇଂନେ ଡାଗ୍ରା ପାଙ୍ଗ୍ଚେ ସେଃମଁ ବାଲିର୍ବାତା ଡିଙ୍ଗ୍ନେ ଆସା ନେଙ୍ଗ୍ ମ୍ୱକେ ଆତେନ୍ ଡିଙ୍ଗ୍ ୟାଲା ନେନେ ସମାନ୍ ବାବ୍ରେ ସୁକ୍ ନେଡିଙ୍ଗ୍ଏ ।
୧୩ ପେନେ ନିଜର୍ ତନାଣ୍ଡେନେ ଉଂଡ଼େଇଂ ଆପେକେ ସାର୍ଲଡିଂକେ ।
✡୧:୫ ଜହନ୍ ୧୩:୩୪; ୧୫:୧୨,୧୭.