ପିତରଙ୍କ ଦ୍ୱିତୀୟ ପତ୍ର
ପିତରନେ ୨ ଉଲିଆଃ
ପିତର ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ପିତରନେ ଦୁତିୟ ଉଲିଆଃ ବାସଙ୍ଗ୍ଡିଂକେ ଜେ ଆକେନ୍ ଉଲିଆଃ ବେବକ୍ନେ ପିତରନେ ବାନ୍ ଗ୍ନୁଆର୍ ଡିଂଲେଃକେ । ମାତର୍ ଏଃକେ ଗୁଲେ ପଣ୍ଡିତ୍ଇଂ ଆକେନ୍ ସତ୍ ଣ୍ଡୁ ଡାଗ୍ଚେ ବାସଙ୍ଗ୍ ଡିଂଆର୍କେ । ଡିଂଲେଃଏ ଆକେନ୍ ବାର୍ମୁଇଂ ପିତରନେ ବାଦୁଲ୍ ଗୁଆର୍ବକେ । ଗୁଆର୍ଣ୍ଡ୍ରେ ବାସଙ୍ଗ୍ଡିଂକେ ଜେ ମେଁ ଜିସୁ କିସ୍ଟନେ କେକ୍ନେ ମୁଆଃନ୍ନିଆ ସାକି ଲେଃକେ । ନିମାଣ୍ଡା ବାବ୍ରେ ଜିସୁନେ ବଦ୍ଲେ ବିସୟ୍ରେ ବାସଙ୍ଗ୍ଡିଂକେ ୧:୧୭-୧୮ । ଜଦି ପିତର ଆକେନ୍ ଉଲିଆଃ ଗୁଆର୍କେ ଡିଂଲେଃଏ କିସ୍ଟନେ ଜନମ୍ ଇଡ଼ିଂ ୫୬-୬୯ ବିତ୍ରେ ମେଁ ଗୁଏଃନେ ସିସେବାନ୍ ଆକେନ୍ ଗୁଆର୍ବକେ । ପିତର ଣ୍ଡିଗ୍ ଆକେନ୍ ମେଁନେ ୨ ଉଲିଆଃ ଡାଗ୍ଚେ ବାସଙ୍ଗ୍ଡିଂକେ ୩:୧ । ପିତରନେ ପର୍ତୁମ୍ ଉଲିଆଃ ଗୁଆର୍କ୍ନେ ଇଡ଼ିଂ ଆତେନ୍ ଗ୍ନୁଆର୍ନେ ବେଲା ଟାନ୍ ବିଃଚେ ଆକେନ୍କେ ଦୁତିୟ ଉଲିଆଃ ଡାଗ୍ଚେ ବାସଙ୍ଗ୍ଡିଂକେ ।
ମେଁ ସର୍ତେ କିସ୍ଟିୟାନ୍ଇଂକେ ଆକେନ୍ ଉଲିଆଃନ୍ନିଆ ଇନି ଆଃମ୍ୟାଡିଂକେ । ପିତର ବିସ୍ବାସିଇଂକେ ସାଆସ୍ ବିଃନେ ଆରି ନିମାଣ୍ଡା ବ୍ରୁଆ ଡିକେଃନେ ନ୍ସା ବାରି ବଣ୍ଡ ବାବବାଦିଇଂନେ ସାମୁଆଁ ମାମାନେଃନେ ନ୍ସା ତରକ୍ ଆଃଡିଂନେ ନ୍ସା ଆକେନ୍ ଉଲିଆଃ ଗୁଆର୍ଡିଂକେ ୨। ଜିସୁ ପାଙ୍ଗ୍ନେ ନ୍ସା ଜାବର୍ ବେଲା ଡୁଙ୍ଗ୍ଡଡିଂକେ ଡାଗ୍ଚେ ବାସଙ୍ଗ୍ଡିଂକ୍ନେ ରେମୁଆଁଇଂକେ ଣ୍ଡୁ ଡାଗ୍ନେ ନ୍ସା ସାଆସ୍ ବିଃଡିଂକେ । ଇସ୍ପର୍ ଲେଃଗା ଣ୍ଡୁ ମାତର୍ ସାପାରେ ଉଦାର୍ ବାଆର୍ଏ ଆକେନ୍ ଇସ୍ପର୍ ଇକ୍ଚା ଡିଂଡିଂକେ ୨ ପିତର ୩:୮-୯ । ଆକେନ୍ ମୁଇଂ ନିମାଣ୍ଡା ଜିବନ୍ନେ କାରନ୍ ୨ ପିତର ୩:୧୪ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପିତର ମେଁ ନିଜର୍ ପରିଚୟ୍ ବିଃଡିଂକେ ବାରି ମେଁନେ ପଡ଼େଣ୍ଡ୍ରେଇଂକେ ଟିକନା ବିଃଡିଂକେ । ୧:୧-୨
