No Luena
Pakpakat ta
PITA
Pita ga pakat iakan ra pakpakat maras ‘Babilon’ (nas 1 Pita 5.13). Aring diet lik bia Pita ga kis aras Babilon tutun tano hanua Mesopotemia. Aring diet lik bia Pita ga kilam ‘Babilon’ hoing tiga nianga harharuat ta tiga sakana taman ma ga kis tutun aras Rom bia Ierusalem. Ga tulei no pakpakat tupas diet ing diet ga lon harbasiai ta aring hanua (1.1) ing ga dadas ira nilon ta ira Kristian kaia. Pita ga nem bia na haragat ira Kristian ing ira tena sakena diet ga manga hagawai ta diet (1.6; 2.18-26; 3.13-17; 4.6-19). Pita ga tangai bia kaiken ra tinirih i la umubal dahat wara walawalar ira nudahat nurnur bia na haminis bia ira nudahat nurnur i tutun (1.6-7). 1 Pita i la harharagat dahat bia dahat na mur ira bilai na tintalen ta Iesu nong ga kap ra ngunngutaan mah hua (2.21-24; 3.18) ma nong na tapukus balin wara uta dahat (1.3-5; 1.13; 4.7). Dahat ira mataniabar tus ta Kalou (2.9-10) hua i tahut bia dahat na lon hua ma ira bilai na magingin nalamin ta kaiken ra tinirih ma dahat na tur dadas tano nudahat nurnur. Iakan no suruna ta iakan ra pakpakat.
1
1-2 Iau Pita tiga apostolo ta Iesu Karisito, iau pakat iakan ra nianga ukaia ta muat ing muat lon harbasiai hoing ira hasira kaia ta ira kaba hanua Pontas ma Galesia ma Kapadosia ma Esia ma Bitinia. Iau pakat iakan ra nianga tupas muat ing Kalou no adahat Sus gata pilak laah muat haruat ma no nuna lilik manaluai. Ma Kalou ga luena bul no nuna lilik manaluai wara nunurei um muat. Ga pilak muat ma no pinapalim tano Tanua ing no Tanua ga bul hasisingen muat bia muat naga gamgamatien. Ma ga pilak muat waing muat na taram Iesu Karisito ma bia Iesu na sapur hagamgamatien muat ma no gapina.
Iau sasaring bia muat na hung tutun at ma ra harmarsai tikai ma ra malum.
Dahat na tinanei ra harhalon nong pa na panim laah
3 A pirharlat uram tupas Kalou. Ia no God ma no Sus ana no nudahat Watong Iesu Karisito. Ga manga marsei dahat hua gaam tar ra sigara nilon ta dahat bia dahat naga kis kahai ma ra nurnur uta ira bilai na linga na tabar dahat manei. Ma kaiken ra linga na kis hatikai. Ma ga tale bia na tar ra sigara nilon ta dahat kanong Iesu Karisito ga taman tut hut sukun ra minaat. 4-5 Kalou ga marsei dahat hua bia dahat naga kap kaiken ra bilai na linga wara nudahat at. Kaiken ra linga pa na panim laah ma pa na marota. Ma Kalou i ta bul hakabet timaan kaiken ra linga aram ra mawai wara uta muat ing Kalou i balbalaurei bat muat bia pa muat na hirua. Tano numuat nurnur, hua gi balaurei bat muat hoken ing muat naga kap no harhalon. Ma iakan ra harhalon i tagura taar bia na hanuat palai tano mutuaina pakana bung.
6 Io hua, muat manga guama sukmaal bia kaiken ma namur ta dahina i nanaas bia aring kaba mangana walawalar na umubal muat. 7 Kaiken ra walawalar i haan tupas muat wara haminis bia ira numuat nurnur i tutuna. Ma di la walwalar gol mah hua. Di la bulbul ia narako tano iaah wara hamhaminis no bilbilai tana. Ma sen i tale bia gol na panim laah ma no matana no nurnur tutun i luai tano matana no gol. Hoken, ira walawalar na haan tupas muat bia ira numuat nurnur naga tur dadas. Io hua, ing Iesu Karisito na puasa, na pirlat muat ma na hamar muat ma na hatamat muat. 8 Pa muat nas baa ia, senbia muat sip ia. Ma kaiken mah pa muat nas ia ma sen muat nurnur tana. Io hua, muat manga hung ma ra bilai na gungunuama sakit ing pai tale bia da hasahesa tanei. 9 Ma muat guama hua kanong muat hatur kahai no harhalon, ia no hunena no numuat nurnur.
