1 ታ ኣሳ ቃላኒኔ ሳሎ ኪታንቻታ ቃላን ሃሳዪኮካ ታስ ሲቆይ ባይንዳ ኣጊኮ ጮ ሜላ ቢራታ ጊሪሳ ማላ ዎይኮ ዳላ ጊሬꬃ ማላ። 2 ቲንቢቴ ሃሳዪዛ ኢሞታይ ታስ ዲኮካ፥ ዎይኮ ፁራ ዮዖታኔ ኤራቴꬅ ዉርሳ ታ ኤሪኮካ፥ ዙማይ ኢዚ ዲዛሶፔ ꬎቃዳ ሃራሶ ዲጊዛ ኣማኖይ ታስ ዲኮካ ሄሳ ዉርሳካ ሲቆይ ባይንዳ ታ ኦꬂኮ ሄሲ ሜላ ሃዳ። * ማቶ 17፡20፤ 21፡21፤ ማር 11፡23 3 ታስ ዲዛዝ ዉርሳ ማንቆታስ ታ ኢሚኮካ፥ ታ ኣሳቴꬅ ታ ታማን ፁጊኮካ፥ ሲቆይ ባይንዳ ኣጊኮ ታና ሄሲ ኣይኮካ ማዴና። * ታማን ፁጊኮካ ኢሲ ኢሲ ጌሻ ማፃፋቲ ኦቶሬቴꬃስ ጊዛ።

4 ሲቆይ ዳንዳያ፥ ቃሴካ ኪያ፤ ሲቆይ ሚቃይኔና፤ ጬቄቴና፤ ኦቶሬቴና፤ 5 ቤሶንታዝ ኦꬄና፥ ባርካ ባ ጎዓ ፃላላ ፄሌና። ቆሆ ቆዳን ዬጌና። 6 ሲቆይ ቱማንፔ ኣቲን ማካላን ኡፋዬቴና። 7 ሲቆይ ኡባ ዎዴ ዳንዳዬስ። ኡባ ዎዴካ ኣማኔስ። ኡፋይስ ኦꬄሲኔ ሚኒ ኤቄስ።

8 ሲቆይ ሙሌካ ኩንዴና። ቲንቢቴይ ጊዲኮ ኣታና። ሃራ ቃላን ሃሳያይካ ኣታና። ኤራቴꬂካ ሻሬታና። 9 ጋሶይካ ኑ ኤሪዛይ ዉርሲ ጊዶንታ ሻኪ ኤሮስ። ቲንቢቴ ሃሳያ ጊዲኮካ ባጋ ሃሳዮስ። 10 ጊዶ ኣቲን ዉርሴꬂ ጋኪዛ ዎዴ ኩሜꬅ ጊዶንታ ኢሞታይ ሄ ዎዴ ሻሬታና።

11 ታ ጉꬃ ናቴቴꬃን ዳሼ ና ማላ ሃሳያይሲኔ ና ማላ ቆፓይስ። ና ማላካ ዩሻ ቆፓይስ። ካሃ ኩንꬂዳፔ ጉዬ ካሴ ናቴꬃን ሃኒዛይሳ ዉርሳካ ዬጋ ኣጋዲስ። 12 ኑኒ ሃዒ ቤይዛይሲ ሃꬃን ፄሊዛ ማላ ጮ ቦዢ ቦዤስ ሺን ሄ ዎዴ ጊዲኮ ኑ ኢዛ ኣይፌሶ ሎዔꬂ ቤያና። ታ ሃዒ ኩሜꬅ ጊዶንታ ባጋ ፃላላ ኤራይስ። ሄ ዎዴ ጊዲኮ ታኒ ታ ሁዔስ ኤሬቲዳይሳ ማላ ኤራና።

13 ሄሳ ጊሽ ኣማኖይ፥ ሂዶታይኔ ሲቆይ ሃይቲ ሄꬓቲ ኤቂ ዳና። ሃይታ ኡባፌ ኣꬊዛይ ሲቆ።