4
Pita ma Ioanes dir ga tur ra matmataan ta ira kaunsal
1 Ing Pita ma ne Ioanes dir ga iangianga ta ira mataniabar, ira pris ma no lualua ta ira umri tano tamat na hala na lotu ma ira Sadiusi diet ga hanuat ukaia ta dir. 2 Diet ga ngalngaluan kanong warah ira airua apostolo dir ga hauhausur ira tunatuna bakut utano tamtaman tut hut balin ta Iesu talur ra minaat, bia i ta hatutun tar bia ira minaat mah diet na tut hut balin. 3 Io, diet ga palim kahai dir, diet gaam banus bat dir tano hala na harpidinau tuk taar tano mes na bung kanong gata matarahien bungbung tuai um. 4 Senbia a haleng ta ira tunatuna ing diet ga hadadei no hinhinawas diet ga nurnur, ma no winawas ta diet ga haruat ma ra liman na arip.
5 Tano bung namur ira lualua gar na Iudeia, ira tamat ta ira huntunaan, ma ira tena hausur ta ira warkurai ta Moses diet ga hanuat hulungai na Ierusalem. 6 Diet ga hanuat hulungai ma ne Anas, no tamat ta ira pris, tikai ma ne Kepas, Ioanes, Aleksanda, ma ira hinsakana no tamat ta ira pris. 7 Ma diet ga hartulai uta Pita ma Ioanes. Io, di ga me hatur dir nalamin ta diet ma diet ga tiri dir hoken: “Ma ra mangana dadas sa, ma tano hinsa siga kaikek mamur gil iakan ra linga ma ia?”
8 Ma Pita ga hung taar ma no Halhaliana Tanua gaam tangai ta diet hoken: “Muat ira lualua ma muat ira tamat ta ira huntunaan, muat hadadei! 9-10 Ing bia muat tirtiri murmur mamir utano harharahut nong i hanuat taar tano pengpeng ma bia i langalanga hoeh, io, i tahut bia muat bakut ma ira kaba mataniabar na Israel muat na nunurei hoken: Iakan ra tunatuna i tur taar ra matmataan ta muat i ta langalanga ma no dadas tano hinsa Iesu Karisito ma Nasaret nong muat ga tut tar ia tano kabai. Iasen Kalou ga hatut habal ia talur ra minaat. 11 Iakan ra Iesu, ia nong ira nianga gar ta Kalou di ga pakat i tangtangai utana hoken:
‘Ia no Haat nong muat ira tena gil hala muat ga sura sei ia,
ma ia balik um no dadas na burena tano hala bakut.’
12 No harhalon i tahuat sena mon tana kanong taia mah um ta tikai tano ula hanua bakut bia Kalou i tar ia ta dahat bia ia nong na halon dahat.”
13 Ing diet ga nas bia Pita ma Ioanes pa dir ga ianga ma ra bunurut ma ing diet ga nunurei lah bia pa dir ga haan ra hausur ma bia a tunatuna bia mon dir, diet ga karup ma diet ga nas kilam bia dir git saksakatei Iesu. 14 Senbia diet ga maas lilik bia diet na tangai hoeh kanong no tunatuna nong ga langalanga, diet ga nas ia bia ga tur tikai taar ma dir. 15 Io hua, diet gaam tulei hasur sei dal makaia tano nudiet kinkinis hulungai ira kaunsal, ma diet gaam iangianga tikai. 16 Diet ga tiri bia, “Dahat na bihanei kaiken ra airua tunatuna? Ira mataniabar bakut kai Ierusalem diet nunurei tar bia dir ta gil tiga dadas na pinapalim na kinarup ma pai tale bia dahat na hus iakan ra linga. 17 Senbia dahat na tigal dir bia pa dir na haianga habal tikai ma iakan ra hinsang waing iakan ra linga pa na haan kakari.”
18 Io, diet ga tatau halaka habal dir ma diet ga tigal dir bia waak baal um dir wara hasahesa bia hauhausur tano hinsa Iesu. 19 Senbia Pita ma Ioanes dir ga balu diet hoken: “Muat nas murmur baa bia i takodas ta ra ninaas ta Kalou bia mamir na taram muat ma waak Kalou, 20 Mamir tangai hoken kanong pai tale mamir bia mamir na sangeh wara hasahesa uta ira linga mamir gata nas ma mamir gata hadadei.”