10 Ma ira poropet ing diet git iangianga utano harmarsai nong na haan tupas muat, diet git manga walawalar wara ninaas uta iakan ra harhalon at. 11 No Tanua ta Karisito narako ta diet git tangtangai haminis ira linga uta Karisito, gaam luena hinawas bia Karisito na kap ra ngunngutaan ma bia na kap ira nuna minamar namur. Diet git walawalar bia diet na nunurei iakan ra pakana bung ma bia kaiken ra linga na hanuat hoeh. 12 Kalou ga hapuasnei ta diet bia pa diet ga iangianga na poropet uta kaikek wara uta diet at. Taia. Diet ga tangtangai kaikek wara uta muat. Ma diet ing diet ga ianga ta muat ma no tahut na hinhinawas narako tano dadas tano Halhaliana Tanua Kalou ga tulei ia maram ra mawai, diet ga hasasei muat uta kaiken ra linga at. Ma kaiken ra linga ira linga ing ira angelo diet sip bia diet na nunurei.
Dahat na gamgamatien talur ira sakena
13 Io hua, muat na kurei ira numuat lilik bia muat na tagura wara nilon timaan. I tahut bia na palai ira numuat lilik. Waak muat kis kahai ira linga bia. Muat na nanaho sen mon ma ra nurnur tano harmarsai nong Iesu Karisito na kap hahuat taar ia ta muat ing na hanuat puasa. 14 Naluai pa muat ga palai ma muat git murmur ira numuat sakana sinisip. Ma sen kaiken muat ira tena taram nianga, hua waak muat tartaram lah kaikek ra tuarena nemnem bia na kurei muat. 15 Kalou nong ga tatau muat i gamgamatien. Io, i tahut bia ta ira numuat magingin, muat a mah, muat na gamgamatien talur ira sakena haruat ma ia. 16 Kanong warah, no nianga ta Kalou di ga pakat ia i tangai hoken: “I tahut bia muat na gamgamatien talur ira sakena kanong ia i gamgamatien.”
17 Ma bia muat sasaring tupas Kalou, muat kilam ia bia Mama. Ia nong i kurei ira mataniabar. Ma no nuna warkurai i takodas. Pa na kurei hagawai tikai ma pa na harahut bia tiga mesa. Taia. Na kurei ira tunatuna haruat ma ira nudiet magingin. Io hua, i tahut bia muat na lon ma ra tamat na bunurut tupas ia ing muat kis na hasira baa ta iakan ra ula hanua 18 kanong muat nunurei no kunkulaan nong Kalou ga tar wara kulkul halangalanga muat sukun ira numuat mangana nilon manaluai. Iakano nilon nong muat ga kap hausur laah ta ira hintubu muat ma pa ga tale bia na harahut muat ta dahina. Ma Kalou pa ga kul halangalanga muat ma ra linga hoing ra gol ma ra siliwa ing i tale bia na panim laah. Taia. 19 No kunkulaan ga tabi matana. Ia no gapi Karisito. Ia hoing tiga nat na sipsip na hartabar, pataia ta da sakena tana, i manga bilai sakit. 20 Manaluai tano hakhakisi tano ula hanua Kalou ga bul no nuna lilik bia na pilak ia. Senbia ta kaiken ira mutuaina pakana bung i ta hanuat puasa wara uta muat. 21 Ma muat, muat ira tena nurnur ta Kalou kanong muat haan tupas ia narako ta Karisito. Ma Kalou, ia nong ga hatut haut Karisito talur ra minaat ma ga tar ra minamar tana. Io hua, ira numuat nurnur i kis ta Kalou ma ira bilai na linga muat kis kahai ma ra nurnur i hanuat maram ta Kalou.
Dahat na tar ra harmarsai hargilaas haruat
22 Io, muat ta taram ira tutun Kalou i ta hapuasnei, hua muat ta hagamgamatien ira numuat nilon wara tartar ra harmarsai tutun ta ira tasi muat gar ta Karisito. Muat ta gil um hua, io hua, i tahut bia muat na tar tutun at ra harmarsai harbasiai ta muat maram narako ta ira kati muat. 23 Kanong warah, muat ta kap ra sigara nilon. Pa muat kap no sigara nilon tano pat na dahai nong na marota. Taia. Muat ta kap ia ta nong pa na marota. Ma ia no nianga gar ta Kalou, a lilona ia ma pa na panim laah. 24 Ma i palai bia iakan i tutun kanong,
“Ira tunatuna diet haruat ma ra hura,
ma ira minarina no tunatuna i haruat ma no lamarina no hura.
No hura na mahiawa,
ma no lamarina na puka laah.
25 Senbia no nianga gar tano Watong na kis hatikai.”
Ma iakan ra nianga, ia nong di ga warawai taar ta muat ma ia.