1 Kaba tasigu narako ta Karisito, iau nem bia muat na palai bia ira hintubu dahat, diet bakut diet ga hanahaan manapu tano baakut ma diet bakut diet ga haan kutus nalamin tano Tes Dardaraan. 2 Diet bakut diet ga kap bapitaiso tano baakut ma tano Tes, ma iakan i hinawas palai bia diet ira mataniabar ta Moses. 3 Diet bakut diet ga ien tiga kapawena nian mon, a mangana nian makaia ta Kalou. 4 Ma diet bakut diet ga mom tiga kapawena minminom mon, a mangana minminom makaia ta Kalou. Iakan i palai kanong diet git mamom tano haat kis nong git tiktikai ma diet, a mangana haat makaia ta Kalou. Ma iakano haat kis, ne Karisito mon ia. 5 Senbia Kalou pa ga guama balik uta ira haleng sakit ta diet. Ma iakan i palai kanong ira nudiet turangan ga sua hurlabit tano hanua bia. 6 Ma kaiken ra linga ga haan tupas diet hoira malalar ta dahat wara hatumarang dahat bia kaba dahat nem ira sakana linga hoing diet ga gil. 7 Ma waak muat lotu tupas ira palimpua hoing aring ta diet, diet ga gil. Hoing di ga pakat tano nianga ta Kalou, “Ira mataniabar diet ga kis napu wara nian ma wara minminom, ma diet ga taman tut um wara gilgil ra sakana minamagu ma ira hahina.” 8 Waak dahat gil ra magingin na hilawai hoing aring ta diet, diet ga gilgil, ma tiga bung mon, airua sangahul ma itul na arip ta diet ga maat. 9 Waak dahat walwalar no Watong hoing aring ta diet, diet ga gil, ma ira sui gaam karat bing diet. 10 Ma waak dahat rungurung hoing aring ta diet, diet ga gil, ma no angelo na hanghagawai gaam hagawai diet.

11 Kaiken ra linga ga haan tupas diet, na ngan hoira malalar na hatumarang ta dahat. Ma di ga pakat kaiken wara pirpir dahat, dahat ing no haphapataam ta ira pakana bung i ta haan tupas um dahat. 12 Io hua, ing u lik bia u tur dadas taar, u na harbalaurai timaan bia kaba gu puka. 13 Ira mangana harwalaam ing i haan tupas muat, i haruat mon ma ing i haan tupas ira tunatuna bakut. Kalou na gil haruat ta ira nuna nianga, hua i tale bia dahat na so ira nudahat nurnur tana. Pa na waak tar tiga harwalaam bia na tupas muat ing pa muat tale bia muat na tur dadas tana. Taia. Ma ing bia tiga harwalaam na hanuat taar ta muat, Kalou na tagurei no ngaas bia muat naga haan pas ia waing naga tale muat bia muat na tur dadas tano harwalaam.

14 Io hua, ira bilai na talaigu, i tahut bia muat na hilau pas no magingin na lotu tupas ira palimpua. 15 Iau iangianga tupas muat ing i bilai taar ira numuat minminonas, bia muat na nunurei kilam ira nugu nianga bia i tahut bia pai tahut. 16 A tutuna sakit, ing dahat mom ta iakano gapgopai nong dahat tanga tahut tupas Kalou utana, io, i ngan hoing bia dahat laka tano pakpakilai tano gapi ne Karisito. A tutuna mah, ing dahat bingit no beret ma dahat ien ia, dahat laka tano pakpakilai tano palatamai Karisito. 17 Tiga kapawena beret mon, hua dahat ira haleng dahat tiga kapawena palatamai dahat mon kanong dahat bakut dahat iaan tikai ta iakan tiga kapawena beret.

18 Muat na lik lah ira mataniabar na Israel. A tutun sakit, diet ing diet ien ira warat ing di hartabar manei, io, diet laka tano pakpakilai ta iakano suuh na hartabar. 19 Ing bia iau tangai hua muat lik bia iau tangai bia a hartabar tupas tiga palimpua a tamat na linga ia, ma bia tiga palimpua at a dadas na linga mah ia? 20 Taia, a linga bia mon. Senbia iau tangai bia diet ing pa diet nurnur, diet tamtabar ira tadaar, ma pataia bia Kalou. Ma pa iau nem bia muat na laka ta ira pakpakilai ta ira tadaar. 21 Pai tale bia muat na mom tano gapgopai tano Watong ma tano gapgopai gar na tadaar mah. Ma pai tale bia muat na iaan tano suuh na nian gar tano Watong ma tano suuh gar na tadaar mah. 22 Ing bia dahat gil hua dahat na hatatik no nginaluan gar tano Watong kanong i nem bia dahat na lotu tupas sena mon ia. Hoeh, dahat manga dadas tana, kaikek dahat gi gil hua?

23 Di tangai bia, “Asa ing dahat nem bia dahat na gil, i takodas bia dahat na gil.” Masa. Senbia ira linga bakut pai tale bia na hatahutnei muat. Di tangai bia asa ing diet nem bia diet na gil, i takodas bia diet na gil. Senbia ira linga bakut pai tale bia na harahut. 24 Waak tikai i gilgil ira linga ing na harahut ia. Na gilgil mon ira linga ing na harahut mah ira mesa.

25-26 I tahut bia muat na ien ta sa ing di suhuranei tano sibaan di la susuhuranei ira warat kaia. Waak muat hatirih ira numuat lilik bia i takodas bia muat na ien bia pataia, kanong “gar tano Watong no ula hanua ma ira linga bakut i la kis taar tana.”

27 Ing bia tikai nong pai nurnur i saring muat wara ninian kaia ra nuna hala, ma muat nem bia muat na haan, io, i tahut bia muat na ien kaikek ing i palau muat manei. Waak bia muat na hatirih no numuat lilik bia muat na iaan bia taia. 28 Iasen bia tikai i tangai ta muat bia, “Di ta hartabar tupas ira palimpua ma kaiken ra warat,” io, waak muat ra ienien. I tahut bia muat na lilik uta nong i tangai hua ta muat. Ma waak muat ienien mah kanong pai tahut bia muat na hatirih no lilik a nuna tikai. 29 Pa iau ianga uta ira numuat lilik. Taia. Iau ianga utano lilik a nuna no mesa. Io, wara biha no lilik a nuna tiga mesa na kurei iau ta ira linga i tale bia iau na gil ma ing pai tahut bia iau na gil? 30 Ing bia iau tanga tahut tupas Kalou uta ira linga iau ien, wara biha di tangai hagawai iau uta kaikek ra linga iau ta tanga tahut uranai? 31 Io hua, ing bia muat na iaan bia muat na mom, ma asa ing muat na gil, i tahut bia muat na gil wara hatamat Kalou. 32 Waak muat ra hatirih ira nilon nudiet ira Iudeia ma diet ing pai Iudeia diet, ma ira mataniabar na lotu ta Kalou mah. 33 I tahut bia muat na lon hoing iau lon hua. Iau mur no mangana nilon bia ira mataniabar bakut diet na nem ira nugu tintalen bakut. Pa iau lilik uta ira linga ing na hatahutnei at iau, senbia ing na hatahutnei ira mataniabar bakut, waing diet naga hatur kahai no harhalon.