7
Ka 144,000 Tinoni tana Tamaza
Pa liguna za vei zara za qa batiria za ka made mateana qari kole turu pana ka made uquna na kasia abana, ko qari aru vanogotoria za ka made gava pa abana, ko kepore maka gava bi gava lao pa pezo, pa kolo, beto pana suvege. Beto za qa batia mutugu ara za maka goto mateana za zale vei pa kale zagere tapo, za pogozia na vinagilagila tana na Tamaza toana, beto za kuku viva laoria ka made mateana qari taiani na neqi ko mari ngangangulia na pezo beto na ivere. Ari za gua vei za na mateana aza, <<Muke ngangangulu ria na pezo, na ivere beto na suvege, koi vei mami vakoledi mae tu na vinagilagila pa readi ria na nabulu tana nada Tamaza,>> za gua. Ko qa nongoroni za na nguti varikamudi ria qari tavakoleni na vinagilagila tana Tamaza pana readi za ari ka maka gogoto madengavulu ka made vuro, na koko lame veidi pana ka manogori doru butubutu Izireli.
Pa butubutu ti Jiuda ka manogori vuro qari tavakoleni na vinagilagila,
pana butubutu ti Rubeni ka manogori vuro,
pana butubutu ti Qadi ka manogori vuro,
pana butubutu ti Aesea ka manogori vuro,
pana butubutu ti Naputalai ka manogori vuro,
pana butubutu ti Manase ka manogori vuro,
pana butubutu ti Simione ka manogori vuro,
pana butubutu ti Livai ka manogori vuro,
pana butubutu ti Isaka ka manogori vuro,
pana butubutu ti Zabuloni ka manogori vuro,
pana butubutu ti Josepa ka manogori vuro,
pana butubutu ti Benijimani ka manogori vuro za qari tavakoleni na vinagilagila.
Na Minete Tinoni Lavata pa doru Pukupuku Tinoni
Ego pa liguna za jola za vei zara za ma dogoro lao qa gua, nari qa batia za maka varikamu minete lavata, kepore maka tinoni mina boka nguti betoria! Na lame veidi pana okoto puku tinoni, na okoto butubutu, na minete tinoni beto na okoto dia parangana ko qari turu pana moena na nyumunyumuna bangara, beto pa moena na lami. Qari vazae poko keala gojo doruru beto ria doru, beto qari okoto aru kavana na suvege pamu. 10 Beto qari velavela vei ari,
<<Na inaalo za na koko lame veina tana nada Tamaza,
aza za nyumu pana nyumunyumuna bangara,
beto na koko veina pana tana lami!>> qari gua.
11 Nari ria doru mateana qari turu varilivutaini na nyumunyumuna bangara, ria na tinoni matamata, beto ari ka made manugu qari todongo pa moena na nyumunyumuna bangara ko qari vatarazaea na Tamaza, za 12 ari qari gua vei,
<<Agua! Na vinatarazae, na malakapi vavaguana,
na gigalai, na paranga leana,
na vinalavata, na neqi,
beto na viva za tana nada Tamaza kamua na kamua! Agua!>> qari gua.
13 Beto za maka ria na tinoni matamata za nanaza lameziu, <<Ari zei za qari pokopoko keala ari, beto pae na koko lame veidi ria?>> za gua.
14 Qa oe laoia ara aza, <<Qokolo, ko ao tu qu gilagilai za, ara qake gilagilai,>> qa guni.
Nari za paranga lameziu, ari za gua vei, <<Ari ria na votu lame veidi pana totozo ngangangulu ikikeredi jola. Qari tori valiosoria tu ria na dia poko gojo doru ko qari tavakeka keala pana orunguna na lami.
15 Ko zara za vei za qari turu pa moena na nyumunyumuna bangara tana Tamaza,
ko mari nabuluni na rane na bongi
pana nana zelepade madina aza.
Ko aza za nyumu pa nyumunyumuna bangara
mina suvere tavitiria na kopu vasareria ria.
16 Marike izongo burana soga,
beto marike izongo kidepe soga,
beto na tapo babi kaki mangini marike vavuiria.
17 Ura na lami za mina dia sepati
aza za nyumu pa varikorapaina na nyumunyumuna bangara,
beto aza za mina toka laodi pana vuvugu kolo toana.
Beto na Tamaza mina nyunyu paledi
doru oni kolo mata takulanga pa matadi,>> za gua.