10
ዬሱሳ ካሊዛ ታማኔ ናምዓታ ኪቴቴꬅ
(ማር 3፡13-19፤ ሉቃ 6፡12-16)
1 ዬሱሲ ባና ካሊዛ ታማኔ ናምዓታ ባኮ ፄይጊዲ፥ ኢስቲ ቱና ኣያናታ ኬሳና ማላ ቃሴካ ሳኮፔኔ ሃርጌፌ ፓꬃና ማላ ኢስታስ ጎዳቴꬅ ኢሚዴስ። 2 ታማኔ ናምዑ ሃዋሬታ ሱንꬃይ ሃይሳፌ ካሊዛይሳ፤ ኮይሮ ጴፅሮሳ ጌቴቲዛ ሲሞና፥ ኢዛ ኢሻ ኢንዲራሳ፥ ዛቢዶሳ ና ያቆቤኔ ኢዛ ኢሻ ዮሃኒሳ፥ 3 ፒሊጶሳኔ ባርቴሌሞሳ፥ ቶማሳኔ ቃራፃ ሺሺዛ ማቶሳ፥ ኢልፊዮሳ ና ያቆቤኔ ታዶሳ፥ 4 ባ ባጋስ ሚሼቲዛ ሲሞናኔ ጉዬፔ ዬሱሳ ሃይቆስ ኣꬂ ኢሚዳ ኣስቆሮንቶ ዩሁዳ። *ባ ባጋስ ሚሼቲዛ ሲሞና ሃይሲ ሃ ሱንꬃይ ጉጄቲዳይ ኢሲ ኢሲ ኣሳቲ ኢዚ ባ ሃይማኖቴዛስ ሚሼቲዛ ጊሻሳ ጌቴስ። ሃራቲ ቃሴ ኢዚ ኢሲ ኣሳ ኣይሌቴꬃፌ ኬሲዛ ኢሲ ዲርጂቴ ጊዶን ዲዛ ጊሻሳ ጌቴስ። †ኣስቆሮንቶ ሃይሳ ሃ ቃላ ጊሽ ሺቂዛ ናምዑ ቆፋቲ ዴቴስ፤ ኢሶይ ዩሁዳይ ኣስቆሮንቶ ጊዛ ዴሬፔ ዪዳይሳ ቤሳናስ ጎዔቲሺን ሃራይቲ ቃሴ ዩሁዳ፥ ዎርዳንቻኔ ባሌꬂዛይሳ ጊዲ ጫያናስ ጎዔቲዛ ሱንꬃ ጌቴስ።
5 ሃይታ ታማኔ ናምዓታ ኡባ “ጌዴ ኣይዛቤታ ጋꬅ ቦፒቴ፤ ሳማሪያ ኣሳ ካታማ ጌሎፒቴ። 6 ጊዶ ኣቲን ኢስራዔሌ ዴራ ጋርሳፌ ꬋዪዳ ዶርሳታኮ ቢቴ። 7 ቢዲኔ ‘ሳሎ ካዎቴꬅ ማቲዴስ!’ ጊዲ ሳባኪቴ። *ሉቃ 10፡4-12 8 ሃርጋንቻታ ፓꬂቴ፥ ሃይቂዳይታ ሃይቆፔ ዴንꬂቴ፥ ኢንቺራቻ ሃርጊዛይታ ጌሺቴ፤ ዳይዳንꬃታ ኬሲቴ፤ ኢንቴ ሜላ ኤኪዳይሳ ሜላ ኢሚቴ፤ 9 ዎርቃ፥ ቢራ ዎይኮ ፃርቂማላ ጊዲን ኢንቴ ኪሴን ኦይኮፍቴ። 10 ኦሳንቻስ ሃቺስ ሃቺስ ጊዲዛዚ ኮሺዛ ጊሽ ኢንቴ ኦጌስ ጊዲ ሺንቄ፥ ኮሾንታ ማይዖ፥ ጫማ ዎይኮ ጉፌ ኤኪ ቦፒቴ። *1ቆሮ 9፡14፤ 1ፂም 5፡18
