୫
ସାକାର୍ଇଂନ୍ସା ତରକ୍ ସାମୁଆଁ
୧ ଅ ସାକାର୍ ରେମୁଆଁ ନେଂ ସାମୁଆଁ ଅଁପା । ପେନେ ଆଣ୍ତିନେ ଅସ୍ବିଦା ଡିଂନେ ୱେଡିଂକେ ଆତେନ୍ସା ମନେ ଏତେଚେ ଅଃପା । ୨ ପେନେ ଦନ୍ ସମ୍ପତି ନାସେ ୱେଡିଂକେ ଆରି ପାଟାଇପୁଟାଇ ତାଃଡିର୍ ଚଂଡିଂକେ । ୩ ପେନେ ସୁନା ଆରି ରୁପା ଏଡ଼େଃ ଡିଂକେ ଆରି ଆକେନ୍ନେ ତାଃଡିର୍ ପେନେ ବିରଦ୍ରେ ସାକି ବିଃଏ ଆରି ପେନେ ଗାଗ୍ଡ଼େ ସୁଆ ସୁଗୁଆ ଗିଃ ୱେଏ । ଆକେନ୍ନେ ସାରାସାରି ବେଲା ପେଇଂ ଦନ୍ ସମ୍ପତି ରାଃସିଙ୍ଗ୍ ପେବକେ । ୪ ପେନେ ଲିଜ ସ୍ଲେଡିଂକ୍ନେ ସ୍ଲେରେଇଂକେ ବୁତି ପେବିକେ ଣ୍ଡୁ । ମେଇଂନେ ସାମୁଆଁ ଦ୍ରିଗ୍ । କିଆଉଁଆ ୱେଣ୍ଡ୍ରେଇଂନେ ଅଃକ୍ନେ ସାପାନେ ବପୁଣ୍ଡ୍ରେ ମାପ୍ରୁ ଇସ୍ପର୍ ଅଁଲେଃକେ । ୫ ଆକେନ୍ ଦର୍ତନିନ୍ନିଆ ପେନେ ଜିବନ୍ ସୁକ୍ସାନ୍ତି ଡିଂୱେଗେ । ଗୁଗୁଏଃନେ ଦିନ୍ ନ୍ସା ଲେଃକ୍ନେ ପଶୁ ସୁଗୁଆ ପେ ଗାଗ୍ଡ଼େ ପେଲେଃକେ ।
୬ ପେ ନିର୍ଦସ୍ ରେମୁଆଁଇଂକେ ଦସି ଡାଗ୍ଚେ ବାଗୁଏଃପେଡିଂକେ, ମେଁଇଂ ପେନେ ବିରଦ୍ ଡିଂ ଆୟାଆର୍କେ ।
ସାଆସ୍ ଡିଂଚେ ପାର୍ତନା ଡିଂପା
୭ ଅ ବୟାଁ ଆରି ତନାଇଂ ମାପ୍ରୁ ପାଙ୍ଗ୍ନେ ଜାକ ବର୍କସ୍ ଡିଂପା । କେଲାପା ଲିଜ ସ୍ଲେରେ ଡିରକମ୍ ମେଃନେ ଲିଜନ୍ନିଆ ଜାବର୍ କିଆ ଆବ୍ଲେନ୍ସା ବର୍କସ୍ ଡିଂଚେ ପର୍ତୁମ୍ ଆରି ଇଡ଼ିଙ୍ଗ୍ ଗୁର୍ନେ ଣ୍ଡିଆକେ ଉର୍ଲେଃଏ । ୮ ଦେତ୍ରକମ୍ ପେଇଂ ଣ୍ଡିଗ୍ ବର୍କସ୍ ଡିଂଚେ ଉର୍ ଲାଃଲାପା । ପେଇଂନେ ଆସା ନିମାଣ୍ତା ଲେଃଲେ ଡାଗ୍ଲା ମାପ୍ରୁ ପାଙ୍ଗ୍ନେ ଦିନ୍ ପିଙ୍ଗ୍ଚାକେ ।
୯ ଅ ବୟାଁ ବାରି ତନାଇଂ ପେଇଂ ଡିରକମ୍ ବିଚାର୍ନ୍ନିଆ ଆଡିଙ୍ଗ୍ଗ୍ପା ଏନ୍ସା ନିଜର୍ ନିଜର୍ ବିତ୍ରେ ବିଚାର୍ ଆଡିଙ୍ଗ୍ଗ୍ପା । ବିଚାର୍ ଡିଂଣ୍ଡ୍ରେ ର୍ଣ୍ଣସାଙ୍ଗ୍ ଡାଗ୍ରା ପାଙ୍ଗ୍ ଲେଃକେ । ୧୦ ଅ ବୟାଁ ଆରି ତନାଇଂ ମୁଡ଼ିନେ ବାବବାଦିଇଂ ମାପ୍ରୁନେ ମ୍ନିରେ ସାମୁଆଁ ବାସଂଆର୍ଗେ ଆମେଇଂକେ ସାଆସ୍ ଆରି କସ୍ଟ ବାନେ ଉଃସ୍ରା ରକମ୍ ମନେ ଏତେପା । ୧୧ ମେଇଂନେ ସାଆସ୍ ନ୍ସାଃ ନେ ଆମେଇଂକେ ସୁକ୍ ରେମୁଆଁ ଡାଗ୍ଚେ ନେଃବାସଂଏଁ । ପେ ଆୟୁବନେ ବର୍କସ୍ ସାମୁଆଁ ଅଁପେଲେଃକେ ଆରି ଇଡ଼ିଂ ମାପ୍ରୁ ଡିଡିରକମ୍ ଆମେକେ ଆସିର୍ବାଦ୍ ଡିଂବକେ ଆତେନ୍ ମ୍ୟାଃପେଲେଃକେ । ଡାଗ୍ଲା ମାପ୍ରୁ ଦୟା ଆରି ଲିବିସଃ ଡିଂମ୍ୟାକେ ।