୨. ତେନ୍ ଇଡ଼ିଂ ବିସ୍ବାସିଇଂକେ ନିମାଣ୍ଡା ବ୍ରୁଆ ଡିକେଃ ନ୍ସା ମନେ ଏତେ ବିଃଡିଂକେ ଡାଗ୍ଲା ଇସ୍ପର୍ ଆନେଃକେ ସାଆଜ୍ୟ ଡିଂଡିଂକେ । ୧:୩-୨୧
୩. ମେଁ ବଣ୍ଡ ବାବବାଦିଇଂକେ ତରକ୍ ଆଃଡିଂଚେ ସାରାସାରି ବେଲା ମେଇଂନେ ଆଡ଼ାତ୍ରା ମେଃନେ ଗଟେଏ ଆତେନ୍ ବାସଙ୍ଗ୍ଡିଂକେ । ୨:୧-୨୨
୪. ପିତର ଜିସୁ କିସ୍ଟନେ ବାର୍ମୁଇଂତର୍ ପାଙ୍ଗ୍ନେ ନ୍ସା ତିଆର୍ ଡିଂଚେ ନିମାଣ୍ଡା ବ୍ରୁଆ ଡିକେଃନ୍ସା ସାଆସ୍ ବିଃଡିଂକେ । ୩:୧-୧୭
୧
୧ ଜାଣ୍ଡେଃଇଂ ନେନେ ଇସ୍ପର୍ ଆରି ଆମ୍ବ୍ରଣ୍ଡ୍ରେ ଜିସୁ କିସ୍ଟନେ ଦରମ୍ ନ୍ସା ନେଃ ରକମ୍ ବିସ୍ବାସ୍ ସୁଗୁଆ ମାଲେ ଇନାମ୍ ବା ଲେଃଆର୍କେ ମେଇଂନେ ଡାଗ୍ରା ଜିସୁ କିସ୍ଟନେ ସେବକ ଆରି ବେକ୍ନେ ସିସ୍ ଶିମୋନ ପିତରନେ ଉଲିଆ ।
୨ ଇସ୍ପର୍ ଆରି ନେଃ ମାପ୍ରୁ ଜିସୁ କିସ୍ଟନେ ବିସୟ୍ରେ ପେନେ ବୁଦି ବାନ୍ ପୁରୁନ୍ ବାବ୍ରେ ପେନେ ଅନୁଗ୍ରଅ ଆରି ସାନ୍ତି ଡିଂଲେ ।
ଇସ୍ପର୍ ୱାନେ ଆରି ସିସ୍ ସ୍ରିନେ
୩ ଟିକ୍ ବାବ୍ରେ ଦରମ୍ ଜିବନ୍ କାଟେ ନ୍ସା ନେଃନେ ମେଃ ମେଃନେ ଦର୍କାର୍ ଆତେନ୍ ଇସ୍ପର୍ ନିଜର୍ ଇକ୍ଚା ବପୁରେ ଆନେକେ ଦାନ୍ ଡିଂବକେ । ଜା ନିଜର୍ ମଇମା ଆରି ଦରମ୍ନ୍ନିଆ କୁଡ଼େଃ ନ୍ସା ଆନେକେ ୱାବକେ ଆମେକେ ମ୍ୟାକ୍ନେ ବାନ୍ ନେ ଆକେନ୍ ଦାନ୍ ବାନେଲେଃକେ । ୪ ଦେକ୍ରକମ୍ ମେଁ ଆନେକେ ମେଁନେ ପାର୍ମାନ୍ ଅନୁସାରେ ଜାବର୍ ମ୍ନା ଆରି ଜବର୍ ଦାନ୍ ବିଃବକେ । ଆକେନ୍ ସାପା ଦାନ୍ ଏତେ ପେଇଂ ଆକେନ୍ ମଞ୍ଚ୍ପୁର୍ନେ ବିନାସ୍ ଡିଂଣ୍ଡ୍ରେ ଦଦ୍ୟା କାମ୍ବାନ୍ ଉଦାର୍ ବାନ୍ସା ନିଜର୍ ଇକ୍ଚାରେ କୁଡ଼େଃପା । ୫ ମେଇଂ ମ୍ୟାଃଚେଂଚେ ଆବଃବିଆର୍ଏ ଜେ ଅଃସେ ଇସ୍ପର୍ ବାସଙ୍ଗ୍ବିଃକେ ଆରି କିତଂଇନି ଆରି ଦର୍ତନି ଉବ୍ଜେ ୱେଗେ ! ଦର୍ତନି ଣ୍ତିଆବାନ୍ ଆରି ଣ୍ତିଆ ନ୍ସା ଦର୍ତନିକେ ଉବ୍ଜେକେ; ୬ ଆତାନ୍ ବାୱିର୍ ଦର୍ତନି ମେସୁଃଆ ୱେଗୁର୍ ବ୍ରୁଆଣ୍ତିଆ ଏତେ ବୁଡ଼େ ଡିଂୱେଗେ । ୭ ଦରମ୍ କାମ୍ ଏତେ ବୟାଁ ଆଲାଦ୍ ଆରି ବୟାଁ ଆଲାଦ୍ ଏତେ ଆଲାଦ୍ ଆଃମିସୁ ନ୍ସା ନିଜେ ଚେସ୍ଟା ଡିଂପା । ୮ ଆକେନ୍ ସତ୍ ଗୁନ୍ଇଂ ନାନେ ଦର୍କାର୍; ଆକେନ୍ ସାପାନ୍ନିଆ ପେ ପୁରନ୍ ପେଡିଂଲା ପେ ବାଲେଃକ୍ନେ ମାପ୍ରୁ ଜିସୁ କିସ୍ଟନେ ବୁଦି ଆନାକେ ଜିବନ୍ ଆରି ଚୁଚୁ ଆଃଡିଂଚେ ବଏ । ୯ ମାତର୍ ଆକେନ୍ ସାପା ଜାଡାଗ୍ରା ଣ୍ଡୁ, ମେଁ ସ୍ଲନେ କିକେ ମାୟାଚେ କାନା ଡିଂଲେଃକେ, ବାରି ନିଜର୍ ଅଃସେ ଡିଂବକ୍ନେ ପାପ୍ବାନ୍ ପବିତ୍ର ଡିଂନେ ସାମୁଆଁ ଆବଃ ୱେଲେଃକେ ।
୧୦ ଆତେନ୍ସା ଅ ବୟାଁଇଂ ଇସ୍ପର୍ ଜେ ଆପେକେ ୱାବକେ; ଆକେନ୍ ଚିନ୍ତାକେ କାଲାଆଃ ଆଃଲେନେ ନ୍ସା ମାଲେ ଜତନ୍ ଡିଂପା । ଡେକ୍ରକମ୍ ଡିଂଲା ପେଇଂ ଅଃନାଡିଗ୍ ନାନେ ବିସ୍ବାସ୍ବାନ୍ ଟେପ୍ଲଃ ନାଲଃଣ୍ଡୁ । ୧୧ ଆକେନ୍ ଉପାୟ୍ରେ ନେ ମାପ୍ରୁ ଆରି ଆମ୍ବ୍ରଣ୍ଡ୍ରେ ଜିସୁ କିସ୍ଟନେ ମାଡାନେ ରାଜ୍ୟନିଆ ଗିଃଗାଃନେ ନ୍ସା ନାଁ ସର୍ତେ ଅଦିକାର୍ ବାପେଲେକେ ।
୧୨ ପେଇଂ ମାପ୍ରୁନେ ଦିନ୍ ପାଂ ନ୍ସା ପେ ସତ୍ ବାବ୍ରେ ଉର୍ ଲେଃନେ ଦର୍କାର୍ । ଆତାନ୍ କାଲା ପାଙ୍ଗ୍ଲା ସୁଆ ଏତେ କିତଂଇନି ଚୁର୍ମାର୍ ଡିଂ ୱେଏ ଆରି କିତଂଇନି ଲେଃକ୍ନେ ସାପା ସିସେବାନ୍ ଲେଃକ୍ନେ ଜିନିସ୍ଇଂ ତାତିରେ ଏଡ଼ିଆ ୱେଏ । ୧୩ ଡାଗ୍ଲା କିତଂ ଆନେକେ ମୁଇଂ ସାମୁଆଁ ବିଃବକେ । ନେ ମେଃନେ ବାସଙ୍ଗ୍କ୍ନେ ଅନୁସାରେ ମୁଇଂ ତ୍ମି କିତଂଇନି ଆରି ତ୍ମି ଦର୍ତନିନେ ଉର୍ନେଲେଃକେ । ଆତେନ୍ ଦାର୍ମିକ୍ଇଂନେ ବାସାନେ ଜାଗା ଡିଂଏ । ୧୪ ନେ ମାପ୍ରୁ ଜିସୁ କ୍ରିସ୍ଟନେବାନ୍ ତିଆର୍ ଡିଂକ୍ନେ ସୁଚନା ବାନେଲେଃକ୍ନେ ଅନୁସାରେ ଗିଆଃ ଆକେନ୍ ଗୁଏକ୍ନେ ଗାଗ୍ଡ଼େ ଙାନ୍ତାର୍ଏ ଡାଗ୍ଚେ ନିଂ ମ୍ୟାନ୍ଲେଃକେ । ୧୫ ମାପ୍ରୁ ଡାଟ୍ଲେଃକେ ଡାଗ୍ଚେ ନେ ରକ୍ୟା ନେବାକେ ଏନ୍ ମନେ ବପା । ଇସ୍ପର୍ନେ ବାଲେଃକ୍ନେ ବୁଦିନେ ବପୁରେ ନେନେ ନିମାଣ୍ତା ବୟାଁ ପାଉଲ୍ ଆପେକେ ଗୁଆର୍ନେ ବେଲା ମେଃ ଆତାନ୍ ସାମୁଆଁ ବାସଂବଗେ ।
