Ləkaləkatətə nyaahə ənji ka ənji
Ibəraaniya
1
Waɓənə ŋga Əntaŋfə ka ənji shiŋkinə da ma Uuzənaakii
1 Ma ŋga ŋukə ŋukə, kə waaɓi Əntaŋfə ka dzədzəshi'inaamə ka rəgwanyinə kama kama da ma anabinyinə. 2 Amma ma agi zamananə ŋga muudina, kə waɓi ci kaamə da ma uuzənaakii. Tə ci ta'i ci kaa patənə ŋga uushi'inə a ndzaanə aciikii. Daciikii əsə tagii Əntaŋfə duuniya. *1.2 Uuzənaakii: 5.8; daciikii tagii ci: Yooh. 1.2; Kwal. 1.16; Ibər. 11.3. 3 Dashikii neenə ənji ka ŋgeerənə ŋga ɗuunuunə ŋga Əntaŋfə. Ma ca, ndilə ndilə nə ci makə sətə ɗii Əntaŋfə. Tə'i ŋgeerənə ka waɓənaakii, ci kavə tə patənə ŋga duuniya ka dzənə aakəŋwa də waɓənəkii. Makə uugi ci wunəgi rəgwa ŋga tifyagi 'waslyakəənə ŋga patənə ŋga ənji shiŋkinə, kə ŋgirə ci aadəgyə, ca dzə ka ndzaanə dasə daciizəma Əntaŋfə Ŋwaŋwa agyanə meeminə patə. †1.3 2 Koor. 4.4; Kwal. 1.15; da ciizəma Əntaŋfə: 8.1.
Ɗuunuunə ŋga *Uuzənə ŋga Əntaŋfə
4 Ma Uuzənə ŋga Əntaŋfə, kə kavə Dii tə ci kaa ca palee ka malaa'ikanyinə, makə sətə palee ləmətə ikə ci ka ci ka natii də məghərəvənə. 1.4 Af. 1.21; Fil. 2.9. 5 Acii əntaa ka malaa'ika shi Əntaŋfə a bii oo'i, 1.5 Jab. 2.7; 2 Sam. 7.14; Mat. 3.17; Slənə 13.33; Ibər. 5.5.
“Uuzənaaki nə hə, daga ənshinə kə ndzaa nyi ka Duu.”
Ha'ə əsə, paa ci sha bii ka malaa'ika,
“Duu nə nyi, uuzənaaki nə hə.”
6 Amma ma ka saa'itə Əntaŋfə kədəhə ka sləkeenə ka mukajaakii aasəkə duuniya, kə bii ci, əŋki ci, 1.6 Jab. 89.28; 97.7.
“Wa patənə ŋga malaa'ikanyinə ŋga Əntaŋfə
a paslə tə ci.”
7 Ma malaa'ikanyinə əsə, kə waɓi Əntaŋfə agyanətii oo'i, ka kavənə nə ci tə malaa'ikanyinaakii kaa təya slənə ka ci, təya ndzaanə makə məɗa. Ca kavə tə tii əsə təya ndzaanə makə gana ŋga gunə. 1.7 Jab. 104.4. 8 Amma ma uuzənaakii, kə bii ci ka ci, əŋki ci, 1.8-9 Jab. 45.7-8.
“'Ya'ə Əntaŋfə, ma ŋwaŋuunaaku,
ŋga ca'ə ndəŋwə ndəŋwə nə ci.
Də gooŋgaanə cii kwa ɗa ŋwaŋuunaaku.
9 Kə kaɗeesəkə ka hə nə sətə da gooŋga agikii.
Ma sətə pooshi gooŋga agikii əsə, kə ɓiipaa ka hə səka.
Ci ɗii ta'i Əntaŋfwaaku tə hə,
waatoo Əntaŋfə rəŋwə dyaŋə,
kaa ha ndzaa da ɗuunuunə da mooɗasəka
palee ka patənə ŋga guvii-slənaaku.”
10 Kə waɓi Əntaŋfə ka ci əsə, əŋki ci, 1.10-12 Jab. 102.26-28.
“Slandana, hə tagii duuniya daga ka 'watəginə,
də ciinəku saaku ɗii hə səkəntaŋfə.
11 Patənə ŋga uushi'iitsa, ka uudəginə,
amma ma hə, ma'ə hə.
Ka iirəginə nə tii makə sətə ci kəjeerənə a iirəgi.
12 Ka fuuɗəginə nə hə tə tii,
makə sətə ci ənjə a fuuɗə baləwa.
Ka zə'uginə nə tii makə sətə ci kəjeerənə a zə'ugi.
Amma ma hə, ca'ə ndəŋwə ndəŋwə nə hə.
Pooshi muudinə ŋga əpinaaku əsə.”
13 Əntaa ka malaa'ika shi Əntaŋfə a bii, “Ndzaanə gadəvə da ciizəmaki, see maɗa kavə nyi tə hə kaa ha jaala agyanə ənji daawaanaaku.” 1.13 8.1; Jab. 110.1. 14 I wu saŋə nə malaa'ikanyina? Ma təya, ma'yanyinə nə tii ətə ca slənə ka Əntaŋfə. Tə tii cii kəya sləkee ka tsakənə tə ənjitə ca upaa luupaanə. 1.14 Jab. 34.8; 91.11.
*1:2 1.2 Uuzənaakii: 5.8; daciikii tagii ci: Yooh. 1.2; Kwal. 1.16; Ibər. 11.3.
†1:3 1.3 2 Koor. 4.4; Kwal. 1.15; da ciizəma Əntaŋfə: 8.1.
1:4 1.4 Af. 1.21; Fil. 2.9.
1:5 1.5 Jab. 2.7; 2 Sam. 7.14; Mat. 3.17; Slənə 13.33; Ibər. 5.5.
1:6 1.6 Jab. 89.28; 97.7.
1:7 1.7 Jab. 104.4.
1:8 1.8-9 Jab. 45.7-8.
1:10 1.10-12 Jab. 102.26-28.
1:13 1.13 8.1; Jab. 110.1.
1:14 1.14 Jab. 34.8; 91.11.