19
Faaruu Gaddaa
1 «Faaruu gaddaa qondaaltota Israa'eliitiif faarsa'aatii:
2 «‹Haati teeti neenqota keessaa neenqa dhalaa attamii ti!
Isiin neenqota dardara odduu ciittee,
ilmoolee ifii guddifatte.
3 Isiin ilmoolee ifii keessaa tokkocha guddifatte;
innille neenqa dardara te'e;
adansee qabatiisa baratee, nama nyaate.
4 Gosi biyya adda addaa marroo isaa dhageette;
inni boolla isaan qotane keessa seenee qabame;
Isaanille hookkoo itti keyanee
harkisanee gara biyya Gibxi'ii geessane.
5 Addiin isi'ii bu'aa akka hin qanne,
wonni isiin eegatte akka isi'ii hin teene yennaa dhaggite,
ilmoolee ifii keessaa ka dhibii fuutee guddittee,
neenqa dardara goote.
6 Innille odduu neenqotaa asii fi achi ideeme;
neenqa dardara te'ee
adansee qabatiisa baratee, nama nyaate.
7 Inni kushee isaanii jadduu caccassee
qachaa isaanii balleesse; lattii fi wonni isii keessaa marti
dhangaa inni dhowuun sheephitte.
8 Achiin duuba gosi biyya adda addaa
karaa maraan isatti kaate;
isaan caccoo ifii isa irratti afanee,
inni boolla isaan qotane keessa seenee qabame.
9 Hookko'oon harkisanee gooree sibiilaa keessa keyanee
gara mootii Baabilonii geessane.
Dhangaan inni dhowu
gaarota Israa'elii irratti
deebi'ee akka hin dhage'ane
addee inni itti hidhamee eegamu keessa buusane.
10 Haati teeti muka woyni'ii
ka bisaan qarqaratti dhaabane,
ka sababa bisaan guddaa saniitiif
midhaan bacaa buusee banqaaqe fakkaatti.
11 Dameeleen isaa jajjabaattee,
ulee bokku'uu ta bulchitootaa teete.
Hojjaan isaatii fi dameeleen isaa bacaan,
ciggaa keessaa ol dheeratanee mudhatane.
12 Te'uu malee aari'iin buqqifamee lafatti gatame;
qilleensi goomole'ee ka karaa aduun baatuu
midhaan isaa qoorsee, irraa lafatti harcaasee goggosse;
dameelee isaa jajjadduu sanille ibiddi nyaate.
13 Amma muki woyni'ii goomolee keessa
addee bisaan hin jirre lafa goddu'utti dhaabame.
14 Qaccee damee muka woyni'ii guddittii keessaa
ibiddi bayee midhaan isaa mara nyaate;
dameen jadduun ulee bokku'uu ta bulchitootaa teetu,
ijjumaa irratti hin hanne› jedhi.
Tun faaruu gaddaa,
ta yennaa gaddaa faarfatanu» jedhe.