17
ዬሱሳ ሜꬋይ ላሜቲዴስ
(ማር 9፡2-13፤ ሉቃ 9፡28-36)
ኡሱፑን ጋላሳፌ ጉዬ ዬሱሲ ጴፅሮሳኔ ያቆቤ ቃሴካ ያቆቤ ኢሻ ዮሃኒሳ ባናራ ኤኪዲ ኢስታራ ፃላላ ኢሲ ꬎቃ ዙማ ቦላ ኬዚዴስ። * 2ጴፅ 1፡17-18 ኢስቲ ሄን ዲሺን ዬሱሳ ሜꬋይ ላሜቲዴስ፤ ኢዛ ኣይፌሶይ ኣዋ ኣርሼ ማላ ፖዒዴስ፤ ኢዛ ማይዖይካ ፖዖ ማላ ፆልቂዴስ። ሄራካ ሙሴይኔ ኤላሲ ዬሱሳራ ሃሳዪሼ ኢስታስ ቤቲዴስ። ጴፅሮሲ ዬሱሳ “ጎዶ! ኑ ሃኒን ዲዛኮ ኑስ ሎዖኮ! ኔ ሼኔ ጊዲኮ ኢሲ ዳሴ ኔስ፥ ኢሲ ዳሴ ሙሴስ፥ ኢሲ ዳሴ ኤላሳስ ሄꬑ ዳሴ ኦꬆ?” ጊዴስ።
ኢዚ ቡሮ ሃሳያን ዲሺን ፖዒዛ ሻራይ ኢስታ ካሚዴስ፤ ሻራ ጋꬃራ “ታኒ ኢዛን ኡፋዬቲዛ ታ ዶሲዛ ታ ናይ ሃይሳ፤ ኢዚ ጊዛዝ ሲዪቴ” ጊዛ ቃላ ጊሪስ ሲዬቲዴስ። * ሜꬌ 22፡2፤ ዛሬ 18፡5፤ ማቶ 3፡17፤ 12፡8፤ ኢሳ 2፡7፤ ማር 1፡11፤ ሉቃ 3፡22
ኢዛ ካሊዛይቲካ ሄሳ ሲዪዳ ዎዴ ዳጋሚዲ ቢታ ቦላ ጉፋኒዳ። ዬሱሲ ኢስታኮ ሺቂ ኢስታ ባ ኩሼን ቦቺዲ “ዴንዲቴ፤ ባቦፍቴ!” ጊዴስ። ኢስቲ ꬎቁ ጊ ፄሊሺን ዬሱሳፔ ኣቲን ኢዛራ ሃራ ኣስ ኦናካ ቤዒቤቴና።
ኢስቲ ዙማ ቦላፌ ዎꬊሺን ዬሱሲ “ኣሳ ናይ ሃይቆፔ ዴንዳና ጋካናስ ኢንቴ ቤዮይሳ ኦናስካ ዮቶንታ ማላ” ጊ ኣዛዚዴስ።
10 ዬሱሳ ካሊዛይቲ “ሂስቲን ሙሴ ዎጋ ታማርሲዛይቲ፥ ኤላሲ ካሴቲዲ ያና ቤሴስ ኣዛስ ጊዞ?” ጊዲ ኦይቺዳ። * ሚክ 4፡5
11 ኢዚካ ኢስታስ “ቱማኮ፤ ኤላሲ ዪዲ ዉርሲካ ጊጊሳና ጊዲ ዛሪዴስ። 12 ታ ኢንቴስ ጊዛይ ኤላሲ ዪዴስ፤ ጊዶ ኣቲን ኣሳይ ባ ኮይዳ ማላ ኢዛ ቦላ ኦꬂዴስ ኣቲን ኢዛ ኤርቤና፤ ሄሳꬆካ ኣሳ ናይ ኢስታ ኩሼን ዋዬ ቤያና” ጊዴስ። * ማቶ 11፡14
13 ሄ ዎዴ ዬሱሳ ካሊዛይቲ ዬሱሲ ኢስታስ ዮቲዛይስ ፃማቂዛ ዮሃኒሳ ጊሽ ጊዲዳይሳ ኤሪዳ።
ዳይዳንꬂ ኦይኪዳ ኢሲ ና ዬሱሲ ፓꬂዴስ
(ማር 9፡14-29፤ ሉቃ 9፡37-43)
14-15 ዬሱሲኔ ኢዛ ካሊዛይቲ ኣሳኮ ሲሚዳ ማላ ኢሲ ኣሲ ዬሱሳኮ ሺቂዲ ኢዛ ሲንꬃን ጉልባቲዲ “ጎዶ! ታ ና ዳይሳ ቦላፌ ዬጊዛ ሃርጌይ ዳሮ ዋይሲዛ ጊሽ ታስ ማራሪኪ! ዳሮ ዎዴ ታማን ኩንዴስ፤ ሃꬃንካ ጌሌስ። 16 ታኒ ናዛ ኔና ካሊዛይታኮ ኤሃዲስ ሺን ኢስቲ ኢዛ ፓꬃና ዳንዳዪቤቴና” ጊዴስ።
17 ዬሱሲ “ኔኖ ኣማኖንታ ጌላ ዬሌታዞ! ኣይዴ ጋካናስ ታ ኢንቴናራ ዳኔ? ቃሴ ኣይዴ ጋካናስ ታ ኢንቴና ዳንዳያኔ? ኣኔ ናዛ ሃ ታኮ ኤሂቴ” ጊዴስ። 18 ሄሳፌ ጉዬ ዬሱሲ ዳይዳንꬃ ሴሪዲ ናዛፔ ኬሲዴስ፤ ናዚካ ሄ ሳቴፔ ሲሚዲ ፓፂዴስ።
