1 Aandzu ba mana sǝrgasǝrg kǝ taa ghaiya uudaha shah shaha ard dǝga zǝrɓǝlgaha Daadamazhigǝla, akwama ǝn maay dǝ wayakǝvǝr biya, nanalnǝg band talenlenga kwa tlaav ba gyaagyanna, aandzu gangga kwa tlaav ba dyǝk dyǝkka, 2 Aandzu ba mana sǝrgasǝrg kǝ taa tlayangǝra, ǝn nǝghaakan kǝ dǝgitah shiɓashiɓan baɗǝmma, dlaɓa ǝn mǝng dǝ dyǝmdyǝma baɗǝmma, ard fadǝghǝr ba vaivaiya, kwan da gantgǝg kǝ aghwa, akwama ǝn maay dǝ wayaikǝvǝr biya, maay nǝ dǝgiti ǝn tuuk vakai naiy biya. 3 Aandzu ma vǝlandavǝlǝg kǝ dǝgiti ǝn dǝvakai nai baɗǝmma, ǝn vǝldan dlaɓ kǝ vǝghara hǝvara kaara, akwama ban maay dǝ wayakǝvǝr biya, ǝn maay dǝ dǝkshiga aandzu ndaw biya. 4 Waiyakǝvǝra fǝgara fa ǝrvǝdmahuɗa ard taa jir ƙǝ uuda, waiyakǝvǝra maay dǝ sǝlg biya, maay fǝgara tǝɗa fǝɗavgha ,ard ɗaaga ghǝr biya. 5 Waiyakǝvǝra Maay dǝ naa ghǝr biya, maay dlaɓa fa dagar ma uudah biya, maay pǝkya ghaiy biya maay hǝkya dǝgit ghwaɗ mahuɗ biya. 6 Naay nǝ waiyakǝvǝr kǝ ɓa dǝga kǝlaɗǝr biya, bamma naa ɓa dǝga jirjira, 7 Waiyakǝvǝra fǝgara fa ǝrvǝdmahuɗ kǝ uud, ard fadghǝra aandzu tauwa, ard pakka dǝgita, ard ɓǝshgaana aandzu ba ndara. 8 Maay ghyǝnng nǝ waiyakǝvǝra ba tangw dama zǝrazǝr biya, taa tlayanngǝra da dagal zamanana, taa ghayah dlaɓa zǝgga, dyǝmdyǝmǝra da ghyǝnnga. 9 Bak jirjira, dyǝmdyǝmǝra miiyama rǝghghǝt biya, taa tlayanngǝra miiyama rǝghghǝt biya. 10 Akwama da saahii sǝg nǝ daddakwa rǝghgha rǝghghana, tǝhalakwaha daddakwa rǝgha biya da nǝga. 11 Ma sartǝn zarhǝrara, ndzan taa ba ǝlbǝga zarhǝrra, ndzan dzamaghǝr band dǝga zarha, ndzan vǝla farwut band dǝga zarha. Ghubaranǝt ba naiya kal dugarsdug kǝskai kǝ hǝnkala zarhǝrra. 12 Aɗaba ndakwana kǝm zhara garava ma akwatǝrama band avǝɗvaavǝɗa, daghuvaliina kǝm da zharg ba ghwǝm dǝ gyiiya, aɗaba ndakwana sǝrgasǝrgara rǝghghǝt biya, daghuvalaana sǝrgasǝrgǝrra da rǝghghǝg ba dyǝkdyǝk band kwa fakwi nǝ Daadamazhigǝla. 13 Ndakwan ciya, dǝgitahaan hǝkǝrɗǝna mǝnga bak jiijira, fadghǝra, pakka dǝgita, ard waiyakǝvǝra, baɗǝm miitǝra ba waiyakǝvǝr wa dyǝkka.