କ୍ରିସ୍ଟନେ ମଇମା ନିଜର୍ ମୁଆଃନ୍ନିଆ କିକେଣ୍ଡ୍ରେ
୧୬ ମାପ୍ରୁ ଜିସୁ କିସ୍ଟନେ ଗୌରବ୍ମୟ ବାର୍ମୁଇଂତର୍ ପାଙ୍ଗ୍ନେ ବିସଏରେ ଆପେକେ ଆଃମ୍ୟାନେ ନ୍ସା ନେ ଏତେକ୍ନେ ଉଃସ୍ରା ଆଡ଼ାତ୍ରା ଆସା ନେଡିଂକେ ଣ୍ଡୁ । ନେ ନିଜର୍ ମ୍ମୁଁଆଃନ୍ନିଆ ମେଁନେ ମଇମା କିକେ ନେଲେଃକେ । ୧୭ ବାରି ଉଡ଼ିବେଲା ମ୍ନାଃ ଗୌରବ୍ ବାନ୍ ମେଁ ପାକା ଆକେନ୍ ସାମୁଆଁ ଡିଂକେ, “ଏ ନେଙ୍ଗ୍ନେ ନିଜର୍ ଉଂଡେ ଆକ୍ମେଅରିଆ ନେଂନେ ଜାବର୍ ସାନ୍ତି ନ୍ଲେଃକେ” ଆତେନ୍ ବେଲା ମେଁ ଆବା ଇସ୍ପର୍ବାନ୍ ବପୁ ବାରି ଗୌରବ୍ ବାକେ । ୧୮ ନେ ମେଁନେ ଏଃତେ ପବିତ୍ର କଣ୍ଡାନ୍ନିଆ ନେଲେଃକ୍ନେ କାଲା ନିଜେ କିତଂବାନ୍ ତାର୍କ୍ନେ ଆକେନ୍ ସାମୁଆଁ ନେଅଁକେ ।
୧୯ ତେସାଃ ବାବବାଦିଇଂନେ ବାନ୍ ପର୍ଚାର୍ ଡିଂକ୍ନେ ସାମୁଆଁନ୍ନିଆ ନେନେ ବିସ୍ବାସ୍ ମାଲେ ଡାଟ୍ ଡିଂଲେଃକେ । ଆତ୍ଡାଗ୍ରା ପେଇଂ ଡିଗ୍ ମନ୍ ବିଃନେ ଦର୍କାର୍, ଡାଗ୍ଲା ଆତେନ୍ ତାଂକିଗ୍ନ୍ନିଆ ମୁଇଂ କୁପିସ ସୁଗୁଆ ଏତେଚେ ମିଡିଗ୍ ମାତାରାଃ ଜାକ ଆରି ପେନେ ଉର୍ଦେନ୍ନିଆ ତାରାଃ ବେଲାନେ ଚାଙ୍କୁଆ ମାତାର୍ନେ ଜାକ ଆତେନ୍ ଅରିଆ ମନ୍ ବିଃଲା ନିମାଣ୍ଡା ଡିଂଏ । ୨୦ ପେଇଂ ସାରାସାରି ଅଃକେନ୍ ତ ମ୍ୟାଃଲାଲାପା ଜେ ଦର୍ମସାସ୍ତର୍ନ୍ନିଆ ଗ୍ନୁଆର୍କ୍ନେ ମୁଃଡ଼ି ବାବବାଦି ଜାଡିଗ୍ ନିଜର୍ ବୁଦିରେ ବୁଜେ ଆୟା ଣ୍ଡୁ । ୨୧ ମୁଃଡ଼ି ବାବବାଦି ଅଃନାଡିଗ୍ ରେମୁଆଁନେ ଇକ୍ଚାବାନ୍ ତାର୍ ଆଲେଃକେ ଣ୍ଡୁ, ମାତର୍ ଇସ୍ପର୍ନେ ବକ୍ତଇଂ ପବିତ୍ର ଆତ୍ମାନେ ବାନ୍ ଅଲେଙ୍ଗ୍ଡାଲିଆଚେ ବାସଙ୍ଗ୍ ବଆର୍ଗେ ।