Ino Palunguwa Turakki Juan
Ino Mappeafu Sitawa Turak
Ino nanurak sitaw, i Juan a tata a adalani Jesus a nebumbulun sikwana sin nagyananna sito lubag. Neturaꞌnga yaw sino manguruwira a nagyan sino palulubbunna Asia Menor. Lakayin sin nanurakkanna sitaw.
Ino gafuneno niturakkanna taw, se agyanin nekatwayira sino nanguruwira a nanulduwera si bakkanna gakkurug mappeafu ki Jesu Kristo. Netuldura si amminira a ana sito lubag, nalamitanira si narakkat. Antu gafuna, amme kanu nabbaliyi Kristo si gakkuruwa tolay. Netuldura kappay si i Jesus, bakkannino Mesias onnu Kristo a Abbingi Dios. Bakkampelangino netuldureno nabbakabakkan, nu ammena kappelurino akwanda, se sinapiꞌda si massiki amme talekkuranino manguruwireno liwaꞌda anna massiki ammera makkaaanggam, nalawaggepay.
Antu gafuna, sinaꞌdaggani Juan sino mabbasera sitaw si i Jesu Kristoweno Abbingi Dios a nabbali si tolay. Nepipidwana kappaya nassapit si ino tolaya manggam ki Dios, anggamma kappenaddino bafulunnera anna tuntulanna naddino tunira i Dios.
Ooddu peneno mabasa sitawa mappaanggam sino nakantama mangurug: ino kakkaꞌbawa agganggammi Dios sikwatam, ino akwantammad ta madalusanino ammina rakkattam, ino akwantammadda mangaffut sino ana sito lubagga kumontara ki Dios, andino pangammuwantam si ana sikwatamino biyaya mannayun.
Ino Baggaꞌna Yaw
Ino gafuneno turak 1:1-4
Ino pattalaginarantam sino baggaw onnu sino lammuk 1:5–2:29
Ino nalawara biyayino abbingira i Dios 3:1-10
Ino pakkaaanggammanino abbingira i Dios 3:11-24
Ino pangammuwan sino gakkurug anda sino bakkanna gakkuruwa tuldu 4:1-6
Ino agganggammi Dios andino agganggammino mattalaginad ki Dios 4:7–5:5
Ino pitaꞌdagganda si Abbingi Diosi Jesu Kristo 5:6-12
Ino dama a ammuwanino manguruwira sino Abbingi Dios 5:13-21
1
Ino Sapita Mangaꞌda Si Biyaya Mannayun
1-2 Sitawa turak, aneno sapitammi sikwayu mappeafu sino mingngan si Sapit. Antuwi Jesu Kristo a mangaꞌda si biyaya mannayun. Agyanin ki Dios a Amana sin liyekepaya naparatu yo lubag, udde nabbali si tolay sin nappaitanna sito lubag. Antu gafuna, initamingke, diningngammiyeno damiꞌna, anna inappangammi kappay. 3 Ituldumi inayira a initami anna diningngammi takesi mesapakkayu pay sikwami sino kebulunammi ki Dios a Ama anni Jesu Kristo a Abbingnga. 4 Ituraꞌmiyera yaw takesi maanggammetamungke.
I Dios, Kunnangke Sirwat
5 Inaya diningngammi sino Abbingi Dios, antuweno ipakaammumi sikwayu: i Dios, kunnangke sirwat, se awaningke lammuk sikwana. 6 Nu kuntam si mebumbulunetam ki Dios, gampade mangwetangkepay si narakkatta kunnangke agyanetangkepay sino lammuk, massisiriyetam, se ammena mekunneno akwantam sino kakuruwan. 7 Udde nu mattalaginaretam sino baggawa kunna payino akwani Dios, nalawarino abbafaruluntam annino buluntamira a mangurug, anna maunafan amminino liwattam gafu sino ada i Jesus a Abbingnga. 8 Nu kuntam si awana liwattam, sinsiriyantamino baggitamungkepay, e ammena gakkuruwino dinandantam. 9 Udde nu ipunnutamino liwattamira ki Dios, pakomannenaya liwat anna dalusandetam sino ammina rakkattam. Matalakki Dios a mangwa si kunnenoy, anna naggaddang nu akwanna, gafu sino natayani Kristo. 10 Nu kuntam si ammetam nalliwat, pabbalintami Dios si sariyon, e awanino sapiꞌna sino nakantam.