1 ሄሳ ጊሽ ኮይሮፔ ኪርስቶሳ ጊሽ ኢሜቲዳ ቲሚርቴዛ ኣጊዲ ኣኔ ጌዴ ሚኖ ቲሚርቴኮ ቦስ። ሃይቂዳ ኦሶፔ ማሮቴꬃን ጌሎ ጊሺኔ ፆሳን ኣማኖ ጊሽ ቡሮ ኣኔ ኢዛን ዎꬊ ማꬎኮ። 2 ሄሳꬆካ ፂንቃቴ ጊሺኔ ኩሼ ኣሳ ቦላ ዎꬆ ጊሽ ቃሴካ ሃይቂዳያታ ዴንꬃ ጊሺኔ ሜርና ፒርዳ ጊሽ ቡሮ ዎꬂ ዶሞኮ። 3 ፆሳ ሼኔ ጊዲኮ ኑ ሄሳꬆ ኦꬃና።

4 ባ ኣማኖ ካዲዳ ኣሳታ ኢስታ ማሮቴꬃን ዎስቲ ዞራኔ? ፖዖይ ኢስታስ ኢሲቶ ፖዒዳይታ ሳሎ ኢሞቴꬃ ኤኪ ቤዪዳይታ፥ ፂሎ ኣያና ኤኪ ቤዪዳይታ፥ 5 ሎዖ ፆሳ ቃላኔ ቡሮ ያና ኣላሜዛ ዎልቃ ኤኪ ቤዪዳይታ፤ 6 ዛሪዲ ካዲዳይታ ኢስታ ናምዓንꬆ ዛሪዲ ማሮቴꬃን ኤኮይ ዳንዳዬቴና። ጋሶይ ኢስቲ ባ ሞሮስ ፆሳ ና ዛሪ ካቄቴሲኔ ካዉሼቴስ።

7 ኡባ ዎዴ ባ ቦላ ኢራ ኡዪዛ ቢታይ ቃሴካ ኢዛ ጎይዛዴስ ኣይፌ ኢሚዛ ቢቲያ ፆሳ ኣቻን ኣንጄታዱስ። 8 ጊዶ ኣቲን ኣጉንꬂኔ ኦዶሮይ ሞኪዛ ቢታያ ጎዓይ ቤዪዳሮ ጊዳና። ሄ ቢታይስ ቃንጌቴꬂ ማታን ዴስ። ኢዚ ዉርሴꬂ ታማን ፁጌቴꬅ ጊዳና። *ሜꬌ 3፡17-18

9 ታ ኢሻቶ! ኑኒ ሄሳꬆ ሃሳይኮካ ኢንቴስ ኢንቴ ኣቶቴꬃራ ኦይኬቲዳ ሎዖ ሚሽ ዲዛይሳ ኑ ሲꬎኮ። 10 ካሴ ጊዲን ዎይኮ ሃዒ ጊዲንካ ኢንቴ ኣማኒዛይታ ማዲዳይሳኔ ኢዛ ሱንꬃ ጊሽ ኢንቴ ቤሲዳ ሲቆቴꬃ ባላናስ ፆሲ ማካላንቻ ጊዴና። 11 ኢንቴስ ኢሜቲዳ ሂዶታይ ፖሌታና ጋካናስ ኢንቴፌ ኢሲ ኢሲ ኣሲ ሄሳ ማላ ኦሶ ዉርሴꬅ ጋካናስ ጌንጪዲ ኦꬃና ማላ ኑ ኣሞቶስ። 12 ኣማኖኒኔ ዳንዳያን ኢንቴ ኢዛ ሂዶታ ቃላ ላቲዛይታ ሚሳታናፔ ኣቲን ዶታዓታ ጊዳናይሳ ኑ ኮዮኮ።

13-14 ፆሲ ኣብራሃሜስ ሂዶታ ኢሚዳ ዎዴ ጫቂሼ ሃራ ኢዛፔ ኣꬊዛዴይ ባይንዳ ጊሽ ባርካ ባናን፥ “ታ ኔና ቱማፔ ኣንጃና፤ ታኒ ኔ ዜሬꬅ ዳርሳና” ጊ ጫቂዴስ። *ሜꬌ 22፡16-17 15 ኣብራሃሜይካ ጌንጪ ናጊዳፔ ካሊዲ ኢዛስ ኢሜቲዳ ሂዶታ ዴሚዴስ።

16 ኣሳይ ጫቆ ጫቂሼ ባፔ ꬎቃን ጫቄስ። ጫቆዚካ ጌቴቲዳይሲ ፖሌታና ማላ ሚንꬂዛ ጊሽ ጫቂዳይታ ጊዶን ፓላማይ ዴንዲኮ ካሴ ጫቆ ቃላይ ዲጌስ። 17 ፆሲ ላሜቶንታ ባ ቆፋ ሂዶታ ቃላ ላታናይታስ ቆንጪሳና ማላ ኮይዳ ጊሽ ጫቆ ቃላን ሚንꬂዴስ። 18 ፆሲ ኣይ ዎዴካ ዎርዶታናስ ዳንዳዬና፤ ኢዚ ላሜቶንታ ናምዑ ሚሻታን ኑ ሲንꬃን ዲዛ ሂዶታ ኦይካናስ ኢዛኮ ሺቂዳ ኑኒ ጊታ ሚኖቴꬅ ዴማና ማላ ኦꬂዴስ። 19 ኑካ ሼምፖ ቴቄ ጊዲዳ ሚኖኔ ኣማንꬂዛ ሂዶታ ዴሚዶስ፤ ሄ ሂዶታይካ ማጋላሻዛፔ ጉዬ ባጋራ ዲዛ ጌዴ ፆሳ ኬꬃ ጊዶ ጌሌስ። *ማጋላሻ ጊዛይሳ ኢሲ ኢሲ ባጋ ጋሞꬆን ቃላን ማጋራጃ ጌቴስ። *ሌዌ 16፡2 20 ሄ ሶዚካ ኑ ጊሽ ዬሱሲ ካሴቲ ጌሊዳ ሶ፤ ኢዚካ ማልኬፄዴቄ ሹሜቴꬃ ማላ ሜርናስ ቄሴታ ሃላቃ ጊዲዴስ።