1 Ən maay naiy dǝ kwara ghǝr biya? Nii ǝn dlakulva gyiya yesu bihi? Nǝghǝghanabi nai kǝ Yesu Yaazhǝl biya? Nii ɗǝg shɪgar ma Yaazhǝgǝl bihi? 2 Akwama ǝn dlakulva gyiya Yesu bi nai vak uudah biya, ǝn dlakulva gyiya Yesu nai vakaruwa adaɓa kuuram nǝ dǝga sǝrga taakiya ŋ dlakulva gyiya Yesu naiya. 3 Ən ngǝdlǝg ndkwah nai kǝ ghǝrar vak lii arna sǝrra ndzǝganara. 4 Mbats kǝm maay dǝ ndzǝɗ vǝlkǝmnd nǝ uud kǝ dǝg zhǝga ard yuwa hubǝg biya? 5 Kǝm maay dǝ ndzǝɗa gwiyav dǝ ǝmghwassahamǝnd band kwa ɓag nǝ kyalmaha lii ɓa tlǝri, ard zaraabah ma gata Yaazhǝgǝla, ard kefas biya? 6 Nii ba kaiya ard barnabas ha wa nalnǝg kǝ barari kǝskǝmnd ɓa tlǝr gǝlla ghayamǝndi? 7 War wa ɓatlǝra tlauja tǝhalakwaha iin wa gǝlla ghǝraani? War wa uusa ghuha inabi, kwal huɓgwibi kǝ yuwan biyi? War wa piiya almana, da pǝlarvan huɓa watli? ? 8 Ən taa kwana kwakyarvad dǝgiti naag nǝ uuda? Taagabi na adzahadzah muus ndkwahiin biya? 9 Adabb viinɗaviinɗan ma adzahadzaha muusa taakiya,“ mbusarbi kǝ ghai kǝ tlusǝg ma sarta buga hiya biya,” ba tlah pall wa fǝg nǝ Daadamazhigǝl kǝ hyǝmi tǝ iitǝra? 10 Tagav da mbakyarvad kǝmyam nǝ ǝlbǝgiin biya? Ba jirjiira, viindava mbakyarvad kǝmyamma. Abi kalkalan kǝ daada uusǝga ard dadda bugahiya fadghǝr kǝ tlǝkǝna dǝgshigaan matlra guuha. 11 Akwama riitamǝnd riig kǝlbǝga Daadamazhigǝl ma ǝrvǝdamahuɗaruwa, aiciya, dǝgit dyak vakamǝnd akwama ghudamǝnda ghudǝg tlǝraru kwa hulfa dǝga duniya biya? 12 Akwama tlǝkǝnatlǝg nǝ kyalmah kǝ ndzǝɗa ɓa kwaha, mbats, jamtǝrubi nǝmnd dǝ ɓa kwahiin biya? Bakǝvakwaha, ɓagamnd bi kǝ tlǝr dǝ ndzǝɗǝmǝnd biya, famǝnda fǝg kǝ huɗda ɓagamǝndbi kǝ dǝgiti da tsǝgarva taa ǝlbǝg marawa tlǝkatǝga. 13 Mbats, am sǝrgai taakiya lii ɓatllǝr ma guda Daadamazhigǝla ar tlǝkǝna ba vakwahiin kǝ ɗǝgzǝgaatǝr biya? Lii ɓatlǝra tǝ ɓagadiya, ar tlǝkǝna ba dǝga kyuulǝg nǝ iitǝr kǝ dǝgshigatǝr biya? 14 Bandkwah dlaɓa, tagadatag nǝ adzahadzaha Yaazhǝgǝl taakiya lii taa ǝlbǝg marawa ar da tlǝkǝna bavakwahiin kǝ dǝga pǝla puutatǝra 15 Ɓaganbi nai kǝ tlǝr aandzu dǝ pal ma kwanahaan kǝ kwara ghǝr biya, adaba ǝn viinda kwanǝn naiya mbakyavad ɓagwi nǝ band kwah biya, nggulǝm ǝn ǝmtsan nai tǝghǝr kwa da tsǝkwava nǝ uud kǝ tsa kuusghǝg dǝ kwanna. 