5
ዶርሳዛኔ ኢዛ ማፃፋ
1 ሄ ኣልጋ ቦላ ኡቲዳይሳ ኡሻቻ ኩሼ ቃዓ ጋርሳኒኔ ቦላ ባጋራ ፃፌቲ ኡቲዳ ላፑን ማታሜን ጎርዴቲዳ ኢሲ ፃፄቲ ኡቲዳ ማፃፋ ቤያዲስ። 2 ኢሲ ሚኖ ኪታንቻ ዳይሲ ጊታ ቃላራ “ሃይታ ማታሜታ ቢርሺዲ ሃ ፃꬃ ማፃፋ ዶያናስ ቤሲዛዴይ ኦኔ?” ጊ ሃሳዪሺን ታ ቤያዲስ። 3 ጊዶ ኣቲን ሳሎንካ ጊዲን ዎይኮ ሳዓ ቦላ ዎይኮ ቢታፌ ጋርሳ ባጋንካ ሄ ፃꬃ ማፃፋ ዶዪዲ ኢዛ ጊዶን ዲዛይሳ ፄላናስ ዳንዳዪዳ ኣሲ ኦኒካ ቤቲቤና።
4 ታካ ሄ ፃꬃ ማፃፋ ቢርሺዲ ኢዛ ጊዶ ፄላናስ ቤሲዛዴይ ቤቶንታ ኣጊዳ ጊሽ ዳሮ ዬካዲስ። 5 ሄ ዎዴ ጪማታፔ ኢሳዴይ ታስ “ኔ ዬኮፋ! ሄኮ ዩሁዳ ባጋ ጊዲዳ ዳዉቴ ዛርኬፌ ዴንዲዳ ጋሞይ ኢዚ ካሴ ፆኒዴስ። ኢዚ ሄ ፃꬃ ማፃፋዛኔ ሄ ላፑን ማታሜዛ ዶያናስ ዳንዳዬስ” ጊዴስ። *ሜꬌ 49፡9፤ ኢሳ 11፡1፥10
6 ሄሳፌ ጉዬ ኣልጋ ቦላን ኦይዱ ዶዓታ ጊዶን ሄ ጪማታ ጊዶንካ ሹኬቲዳ ዶርሳ ሚሳቲዛይሲ ኤቂዳይሳ ታ ቤያዲስ። ሄ ዶርሳዛስ ላፑን ካጬይኔ ላፑን ኣይፌይ ዴስ። ሄ ኣይፌቲካ ኩሜꬃ ኣላሜ ኪቴቲዳ ፆሳ ኣያና ላፑናታ። *ኢሳ 53፡7፤ ዛካ 4፡10 7 ሄ ዶርሳይ ዪዲኔ ኣልጋ ቦላ ኡቲዳይሳፌ፥ ኡሻቻ ኩሼን ዲዛ ፃꬃ ማፃፋ ኤኪዴስ። 8 ሄ ፃꬃ ማፃፋዛ ኤኪዳ ማላ ኦይዱ ዶዓቲኔ ናምዑ ታማኔ ኦይዱ ጪማቲ ሄ ዶርሳ ሲንꬃን ባ ሊጴን ጉፓኒዳ። ኢስቲካ ኢሶይ ኢሶይ ባ ኩሼን ዲꬃ ማላ ሚሽ ኦይኪዴስ። ሄሳꬆካ ጌሻታ ዎሳ ጊዲዳ ኢዛን ኤፃኔይ ኩሚዳ ዎርቃ ፃሮ ባ ኩሼን ኦይኪ ዴቴስ። *ማዛ 141፡2 9 ኦራꬃ ዬꬅ ሂዝጊ ዬፂዳ
“ኔኒ ኣሳ ዱማ ዱማ ኮቻፌ፥
ዱማ ዱማ ቃላን ሃሳዪዛይታፔ፥
ዱማ ዱማ ቆሞፌኔ
ዱማ ዱማ ዴሬፔ
ፆሳስ ዎዛናስ ኔ ሹኬቲዳ ጊሽ ሄ ፃꬃ ማፃፋዛ ኤካናሲኔ ማታሜታካ ዶያናስ ቤሲዛዴ ጊዳዳሳ። *ማዛ 33፡3፤ 98፡1፤ ኢሳ 42፡10
10 ኔ ኢስታ ኑ ጎዳ ፆሳስ
ካዎታኔ ቄሴታ ኦꬃዳሳ።
ኢስቲካ ቢታ ቦላ ካዎታና።” *ኬሳ 19፡6፤ ኣጁ 1፡6
11 ታኒ ጌዴ ዛራ ፄሊሺን ሄ ኣልጋዛ፥ ዶዓታኔ ጪማታ ዩዪ ኣꬊዳ ዳሮ ኪታንቻታ ቃላ ጊሪስ ሲያዲስ። ኢስታስ ጮራቴꬃይ ዳሮ ሺያኒኔ ዳሮ ሚሎኔን ቆዴቴስ። *ዳኔ 7፡10 12 ኢስቲ ዳሮ ጊታ ቃላን “ሃ ሹኬቲዳ ዶርሳይ ዎልቃ፥ ዱሬቴꬅ፥ ኤራቴꬅ፥ ሚኖቴꬅ፥ ጊታቴꬅ፥ ቦንቾኔ ጋላታ ኤካናስ ቤሴስ” ጊዳ።
13 ሳሎንካ ሳዓ ቦላካ፥ ቢታፌ ጋርሳንካ፥ ኣባ ጊዶን ዲዛ ሜꬌቴꬃ ኡባን “ኣልጋ ቦላ ኡቲዳይሳሲኔ ዶርሳስ ጋላታይኔ ꬎቃቴꬂ፥ ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ!” ጊሺን ታ ሲያዲስ። 14 ኦይዱ ዶዓቲካ “ኣሚን” ጊዳ። ጪማቲካ ባ ሊጴን ጉፋኒዲ ኢዛስ ጎይኒዳ።