Lav Zǝɗane
a vinzdga
Mat
Farsa kwar lav
Kaɗkaɗ na, Mat kǝ vindzgan. Dǝge tuku ɗakhana in kwarne, Dadzikan kǝ bǝdu. Nenan kǝ dadak li chaw khadam ai ɗuda tlǝr sar kǝ nǝga kǝ fur Yasu. Ən kaɗkaɗ Markus zǝ Luk, ǝn ɗakha dǝ tlǝrna ɗakha sare Lawi ud. Ən vǝgakhe a dal, a tǝga Yazhigǝl ad lanji, diwa vak tlayangakh, kǝ ɓǝlaɓǝla dǝ Kristu da vak Yakhudakh. Kristu dadake a ghitsa vanan, dadake da saks da man wuliwa tlǝks. A vindzǝga Mat a dina kǝ kaɗkaɗ kǝ sukwtakh sar Yakhudakh. Kǝ ǝmdla kwarne, Yasu zǝr Nazǝrat, in Kristu, dadak kat. Tsuguna kǝ ǝmdlada wakhada giɗa sar kǝ tlǝksa Yazhigǝl. A tsukwanan ad ghǝr kǝ mǝdlada ɗule a righanǝf Yasu ad vindzakhe ǝn kaɗkaɗ mughur lanji ai ǝn kwar lavǝn tǝghǝr kǝ Kristu, dadak man tlǝks. Ina kǝ kaɗkaɗ matla lave ǝn tǝbkǝ mughura lanji zǝ wilwa lanji wirva kǝ righada hihisar kǝ lav tlayang.
Madǝv kur tugwado tugwa ad kaɗkaɗǝn, tsǝnam tsǝna ad lav Mat chuwaɗaɗ. Yasu in Kristu, Shik ǝn tǝghǝr kǝ shikakh, zǝ Dadzikan ya dadzikanakh. Dǝgakhana daghan kǝ ǝmdlanan kwarne, zǝr Yazhigǝl Yasu. Ghǝrmar tsuguna, khayanǝf kiyam kǝ ɗabaɗab, wirva Dadzikan mara zǝ dad kat.
Detla na kǝ lav
Farsa giɗa Yasu zǝ mantlǝr sar (1:1-4:25)
Kwardu lav Yazhigǝl ǝn tǝ ghuɓ (5:1-7:29)
Tsagdutsaga daghanghan, Jakvakh, zǝ ɗaya dzanakakh (8:1-18:35)
Degal da Wurshalim zǝ mbasa ɓǝl magi (19:1-23:39)
Lav tlayangakh ǝn tǝghǝr kǝ dǝgakhe da dzoghǝr dzǝg (24:1-25:20)
Əmtsa Yasu zǝ tsiya sar (26:1-28:20)
1
Ndazhazhana kǝ tugwa mbǝrt Yasu
(Luk 3:23-38)
1 Ina ndazhazhana kǝ tugwa mbǝrt Yasu Kristu, zǝr Dod, zǝr Brakhim.
2 Brakhim kǝ yiga Ishaku,
Ishaku kǝ yiga Yakub,
Yakub kǝ yiga Yakhud zǝ zarbabakh sar,
3 Yakhud kǝ yiga Perez zǝ Zera ai yiga Tamar,
Perez kǝ yiga Khezron,
Khezron kǝ yiga Ram,
4 Ram kǝ yiga Aminadab,
Aminadab kǝ yiga Nakhshon,
Nakhshon kǝ yiga Salmon,
5 Salmon kǝ yiga Boaz, bab sara Rakhab,
Boaz kǝ yiga Obed bab sara Rutl,
Obed kǝ yiga Yese,
6 Yese kǝ yiga Dod shik.
Dod kǝ yiga Sulemanu ai yiga nus Uri.
7 Sulemanu kǝ yiga Rekhobom,
Rekhobom kǝ yiga Abij.
