22
ሳርጌስ ፄይጌቲዳ ኣሳታ ሌሚሶ
(ሉቃ 14፡15-24)
1 ቃሴካ ዬሱሲ ሃራ ሌሚሶ 2 “ሳሎ ካዎቴꬂ ባ ናስ ሳርጌ ጊጊሲዳ ኢሲ ካዎ ሚሳታዉስ። 3 ካዎይካ ዲጊሳስ ዮቲዳይታ ፄይጋናስ ባ ኣሽካራታ ዬዲዴስ፤ ፄይጌቲዳይቲካ ‘ኑ ቦኮ’ ጊዳ።
4 “ቃሴካ ሃራ ኣሽካራታ ‘ካሴ ኢስታስ ዮቲዳይታ ሄኮ ታ ሳንጋ ቦራታኔ ሞꬊዳ ሜሄታ ሹካዳ ዲጊሳ ጊጊሳዲስ፤ ዉሪካ ጊጌቲዳ ጊሽ ሳርጌሶ ሃ ዪቴ!’ ጊዲ ዮቲቴ። 5 ፄይጌቲዳይቲ ጊዲኮ ኢዛ ፄይሳ ዉዳን ዬጎንታ ኣጊዲ ኢሶይ ባ ጎሻሶ፥ ኢሶይ ባ ዛልዔሶ ቢዴስ። 6 ሃንኮ ኣቲዳይታ፥ ኣሽካራቲ ኦይኪዲ ዳሮ ዋይሲዲ ዎꬊዳ።
7 “ካዎይካ ሃንቄቲዲ ዎታዳራታ ዬዲዲ ኣሽካራ ዎꬊዳይታ ꬋይሲዴስ፤ ኢስታ ካታማ ፁጊዴስ። 8 ባ ኣሽካራታካ ‘ሳርጌዛ ዲጊሴይ ጊጊዴስ፤ ጊዶ ኣቲን ሳርጌዛሶ ፄይጌቲዳይቲ ሳርጌስ ቤሲዛይታ ጊዲቤቴና። 9 ጌዴ ኦጌ ቦላ ኬዚዲ ኢንቴ ዴሚዳ ኣስ ዉርሲ ሃ ሳርጌ ዲጊሴስ ፄይጊቴ’ ጊዴስ። 10 ኣሽካራቲካ ኦጌ ቦላ ኬዚዲ ባ ዴሚዳይታ ሎዖታካ ኢታታካ ዉርሲ ሺሺዲ ሳርጌዛሶ ኢማꬅ ኩንꬂዳ።
11 “ካዎይካ ፄይጌቲዳ ኢማꬃ ቤያናስ ሶ ጌሊዛ ዎዴ ሳርጌ ማይዖ ማይዖንታ ኣስ ዴሚዴስ። 12 ‘ሃይሶ! ሳርጌ ማይዖ ማይዖንታ ዋናዳ ሃይሳ ጌላናስ ዳንዳያዲ?’ ጊ ኦይቺን ኣዴዛስ ዛራና ቃላይ ꬋዪዴስ። 13 ካዎይካ ባ ኣሽካራታ ‘ሃይሳ ኣዴዛ ቶሆኔ ኩሼ ሺሺ ቃቺዲ ሄን ካሬን ዲዛ ꬉማን ኬሲ ኦሊቴ፤ ሄን ዬሆኔ ኣቻ ጋርጬች ጊዳና።’ *ማቶ 8፡12፤ 25፡30፤ ሉቃ 13፡28
14 “ፄይጌቲዳይቲ ዳሮታ፤ ዶሬቲዳይቲ ጊዲኮ ጉꬃታ” ጊ ዮቲዴስ።
ጊራ ቃንፃናስ ሺቂዳ ኦይሾ
(ማር 12፡13-17፤ ሉቃ 20፡20-26)
