ROM
Khe Por Romiŋ Ndi Khergi Gap
Khe fharav ganɨnga buni khare.
Por khueŋ nzuav ana kha gava khergiap, Romiŋ ndi mbarigi. Ana Rom ŋgu bakɨmen guigira Zisas khothɨgap ana zɨn panan ruagi gumgi gu mbigi ganɨngeŋ vuzvugiap, mba gava khergiap, mbe ndi mbarigi. Ana khueŋ vuzvugi, ana ŋgɨp, tuga tɨvaneŋra mbe phorgɨ kegɨp, mbe thav ŋgɨp, Spenan Fhe Bakɨme buni vhuuiŋ bun suanga. Por mba gava kherav, ana guigira Krais buni vhuuiŋ, ana guigira nta siga sarav, nta bun mbe nzuav, vhɨra ana zɨn vui gumgi gu mbigi kɨrga kɨrɨr tɨvi mbun mbe nzuai. Por mba gava kherav, ana fharav won raar vhuun mba guigira Zisas khothɨgap ana zɨn vui gumgi gu mbigi mbe Roman ki, ana raar vhuun mbe ndɨɨv khaŋ mbe nzuai, “Gu zazera nden kurkura zav nde nzuav Fhe Bakɨme phorga nzuai.” Ana maaŋ mbe suaŋgiap, ana zumgum mba gava khergiap, mbe ndi mbai, ne nɨɨeŋ bun mbe nzuai. Ana khaŋ mbe nzuai, “Nza guigira Zisas khothɨgi, mba tuavra, nza Fhe Bakɨme nɨman nza tɨvir vhuuiaŋ mbui gumgi gu mbigi ki.” 1.17 Por khaŋ mbe nzuai, “Kha gumgi gu mbigi zam, mbe Zudaiŋ o, mbe harigi fhaiŋ ntɨɨri, mbe za tɨvi mbatɨgi ga mbui gumgi gu mbigi ma.”
Maaŋ muuŋgiap, Fhe Bakɨme mbe korar muuŋgip, ana taagip mbe ndigirga. Guma guigira Zisas Krais khothɨgɨrga, Fhe Bakɨme taagip mba guma ndigirga. Mba guma, ana Fhe Bakɨmen kɨvntok kɨv, ana Zisas Krais phorga rɨgi gumgi kɨrga. Fhe Bakɨme maaŋ muuŋgip guma the ndigirga, mba guma, ana tɨvar kama ndigap, ana ana zɨn vui.
Ana fhum zɨn vugi tɨva vur, ana ana thagi. Ana tɨvar kama zɨn vui. Mba guma Fhe Bakɨme ana phorga kim, Fhe Bakɨmen Ŋinan Ŋaar guigira ana phorga ki. Maaŋ muuŋgiap, tɨvi mbatɨgi gu za rimgiap za vhɨzi ŋkasŋka, ana mbevav, ana gangirga tuktɨgi fhuvara. Kha gavar Sapta 5 kegap gara vov Sapta 8 thɨgi. Por Fhe Bakɨmen tɨvi nɨɨŋge bun nzuav, vhɨra Fhe Bakɨmen Ŋina Ŋaar guigira Zisas Krais khothɨgi gumgi gu mbigir ndavi vherir ŋgari ŋkasŋka bun nzuai. Kha gavar Sapta 9 kega vov Sapta 11 thɨgi. Por ana simtɨga bakɨme bun nzuai. Por vhɨra ana Zuda guma ma.
Mbe Zudaiŋ, mbe fhum Fhe Bakɨme mben wora mbuigi, mbe ana gumgi gu mbigi ma. Mbe Zudaiŋ, mbe ntigem, mben gumgi gu mbigi vhɨrve mbe kɨr Zisas ga segi. Mbe harigi fhain ŋguir ki gumgi gu mbigi vhɨrve, mbe ntigem, mbe guigira Zisas khothɨgap ana zɨn vui gumgi gu mbigi ki. Mbe Zudaiŋ, mbe fhu. Por ne nzuav khaŋ nzuai, mbe Zudaiŋ, mbe nduarira pham muuŋgi. Mbe mba Fhe Bakɨme mben muun zav mbui bigɨna bakɨme, mbe ne gangiap ne kaŋgi fhuvara. Por kha ndɨkndɨga mbui, mbe Zudaiŋ, mbe