21-22 Namur, bia diet ga mang habal tar dir, diet ga waak sei um dir. Diet ga nas bia na dadas bia da hapidinau dir kanong ira mataniabar bakut diet ga pirpirlat Kalou utano linga ga hanuat, kanong warah, no tunatuna nong ga langalanga tano dadas na gingilaan na kinarup ga sakiit ra aihat na sangahul ira nuna tinahon.
No sinsaring ta ira tena nurnur
23 Ing di gata waak sei um Pita ma Ioanes, dir ga haan tapukus baal taar ta ira hintura dir, dir gaam hasasei diet ta ira nianga ing ira tamat ta ira pris ma ira tamat ta ira huntunaan diet gata tangai tar ta dir. 24 Ing ira hintura dir diet ga hadadei hua, diet ga sasaring tikai ma tiga lilik sena mon uram ta Kalou hoken: “Tamat na Watong, u ga hakisi no mawai, no ula hanua ma no tes ma ira kaba linga bakut narako ta dal. 25 Tano num Halhaliana Tanua u ga tangai makaia tano hana no hintubu mehet Dewit no num tultulai hoken:
‘Hoeh bia ira huntunaan ing pai Iudeia diet, diet tut na kamahar?
Hoeh bia ira mataniabar diet ta harpingit?
Pa diet haruat ma tiga linga.
26 Ira kaba king tano ula hanua diet tagurei at diet,
ma ira kaba lualua diet hanuat hulungai
wara gilgil hagawai no Watong ma no nuna Mesaia*No kukuraina i haruat ma ‘Karisito’. mah.’
27 Ma a tutun bia Herot ma ne Pontias Pailat dir ga hanuat hulungai kai ta iakan ra pisa na hala tikai ma diet ing pai Iudeia diet ma ira mataniabar na Iudeia mah. Ma diet ga harpingit tikai wara gilgil hagawai no num halhaliana tultulai Iesu nong u ga bul ia bia no num Mesaia. 28 Diet ga hanuat hulungai wara gilgil asa ing no num dadas ma no num lilik gata kurei hanaluai tar bia na ngan hua. 29 Ma kaiken, Watong, hadadei um ira nudiet kaba harmang ma u na tar ra dadas ta mehet ira num tultulai waing mehet na tale wara hinhinawas ma ira num nianga ma ra balamasa. 30 Hapuasnei no num dadas wara halangalanga ira ina minaset. Ma u na gil ra dadas na hakilang ma ra pinapalim na kinarup tano hinsana no num halhaliana tultulai Iesu.”
31 Io, bia diet ga sasaring taar, no hala diet ga kis hulungai taar tana ga gunagunai. Ma diet bakut diet ga hung ma no Halhaliana Tanua ma diet ga hasahesa ma ira nianga ta Kalou ma ra balamasa.
A bilai na kinkinis ta ira tena nurnur
32 Io, diet bakut ira tena nurnur, ga tikai sena mon ira nudiet lilik ma ira nudiet sinisip. Ma taia tikai ta diet ga tangai bia ira nuna tabarikik a nuna sena at. Senbia diet ga hartabar hargilaas ma ira nudiet linga bakut. 33 Ma ira apostolo diet ga manga dadas ma no nudiet hinhinawas. Diet ga hinhinawas bia a tutuna at no tamtaman tut tano Watong Iesu. Ma a tamat na harmarsai ga haan tupas diet bakut. 34-35 Taia tikai ta diet ga supi ta tiga linga kanong aring ta diet ing a nudiet mon pisa ma ra hala, diet ga suhuranei kaikek ma ira kinewa diet ga tartar ta ira apostolo. Ma diet ira apostolo diet ga palau harbasianei ira mataniabar tikatikai manei, haruat ta ira sunupi gar tikai.
36 Ma ga mon tiga tunatuna, no hinsana Iosep, ia tano huntunaan ta Lewi maras Saipras. Ma ira apostolo diet ga kilam ia bia ne Banabas, a kukuraina bia no Tena Harharagat. 37 Ga suhuranei nuna tiga sibana pisa ma ga tar ira kinewa ta ira apostolo.