୧୨ ✡ମାତିଉ ୫:୩୪-୩୭.ଆରି ବୟାଁ ଆରି ତନାଇଂ ପାର୍ମାନ୍ ଡିଂନେବେଲା କିତଂ କି ଦର୍ତନି କି ବିନ୍ ବିସଏରେ ପାର୍ମାନ୍ ଆଡିଙ୍ଗେପା । ନାଁନେ “ଅଃଅଁ”ନେ ଅର୍ତ “ଅଃଅଁ” ଡିଂଲେ “ଣ୍ଡୁ”ନେ ଅର୍ତ “ଣ୍ଡୁ” ଡିଂଲେ । ଡେତ୍ଲା ପେ ଇସ୍ପର୍ନେ ବିଚାର୍ନ୍ନିଆ ଡଣ୍ଡ୍ ପେବା ଣ୍ଡୁ ।
୧୩ ପେଇଂନେ ବିତ୍ରେବାନ୍ ଜାଣ୍ଡେଃ ମେଃଆରେ ଅସ୍ବିଦା ଡିଂପେଲେଃକେ ? ମେଁ ପାର୍ତନା ଡିଂଲେ ? ଜାଣ୍ଡେଃ ମେଃଆରେ ସାର୍ଦା ପେଲେଃକେ ? ମେଁ ମାପ୍ରୁନେ ଅସ୍ମାର୍ ସାର୍ଲେଃ । ୧୪ ✡ମାର୍କ ୬:୧୩.ଜାଣ୍ଡେଃ ମେଃଆରେ ଆଃସିଲେଃକେ ? ମେଁ ମଣ୍ଡଲିନେ ନେତାଇଂକେ ୱାଲେ; ମେଇଂ ମାପ୍ରୁ ମ୍ନିରେ ଞ୍ଚୁ ଲିଗ୍ଚେ ମେଁ ନ୍ସା ପାର୍ତନା ଡିଂଆର୍ଲେ । ୧୫ ଦେକ୍ରକମ୍ ଡାଟ୍ ବିସ୍ବାସ୍ ପାର୍ତନା ଆଃସିରେକେ ନିମାଣ୍ଡା ଆଃଡିଂଏ । ମାପ୍ରୁ ଆମେକେ ନିମାଣ୍ଡା ଆଃଡିଂଏ ଆରି ଜଦି ମେଁ ପାପ୍ ଡିଂବଏ ଆମେକେ କେମା ଡିଂଏ । ୧୬ ନିଜର୍ ନିଜର୍ ଡାଗ୍ରା ନିଜର୍ ନିଜର୍ ପାପ୍ ସାମୁଆଁ ବାସଙ୍ଗ୍ପା ବାରି ନିଜର୍ ନିଜର୍ ନ୍ସା ପାର୍ତନା ଡିଂପା । ଡେତ୍ଲା ପେ ନିମାଣ୍ଡା ପେଡିଂଏ । ଦାର୍ମିକ୍ନେ ପାର୍ତନା ଜବର୍ ବପୁ ଆରି ଗୁଲୁଏ କାମ୍ ପୁରନ୍ ଡିଂ ୟାଏ । ୧୭ ଏଲିୟ ନେଃ ରକମ୍ ରେମୁଆଁ ଲେଃଗେ । ଣ୍ଡିଆ ଆଗୁର୍ଲେଃ ଡାଗ୍ଚେ ମେଁ ମୁଇଂ ମନ୍ରେ ପାର୍ତନା ଡିଂବଗେ ଞ୍ଜିମୁଆଁ ତେଃପିଆ ଜାକ ଦେସ୍ନ୍ନିଆ ଣ୍ଡିଆ ଆଗୁର୍କେ ଣ୍ଡୁ । ୧୮ ମେଃ ଆର୍ମୁଇଂତର୍ ପାର୍ତନା ଡିଂକେ ଆରି କିତଂଇନିବାନ୍ ଣ୍ଡିଆଃ ଗୁର୍କେ, ଆରି ଦର୍ତନି ଆର୍ମୁଇଂତର୍ କିଆଉଁଆଃ ବ୍ଲେକେ ।
୧୯ ଅ ବୟାଁ ଆରି ତନାଇଂ ପେଇଂନେ ବିତ୍ରେବାନ୍ ଜାଣ୍ଡେ ଜଦି ଗାଲି ଉମୁଁଆଃ ୱେଏ ବାରି ବିନ୍ରେ ମୁଇଂଡା ଆମେକେ ସତ୍ ଗାଲି ପାକା ଆଣ୍ଡେ ଡୁଂପାଂଏ ୨୦ ✡୧ ପିତର୍ ୪:୮.ତେଲା ମନେ ବପା ଜା ବିନ୍ ଗାଲିବାନ୍ ପାପିକେ ଆଣ୍ଡେ ୱା ଡୁଂପାଂଏ ମେଁ ଆତେନ୍ ପାପିନେ ଆତ୍ମାକେ ଗୁଗୁଏନେବାନ୍ ରକ୍ୟା ଡିଂଏ ଆରି ମେଁ ନିଜର୍ନେ ଗୁଲୁଏ ପାପ୍ କେମା ଡିଂଏ ।