19 ዬሱሳ ካሊዛይቲ ፃላላ ኢዛኮ ሺቂዲ “ኑኒ ዳይዳንꬃ ኬሳናስ ኣዛስ ዳንዳይቤይኮኒ?” ጊዲ ኦይቺዳ።
20 ኢዚካ ኢስታስ “ኢንቴስ ኣማኖይ ፓጬ ጊዲዳ ጊሽ ዳንዳይቤኬታ፤ ታ ኢንቴስ ቱሙ ጋይስ፤ ቄሪ ጋሼ ኣይፌ ማላ ኣማኖይ ኢንቴ ቦላ ዲዛኮ ሃይሳ ዙማ ‘ሃይሳፌ ዴንዳዳ ጌዴ ባ!’ ኢንቴ ጊዳኮ ኢዚ ኢንቴስ ባና። ኢንቴና ፆናናይ ዴና። * ማቶ 21፡21፤ ማር 11፡23፤ 1ቆሮ 13፡2 21 ሃይሳ ማላይ ጊዲኮ ፆማኒኔ ዎሳን ኣቲን ሃራን ኬዜና” ጊዴስ። * ኢሲ ኢሲ ጌኤሻ ማፃፋታን ፓይዶ ናምዑ ታማኔ ኢሲን ቦላ ዲዛ ቆፋይ ጉጄቲቤና፤ ቃላይካ ማር 9፡29 ዲዛይሳ ማላ።
22 ኢስቲ ጋሊላን ኢሲፌ ዲሺን ዬሱሲ ኢስታ “ታና ኣሳ ና ኣሳስ ኣꬂ ኢማና። 23 ኢስቲካ ኢዛ ዎꬋና፤ ኢዚካ ሄꬓንꬆ ጋላስ ዴንዳና” ጊን ኢዛ ካሊዛይቲ ኬሂ ሚሼቲዳ።
ፆሳ ኬꬃ ጊራ ቃንፆ
24 ዬሱሲኔ ኢዛ ካሊዛይቲ ቂፊርናሆሜ ጌቴቲዛሶ ጋኪዳፔ ጉዬ ፆሳ ኬꬃ ጊራ ኤኪዛይቲ ጴፅሮሳኮ ሺቂዲ “ኢንቴ ኣስታማሬይ ፆሳ ኬꬃ ጊራ ናምዑ ዲናሬዛ ኣይስ ቃንፄኔ?” ጊዳ። * ኬሳ 30፡13-15፤ 38፡26 ኢሲ ዲናሬይ ሄ ዎዴ ኢሲ ኣሳስ ናምዑ ጋላሳ ዳሞዛ ላጌ።
25 ኢዚካ ኢስታስ “ቃንፄስ” ጊዴስ። ጴፅሮሲ ሶ ጌሊዳ ማላ ዬሱሲ ካሴቲዲ “ሲሞና ዴሬ ካዎቲ ጊራ ጊዲን ዎይኮ ቃራፃ ጊዲን ባ ናይታፔ ኤኪዞዬ? ሃራታፔ ኤኪዛ ሚሳቲዜ?” ጊዴስ።
26 ጴፅሮሲካ “ሃራታፔ ኤኬቴስ” ጊዴስ። ዬሱሲ “ሂስቲኮ ናይታ ቦላ ኣጮይ ባ ጉሳካ! 27 ሂስቲኮካ ኢስታ ኑ ꬉጴꬆንታ ማላ ኔ ሞሌ ኦይኪዛ ጊቴ ኤካ ባዳ ኣባን ዬጋ፤ ኮይሮ ኦይኪዳ ሞሌዛ ዱና ኔ ፖቃዳ ዴሚዛ ሚሻ ኤካዳ ታ ሱንꬃራኔ ኔ ሱንꬃራ ጊራ ቃንፃ” ጊዴስ።

*17:1 2ጴፅ 1፡17-18

*17:5 ሜꬌ 22፡2፤ ዛሬ 18፡5፤ ማቶ 3፡17፤ 12፡8፤ ኢሳ 2፡7፤ ማር 1፡11፤ ሉቃ 3፡22

*17:10 ሚክ 4፡5

*17:12 ማቶ 11፡14

*17:20 ማቶ 21፡21፤ ማር 11፡23፤ 1ቆሮ 13፡2

*17:21 ኢሲ ኢሲ ጌኤሻ ማፃፋታን ፓይዶ ናምዑ ታማኔ ኢሲን ቦላ ዲዛ ቆፋይ ጉጄቲቤና፤ ቃላይካ ማር 9፡29 ዲዛይሳ ማላ።

*17:24 ኬሳ 30፡13-15፤ 38፡26

17:24 ኢሲ ዲናሬይ ሄ ዎዴ ኢሲ ኣሳስ ናምዑ ጋላሳ ዳሞዛ ላጌ።