Abij kǝ yiga Asa,
8 As kǝ yiga Jekhoshafat.
Jekhoshafat kǝ yiga Joram,
Joram kǝ yiga Uzi.
9 Uzi kǝ yiga Jotlam,
Jotlam kǝ yiga Ahaz.
Ahaz kǝ yiga Khezikay,
10 Khezikay kǝ yiga Manas.
Manas kǝ yiga Amon,
Amon kǝ yiga Yosi.
11 Yosi kǝ yiga Yekoni, zǝ zarbabakh sar ǝn tǝ sarte tsa khutsalud udakh ya Yakhud da man vǝɓ ǝn Khay ya Babil.
12 Ən tǝ khal kǝ ɓǝtral ɓa tsud da khaya Babil.
Ka yiga Yekoni ad Sheyaltiyal.
Sheyaltiyal kǝ yiga Zerobabel,
13 Zerobabel kǝ yiga Abikhud.
Abikhud kǝ yiga Eliyakim.
Eliyakim kǝ yiga Azor,
14 Azor kǝ yiga Zadok,
Zadok kǝ yiga Akim,
Akim kǝ yiga Eliyud
15 Eliyud kǝ yiga Eliyazar,
Eliyazar kǝ yiga Matan,
Matan kǝ yiga Yakub,
16 Yakub kǝ yiga Yusuvu zil Maryam, Maryam tsuguna ka yigan ad Yasu ai ɗakhdud dǝ Kristu.
17 Tsiyif ǝnt Brakhim kakh da tǝ Dod, a nala kǝ kǝlgwidz klatǝm ufaɗ. Tsiyif ǝn tǝ Dod, tsa kǝlgwidz klatǝm ufaɗ ǝn sarte a dzǝtrarud ak Izrailakh da man vǝɓ ǝn Babil. Tsiyif ǝn tǝ sarte tsǝn manud vǝɓ ǝn Babil da tǝ sarte yigdud Kristu tsa kǝlgwidz klatǝm ufaɗ.
Yig Yasu Kristu
(Luk 2:1-7)
18 Auna ɗule a yigdud Yasu Kristu. Ən sarta sǝb Maryam bab Yasu kǝ Jisav, kǝda nguɗatra sǝba tsuda, ka dzoghǝr khuɗ tsin tǝ dǝva dǝ ndzǝɗa Sǝɗikw Chuwaɗaɗan. 19 Jambu sar Jisava ud charan, nagh ba dǝ kǝɗara zhiru ǝn tatak udakh bi. Ka ɗayanan ad ghǝr kǝ tǝkaghera tsitar ɓǝghanyan.
20 Madvin ǝn ɗaya ghǝra, dzagwdlam ǝmdlawala zǝrɓǝla Yazhigǝl tsin ǝn suwan. Niya tsin, “Jisav zǝr Dod, a ɗuwa gǝdza kǝ zǝɓ Maryam kǝ nǝga kǝ nusagh, wirva khuɗsarna a sa tǝdǝva dǝ ndzǝɗa Siɗikw Chuwaɗaɗan. 21 Da yigayiga dǝ zǝr dǝɗungw, da barva bǝg kha ɗakha Yasu. Wirva in da kat yakhtar ǝn khaipakh tar.”
22 Daghan ina a dzoghǝr kǝ righada dǝge a kwarga Dadzikan tǝ dǝva dǝ tlayang kwarne, 23 “Da dlǝgh khuɗ dughmbǝl, da yiga yiga ad zer. Ka da barva ɗakhud Manuwel.” Dǝge tuku Manuwel na in kwarne “Dagha kǝnda zǝ Yazhigǝl.”
24 Tsiyif kǝ Yusuvu ǝn khara, ka gatars kǝ lave a kwararkhe zǝrɓǝla Yazhigǝl. Yusuvu tsuguna ka ɓǝf ad Maryam kǝ nǝga kǝ nus sar. 25 A khǝnarghǝr bi, ba yiga tsin zǝr sar. Ka barva Yusuvu ad ɗakha Yasu.