ଯୋହନଙ୍କ ପ୍ରତି ପ୍ରକାଶିତ ସାମୁଆଁ
ଜହନ୍ନେ ଡାଗ୍ରା ଆଃସୁଏକ୍ନେ ସାମୁଆଁ
ପ୍ରକାସିତ୍ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ପ୍ରକାସିତ୍ ସାମୁଆଁ ତ୍ମି ନିୟମ୍ ବଇନେ ସାରାସାରି ସାସ୍ତର୍ । ଆକେନ୍ ଣ୍ଡିଗ୍ ଜହନ୍ନେ ବାନ୍ ଜିସୁକିସ୍ଟନେ ଜନମ୍ନେ ପାକାପାକି ୯୫ ମସିଆରେ ଗୁଆର୍ବଗେ ୧:୧ । ମେଁ ଜହନ୍ ନିମାଣ୍ଡାସାମୁଆଁ ଏତେ ଞ୍ଜିକ୍ଲିଗ୍ ବଇ ସର୍ତେ ଡିଗ୍ ଗୁଆର୍ବଗେ ଡିରକମ୍, ୧ ଜହନ୍ ୨ ଜହନ୍ ୩ ଜହନ୍ । ଜହନ୍ ଆଜାକେ ଜିସୁ ମାଲେ ବଲ୍ ବାଡିଂଗେ ଡାଗ୍ଚେ ଡିଗ୍ ମ୍ୟାଃଡିଂଏ ଜହନ୍ ୧୩:୨୩ । ଜହନ୍ ଆଇସ୍ଲାଣ୍ଡ୍ନେ ପାତ୍ମସ୍ନ୍ନିଆ ଲେଃକ୍ନେ ବେଲା ଆକେନ୍ ପ୍ରକାସିତ୍ ସାମୁଆଁ ଗୁଆର୍ବଗେ । ଡାଗ୍ଲା ଜିସୁକିସ୍ଟନେ ନିମାଣ୍ଡାସାମୁଆଁ ବାସଙ୍ଗ୍ ନ୍ସା ଆମେକେ ଆତ୍ଅରିଆ ବେବଆର୍ଗେ ୧:୯ ।
ଜିସୁ ବାର୍ମୁଇଂତର୍ ପାଙ୍ଗ୍ନେ ବେଲା ଡାଗ୍ରା ପାଙ୍ଗ୍ଡିଂକ୍ନେସା ଜିସୁକିସ୍ଟନେ ଡାଗ୍ରା ବିସ୍ବାସ୍ ଡିଂଚେ ଲେଃନେ ନ୍ସା ସାସ୍ତର୍ ଲଃଣ୍ଡ୍ରେକେ ସାହାସ୍ ଆରି ଆସା ବିଃନେ ନ୍ସା ଜହନ୍ ଆକେନ୍ ପ୍ରକାସିତ୍ ସାମୁଆଁ ଗୁଆର୍କେ ୧:୩; ୨୨:୭ । ଆତେନ୍ ସର୍ତେ ବିସ୍ବାସି ବାରି ନିଜର୍ ଇକ୍ଚାରେ ଗୁକ୍ଲିଗ୍ ମଣ୍ଡଲିକେ ଆକେନ୍ ଗୁଆର୍ଡିଂକେ ୨–୩ । ଜହନ୍ ମେଁନେ ଗୁଗୁଆର୍ନ୍ନିଆ ବାବବାନି ୧:୩ ଆରି ମେଁ କେଲେଃକ୍ନେ ଗୁଲୁଏ ରୁପ୍ ବିସଏରେ ଗୁଆର୍ଡିଂକେ । ଆକେନ୍ ସାସ୍ତର୍ନ୍ନିଆ ଉଡ଼ିକ୍ଲିଗ୍ ବାଗ୍ନ୍ନିଆ ବାୱିର୍ ସାସ୍ତର୍ନେ ବାଗ୍ ଏତେ ସମାନ୍ ଲେଃକେ ବିନ୍ପାକା ଯିଖରିୟ ୬:୧-୮ ନ୍ନିଆ ନେଃକେଏ । ଡିରକମ୍ ଗୁକ୍ଲିଗ୍ ପ୍ନିଃ ଆରି ଗୁକ୍ଲିଗ୍ ଙ୍କୁଇ ଆଣ୍ଡିନେକି ଇସ୍ପର୍ ମିସରିୟଇଂକେ ଡଣ୍ଡ୍ ବିଃନେ ନ୍ସା ମୁର୍ଡି ବେଡିଂକେ ଯାତ୍ରା ୭–୯ । ପ୍ରକାସିତ୍ ସାମୁଆଁ ସାରାସାରି ବେଲା ଆଃମ୍ୟାଏ । ଜିସୁ ଇଡ଼ିଂ ଜିତେଏ ଆରି ଜାଣ୍ଡେଇଂ ମେଁଡାଗ୍ରା ଆସା ଡିଂଆର୍ଡିଂକେ ମେଁଇଂ କାଲାଆଃ ମେଁ ଏତେ ଲେଃଆର୍ଏ । ଆକେନ୍ ବଇ ଆପେକେ ତରକ୍ ଆଃଡିଂବିଃଏ ଆରି ଆସା ବିଃଏ ଜେ ଜିସୁ ଡିରକମ୍ ଗିଆଃ ଆଣ୍ଡେ ପାଙ୍ଗ୍ଡିଂକେ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ଜହନ୍ନେ ସ୍ନାମୁଁଆଃ ଆରି ମେଁନେ ଇଡ଼ିଂଡେନେ ଦର୍ସନ୍ । ୧:୧-୨୦
୨. ଜିସୁ କ୍ରିସ୍ଟନେବାନ୍ ଗୁକ୍ଲିଗ୍ ମଣ୍ଡଲି ନ୍ସା ଜହନ୍ନେ ସାମୁଆଁ । ୧:୧–୩:୨୨
୩. ଗୁକ୍ଲିଗ୍ ଡାବୁ ଗୁକ୍ଲିଗ୍ ପ୍ନିଃ ବିସୟ୍ରେ ଗୁଆର୍ବକେ । ୪:୧–୧୧:୧୯
୪. ଗଡ଼େଇଂ ଆରି ଗୁକ୍ଲିଗ୍ ବାଆଃ ଲେଃକ୍ନେ ବାୱିର୍ ବୁବଃ ଏତେ ଜୁଦ୍ । ୧୨:୧–୧୪:୨୦
୫. ଗୁକ୍ଲିଗ୍ ରିସାନେ ମୁତା ବିସୟ୍ରେ ଗୁଆର୍ବକେ । ୧୫:୧–୧୬:୧୮
୬. ଇସ୍ପର୍ କିତଂନ୍ନିଆ ମେଁନେ ସତ୍ରୁକେ ଜୁଦ୍ବାନ୍ ଜିତେଏ । ୧୭:୧–୨୦:୧୫
୭. ତ୍ମି କିତଂ ଆରି ତ୍ମି ଦର୍ତନି । ୨୧:୧–୨୨:୨୧
୧
୧ ମେଃନି ସାପା ଗିଆ ଗଟେନେ ୱେଡିଂକେ ଇସ୍ପର୍ ଜିସୁ କିସ୍ଟନେ ଡାଗ୍ରା ଆସୁଏବକ୍ନେ ମେଁନେ ମୁଇଂ ସାମୁଆଁ ଆକେନ୍ ଉଲିଆନ୍ନିଆ ଗ୍ନୁଆର୍ ଡିଂଲେଃକେ । ଆତେନ୍ ସାପା ସାମୁଆଁ ମେଁନେ ଗତିରେଇଂକେ ଆମ୍ୟା ନ୍ସା କିସ୍ଟ ମୁଇଂଡା କିତଂଦୁତ୍କେ ବେଚେ ମେଁନେ ଗତି ଜହନ୍କେ ଆତେନ୍ ଆମ୍ୟାକେ । ୨ ବାରି ଜହନ୍ ନିଜେ ମେଃନେ ସାପା କେଲେଃକେ ଆତେନ୍ ଆକ୍ଅରିଆ ଆଃତ୍ନାବକେ । ଆକେନ୍ ବଇନ୍ନିଆ ଇସ୍ପର୍ନେ ବ୍ନାଲିର୍ ଆରି ଜିସୁ କିସ୍ଟନେ ବାନ୍ ଆଃତ୍ନାକ୍ନେ ସତ୍ ସାମୁଆଁ ଗ୍ନୁଆର୍ ଡିଂଲେଃକେ । ୩ ମୁଡ଼ି ରେମୁଆଁ ଆକେନ୍ ଉଲିଆଃ ଲଃଏ ବାରି ଜାଣ୍ଡେଇଂ ଆକ୍ଅରିଆ ଗୁଆର୍କ୍ନେ ଇଡ଼ିଂଡାମୁଏଃନେ ସାମୁଆଁ ଅଁଚେ ମେଁନେ ଆଦେସ୍ଇଂ ମାନେଃଆର୍ଏ, ମେଁଇଂ ସତେଆଃ ନିମାଣ୍ଡା, ଡାଗ୍ଲା ଆତେନ୍ ସାପା ଗଟେନେ ବେଲା ଡାଗ୍ରା ଡିଂଗେ !