11 “ኢሲ ካታማ ዎይኮ ኢሲ ጉታ ኢንቴ ጌሊዛ ዎዴ ኢንቴና ሞካናዴ ኮዪ ዴሚዲ ኢዛ ኬꬃን ሼምፒቴ፤ ሄፔ ኬዛና ጋካናስ ሄን ዲሺቴ። 12 ኢንቴ ኦና ኬꬂካ ጌሊሼ ‘ሳሮ’ ጊቴ። 13 ሄ ኬꬃይ ሳሮታይ ቤሲዛ ኬꬄ ጊዲኮ ኢንቴ ሳሮታይ ሄ ኬꬃስ ጊዶ፤ ሶሮታይ ቤሶንታ ኬꬄ ጊዲኮ ኢንቴ ሳሮታይ ኣጊዲ ኢንቴስ ሲሞ። 14 ኣይ ኣሲካ ኢንቴና ሞኪ ኤካናሲኔ ኢንቴ ጊዛ ሲያናስ ኮዮንታዴ ጊዲኮ ሄሳዴ ኬꬃፌ ዎይኮ ሄ ካታማፔ ኬዚሼ ኢስታ ቦላ ዪዛ ጎሜፔ ኢንቴ ኣቲዳይሳስ ማርካ ጊዳና ማላ ኢንቴ ቶሆ ቦላ ዲዛ ጉዱላ ፒቲዲ ኬዚቴ። *ሃዋ 13፡51 15 ታ ኢንቴስ ቱሙ ጋይስ፤ ፒርዳ ጋላስ ሄ ካታማይ ቦላ ጋካና ፒርዳይ ሶዶሜ ቦላን ጋሞራ ቦላ ጋኪዳ ፒርዳፌ ዴፆ ጊዳና። *ማቶ 11፡24
16 “ታ ኢንቴና ዶርሳ ማላ ካና ሱይቴታ ጊዶራ ኪታይስ። ሄሳ ጊሽ ሾሻ ማላ ጪንጫታኔ ሃራጴ ማላ ኣሽኬታ ጊዲቴ። *ሉቃ 10፡3 17 ኣሳይ ኢንቴና ኦይኪዲ ፒርዲዛ ዱላታስ ሺሻና፤ ኣይሁዳቲ ባ ዎሳ ኬꬃን ኢንቴና ጋራፋና፤ ሄሳ ጊሽ ኢስታፌ ናጌቲቴ። *ማር 13፡9-11፤ ሉቃ 12፡11-12፤ 21፡12-15 18 ታ ጌዶን ዴሬ ሃሪዛይታኮኔ ካዎታኮ ኢንቴና ኤፋና፤ ኢስታ ሲንꬄኒኔ ኣማኖንታ ኣሳታ ሲንꬃን ኢንቴ ማርካ ጊዳና። 19 ኢንቴና ኢስቲ ኦይኪዛ ዎዴ ‘ኑ ኣይ ጊ ሃሳዪኖ? ዎዝጊ ዛሮ ኢሚኖ?’ ጊ ሂርጎፍቴ። ሄ ዎዴ ኢንቴ ጋናዚ ኢንቴስ ኢሜታና። 20 ኢንቴናን ሃሳያናይ ኢንቴ ኣዋ ኣያናፔ ኣቲን ኢንቴና ጊዴኬታ።
21 “ኢሻይ ባ ኢሻ ሃይቆስ ኣꬂ ኢማና፤ ኣዋይ ባ ና ቦላ፥ ናይቲ ባና ዬሊዳይታ ቦላ ማካላቴꬃን ዴንዲዲ ሃራ ኣሳን ዎꬊሳና። 22 ታ ጊሽ ኣሲ ዉሪካ ኢንቴና ኢፃና። ጊዶ ኣቲን ዉርሴꬅ ጋካናስ ሚቅኒ ኤቂዳይ ኢዚ ኣታና። *ማቶ 24፡9፤ ማር 13፡13፤ ሉቃ 21፡17 23 ኣሳይ ኢንቴና ኢንቴ ዲዛ ሄራፔ ጎዲኮ ሃራሶ ኪቺቴ! ታ ኢንቴስ ቱሙ ጋይስ፤ ኢንቴ ኢስራዔሌ ካታማ ኡባ ጋኮንታ ዲሺን ታ ኣሳ ናይ ያና።
