ut-Mai'n Scripture portions Roma-ne̱ 10

1 O̱r-u̱t ri ne̱, no̱m-u̱ jab-u̱ ri ze̱ge̱ m-cwan u̱ to̱o̱g-u̱s ri ne̱ u̱du̱ u-Ru̱ u̱zu̱, u̱ Isra-ne̱ kum u-u̱ku̱r. 2 U̱m nak u̱n yaag hi-u̱t u̱n u̱ no̱m-du̱ pama-su̱ u-Ru̱ sok. Se̱di o̱ za u̱ fu̱n-yu̱ nap-du̱ u̱t-nip da. 3 U̱m zu̱u̱g iya remu̱ zu̱ u̱n nak fu̱n-yu̱ Ru̱-u̱ o̱ u̱t-do̱r wa muute̱ u̱t-ne̱t a-jab-u̱s so̱-se̱ ne̱. Wa cwanu̱g u̱n kum jab-u̱ so̱-o̱ u̱ rwu̱ne̱ u̱du̱ wa. Se̱di e̱ gu̱gu̱mte̱ fu̱n-yu̱ u-Ru̱. De̱ wu̱te̱ e̱ o̱tte̱ u̱ssa e̱ kum jab-u̱ so̱-o̱ remu̱ do̱rru̱ u̱t-bo̱r. 4 Kiristi shu̱u̱ste̱ no̱m-u̱ wu̱te̱ na nom-u̱t bo̱r-u̱t Mosa, remu̱ ko̱wana ya'e̱ jab u̱du̱ u-Ru̱, Ru̱-u̱ de̱ jaasu̱ ba'as-u̱t wa.

U-u̱ku̱r u̱ ko̱wan o̱

5 Ko̱se̱-u̱t Mosa ko̱ske̱ u̱zu̱ ne̱t de̱ keru̱ shu̱'u̱tu̱ wa jab-u̱ so̱-o̱ a wa o̱ do̱rru̱ u̱t-bo̱r. <<A-bo̱ u̱t-sa kwu̱m-du̱ u̱r-fat, se̱ bo̱ no̱ng no̱m-u̱ bo̱r-tu̱ zu̱ye̱.>>* 6 Se̱di no̱m-u̱ Rem-su̱ u-Ru̱ zu̱ye̱, u̱ka ne̱t do̱te̱ u̱t-shu̱'u̱t wa jab-u̱ so̱-o̱ remu̱ yadu̱ jab, <<A-bo̱ zu̱ u̱-me̱ jab-u̱ ró, <¿Wana de̱ dadu̱ do̱m u-ru̱?> (Remu̱ wa cu̱stu̱n Kiristi u-dak) 7 Tu̱msu̱ ko̱ no̱ zu̱, <¿Wana de̱ u̱r-cwa u̱-ta u-dak>?>>† (Wa yu̱ns Kiristi du̱gu̱ m-mar.) 8 Se̱di no̱m-u̱ Rem-su̱ u-Ru̱ zu̱ye̱ ya:

<<Rem-su̱ u-Ru̱ o̱ u̱t-mo̱r u̱ bo̱ ne̱,

se̱ o̱ me̱ nu-u ró u̱ jab-u̱ ró ne̱.>>‡

Rem-u̱s se̱ o̱tte̱ ko̱se̱-tu̱ yadu̱ jab se̱ in o̱ u̱t-bu̱t. 9 A-bo̱ ware̱ u̱ nu-u ró u̱zu̱ Ye̱so̱ Wa-ko-uyan wa, tu̱msu̱ bo̱ yu̱' jab u̱zu̱ Ru̱-u̱ yu̱nste̱ wu̱n du̱gu̱ m-mar, bo̱ de̱ u̱t-kwu̱m u-u̱ku̱r. 10 U̱m zu̱u̱g iya remu̱ zu̱ jab o̱ ne̱t do̱te̱ yadu̱ jab wa shu̱'u̱te̱ za u̱t-ba'as u̱du̱ u-Ru̱, tu̱msu̱ nu-o̱ ne̱t do̱te̱ u̱r-do̱nse̱ wa kum-u̱t u-u̱ku̱r. 11 U̱ka o̱tte̱ m-pan u̱-me̱ Rem-su̱ u-Ru̱, <<Wu̱ ya' jab ro u̱du̱ wa, wa za no̱m-du̱ m-'e̱ da.>>§ 12 Ru̱-u̱ ko̱ste̱ m-ku̱u̱k da. Wa o̱ hyan-du̱ Yahuda-ne̱ u̱ i-za-Yahuda-ne̱ da u̱s-gan. Ru̱-u ne̱t-ne̱ be̱e̱t o̱. Tu̱msu̱ wa no̱m u-nya u̱du̱ ne̱t-ne̱ be̱e̱t i foge̱ dim-u̱r wa. 13 U̱ka o̱tte̱ m-pan u̱-me̱ Ran-u̱ u-Ru̱ u̱zu̱, <<Ko̱wana fage̱ Yawe u̱ sa-u̱ u̱r-se̱ge̱, wa do̱'e̱ kwu̱m-du̱ u-u̱ku̱r.>>*