zumgum, mbe guigira Zisas khothɨgap ana zɨn vui gumgi gu mbigi vhen zirɨrga. Por kha gava kherav mba bunin mbe nzua vov, mpuur ana Zisas khothɨgap ana zɨn panan ruagi gumgi gu mbigi zɨn ŋgɨrga tɨva bun mbe nzuai. Ana guigira kɨvgiap kha tɨvar muun zav mbe nzuai, mba tɨv khare. Mbe guigira harigi gumgi gu mbigi vuzvugɨp, tɨvir vhuuiŋra mben muun za nzuai. Ana vhɨra Fhe Bakɨmen ŋaarar muuŋv, ŋgui gari guman pana piin kɨv, vhɨra harigi gumgir kurkurarga nen mbe nzuai.
Nza guigira Zisas khothɨgi tɨv, mba tuavra, nza Fhe Bakɨme nɨman nza tɨvir vhuuiaŋ mbui gumgi gu mbigi ki.
1
Por, Zisas wo ŋaarar muun zav ana farasarigim, ana wo mbua ruigi ŋaari neŋgi buni khare.
FG 9.15; 13.2; 22.21; 1 Ko 1.1; Ga 1.15Gu, Por, gu Krais Zisasan ŋaara guma. Ana nan kamgiap, na farasarigim, gu ana ŋaara guma ma. Ana won ŋaarar muun zav na farasarigi, gu Fhe Bakɨmen buna vhuueŋ bun suanga.
FG 26.6; Ro 3.21; 16.25-26; Ga 3.8; Ta 1.2Fhum Fhe Bakɨme kha buna vhuueŋ suaŋgi, ana kamthooŋ gumgi ana buneŋ khergim, mba buneŋ ana gavar ŋaarar ki. Mt 22.42; Ru 1.32; Zo 1.14; FG 2.30; Ro 9.5; Ga 4.4; 2 T 2.8Mba buni, anan Kama bun nzuai bunin vhuuiŋ ma. Anan Kam, ana guma guara gegi. Ana kha nuianan ŋgui vhɨrve gari guman pan Devit shɨgar mbiga mbe ana tegim, ana anan nzɨk ki. FG 13.33; Hi 9.14Ana Fhe Bakɨme han kegap, zergap, ana Fhe Bakɨmera fara muuŋgiap ŋgarigi. Fhe Bakɨme, ana won ŋkasŋka bakɨmen nza khɨvav, ana rimgim, ana taagia ana khavgi. Ana maaŋ muuŋgim, Fhe Bakɨme khuen nza khɨvigi, ana anan Kam ma. Ana Zisas Krais, ana nza Bakɨme ma. FG 26.16-18; Ro 12.3; 15.18; 1 Ko 15.10; Ga 2.7-9; Ef 3.8Zisas Krais ŋaarar panan Fhe Bakɨme fhura nzan kora muuŋgiap, ana zɨ kɨvɨr zav Fhe Bakɨme won buna vhuueŋ bun suanga ŋaarar muun zav nzan farasegi. Ana mba tɨvar muuŋgirim, mba harigi fhaiŋ ŋguir ki ntɨɨrir kamɨnga, mbe zam Zisas Krais khothɨgɨp, ana zɨn ŋgɨrga. Nde Romiŋ, nde vhɨra Zisas ntɨɨri ma. Fhe Bakɨme vhɨra nden kamgim, nde Zisas Krais ntɨɨri ki.
Nam 6.25-26; 1 Ko 1.2-3; 2 Ko 1.1; Ga 1.3; Ef 1.2; 1 Te 4.7Nde Roman guigira Zisas khothɨgi gumgi gu mbigi, Fhe Bakɨme won ndavar nde nɨɨŋgiap, nden kamgim, nde anan gumgi gu mbigi kim, gu kha gava khergiap mba bunin za nde ndi mbai. Nzan Ndia Fhe Bakɨme gum nzan Bakɨme Zisas Krais, mani fhura nden korar muuŋv, nden ndavir muuŋgirim, nde ndavi mbɨrav kɨri.
Por Romiŋ ganɨngane vuzvugi.