24 “ኣሽካራይ ጎዳፔ ዎይኮ ካሊዛዴይ ካሌꬂዛዴፌ ኣꬌና። *ሉቃ 6፡40፤ ዮሃ 13፡16፤ 15፡20 25 ታማሬይ ባና ታማርሲዛይሳ ማላ ዎይኮ ኣሽካራይ ጎዳ ማላ ጊዲኮ ሄሲ ኢዛስ ጊዳና። ኬꬃ ኣዋ ‘ቢዔሊዜቡላ’ ጊኮ ሶ ኣሳ ኣይሲ ሄሳፌ ኢታ ጌቴኔ! *ማቶ 9፡34፤ 12፡24፤ ማር 3፡2፤ ሉቃ 11፡15
26 “ሄሳ ጊሽ ኢስታስ ባቦፍቴ፤ ጌሜቲዳይ ቆንጮንታ ቆቴቲዳይ ጌሽ ኬዞንታ ኣቴና። *ማር 4፡22፤ ሉቃ 8፡17 27 ታ ኢንቴስ ꬉማራ ዮቲዳይሳ ፖዖን ሃሳዪቴ፤ ሃይꬃን ሲዪዳይሳ ቆንጬን ሃሳዪቴ። 28 ኣሾ ዎꬊኮፌ ኣቲን ሼምፖ ዎꬋናስ ዳንዳዮንታይታስ ባቦፍቴ፤ ሄሳፌ ኣሾኔ ሼምፖ ጋꬂ ጋናሜ ታማን ꬋይሳናስ ዳንዳዪዛይሳስ ባቢቴ። 29 ኢሲ ሳንቴን ባይዜቲዛ ናምዑ ሲኔ ካፎታፔ ኢሲኒያካ ኢንቴ ሳሎ ኣዋ ሼኔይ ባይንዳ ጮ ኩንዳ ኣቱኩ። ‡ሲኔ ካፎ ኢሲ ኢሲ ባጋ ጋሞꬆ ቃላን ሲኔ ጊዛይሲ ጋሼ ካፎ ጉሳ። 30 ሃራይ ኣቶ ሺን ኢንቴ ሁዔ ቢናናይካ ታዪቦን ዴስ። 31 ሄሳ ጊሽ ባቦፍቴ። ዳሮ ሲኔ ካፎታፔ ኢንቴ ዋጋይ ኣꬊ ቦንቼቲዳዛ።
32 “ኣሳ ሲንꬃን ታስ ማርካቲዛዴስ ታካ ሳሎን ዲዛ ታ ኣዋ ሲንꬃን ኢዛዴስ ማርካታና። 33 ቃሴ ኣሳ ሲንꬃን ታና ካዲዳዴ ታካ ሳሎን ዲዛ ታ ኣዋ ሲንꬃን ኢዛ ካዳና። *2ፂም 2፡12
34 “ታ ቢታ ቦላ ሳሮቴꬅ ኤሃናስ ዪዳ ኢንቴስ ሚሳቶፖ፤ ማሻ ኤሃናስ ኣቲን ሳሮቴꬅ ኤሃናስ ያቤኬ። 35 ታኒ ዪዳይ ና ኣዋፔ፥ ማጫ ና ኣዪፔ፥ ና ማቾ ቦሎቲፔ ሻካናሳ። 36 ኣሳስ ሞርኬይ ሶ ኣሳ ጊዳና።
37 “ታፔ ኣꬂዲ ባ ኣዋ ዎይኮ ባ ኣዮ ሲቂዛዴይ ታስ ጊዳናስ ቤሴና። ታፔ ኣꬂዲ ባ ኣቱማ ና ዎይኮ፥ ማጫ ና ሲቂዛዴይ ታስ ጊዳናስ ቤሴና። 38 ባ ማስቃሌ ቶኪዲ ታና ካሎንታ ኣሲ ታስ ጊዳናስ ቤሴና። *ማቶ 16፡24፤ ማር 8፡34፤ ሉቃ 9፡23 39 ባ ሼምፖ ኣሻናስ ኮዪዛዴይ ꬋይሴስ፤ ባ ሼምፖ ታ ጊሽ ኣꬂ ኢሚዛዴይ ኣሼስ። *ማቶ 16፡25፤ ማር 8፡35፤ ሉቃ 9፡24፤ 17፡33፤ ዮሃ 12፡25