ଗୁକ୍ଲିଗ୍ ମଣ୍ଡଲିକେ ସାର୍ଲନେ
୪ ✡ପ୍ରକାସିତ୍ ୪:୫.ନିଂ ଜହନ୍ ଆସିଆ ମ୍ନା ଦେସ୍ନ୍ନିଆ ଲେଃକ୍ନେ ଗୁକ୍ଲିଗ୍ ମଣ୍ଡଲିକେ ନିଂ ସାର୍ଲଣ୍ଡିଂକେ । ଇଡ଼ିଂଡେ ଅଃସେ ଆରି ଏଃକେନ୍ନେ ଜିବନ୍ତ ଇସ୍ପର୍ ମେଁନେ ସିଂଆଁସନ ଡାଗ୍ରାନେ ଗୁକ୍ଲିଗ୍ ଆତ୍ମା, ୫ ବାରି ଗୁଏନେବାନ୍ ମ୍ବ୍ରକ୍ନେ ସାପାଟୁ ପର୍ତୁମ୍ ବିସ୍ବାସ୍ନେ ସାକି ବିଣ୍ଡ୍ରେ ଆରି ଦର୍ତନିନେ ଇଃସାଙ୍ଗ୍ନେ ଇଃସାଙ୍ଗ୍ ଜିସୁ କିସ୍ଟନେ ଆଲାଦ୍ ଆରି ସାନ୍ତି ପେ ଆଡ଼ାତ୍ରା ଡିଂଲେ । ମେଁ ଆନେକେ ବଲ୍ ବାଡିଂକେ ଆରି ମେଁନେ ଗୁଏକ୍ନେ ନ୍ସା ଆନେକେ ପାପ୍ବାନ୍ ଉଦାର୍ ଡିଂବକେ । ୬ ✡ପ୍ରକାସିତ୍ ୫:୧୦.ବାରି ମେଁନେ ଆବା ଇସ୍ପର୍ନେ ପୁଜା ଡିଂନେ ନ୍ସା ଆନେକେ ମୁଇଂ ପୁଜାରି କୁଲ୍ ଆଡିଂବକେ । ସାପା ଆସିର୍ବାଦ୍ ଆରି ବପୁ କାଲାଆଃ ଜିସୁ କିସ୍ଟନେ ଡିଂଲେ । ଆମେନ୍ ।
୭ ✡ମାତିଉ ୨୪:୩୦; ମାର୍କ ୧୩:୨୬; ଲୁକ୍ ୨୧:୨୭; ୧ ତେସଲନିକିୟ ୪:୧୭; ଜହନ୍ ୧୯:୩୪,୩୭; ମାତିଉ ୨୪:୩୦.କେଲା ମେଁ ତ୍ରିଗ୍ଡିଆନିଆ ପାଂଡିଂକେ ଦର୍ତନିନ୍ନିଆ ବାସା ଡିଂକ୍ନେ ରେମୁଆଁଇଂ ସାପାରେ ଆମେକେ କେଆର୍ଏ; ଡେକ୍ସୁଗୁଆ କି ଜାଣ୍ଡେଇଂ ଆମେକେ କୁରୁସ୍ନ୍ନିଆ ଡାଃ ବଆର୍ଗେ ମେଁଇଂ ଣ୍ଡିଗ୍ ଆମେକେ କେଚେ ବୁଟଚେ ଅଃ ଆର୍ଏ । ଏନ୍ ସାପା ସତ୍ ଗଟେଏ - ଆମେନ୍ ।
୮ ✡ପ୍ରକାସିତ୍ ୨୨:୧୩.ସାପାଟୁ ବପୁନେ ମାପ୍ରୁ ଇସ୍ପର୍ ବାସଙ୍ଗ୍ଡିଂକେ “ନିଂ କ ଆରି କ୍ଷ” ମେଁ ଅଃସେ ଲେଃଗେ, ଏଃକେ ଲେଃକେ ବାରି ଇଡ଼ିଂଡେ ପାଙ୍ଗ୍ଏ ।