Fi 1.3; Kor 1.3-4; 1 Te 1.2; 1.8Gu fharav khaŋ nde suan za mbui. Gu khueŋ mbararagi, kha nuianan za kha ŋguir, kha gumgi nde Zisas khothɨgi tɨva shɨmandi. Maaŋ muuŋgiap, gu za nde ndɨkndɨgap, gu Zisas Krais zɨn panan, gu wo Fhe Bakɨmen ndikndigap ana phorga nzuai. FG 19.21; Ro 15.23; 15.32; 2 Ko 1.23; Ef 1.16; Fi 1.8; 1 Te 2.5; 2.10; 3.10; 2 T 1.3; Ze 4.15Gu guigira wo ndavar Fhe Bakɨme nɨɨŋgiap, anan ŋaara mbuav, ana Kaman buna vhuueŋ bun nzuai. Fhe Bakɨme kaŋgi, gu zazera nde ndɨkndɨgap nde nzuav ana phorga nzuai. 10 Gu zazera Fhe Bakɨme phorga nzuav, gu zazera khaŋ ana nzuai. Ana vuzvuk ma, ana vuzvugirga, ana na ndi tuavar muuŋgirga, gu nde han mbar ŋgɨrga. 11 Gu guigira nde ganɨngeŋ vuzvugi. Gu khueŋ nzuav, gu ŋgɨp, nde ganɨp, Fhe Bakɨmen Ŋina Ŋaar na farve panan won ŋaarar muun saŋv fhura nde ndɨɨi ŋkasŋka, ana anan nden nɨɨnga, ana nden kurarim, nde havhargirga. 12 Na ndɨkndɨk khaŋ muuŋgia ki. Gu vuzvugi, nde Zisas khothɨgi tɨv, ana nan kurkurarga, gu vhɨra Zisas khothɨgi tɨv, ana vhɨra nden kurarga. Mba tɨv za nza ndavi havhargirga.
13  Zo 15.15-16; FG 19.21; Ro 15.23; 16.7; Fi 4.17Nde na phorgap guigira Zisas khothɨgi gumgi, gu vuzvugi, nde tuituigip khueŋ kaŋgiri. Gu tugi vhɨrvera nden han ŋgɨr zav ndɨkndɨgi. Gu mbui ŋaar ana harigi fhaiŋ ŋgui gumgi gu mbigir kurkurigim, mbe guigira Zisas khothɨgap ana zɨn vui. Gu maaŋ muuŋgiap, vhɨra nden kurkurargane vuzvugi. Gu maaŋ muun za mbuim, bigi zazera na tuav gora zav ntige kha tugen hɨgi. 14 Fhe Bakɨme Grikin kurkura zav ŋaarar na ndɨɨv, ana vhɨra harigi ntɨɨrir kurkura zav ŋaarar na ndɨɨv, ana vhɨra mba ndɨkndɨgi vhuuiŋ ki gumgi gum ndɨkndɨk vhuuiŋ ki fhuv gumgir kurkura zav ŋaarar na nɨɨŋgi. Gu mba ŋaarara muunga. 15 Maaŋ muuŋgiap, gu Fhe Bakɨme buna vhuueŋ bun nde Romiŋ gumgi gu mbigi, gu nta bun nde suan zav nan ndav guigira khavgi.
Fhe Bakɨme buna vhuueŋ, ne Fhe Bakɨmen ŋkasŋka ma.
16  Sng 119.46; Mk 8.38; FG 3.26; 13.46; 1 Ko 1.18-24; 2 T 1.8Gu Fhe Bakɨme buna vhuueŋ bun suangen mberi fhu. Ne khaŋ muuŋgi, Fhe Bakɨmen ŋkasŋka, ana buna vhuuen ki. Mba ŋkasŋka, ana guigira Zisas khothɨgi gumgi gu mbigi, ana taagia mbe ndi. Mba ŋkasŋka, ana fhara Zudaiŋ ndigip, ana vhɨra harigi fhaiŋ ntɨɨri ndigɨrga. 17  Hab 2.4; Zo 3.36; Ro 3.21-22; Ga 3.11; Hi 10.38Mba Fhe Bakɨme buna vhuueŋra Fhe Bakɨme won tɨvar vhuun nza mbuav, tɨvir vhuuiaŋ mbui gumgi gu mbigir nzan kaai tuav kɨrar hɨgi. Nza Fhe Bakɨme khothɨgɨrga, ana kha zɨn nzan kamɨnga, nza tɨvir vhuuiaŋ mbui gumgi gu mbigi ma. Ne khaŋ muuŋgi, nza guigira Zisas khothɨgim, Fhe Bakɨme tɨvir vhuuiaŋ mbui gumgi gu mbigir nzan kaai. Ne nza ana khothɨgi tuavra kega vov, mba tuavra vhɨzgi. Fhe Bakɨme buni vhuuiŋ ki gap nera nzuai, “Guigira Zisas khothɨgi gumgi gu mbigi, Fhe Bakɨme kha zɨn mben kaai, mbe tɨvir vhuuiaŋ mbui gumgi gu mbigi ma. Mbe nzerara kɨrga.”
Gumgi gu mbigi za kɨr Fhe Bakɨme segi.
18  FG 17.30; Ef 5.6; Kor 3.6; 2 Te 2.12Nza kaŋgi, Fhe Bakɨme Hevenan kav, ana guigira won ndav shirɨ ndiv kɨra khɨngi. Ana mba kɨr ana segap tɨvi mbatɨgi ga mbui gumgi, ana mbe mbui tɨvi mbatɨgi, ana guigira vhega mbatɨgar ntan muuŋgirga. Mbe mba tɨvi mbatɨgi ga mbuav, mbe Fhe Bakɨme bun nzuai buni guari, mbe nta mbevigi. 19  Zo 1.9; FG 14.15-17; 17.24-28Mba gumgi, mbe Fhe Bakɨmen tɨvi vhɨrve, mbe nta kaŋgi. Fhe Bakɨme nduara mba tɨvir mbe khɨvigi. Mbe nta thav, kɨr ana segim, ana mba tɨva mbatɨgar mbe mbui. 20  Jop 12.7-9; Sng 19.1; FG 14.17; 17.27; Hi 11.3Fhum Fhe Bakɨme fhara guarara za kha bigi ga muuŋgi tugen kegap, zav ntige kha tuge thɨgi. Kha gumgi, mbe za ana muuŋgi bigi gangi. Mbe mba tuavar, mbe maaŋ muuŋgip kaŋgirga, Fhe Bakɨmen tɨvi mbari zorga khar ki. Mbe maaŋ muuŋgip Fhe Bakɨmen tɨvi nɨɨŋge kaŋgip, mbe vhɨra ana ŋkasŋka bakɨme ana zazera mbara muuŋgiap ki, mbe vhɨra ana kaŋgirga. Maaŋ muuŋgiap, guma the guigira khaŋ suanga fhu, “Gu kaŋgi fhu. Ne khaŋ muuŋgi, gu thaneŋ Fhe Bakɨme kaŋgi fhu.”
21  Jer 2.5; Ef 4.17-18Mbe Fhe Bakɨme kaŋgi, mbe ana zɨ ndiv vun kuamkuagi fhu. Mbe vhɨra ana ndikndigi bunin ana nzuai fhu. Mbe maaŋ muuŋgiap mben ndɨkndɨgi ŋanŋangiap gɨngɨngi, mbe fhura gɨngɨnan ki. 22  Jer 10.14; 1 Ko 1.20Mbe kav khaŋ nzuai, “Nza ndɨkndɨgi vhuuiŋ ki.” Fhuvara. Mbe guigira ŋanŋangi. 23  Lo 4.16-18; Sng 106.20; Jer 2.11; Ese 8.10; FG 17.29Mbe zazera mbara muuŋgiap ki Fhe Bakɨme, ana guigira ŋkasŋka ki, mbe kɨr ana segap, ana rotu mbui fhu. Mbe vhɨzi gumgi ntuu karav, mbe korgi ntuu karav, sɨgi ntuu karav, kurugi ntuu karav, mbaari ntuu karav, ntan rotu mbui.
Mba gumgi gu mbigi mbarkɨrga tɨvi mbatɨgi, mbe nta mbui.
24  FG 7.42; 14.16; 1 Ko 6.18; Ef 4.18; 1 Te 4.4Mba gumgi gu mbigi, mbe kɨr Fhe Bakɨme segim, Fhe Bakɨme maaŋ muuŋgiap mbe thagi. Maaŋ muuŋgiap, Fhe Bakɨme mbe thagim, mben ndɨkndɨgi mbatɨgi mbe ŋgɨrgim, mbe tɨvi mbatɨgi ga mbui. Mbe maaŋ mbuav wari tɨgap tɨvi mbatɨgir nduarira wari wo fhavi ndirara mbui. 25  Ais 44.20; Jer 13.25; 16.19; Amo 2.4; Ro 9.5; 1 Te 1.9; 1 Zo 5.20Mba khesharigi gumgi gu mbigi, mbe Fhe Bakɨmen buni guari, mbe nta thav, fhura guiguigi buni, mbe nta ndigi. Mbe nta ndigap, za kha bigi ga muuŋgi Fhe Bakɨme, mbe kɨr ana segap, mbe ana muuŋgi bigi, mbe nta rotu mbuav, nta piin ki. Fhe Bakɨme, ana za kha bigi nɨɨŋge ma. Maaŋ muuŋgiap, nza zazera ana zɨ ndiv vun kuamkuarga. Ne guigira.
26  Wkp 18.22-23; Ef 5.12Mbe maaŋ mbuav kɨr Fhe Bakɨme segim, Fhe Bakɨme mbe thagim, mbe won ndavir vuri vuzvugi tɨvi, mbe nta zɨn vov, guigira mberi tɨvi mbatɨgir warira mbui. Mbe kav, mben mbigi vhɨra, mbe mani gu mburi wari ga rɨgi tɨvi guari, mbe nta thav, guigira mberi tɨvi mbatɨgir warira mbui. 27  Wkp 18.22; 20.13; 1 Ko 6.9Mben gumgi vhɨra, mbe mani gu mburi wari ga rɨgi tɨvi guari thav, mben ndavi vhava fara muuŋgiap khavav, mbe mberi tɨvi mbatɨgir warira mbui. Mbe mberɨrga tɨvi mbatɨgir taagia warira mbui. Maaŋ muuŋgiap, mbe nduarira mba mbui tɨvi mbatɨgi ŋgarkav, mba vheza mbatɨga ndigi. 28 Mbe Fhe Bakɨme piin kɨv ana ndɨkndɨgɨrgeŋ thagi. Maaŋ muuŋgiap, Fhe Bakɨme fhura mbe garav, mbe thagim, mbe ndɨkndɨgi guigira mbatɨgim, mbe ndɨkndɨgi mbatɨgi zɨn ŋgɨrga. Mbe nta zɨn vov, mbe guma muunga fhuv tɨvi mbatɨgi guarira mbe nta mbui. 29 Mbe mbarkɨrga tɨvi mbatɨgi guigira mbe givigi. Mbe tɨvi mbatɨgi ga mbuav, mbe harigi gumgi bigi garav, niihɨ mbatɨgar nta mbuav, tɨvi mbatɨgi warira mbui. Mbe vhɨra bigi vhɨrve ki gumgi, mbe mbe nzuav ndavi shiav, mbe harigi gumgi shogim, mbe vhɨzim, mbe fhura tamtam ntari ga mbuav, fhura guiguigap, mbe vhɨra ndɨkndɨgi mbatɨgir harigi gumgi ga mbui. Mbe vhɨra harigi gumgi zɨn mbaav mbe nzuai. 30 Mbe vhɨra harigi gumgir zɨrir farfav, mbe shɨshɨgi bunin mbe nzuai. Mbe vhɨra panara thav Fhe Bakɨme garav, fhura tuava purav, ndikndigap surav, harigi gumgi mbevav, kha ndɨkndɨga mbui, “Nza fegi ma.” Mbe vhɨra wari wo zɨri ndi vun kuamkuagi. Mbe maaŋ mbuav, mbe vhɨra tɨvi mbatɨgir ŋkaa, mbe nta ndiav nta mbui. Mbe maaŋ mbuav wari won ndegi gu ndegmbori nzuai buni, mbe nta daasui. 31 Mbe ndɨkndɨgi kav bigi ga mbui fhu. Mbe wari wo nzuai buni mbararav, mbe nduarira wari wo nzuai buni, mbe guigira nta zɨn vui fhuvara. Mbe vhɨra wari wo phorge regi vɨzɨna bavira, vuzvugap tɨvir vhuuin wari ga mbui fhuvara. Mbe vhɨra harigi gumgi gu mbigi kora mbui fhuvara. 32  Sng 50.18; Hos 7.3; Ro 2.2; 6.21Fhe Bakɨmen tɨvar vhuuŋ khaŋ nzuai, “Mba khesharigi tɨvi ga mbui gumgi, mbe vhɨzɨrga.” Mba gumgi, mbe mba tɨv, mbe tuituigiap ana kaŋgi. Mbe ana kaŋgiap, mbe ana daasuav, mbarkɨrga tɨvi mbatɨgi, mbe nta mbuavra ki. Mbe vhɨra mba tɨvi mbatɨgira mbui fhuvara. Mbe vhɨra mba khesharigi tɨvi mbatɨgi ga mbui gumgi, mbe vhɨra mbe zɨri ndi vun kuamkuagi.