40 “ኢንቴና ሞኪ ኤኪዛዴይ ታናካ ሞኪ ኤኬስ። ታና ሞኪ ኤኪዛዴይ ታና ኪቲዳዴካ ሞኪ ኤኬስ። *ማር 9፡37፤ ሉቃ 9፡48፤ ዮሃ 13፡20 41 ኢሲ ናቤ ናቤቴꬃን ሞኪ ኤኪዛዴይ ሄ ናቤዛ ዋጋ ዴማና። ፂሎ ኣስ ኢዛ ፂሎቴꬃ ጊሽ ሞኪ ኤኪኮ ሄ ፂሎዛ ዋጋ ኤካና። 42 ሄሳ ጊሽ ታ ኢንቴስ ቱሙ ጋይስ፤ ኦኒካ ሃይታ ጉꬃታፔ ታና ካሊዛዴ ጊዲዳ ጊሽ ኢሲ ፁዓ ኢርፃ ሃꬅ ኡሺኮ ሂኒስካ ዋጋይ ꬋዬና” ጊዴስ።
*10:4 ባ ባጋስ ሚሼቲዛ ሲሞና ሃይሲ ሃ ሱንꬃይ ጉጄቲዳይ ኢሲ ኢሲ ኣሳቲ ኢዚ ባ ሃይማኖቴዛስ ሚሼቲዛ ጊሻሳ ጌቴስ። ሃራቲ ቃሴ ኢዚ ኢሲ ኣሳ ኣይሌቴꬃፌ ኬሲዛ ኢሲ ዲርጂቴ ጊዶን ዲዛ ጊሻሳ ጌቴስ።
†10:4 ኣስቆሮንቶ ሃይሳ ሃ ቃላ ጊሽ ሺቂዛ ናምዑ ቆፋቲ ዴቴስ፤ ኢሶይ ዩሁዳይ ኣስቆሮንቶ ጊዛ ዴሬፔ ዪዳይሳ ቤሳናስ ጎዔቲሺን ሃራይቲ ቃሴ ዩሁዳ፥ ዎርዳንቻኔ ባሌꬂዛይሳ ጊዲ ጫያናስ ጎዔቲዛ ሱንꬃ ጌቴስ።
*10:7 ሉቃ 10፡4-12
*10:10 1ቆሮ 9፡14፤ 1ፂም 5፡18
*10:14 ሃዋ 13፡51
*10:15 ማቶ 11፡24
*10:16 ሉቃ 10፡3
*10:17 ማር 13፡9-11፤ ሉቃ 12፡11-12፤ 21፡12-15
*10:22 ማቶ 24፡9፤ ማር 13፡13፤ ሉቃ 21፡17
*10:24 ሉቃ 6፡40፤ ዮሃ 13፡16፤ 15፡20
*10:25 ማቶ 9፡34፤ 12፡24፤ ማር 3፡2፤ ሉቃ 11፡15
*10:26 ማር 4፡22፤ ሉቃ 8፡17
‡10:29 ሲኔ ካፎ ኢሲ ኢሲ ባጋ ጋሞꬆ ቃላን ሲኔ ጊዛይሲ ጋሼ ካፎ ጉሳ።
*10:33 2ፂም 2፡12
*10:38 ማቶ 16፡24፤ ማር 8፡34፤ ሉቃ 9፡23
*10:39 ማቶ 16፡25፤ ማር 8፡35፤ ሉቃ 9፡24፤ 17፡33፤ ዮሃ 12፡25
*10:40 ማር 9፡37፤ ሉቃ 9፡48፤ ዮሃ 13፡20