1 ሄሳ ጊሽ ሻራ ማላ ኑና ዩይ ኣꬊዳ ዳሮ ማርካቲ ኑስ ዲሺን ኑና ዴፂዛ ቶሆኔ ቃሴ ኑና ቃቺ ኦይኪዛ ናጋራ ዉርሲ ኑፔ ዎራ ዬጊዲ ኑ ሲንꬃን ዲዛ ዎꬃ ጌንጫኒኔ ዳንዳያን ኣኔ ዎፆስ። 2 ኑ ኣማኒዛ ኣማኖዛስ ኮይሮኔ ፖሎ ጊዲዳ ዬሱሳ ኣኔ ፄሎስ። ኢዚ ባ ሲንꬃን ዲዛ ኡፋይሳ ጊሽ ማስቃሌ ቦላ ሃይቆ ዳንዳዪዲ ማስቃሌ ቦላ ባና ጋካና ካዉሻቴꬃ ሌቂዲ ፆሳ ኣልጋስ ኡሻቻን ኡቲዴስ።

3 ሂስቲኮ ኢንቴ ዳቡሪዲ ሂዶታ ቃንፆንታ ማላ ሄሳꬆካ ናጋራንቻታፔ ካሴ ኢዛ ቦላ ጋኪዳ ሄሳ ማላ ኤቄቴꬅ ዳንዳዪዳ ዬሱሳ ቆፒቴ። 4 ሱꬂ ጉካና ጋካናስ ናጋራራ ኢንቴ ቡሮ ኤቄቲቤይኬታ። 5 ኢንቴ ፆሳ ናይታ ጊዲ ኡቲዲ ቃላይ ጊዛይሳ ባሊዴታ። “ታ ናዞ ፆሳ ሴራ ካዉሻን ፄሎፋ፤ ኔና ኢዚ ሴሪዛ ዎዴ ሂዶታ ቃንፆፋ። 6 ጋሶይካ ጎዳይ ባ ዶሲዛዴ ሃንቄስ፤ ኢዚ ባ ዶሲዛዴ ሴሬስ። ኢዚ ባ ና ማላ ፄሊዛዴ ቃፃዬስ” ጊዴስ።

7 ፆሲ ኢንቴና ባ ና ማላ ቆዲዛ ጊሽ ሃንቆ ዳንዳዪቴ። ኣዋይ ሃንቆንታ ናይ ኦኔ? 8 ናይ ዉሪ ሴራን ዲጪዛꬆ ኢንቴ ዲጮንታ ኣጊኮ ኢንቴ ካሬን ዬሌቲዳ ና ኣቲን ሶ ና ጊዴኬታ። 9 ሄሳ ኡባፌ ቦላራ ሃይሳ ቢታ ቦላ ኑና ሃንቂ ዲቺዳ ኣሾ ኣዋቲ ዴቴስ። ኑካ ኢስታ ቦንቾስ። ሂስቲን ዴዖን ዴያናስ ኑስ ኣያና ኣዋ ጊዲዳይሳስ ኣዛስ ሄሳፌ ኣꬂ ኣዛዜቶኮኒ? 10 ኑ ኣዋቲ ኑና ባስ ሎዖ ሚሳቲ ቤቲዳ ማላ ጉꬃ ዎዴስ ቃፃዬቴስ። ፆሲ ጊዲኮ ኑኒ ኢዛ ጌሻቴꬃ ኢዛፔ ዴማና ማላ ኑና ጎዓናስ ቃፃዬስ። 11 ቂፃቴይ ዉሪካ ሃዒስ ኡፋይሶንታ ኢታ ሚሳቴስ ሺን ጉዬፔ ቃሴ ዶሲ ኤኪዳ ኣሳታስ ሳሮቴꬂ ኢዛን ኩሚዳ ፂሎቴꬃ ኣይፌን ጋꬄስ።

12 ሄሳ ጊሽ ዳቡሪዳ ኢንቴ ቄሴኔ ኢንቴ ጉልባቴ ሚኒሲቴ። *ኢሳ 3፡3 13 ዎቤይ ፓፃና ማላ ኣቲን ካሴፔ ኣꬂ ዎቦንታ ማላ ኢንቴ ቶሆስ ሎዖ ኦጌ ጊጊሲቴ። *ሌም 4፡26