1:1 FG 9.15; 13.2; 22.21; 1 Ko 1.1; Ga 1.15

1:2 FG 26.6; Ro 3.21; 16.25-26; Ga 3.8; Ta 1.2

1:3 Mt 22.42; Ru 1.32; Zo 1.14; FG 2.30; Ro 9.5; Ga 4.4; 2 T 2.8

1:4 FG 13.33; Hi 9.14

1:5 FG 26.16-18; Ro 12.3; 15.18; 1 Ko 15.10; Ga 2.7-9; Ef 3.8

1:7 Nam 6.25-26; 1 Ko 1.2-3; 2 Ko 1.1; Ga 1.3; Ef 1.2; 1 Te 4.7

1:8 Fi 1.3; Kor 1.3-4; 1 Te 1.2; 1.8

1:9 FG 19.21; Ro 15.23; 15.32; 2 Ko 1.23; Ef 1.16; Fi 1.8; 1 Te 2.5; 2.10; 3.10; 2 T 1.3; Ze 4.15

1:13 Zo 15.15-16; FG 19.21; Ro 15.23; 16.7; Fi 4.17

1:16 Sng 119.46; Mk 8.38; FG 3.26; 13.46; 1 Ko 1.18-24; 2 T 1.8

1:17 Hab 2.4; Zo 3.36; Ro 3.21-22; Ga 3.11; Hi 10.38

1:18 FG 17.30; Ef 5.6; Kor 3.6; 2 Te 2.12

1:19 Zo 1.9; FG 14.15-17; 17.24-28

1:20 Jop 12.7-9; Sng 19.1; FG 14.17; 17.27; Hi 11.3

1:21 Jer 2.5; Ef 4.17-18

1:22 Jer 10.14; 1 Ko 1.20

1:23 Lo 4.16-18; Sng 106.20; Jer 2.11; Ese 8.10; FG 17.29

1:24 FG 7.42; 14.16; 1 Ko 6.18; Ef 4.18; 1 Te 4.4

1:25 Ais 44.20; Jer 13.25; 16.19; Amo 2.4; Ro 9.5; 1 Te 1.9; 1 Zo 5.20

1:26 Wkp 18.22-23; Ef 5.12

1:27 Wkp 18.22; 20.13; 1 Ko 6.9

1:32 Sng 50.18; Hos 7.3; Ro 2.2; 6.21