14 ¿Se̱di re̱ne̱ o̱ ne̱t-tu̱ ya jab u̱du̱ ró da, e̱ do̱te̱ keru̱ fag-du̱ Yawe u̱ sa-u̱ u̱r-se̱ge̱? ¿Re̱ne̱ o̱ e̱ do̱te̱ yadu̱ jab u̱du̱ wu̱ e̱ tame̱ ho̱g-du̱ mo̱t-u̱t wa da? ¿Re̱ne̱ o̱ e̱ do̱te̱ u̱t-ho̱g a waku̱n waru̱ u̱n da? 15 ¿Re̱ne̱ o̱ a-u̱t-bu̱t do̱te̱ bu̱t-tu̱ a waku̱n to̱mu̱ u̱n da? U̱ka o̱tte̱ m-pan u̱-me̱ Rem-su̱ u-Ru̱ u̱zu̱, <<Haan-u̱r a-bu̱t-tu̱ Rem-su̱ m-Re̱me̱r ze̱k u̱r-zwar.>>†

16 Se̱di ne̱t-tu̱ Isra to̱ u̱t-be̱e̱t u̱ kabe̱ Rem-su̱ m-Re̱me̱r se̱ da. U̱ka Ishaya wa-warru̱ Rem-su̱ u-Ru̱ zu̱tte̱, <<Yawe, ¿wana kabe̱ rem-u̱s sin-se̱ su̱ it ware̱?>> 17 De̱ wu̱te̱ yadu̱ jab o̱ haan u̱du̱ in u̱ fu̱n-u̱ ho̱g-du̱ Rem-su̱ M-re̱me̱r, tu̱msu̱ na hog Rem-su̱ m-Re̱me̱r u̱du̱ Rem-u̱s Kiristi. 18 Se̱di u̱m o̱tte̱ u̱r-shu̱t, <<¿Nip-to̱ u̱zu̱ ne̱t-tu̱ Isra-ne̱ ho̱k da?>> U̱ka o̱tte̱ m-pan u̱-me̱ Rem-su̱ u-Ru̱:

<<U̱n no̱ng do̱nse̱-du̱ rem-u̱s

se̱ u-dak u-be̱e̱t,

Rem-u̱s u̱n teeg ma-du̱ u-dak u-be̱e̱t.>>‡

19 U̱m swu̱ru̱g m-shu̱t, <<¿Ne̱t-tu̱ i Isra e̱ gwa'ag nu-du̱ u̱ rem-u̱s se̱ da?>> U̱, e̱ gwa'ag nu-du̱ se̱, remu̱ zu̱ u̱ da-u Mosa, Ru̱-u̱ zu̱u̱g:

<<U̱m de̱ wadu̱ Isra-ne̱ no̱m shu̱b-du̱

ne̱t-tu̱ za-Yahuda ne̱.

Tu̱msu̱ u̱m de̱ u̱t-wa no̱ ho̱g u̱s-ryab

remu̱ ne̱t-tu̱ o̱ a-ko̱b-du̱ m-nap ne̱

i-za-Yahuda-ne̱ da.>>§

20 Ishaya waru̱g Rem-su̱ u-Ru̱ jab gan:

<<Ne̱t-tu̱ sa-u̱ me̱ da,

e̱ de̱ kwu̱m-du̱ me̱,

Ne̱t-tu̱ o̱ro i shite̱ u̱ka e̱ do̱te̱ kwu̱m-du̱ me̱ da.

Se̱di u̱m ko̱ske̱ hi-u̱r ri m-zu̱n

cas u̱du̱ u̱n.>>*

21 Se̱di mo̱ttu̱ Isra, Ru̱-u̱ swu̱ru̱g m-waru̱ u̱n,

<<Ko̱-uyan da,

u̱m u̱t-sa u̱m mu̱u̱tu̱n e̱ u̱du̱ ri,

Se̱di e̱ shu̱'u̱t a-ko̱b-du̱ do̱rru̱ u̱s-rem ne̱

u̱ a-ko̱b-du̱ ho̱g-mu̱ u̱s-rem ne̱.>>†

*10:5 Gwat tu̱msu̱: To̱o̱g 18:5.

†10:7 Gwat tu̱msu̱: Muut 30:13.

‡10:8 Gwat tu̱msu̱: Muut 30:12-14.

§10:11 Gwat tu̱msu̱: Isha 28:16.

*10:13 Gwat tu̱msu̱: Jowe 2:32.

†10:15 Gwat tu̱msu̱: Isha 52:7.

‡10:18 Gwat tu̱msu̱: Se̱pV 19:4.

§10:19 Gwat tu̱msu̱: Muut 32:21.

*10:20 Gwat tu̱msu̱: Isha 65:1.

†10:21 Gwat tu̱msu̱: Isha 65:2.