15 ሄሳፌ ጉዬ ፋርሳዌቲ ኬዚ ቢሼ “ኢዛ ዱናፔ ባላ ቃላ ዎስቲ ዴሚ ኦይኪኖ?” ጊዲ ዞሬቲዳ። 16 ባና ካሊዛይታ ሄርዶሳ ኣሳታራ ኢዛኮ ኪቲዲ “ኣስታማሬ! ኔኒ ቱማንቻኔ ፆሳ ኦጌ ቱማፔ ታማርሲዛዴ ጊዲዳይሳኔ ኦናስካ ዱማ ማዶ ኦꬆንታ ዉርሳካ ኢሲ ማላ ኔ ፄሊዛይሳ ኑ ኤሮስ። 17 ኔስ ኣይ ሚሳቲዛኮኔ ኣኔ ኑስ ዮታ? ቄሳሬስ ጊራ ቃንፃናስ ቤሲዜ? ቤሴኔ?” ጊዳ።
18 ዬሱሲካ ኢስታ ጌኔ ቆፋ ኤሪዲ “ኢንቴኖ ቆꬌፔ ቆሞን ሃኒዛይቶ ታና ዮዖን ባሌꬂ ኦይካናስ ኣዛስ ኮዬቲ? 19 ኢንቴ ጊራ ቃንፂዛ ሚሻ ኣኔ ታና ቤሲቴ” ጊን ኢስቲካ ኢሲ ዲናሬ ጌቴቲዛ ሚሽ ኢዛስ ኤሂዳ። 20 ኢዚካ “ሃይሳ ሚሻ ቦላ ዲዛ ሚሲሌይኔ ፃፌቲዳ ሱንꬃይ ኦናይሴ?” ጊዴስ።
21 ኢስቲካ ኢዛስ “ቄሳሬይሳ” ጊዳ። ኢዚካ ኢስታስ ዛሪዲ “ቄሳሬይሳ ቄሳሬስ፥ ፆሳይሳ ፆሳስ ኢሚቴ” ጊዴስ። 22 ሄሳ ሲዪዳ ዎዴ ማላሌቲዲኔ ኢዛ ኣጊ ቢዳ።
ሃይቂዳይታ ዴንꬃ ጊሽ ሺቂዳ ኦይሾ
(ማር 12፡18-27፤ ሉቃ 20፡27-40)
23 “ሃይቂዳይታስ ዴንዶይ ባዋ” ጊዲ ኣማኒዛ ሳዱቃዌቲ ሄ ጋላስ ዬሱሳኮ ሺቂዲ፥ *ሃዋ 23፡8 24 “ኣስታማሬ! ሙሴይ ‘ኢሳዴይ ማቾ ኤኪዲ ና ዬሎንታ ሃይቂኮ ኢዛ ኢሻይ ሃይቂዳይሳ ማቾ ኤኪዲ ባ ኢሻ ላቲዛ ና ኢዛስ ዬሎ’ ጊዴስ። *ዛሬ 25፡5 25 ኑ ኣቻን ላፑን ኢሻቲ ዴቴስ ሺን ኮይሮ ኢሻይ ማቾ ኤኪዲ ና ዬሎንታ ሃይቂዳ ጊሽ ካሎ ኢሻይ ኢዛ ማቼዮ ኤኪዴስ። 26 ናምዓንꬆ ኢሻይካ ሃይቂዳ ኢሻꬆ ና ዬሎንታ ሃይቂዴስ፤ ሄሳꬆካ ሃኒሺን ማጫሳያ ላፑንꬃ ኢሻ ጌላዱስ። 27 ዉርሴꬃን ማጫሳያ ሃይቃዱስ። 28 ሄሳ ጊሽ ላፑናቲ ዉሪካ ኢዞ ኤኪዳ ሺን ሃይቆፔ ዴንꬃ ጋላስ ማጫሳያ ላፑንታፔ ኣዋይሳ ማቾ ጊዳኔ?” ጊዳ።