16 Aandzu ban ɓa tlǝra taa ǝlbǝg marawa , nalbi adabanǝ wan kǝdǝga tsa kushǝg kǝskaiy biya, adaba barari kǝskai ɓatlǝra, dǝga zhuwadaal kǝskai akwam ǝn maay ɓatlǝr taa ǝlbǝg maraw biya. 17 Akwamana ɓag kwakyarvad naaga ghǝrarra naiya, ma pǝlgwapǝlǝg nǝuud kǝ dǝgshigara, adaba ǝn ɓag kwakyarvad nǝgha gyiya biya, vǝlghwa langyi nǝ Daadamazhigǝla. 18 Auci nǝdǝgshigari? Dǝgshigara, iin taa ǝlbǝg marawa, ǝn tagaan ba gyagyaana. Ən maay ɓa tlǝr dǝ kwara ghǝrǝn tlankǝna naiyin ma tlǝra taa ǝlbǝg maraw biya. 19 Bakǝvakwana ǝn Eva aandzu war naiy biya, nandalnǝg kǝ ghǝrar kǝ Eva aandzu ba wara, adaba ǝn tlǝkǝna kǝ uudah ba dyǝka. 20 Vak yahudaha, nanalnǝg band zhiil yahudah nai kiyava dzahdaan kǝ yahudaha. Kwar ma kwarǝg adzahadzaha musa, iin nǝdal kǝ ghǝrar band daddakwa kwarǝg na adzahadzaha, aandzu ba adzahadzahbi wa kwara kaiy biya, mbakyarvad ǝn dzahdaan kǝ lii kwarǝg nadzahadzaha. 21 Vak lii ar maay ma kwarǝga adzahadzaha muus biya,nanalnǝg nai band daddakwa maay ma kwarǝga adzahadzaha muus biya, kwakyarvad ǝn taaki maay na adzahadzaha Daadamazhigǝl ɓatlǝr dǝ kaibiya, ǝndkwah biya, ǝn mazhangǝl kǝ adzahadzaha tlǝkatǝg naiya, kiyava saa dǝ lii ar maay mazhangǝl kǝ adzahadzaha muus biya. 22 Lii hǝtsahǝtsan nǝ fadghǝraatǝra, nandalnǝg nai kǝ ghǝrar band daddakwa hǝtsahǝtsan ma fadghǝra kiyava saa dǝ iitǝra, dlaɓa nanalnǝg nai aandzu hulfa kwar kǝ dǝgita vak aandzu hulfa kwar kǝ uudaha adaba ma ɓagaba ndandara ǝn kattǝrt kǝ kyalmaha. 23 Ɓaganaɓag nai baɗǝm bandkwana mbakyarvad ǝlbǝg marawa, kiyava tlǝkǝnatlǝg kǝskai kǝ dǝgshigar ma barkaana. 24 Mbats am sǝrgabiya, vaka ɓa dǝrra ɓalla ǝmndǝrga, baɗǝm nǝ lii ɓalla ǝmndǝrga arɓa kǝlla ndzǝɗaatǝra ar jaara kǝ pallatǝra, ba pal miitǝr wada zaa firbiya? 25 Ar ndaigan nǝ lii ɓa dǝr kǝ ghǝraatǝr ma kwar kǝ dǝrra, ar ɓa kwana kwakyarvad ar tlǝkǝna kǝ dǝgshigaatǝr kwa da badzǝga, adaba dǝg shigamnda da maay badzǝg biya. 26 Mbakyarvad kwaha ɓalla ǝmndǝrgara da nǝgalbi gyan biya, tsa dǝmbara ǝn tsǝg ma fǝdbiya. 27 Adaba ǝn ndaiya vǝghara, nandalnǝg Evaara, mbakyarvad aa nalbi dlaɓ tǝhala taa ǝlbǝg maraw kǝkai kǝ kyalmaha, kai kata ghǝrarra da tsuwava nǝ uud kǝ tlǝkǝna zaa fiira.