20
ዎይኔ ኣታኪልቴ ኦሳንቻታ ሌሚሶ
“ሳሎ ካዎቴꬂ ባ ዎይኔ ኣታኪልቴ ጊዶን ኦꬂዛ ኦሳንቻታ ቃፃራናስ ማላዶራ ኬዚዳ ኢሲ ኣታኪልቴይ ዲዛ ጋዳዴ ሚሳታዉስ። ኢሲ ጋላሳ ዳሞዛ ጊዲዛዝ ሃሳዬቲዲ ጊጊዳፔ ጉዬ ኦሳንቻታ ዎይኔ ኣታኪልቴ ኦሶ ኦይꬂዴስ።
“ማላዶ ሄꬑ ሳቴን ኬዚዲ ኦሶይ ባይንዳ ሜላ ጊያይ ኤቂዛሶን ኤቂዳ ሃራ ኣሳታ ዴሚዴስ። ‘ኢንቴ ቢዲ ታ ዎይኔ ጊዶን ኦꬂቴ፤ ታ ኢንቴስ ቤሲዛ ሚሼ ኢማና’ ጊዴስ። ኢስቲካ ቢዳ። ቃሴካ ጋላሳፌ ኡሱፑን ሳቴኒኔ ኡዱፉን ሳቴ ቦላ ኬዚዲ ሃራ ኦሳንቻታ ኦሶን ጌልꬂዴስ። ኦማርሳ ዎዴ ታማኔ ኢሲ ሳቴ ጊዲዛ ዎዴ ኬዚዲ ጮ ኤቂዳይታ ሃራታ ዴሚዲ ‘ኢንቴ ኩሜꬃ ጋላስ ኦሶይ ባይንዳ ኣዛስ ሃይሳን ኤቄቲ?’ ጊዲ ኦይቺዴስ።
“ኢስቲካ ‘ኑና ኦꬂሲዛ ኣሲ ꬋዪዳ ጊሽ ኤቂዶስ’ ጊዳ። ኢዚካ ኢስታ ‘ኢንቴካ ቢዲ ታ ዎይኔ ኣታኪልቴ ጊዶን ኦꬂቴ’ ጊዴስ።
“ጋዴይ ቃሚሺን ዎይኔ ኣታኪልቴዛ ጎዳይ ኦሳንቻታ ኣላፌዛስ ‘ጉዬፔ ዪዳይታፔ ኦይካዳ ኮይሮ ዪዳይታ ጋካናስ ዲዛ ኦሳንቻታ ዉርሲ ፄይጋዳ ኢስታ ኦሶ ዋጋ ቃንፃ’ ጊዴስ። * ሌዌ 19፡13፤ ዛሬ 24፡15 ታማኔ ኢሲንꬃ ሳቴ ቦላ ኦሶን ጌሊዳይቲ ዪዲ ኢሶይ ኢሶይ ኩሜꬃ ጋላሳ ዋጋ ኤኪዳ።
10 “ኮይሮ ኦሶን ጌሊዳይቲ ዪሼ ባ ዎዝናራ ሂንኮይታፔ ቦላራ ዳሮ ዴማና ጊ ቆፒሺን ኢስታስካ ሂንኮይታራ ጊና ኢሚዴስ። 11-12 ሚሻ ኤኪሼ ቃንፂዛዴ ቦላ ‘ሃይቲ ዉርሴꬃን ኦሶን ጌሊዲ ኢሲ ሳቴ ፃላላ ኦꬂዳይቲ ኩሜꬃ ጋላስ ኦሶን ዱሪዲኔ ኣዋን ፁጌቲዲ ፔዒዳ ኑሳራ ዎስታ ኢስታስ ኢሲ ጊና ቃንፃይ?’ ጊዳ።
13-14 “ኢዚካ ኢስታፌ ኢሳዴስ ‘ታ ጃላዉ! ኔና ቆሃቤኬ፤ ኢሲ ጋላሳስ ጊዲዛ ዳሞዛን ኦꬃናስ ታናራ ጊጋቤይኪ? ሃዒ ሄሂ ኔ ጊሻ ኤካዳ ባ፤ ኔስ ኢሚዳይሳ ማላ ዉርሴꬃን ዪዳይሳስካ ታ ኢማና ኮያይስ። 15 ሂስቲን ታ ሚሻን ታ ዶሲዳዚ ኦꬃናስ ዳንዳዒኪና? ዎይኮ ታ ኪያ ጊዲዳይሲ ኔና ቃናቲሲዜ?’
16 “ጉዬን ዲዛይቲ ሲንꬄ፥ ሲንꬄን ዲዛይቲ ጉዬ ኣꬋና” ጊዴስ። * ማቶ 19፡30፤ ማር 10፡31፤ ሉቃ 13፡30
ዬሱሲ ባ ሃይቆ ጊሽ ሄꬓንꬆ ዮቲዴስ
(ማር 10፡32-34፤ ሉቃ 18፡31-34)