29 ዬሱሲካ ኢስታስ ዛሪዲ “ጌሻ ማፃፋታኔ ፆሳ ዎልቃ ኢንቴ ኤሮንታ ጊሽ ባሌቴታ። 30 ሃይቆፔ ዴንዲዳፔ ጉዬ ኣሳይ ሳሎ ኪታንቻታ ማላ ጊዳና ኣቲን ኤኬቴቴናኔ ጌሌቴና። 31-32 ሃይቂዳይታ ዴንꬃ ጊሽ ጊዲኮ ፆሲ ‘ታኒ ኣብራሃሜ ፆሳ፥ ዪሳቃ ፆሳ፥ ያቆቤ ፆሳ’ ጊዲ ኢንቴስ ዮቶይሳ ናባቢቤኬቲ? ፆሲ ፓፃታ ፆሳ ኣቲን ሃይቄꬃታ ፆሴ ጊዴና” ጊዴስ። *ኬሳ 3፡6 33 ዴሬይካ ሄሳ ሲይዲ ኢዛ ቲሚርቴዛን ማላሌቲዴስ።
ዉርሶፔ ኣꬊዛ ኣዛዞ
(ማር 12፡28-34፤ ሉቃ 10፡25-28)
34 ዬሱሲ ሳዱቃዌታ ጮዑ ሂስቲዳይሳ ሲይዲ ፋርሳዌቲ ኢሲ ቦላ ሺቄቲዳ። 35-36 ኢስታ ጊዶፌ ኢሲ ሙሴ ዎጋ ሎዔꬂ ኤሪዛዴይ ዬሱሳ ፓጫናስ ኮይዲ “ኣስታማሬ! ሙሴ ዎጋታ ጊዶን ኡባፌ ኣꬊዛይ ኣዋይሴ?” ጊዲ ኦይቺዴስ። *ሉቃ 10፡25-28
37 ኢዚካ ዛሪዲ “ ‘ኔ ጎዳ ፆሳ ኔ ኩሜꬃ ዎዝናፔ፥ ኔ ኩሜꬃ ሼምፖፌ፥ ኔ ኩሜꬃ ቆፋፔ ዶሳ።’ *ዛሬ 6፡5 38 ሃይሲ ኮይሮኔ ኡባፌ ኣꬊዛ ኣዛዞ። 39 ናምዓንꬆይካ ኢዛ ሚሳቴስ፥ ሄሲካ ‘ኔ ሾሮ ኔ ሁዔ ማላ ዶሳ’ ጊዛይሳ። *ሌዌ 19፡18 40 ሙሴ ዎጋይኔ ናቤታ ቲሚርቴይ ዉሪካ ሃይታ ናምዑ ኣዛዞታን ቃሼቴስ” ጊዴስ።
ኪርስቶሳ ጊሽ ሺቂዳ ኦይሾ
(ማር 12፡35-37፤ ሉቃ 20፡41-44)
41 ፋርሳዌቲ ኢሲ ቦላ ሺቄቲ ዲሺን ዬሱሲ ኢስታ፥ 42 “ኪርስቶሳ ጊሽ ኢንቴ ኣይ ጌቲ? ኢዚ ኦና ና?” ጊ ኦይቺዴስ፤ ኢስቲካ ኢዛስ ዛሪዲ “ኢዚ ዳዉቴ ና” ጊዳ።
43-44 ኢዚካ ኢስታስ
“ሂስቲን ዳዉቴይ ፂሎ ኣያና ዎልቃን
‘ፆሳይ ታ ጎዳ’ ጊዲ ዋኒ ፄይጊዴ?
‘ታ ኔ ሞርኬታ ኔ ቶሆ ጊዶን ጉልባቲሳና ጋካናስ ኔ ታ ኡሻቻን
ኡታ!’ ጊዴስ። *ማዛ 110፡1 45 ሄሳ ጊሽ ዳዉቴይ ኢዛ ‘ታ ጎዳ’ ጊዲ
ፄይጊኮ ዋኒዲ ኢዛስ ና ጊዳና ዳንዳዪዜ?”
ጊዴስ። 46 ኢዛስ ኢሲ ቃላ ዛራና ዳንዳዪዳ ኣሲ ዎይኮ ሄ ጋላሳፌ ሲሚን ኢዛ ኦይሾ ኦይቻና ፃሊዳ ኣሲ ኦኒካ ቤቲቤና።