14 ኣሲ ኡባራ ሳሮ ዳና ማላ ኢንቴስ ዳንዳዬቲዛይሳ ዉርሲ ኦꬂቴ። ጌያና ማላ ኮዪቴ። ጌሻቴꬂ ባይንዳ ጎዳ ቤያናስ ዳንዳዬቴና። 15 ኢንቴፌ ኢሳዴስካ ፆሳ ኪያቴꬂ ፓጮንታ ማላ ቃሴካ ጫሞ ኣይፌ ኣይፊዛ ሚꬂ ሞኪዲ ሜቶ ሜꬎንታ ማላኔ ዳሮታ ሞሮንታ ማላ ናጌቲቴ። *ዛሬ 29፡18 16 ኢሲቶ ማና ካꬃስ ባ ባይራቴꬅ ባይዚዳ ኤሳዌ ማላ ኢንቴፌ ኦኒካ ላይማቲዛዴ ዎይኮ ፆሴ ቦንቾንታዴ ጊዲ ቤቶንታ ማላ ናጌቲቴ። *-ሜꬌ 25፡29-34 17 ኤሳዌይ ጉዬፔ ካሴ ባ ኣንጆዛ ላታናስ ዛሪ ኮዪን ኢዛስ ኢሜቶንታ ዲጌቲዳይሳ ኢንቴ ኤሬታ። ኢዚ ባና ጋኪዛ ኣንጆዛስካ ዳሮ ዬኪሼ ኮዪዲካ ዛሪ ዴማናስ ዳንዳይቤና። *ዴማናስ ዳንዳይቤና ማሬታናስ ኣይኮ ኢዲሌ [ቃዳ] ዴሚቤና ጉሳ። *ሜꬌ 27፡30-40

18 ኩሼን ቦቺኮ ቦሼቲዛ ታማይ ኢዛ ቦላ ኤፂዛ ሲና ዙማኮ ሄ ꬉማኮ፥ ሄ ቱላሌዛኮኔ ሄ ጎቴ ጫርኮዛኮ ኢንቴ ጋኪቤይኬታ። 19 ኢንቴ ዛዬ ጊሪሳኮ ዎይኮ ሃይꬃን ሲዬቲዛ ቃላ ጊሪሳኮ ጋኪቤይኬታ። ሄሳ ሲዪዳ ኣሳቲካ ሃራ ቃላ ጉጆንታ ማላ ዎሲዳ። 20 ሄሳስ ጋሶይካ “ሃራይ ኣቶሺን ሜሄይካ ዙማ ቦቺዛ ጊዲኮ ሹቻን ጫዴቲ ሃይቆ” ጊዛ ኣዛዞዛ ኣሳይ ናጋናስ ዳንዳይቤና። *ኬሳ 19፡12-13 21 ሄ ዎዴ ሄን ሃኒዛይሲ ዉሪካ ዳሮ ባቢሲዛይሳ ጊዲዳ ጊሽ ሙሴይካ “ታ ባባዳ ኮኮራዲስ” ጊዴስ።

22 ኢንቴ ቃሴ ሃ ፂዮኔ ዙማ ቦላ፥ ፑዴ ሳሎ ዬሩሳላሜ፥ ዴዖ ፆሳ ካታማ ኡፋይሳን ሺቂዳ ቆዳይ ባይንዳ ኪታንቻታኮ ዪዴታ። 23 ኢስታ ሱንꬂ ሳሎን ፃፌቲዳ ባይራታ ማባራንኮ፤ ኡባስ ዳና ጊዲዳ ፆሳኮ ኢስታ ቦላ ዎሶይ ባይንዳ ፂሎ ኣሳታ ሼምፖይ ዲዛሶ ማቲዴታ። 24 ኦራꬃ ጫቆን ማቃዪንꬂዛ ዬሱሳኮ ሄሳꬆካ ኣቤሌይ ሺሺዳ ሱꬃፌ ኣꬊዛ ጫቆ ቃላ ዮቲዛ ኣራጬቲዳ ሱꬃኮ ጋኪዴታ። *ሜꬌ 4፡10

25 ኢንቴስ ዮቲዛይሳ ኢንቴ ኣካይ ጎንታ ማላ ናጌቲቴ፤ ሄይታንቲ ፆሲ ቢታ ቦላ ዲዛ ኣሳ ባጋራ ኢስታስ ዮቲዛይሳ ኤኮንታ ኢፂዲ ኢዛፔ ኣታናስ ዳንዳዮንታ ኣጊኮ ኑኒ ሳሎፔ ዪዳይሲ ኑስ ዮቲሺን ኑ ኤኮንታ ኢፂኮ ኢዛፔ ዋኒዲ ኣታኔ? *ኬሳ 20፡22 26 ሄ ዎዴ ቃላ ጊሪሳን ቢታ ቃꬂዴስ። ሃዒ ቃሴ ቢታ ፃላላ ጊዶንታ ታ ሳሎካ ቃሴካ ዛራዳ ኢሲቶ ቃꬃና” ጊዛ ቃላ ዮቲ ዎꬂዴስ። *ሃጌ 2፡6 27 ሃይሲ “ቃሴካ ታ ዛራዳ ኢሲቶ” ጊዛ ቃላይ ኑና ቤሲዛይ ቃፆንታይቲ ሚኒ ዳና ማላኔ ቃፂዛይቲ ሄይቲካ ሜꬌቲዳይቲ ኪቻናይሳ ቤሴስ።

28 ሄሳ ጊሽ ኑኒ ሙሌካ ቃፆንታ ካዎቴꬅ ላታና ጊሽ ኣኔ ፆሴ ጋላቶስ። ቃሴካ ኢዛ ኡፋይሲዛ ኦጌራ ቦንቾሲኔ ያሻቴꬃን ኣኔ ኢዛስ ጎይኖስ። 29 ኑ ፆሳይ ፁጊዛ ታማ ማላ። *ዛሬ 4፡24