ƏLBƏG MARAW TƏDVAD
MATA
1
Əlbǝg tǝghǝr kǝ Yesu Kǝristi
1 Kakaɗ tǝghǝr kǝ hulfa Yesu Kǝristi, zǝra Dauda kwa ghǝravaan ndakwani zǝra Ibrahim.
2 Ibrahim wa yaa Ishaku,
ya nǝ Ishaku kǝ Yakuba,
ya nǝ Yakub kǝ Yahuda ard zaraabahaana.
3 Ya nǝ Yahuda kǝ Ferez ard Zera. Babbaatǝr Tamara.
Ya nǝ Ferez kǝ Hezron,
ya nǝ Hezron kǝ Aram,
4 ya nǝ Aram kǝ Amminadab,
ya nǝ Amminadab kǝ Nashon,
ya nǝ Nashon kǝ Salmon.
5 Ya nǝ Salmon kǝ Bowaz, ɗaaga babbaan Rahab.
Ya nǝ Bowaz kǝ Obed, ɗaaga babbaan Rut.
Ya nǝ Obed kǝ Yesse,
6 ya nǝ Yesse kǝ Tlǝkes Dauda.
Ya nǝ Dauda kǝ Saluman, ɗaaga babbaan Betshaba, kwandza uusa Uri wura.
7 Ya nǝ Saluman kǝ Rehobowam,
ya nǝ Rehobowam kǝ Abija,
ya nǝ Abija kǝ Asa,
8 ya nǝ Asa kǝ Yehoshafat,
ya nǝ Yehoshafat kǝ Yoram,
ya nǝ Yoram kǝ Uzziya,
9 ya nǝ Uzziya kǝ Yotam,
ya nǝ Yotam kǝ Ahaz,
ya nǝ Ahaz kǝ Hezekaya,
10 ya nǝ Hezekaya kǝ Manasse,
ya nǝ Manasse kǝ Aman,
ya nǝ Aman kǝ Yosiya,
11 ya nǝ Yosiya kǝ Yekoniya ard zaraabahaan sartakwa hutsavtǝra nǝ uudah damma Babila kiyava ɛɛva.
12 Tǝhalakwa lanngavtǝrda nǝ iitǝr damma Babila, kaa yigayig nǝ Yekoniya kǝ Shayeltiyel,
ya nǝ Shayeltiyel kǝ Zerubbabela,
13 ya nǝ Zerubbabel kǝ Abihud,
ya nǝ Abihud kǝ Eliyakim,
ya nǝ Eliyakim kǝ Azor,
14 ya nǝ Azor kǝ Zadok,
ya nǝ Zadok kǝ Akim,
ya nǝ Akim kǝ Eliyud,
15 ya nǝ Eliyud kǝ Eliyazar,
ya nǝ Eliyazar kǝ Mattan,
ya nǝ Mattan kǝ Yakub,
16 ya nǝ Yakub kǝ Isuvu zhiila Maryam,
Maryam wa yaayig kǝ Yesu kwa ɗahav dǝ Kǝristi.
17 Baɗǝm nǝ hulfaatǝr ciigǝt tǝ Ibrahim dat Dauda, hulf kǝlawa tar uufaɗa, ciigǝt tǝ Dauda damma sarta kwa hutsavtǝra nǝ yaa Izraˈila damma Babila kiyava ɛɛva, hulf kǝlawa tar uufaɗa, ciigǝt ma sarta ɛɛvǝr ma Babila da tǝ sarta yiga Kǝristi, hulf kǝlaawa tar uufaɗa.
Yiga Yesu Kǝristi
18 Wan nǝ ɗuuli yava nǝ Yesu Kǝristi. Ma sartǝn ndza ɓǝlghara nǝ Isuvu kǝ dzǝgwambǝr kǝ Maryam babba Yesu. Lakuti kǝsgaan kiyava uusa, kaa dlǝghǝgadlǝghǝg kǝ iin kǝ huɗ tǝdvad Shǝɗǝkwa Daadamazhigǝla. 19 Nahabi nǝ Isuvu jambuwaan kǝ tsǝgar zhǝru mataataka uudah biya, aɗaba uuda jiirjiir nǝ iina. Kaa ɓaa dabariya tagwav kǝ iin dǝ vakaiy ma ɗyamɗyamǝra. 20 Masartǝn ba ndzǝgaan nǝ iin ba dzamaghǝra, kaa tlǝgaraatlǝg zǝrɓǝlga Yaazhigǝl ma sǝnnga, aiyama taa kǝ iina, “Isuvu zǝra Dauda, gǝdzbi kǝ kǝssa Maryam kiyava uusagh biya, aɗaba huɗɗǝn dǝvakai nǝ iinna dǝga Shiɗkwa Daadamazhigǝla. 21 Da yigaan kǝ zǝra, agha da farva kǝ ɗaag Yesu, aɗaba iin wada katta uudahaan sagal ma haipahaatǝra.”
22 Dzǝghardzǝg wanahaan baɗǝm mbakyarvad righǝvant nǝ dǝgiti tagada nǝ Yaazhigǝl tǝdvad tlayang taakiya,
23 “Pakwara dǝghwa da dlǝghgaan kǝ huuɗa, da ya kǝ zǝra,
da fǝvarva ɗaag Immanuela.”
Dǝgiti tuuk vakai nǝ Immanuela, “Daadamazhigǝl ǝmtaɗ dǝ kǝmiyamma.”
24 Ciyit ba nǝ Isuvu ma haara, kaa gatǝgaan kǝ iin kǝ dǝgiti taga nǝ zǝrbǝlga Yaazhigǝla. Kaa kǝsguukǝsǝg nǝ Isuvu kǝ Maryam nal kǝ uusaana. 25 Farabi kǝ dzaghǝr biya, bamma tǝhala kwa yaa nǝ iin kǝ zǝraana, farva kǝ iin kǝ ɗaag Yesu.