17 ዬሱሲ ዬሩሳላሜ ቢሼ ባና ካሊዛ ታማኔ ናምዓታ ዱማ ሻኪ ኤኪዲ 18 “ሂያ ኑኒ ዬሩሳላሜ ባና ጎስ፤ ኣሳ ናይ ቄሴታ ሃላቃሲኔ ሙሴ ዎጋ ታማርሲዛይታስ ኣꬊ ኢሜታና፤ ኢስቲካ ኢዚ ሃይቃና ማላ ኢዛ ቦላ ፒርዳና። 19 ኢዛ ቦላ ቂꬊ ካዓናሲኔ ጋራፋና ማላ፥ ዎꬋና ማላካ ዴሬታስ ኣꬂ ኢማና፤ ሄꬓንꬆ ጋላስ ኢዚካ ሃይቆፔ ዴንዳና” ጊዴስ።
ዛቢዶሳ ናይታ ኣዬይ ኦይሻ
(ማር 10፡35-45)
20 ሄሳፌካ ዛቢዶሳ ናይታ ኣያ ባ ናይታራ ዬሱሳኮ ሺቃዳ ኢዛ ሲንꬃን ጉልባታዳ ዬሱሲ ኢዚስ ኢሲ ሚሽ ኦꬃና ማላ ዎሳዱስ። 21 ኢዚካ ኢዞ “ኣይ ኮያይ?” ጊዴስ፤ ኢዛካ “ሃይቲ ታ ና ናምዓቲ ኔ ካዎቴꬃን ኢሶይ ኔ ኡሻቻራ፥ ኢሶይ ኔ ሃዲርሳራ ኡታና ማላ ኦꬃርኪ!” ጋዱስ።
22 ዬሱሲካ ዛሪዲ “ኢንቴ ዎሲዛዝ ኤሬኬታ፤ ታኒ ኡዪዛ ፁዓ ኢንቴ ኡያና ዳንዳያኔ?” ጊዴስ። ኢስቲካ “ኤ ዳንዳዮስ” ጊዳ።
23 ኢዚካ “ታ ፁዓፔ ቱሙ ኢንቴ ኡያናሺን ታ ኡሻቻኒኔ ታ ሃዲርሳን ኡቴꬂ ታ ኣዋይ ጊጊሲዳዴንታስ ኣቲን ታኒ ኢሚዛዝ ዴና” ጊዴስ። 24 ታማቲ ሄሳ ሲይዲ ናምዑ ኢሻታ ቦላ ሃንቄቲዳ። 25 ዬሱሲ ኢስታ ኢሲ ቦላ ፄይጊዲ “ኣይዛቤ ሃላቃቲ ባ ሃሪዛ ዴሬ ቦላ ጎዳቲዛይሳ ማላ ጎዳቴꬂ ዲዛይቲ ዎልቃራ ሃሪዛይሳ ኢንቴ ኤሬታ። 26 ኢንቴ ጊዶን ሄሳ ማላ ሃናናስ ቤሴና፤ ኢንቴፌ ጊታ ጊዳና ኮዪዛዴይ ኢንቴስ ኦꬂዛዴ ጊዶ። * ማቶ 23፡11፤ ማር 9፡35፤ ሉቃ 22፡26 27 ኢንቴፌ ቦላ ጊዳናስ ኮዪዛዴይ ኢንቴፌ ጋርስ ጊዶ። 28 ኣሳ ናይ ኣሳይ ኢዛስ ኦꬃና ማላ ጊዶንታ ኣሳስ ኦꬃናሲኔ ባ ሼምፖ ዳሮታ ጊሽ ኣꬂ ኢማናስ ዪዴስ” ጊዴስ።
ዬሱሲ ኣይፌ ቆቄ ናምዑ ኣሳታ ፓꬂዴስ
(ማር 10፡46-52፤ ሉቃ 18፡35-43)
29 ዬሱሲ ባና ካሊዛይታራ ኢያርኮፌ ኬዚዲ ቢሺን ዳሮ ዴሬይ ኢዛ ካሊዴስ። 30 ሄን ኣይፌይ ቆቂዳ ናምዑ ኣሳቲ ኦጌ ዱናን ኡቲ ዴቴስ። ዬሱሲ ኣꬊ ቢዛይሳ ሲይዲ “ጎዶ! ዳዉቴ ናዉ ኑና ማራ!” ጊዲ ዋሲዳ።
31 ዴሬዚ “ሃይዚቴ!” ጊዲ ሃንቂዴስ፤ ጊዶ ኣቲን ኢስቲ ዳርሲ ዋሲሼ “ጎዶ! ዳዉቴ ናዉ ኑና ማራ!” ጊዳ።
32 ዬሱሲካ ኤቂዲ ኢስታ ፄይጊዲ “ታ ኢንቴስ ኣይ ኦꬃና ማላ ኮዬቲ?” ጊዴስ።
33 ኢስቲካ “ኑ ኣይፌይ ፄላና ማላ ኮዮስ” ጊዳ። 34 ዬሱሲ ኢስታስ ሚሼቲዲ ኢስታ ኣይፌታካ ባ ኩሼራ ቦሼቺን ሄራካ ፄሊዲ ኢዛ ካሊዳ።

*20:8 ሌዌ 19፡13፤ ዛሬ 24፡15

*20:16 ማቶ 19፡30፤ ማር 10፡31፤ ሉቃ 13፡30

*20:26 ማቶ 23፡11፤ ማር 9፡35፤ ሉቃ 22፡26