13
ናምዑ ዶዓታ
ሄሳፌ ጉዬ ኢሲ ዶዓይ ኣባፌ ኬዚሺን ቤያዲስ። ኢዛስ ታሙ ካጬይኔ ላፑን ሁዔይ ዴስ። ካጬታ ቦላ ታሙ ዛዉዴቲ ዴቴስ። ሁዔታ ቦላ ጫሻ ሱንꬃቲ ዴቴስ። * ዳኔ 7፡3፤ ኣጁ 17፡3፥7-12 ታ ቤዪዳ ዶዓዚ ማሄ ሚሳቴስ። ኢዛ ቶሆይ ዶዓ ዛርዶ ቶሆ ሚሳቴስ። ኢዛ ዱናይ ቃስ ጋሞ ዱና ሚሳቴስ፤ ዳዌዚ ባ ዎልቃ፥ ባ ኣልጋዛኔ ባ ጎዳቴꬃካ ሄ ዶዓዛስ ኢሚዴስ። * ዳኔ 7፡4-6
ሄ ዶዓዛ ሁዔታፔ ኢሳ ቦላ ዎꬊዛ ማዱንꬂ ዲዛይሳ ታ ቤያዲስ ሺን ኢዛ ሃይቆስ ጋꬂዛ ማዱንꬃዚ ፓፂዴስ። ኩሜꬃ ኣላሜይ ማላሌቲዲ ሄ ዶዓዛ ካሊዴስ። ሄ ዶዓዛስ ጎዳቴꬂ ኢሜቲዳ ጊሽ ኣሳይ ዉሪካ ሄ ዳዌዛስ ጎይኒዴስ። “ሃይሳ ዶዓዛ ሚሳቲዛይ ኦኔ? ኢዛራ ኦሌታናስ ዳንዳዪዛይ ኦኔ?” ጊሼ ኢዛስ ጎይኒዴስ።
ኢዛስ ቃስ ኦቶሬቴꬂኔ ጫሻ ቃላ ሃሳይዛ ዱናይ ኢሜቲዴስ። ኢዚ ኦይዱ ታማኔ ናምዑ ኣጊና ጋካናስ ጎዳቴꬃን ኦꬃና ማላ ኢዛስ ኢሜቲዴስ። ፆሳኔ ፆሳ ሱንꬅ ኢዚ ዲዛሶዛኔ ሳሎን ዲዛይታ ጫሼ ኦይኪዴስ። ኢዚ ጌሻታ ኦላና ማላኔ ፆናና ማላ ኢዛስ ጎዳቴꬂ ኢሜቲዴስ። ዱማ ዱማ ቆሞታኔ ዛርኬታ፥ ዱማ ዱማ ቃላን ሃሳዪዛ ዴሬታ ኡባ ቦላ ኢዛስ ጎዳቴꬂ ኢሜቲዴስ። * ዳኔ 7፡21 ኣላሜይ ሜꬌቶሳፔ ሃ ሲሚን ኢስታ ሱንꬂ ሹኬቲዳ ዶርሳዛ ዴዖ ማፃፋን ፃፌቶንታ ኣላሜ ቦላ ዲዛ ኣሳይ ዉሪካ ሄ ዶዓዛስ ሆኪ ጎይናና። * ማዛ 69፡28
ሃይꬂ ዲዛዴይ ሲዮ! 10 “ዲዔታናስ ዲዛዴይ ዲዔታና፤ ማሻን ሃይቃናስ ዲዛዴይ ማሻን ሃይቃና” ሄሳ ጊዲዳ ጊሽ ኣማኒዛይታ ዳንዳያይኔ ኢስታ ኣማኔቴꬅ ኮሺዛይ ሃኒና። * ኤር 15፡2፤ 43፡11
11 ቃሴካ ሃራ ዶዓይ ቢታፌ ኬዚሺን ቤያዲስ። ኢዛስ ቃስ ዶርሳ ካጬ ማላ ናምዑ ካጬይ ዴስ። ኢዚ ዳዌꬆ ሃሳዬስ። 12 ኢዚ ካሴ ኮይሮ ዶዓዛ ኦላ ጌሊዲ ሄ ካሴይሳ ጎዳቴꬃን ኦꬄስ። ቢታያኔ ቢታ ቦላ ዲዛይቲ ዉሪካ ካሴ ኮይሮ ዶዓዛስ ጎይናና ማላ ኦꬂዴስ። ሄ ዶዓዚ ቃስ ካሴ ኢዛ ሃይቆስ ጋꬂዛ ማዱንꬃይ ፓፂዳ ኮይሮ ዶዓዛ። 13 ሄሲ ናምዓንꬆ ዶዓዚ ቃስ ኣሳ ሲንꬃን ታማ ሳሎፔ ዱጌ ዬጋና ጋካናስ ጊታ ማላታታ ኦꬂዴስ። 14 ኢዚ ኮይሮ ዶዓዛ ሲንꬃን ማላታ ኦꬃና ማላ ኢዛስ ኢሜቲዳ ማላታ ጌዶን ቢታ ቦላ ዲዛ ኣሳ ኢዚ ባሌꬂዴስ። ማሻን ማዱንፂዲ ፓፂዳ ዶዓዛ ቦንቾስ ሚሲሌ ኦꬃና ማላ ቢታ ቦላ ዲዛ ኣሳ ዉርሲ ኢዚ ኣዛዛና። 15 ናምዓንꬆ ዶዓዚ ኮይሮ ዶዓዛ ሚሲሌዛስ ሼምፖ ኢማና ማላ ኢዛስ ጎዳቴꬂ ኢሜቲዴስ። ዴዖ ሼምፖ ኢማናስ ኢዛስ ጎዳቴꬂ ኢሜቲዳ ሚሲሌዚ ሃሳያና ማላኔ ሄ ኢዛስ ሆኪ ጎይኖንታዴ ኢዚ ዉርሲካ ዎꬋና ማላሳ።
16 ናምዓንꬆ ዶዓዚ ቃስ ጉꬃታ ጊዲን ዎይኮ ጊታታ ጊዲን፥ ዱሬታ ጊዲን ዎይኮ ማንቆታ ጊዲን፥ ጎዳታ ጊዲን፥ ዎይኮ ኣሽካራታ ጊዲን፥ ዉሪካ ባ ኡሻቻ ኩሼን ዎይኮ ባ ሊጴ ቦላ ማላታ ዎልቃራ ዎꬂሳና። 17 ሄሳ ማላን ሄ ዶዓዛ ሱንꬅ ኤሪሲዛ ዱማ ማላታይ ዎይኮ ኢዛ ሱንꬂ ኢዛ ቦላ ፃፌቲዳ ቁፁሬይ ባይንዳዴይ ኦኒካ ጊያ ጌሊዲ ሻማናሲኔ ባይዛናስ ዳንዳዬና።
18 ሄሳ ጊሽ ኣሲ ኤራ ጊዳናይ ሃኒና። ዎዝናራ ዲዛዴይ ኣኬኮ፤ ሄ ዶዓዛ ቁፁሬዚካ ሃይሳፌ ካሊ ዲዛይሳኮ። ሄሲካ ኡሱፑን ፄታኔ ኡሱፑን ታማኔ ኡሱፑና።

*13:1 ዳኔ 7፡3፤ ኣጁ 17፡3፥7-12

*13:2 ዳኔ 7፡4-6

*13:7 ዳኔ 7፡21

*13:8 ማዛ 69፡28

*13:10 ኤር 15፡2፤ 43፡11