କ୍ରିସ୍ଟ ଦର୍ସନ୍ ବିକେ
୯ ନିଂ ଜହନ୍ ପେନେ ମୁଇଂ ବୟାଁ ଜିସୁନେ ସିସ୍ ସୁଗୁଆ ମେଁ ରାଜ୍ୟନେ ରେମୁଆଁଇଂନେ ଆଡ଼ାତ୍ରା ଡିଂଡିଂକ୍ନେ କସ୍ଟ ଡାଟ୍ନେ ଏତେ ସମ୍ବାଲେନେ ନ୍ସା ନିଂ ପେନେ ମୁଇଂ ରେମୁଆଁ । ଜିସୁ ଆସୁଏ ବକ୍ନେ ସତ୍ ଆରି ଇସ୍ପର୍ନେ ସାମୁଆଁ ବାସଙ୍ଗ୍ନେ ନ୍ସା ନିଂ ପାତ୍ମସ୍ ଇନିନ୍ନିଆ ବନ୍ଦି ଡିଂଚେ ଡୁଙ୍ଗ୍ୱେ ବଆର୍ଗେ । ୧୦ ମାପ୍ରୁନେ ବେଲା ପବିତ୍ର ଆତ୍ମା ଆନିଂ ଗେରେକେ ବାରି ନିଂନେ ପ୍ଲାପାକା ପ୍ନି ସବ୍ଦ ରକମ୍ ମୁଇଂ ମ୍ନା ସବ୍ଦ ଙକେ । ୧୧ ଜାଣ୍ଡେ ମୁଇଂଡା ଆନିଂକେ ବାସଂକେ “ନାଁ ମେଃନି କେନାଡିଂକେ ଆତେନ୍ ମୁଇଂ ଉଲିଆଃନ୍ନିଆ ଗୁଆର୍ ବ ବାରି ଏଫିସିୟ ସ୍ମର୍ଣ୍ଣା ପର୍ଗାମମ୍ ଥିଆଟିରା ସାର୍ଦ୍ଦିସ୍ ଫିଲାଦେଲ୍ଫିଆ ଆରି ଲାଓଦିକିଆନିଆ ଲେଃକ୍ନେ ମଣ୍ଡଲିଇଂନେ ଡାଗ୍ରା ମୁଇଂ ଉଲିଆଃ ବେ ବିଃ ।”
୧୨ ଜାଣ୍ଡେ ନିଂ ଏତେ ସାମୁଆଁ ବାସଂଡିଂକେ କିକେ ନ୍ସା ନିଂ ପ୍ଲାପାକା ପ୍ଲେଗ୍ଚେ ଙ୍କେକେ ଗୁକ୍ଲିଗ୍ ସୁନା କୁପିସ ୧୩ ବାରି ଆତ୍ଅରିଆ ରେମୁଆଁ ଗଡ଼େଅ ରକମ୍ ମୁଇଂଡା ତୁଆଁ ଲେଃଗେ । ମେଁନେ ସ୍ନପୁଆ ଞ୍ଚ ଜାକ ଚ୍ଲେ ୱେଲେଃଗେ ବାରି ମେଁନେ ଗ୍ରିନିଆ ମୁଇଂ ସୁନା ବନ୍ଦ୍ନି ଗାଗ୍ ବଗେ । ୧୪ ମେଁନେ ବାଆଃନେ ଉଗ୍ବ ଆରେଣ୍ଡିଆ ସୁଗୁଆ ତୁଲୁଏ ଲେଃଗେ ଆରି ମେଁନେ ମୁଆଃ ଡୁଆକ୍ନେ ସୁଆ ସୁଗୁଆ ଡୁଆଡିଂଗେ । ୧୫ ମେଁନେ ଞ୍ଚ ମ୍ବାକ୍ଲିଗ୍ ସୁଆନ୍ନିଆ ନିମାଣ୍ଡା ପିତଲ୍ ସୁଗୁଆ ତ୍ନାଡିଂଗେ ବାରି ମେଁନେ ତୁମୁଆଃ ସବ୍ଦ ଜର୍ନାଣ୍ଡିଆଃ ସୁଗୁଆ ନ୍ନାଂଡିଂଗେ । ୧୬ ମେଁ ମେଁନେ ଞ୍ଚଂତିପାକା ଗୁକ୍ଲିଗ୍ ଚାଙ୍କୁଆ ସାଃଲେଃଗେ ବାରି ମୁଇଂ ଡିଗ୍କ୍ନେ ବ୍ନାର୍ଡିଗ୍ କାଣ୍ଡା ସାସନ୍ ଆରି ନ୍ୟାୟ୍ ଡିଂନେ ସାମୁଆଁ ମେଁନେ ତୁମୁଁଆବାନ୍ ପୁଏତାର୍କେ । ମେଁନେ ସାର୍ମୁଆଁ ସ୍ମିନେ ସ୍ନି ସୁଗୁଆ ତାର୍କିଗ୍ ଲେଃଗେ । ୧୭ ✡ପ୍ରକାସିତ୍ ୨:୮; ୨୨:୧୩.ଆମେକେ ଙ୍କେକ୍ନେ ଦାପ୍ଡ଼େ ନିଂ ଗୁଏଃକେରକମ୍ ମେଁନେ ଞ୍ଚ ଆଲ ଲଃଙ୍ୱେକେ । ମେଁ ମେଁନେ ଞ୍ଚଂତି ନିଂ ଆଡ଼ାତ୍ରା ବଚେ ବାସଂକେ “ଆବ୍ଟଗେ ନିଂ ସିସେ ଆରି ସାରାସାରି । ୧୮ ନିଂ ନିଜେ ମ୍ବ୍ର ନ୍ଲେଃକେ; ନିଂ ଗୁଏ ନ୍ଲେଃଗେ ମାତର୍ ନିଂ ଏଃକେ ମ୍ବ୍ର ନ୍ଲେଃକେ, ମାଡାନେ ଜୁଗ୍ ଜାକ ମ୍ବ୍ର ନ୍ଲେଃଏ । ଗୁଗୁଏନେ ଆରି ନର୍କନେ କୁଚିକାଡ଼ି ନିଂ ନ୍ତିନ୍ନିଆ ଲେଃକେ । ୧୯ ତେନ୍ସା ନାଁ ମୁଡ଼ି ସାପା ବିସଏ କିକେନାଡିଂକେ, ମୁଡ଼ି ସର୍ତେ ବିସଏ ଏଃକେ ଗଟେଡିଂକେ ଆରି ମେଃନି ସାପା ଇଡ଼ିଂଡେ ଗଟେଏ, ଆତେନ୍ ଗୁଆର୍ଚେ ବ । ୨୦ ନିଂନେ ଞ୍ଚଂତିନ୍ନିଆ ଲେଃକ୍ନେ ଗୁକ୍ଲିଗ୍ ଚାଙ୍କୁଆ ଆରି ଆକେନ୍ ଗୁକ୍ଲିଗ୍ ସୁନା କୁପିସନେ ସତ୍ ସାମୁଆଁ ଡିଂଡିଂକେ, ଚାଙ୍କୁଆଇଂ ଗୁକ୍ଲିଗ୍ ମଣ୍ଡଲିନେ ଦେବ୍ଦୁତ୍ ବାରି କୁପିସଇଂ ଗୁକ୍ଲିଗ୍ ମଣ୍ଡଲି ।”