1 ሄሳፌ ጉዬ ጎዳቴꬂ ኢዛስ ዲዛ ሃራ ኪታንቻይ ሳሎፔ ዱጌ ዎꬊሺን ቤያዲስ። ኢዛ ቦንቾ ፖዖፔ ዴንዲዳይሳን ቢታይካ ፖዒዴስ።

2 ኢዚ ቃስ ꬎቃ ቃላን “ጊታ ባቢሎና ኩንዳዱስ! ኩንዳዱስ! ኩንዳዱስ! ዳይዳንꬃ ዱሳ ሶ ጊዳዱስ! ቱና ኣያናታስ ኣቆሶ ጊዳዱስ! ሃራሲዛ ኢታ ካፎታስ ሼምፖሶ፥ ኢታኔ ሃራሲዛ ዶዓታሲካ ኣቆሶ ጊዳዱስ። *ኢሳ 21፡9፤ ኤር 51፡8፤ ኣጁ 14፡8፤ ኢሳ 13፡21፤ ኤር 50፡39 3 ዴሬ ኣሳ ዉርሳ ማꬆሲዛ ባ ላይማቴꬃ ዎይኔ ጫጄዛ ኡሻዱስ። ቢታ ቦላ ዲዛ ካዎቲ ኢዚራ ላይማቲዳ። ቢታ ቦላ ዲዛ ዛልዓንቻቲ ኢዚስ ዲዛ ኢሻሎ ዱሳፌ ዴንዲዳይሳን ዳሮ ዱሬቲዳ” ጊ ዋሲዴስ *ኢሳ 23፡17፤ ኤር 51፡7

4 ቃሴካ ሃራ ቃላይ ሳሎፔ “ታ ዴሬቶ! ኢንቴ ኢዚራ ኢዚ ናጋራን ዙፔቶንታ ማላኔ ኢዞ ጋኪዛ ቦሻ ኢንቴ ኢዚራ ጊሼቲ ኤኮንታ ማላ ኢዚፔ ሻኬቲ ኬዚቴ። *ኢሳ 48፡20፤ ኤር 50፡8፤ 51፡6፥45 5 ኢዚ ናጋራይ ዶሬቲዲ ፑዴ ሳሎ ጋኪዴስ። ፆሲካ ኢዚ ሞሮዛ ኣኬኪዴስ። *ሜꬌ 18፡20-21፤ ኤር 51፡9 6 ኢዚ ኢሚዳሪ ጊና ኢዚስ ኩሼ ዛሪቴ፤ ኢዚ ኦሶ ጊሽ ኢዚስ ናምዑ ኩሼ ጪጊቴ፤ ኢዚስ ናምዑ ኩሼ ኢዚይሳፌ ኣꬂ ዋላኪቴ። *ማዛ 137፡8፤ ኤር 50፡29 7 ኢዛ ባስ፥ ባ ቦንቾሲኔ ባስ ጊጋና ማላ ኢሞይሳ ጊና ዋዬኔ ሙዞቴꬅ ኢዚስ ኢሚቴ፤ ኢዛ ባ ዎዝናራ ‘ታኒ ካዎ ማቺ ማላ ኡታዲስ ኣቲን ኣምዒ ማላ ጊዲኬ። ታና ሙዞቴꬂ ሙሌካ ጋኬና’ ጋዳ ጬቄታዉስ። 8 ሄሳ ጊሽ ኢዚ ቦላ ቦቻይ ዉሪካ ኢሲ ጋላስ ጋካና። ሃይቆይ፥ ሙዞቴꬂኔ ጋፋይ ኢዞ ጋካና፤ ኢዛ ታማን ፁጌታና፤ ኢዚ ቦላ ፒርዲዛ ጎዳይ ፆሲ ኢዚ ሚኖ” ጊሺን ታኒ ሲያዲስ።

9 ኢዚራ ላይማቲሼ ኢሻሎ ዱስ ዴዪዳ ሃ ቢታ ካዎቲ ኢዛ ፁጌቲሺን ጩዋቲዛ ጩዋ ቤዪዲ ኢዚ ጊሽ ዋሲዲ ዬካና። 10 ኢዚ ዋዬዛስ ባቢዳ ጊሽ ሃሆን ኤቂዲ “ሃኔ ጊታ ካታማዬ! ሃኔ ሚኖ ካታማዬ ባቢሎኔ! ኔ ፒርዳይ ሜፂ ኢሲ ሳቴ ጊዶን ዪዳ ጊሽ ኔስ ኣዬ ኣና! ኣዬ ኣና!” ጋና።

11 ሃይሳፌ ጉዬ ኢስታ ማርካቤን ጫኔቲዳዝ ሻሚዛ ኣሲ ባይንዳ ጊሽ ቢታ ቦላ ዲዛ ዛልዓንቻቲ ኢዚስ ዬካናኔ ካዮታና። *ሂዚ 27፡31፥36 12 ኢስታ ማርካቤን ጫኔቲዳይ ዎርቃ፥ ቢራ፥ ኣልዖ ሹች ኢንቁ፥ ሌዔ ማይዖ፥ ጋላልዖ ማላ ማይዖ፥ ሃሬ ጌቴቲዛ ማይዖ፥ ዞዖ ማይዖኔ ሎዖ ሳዎ ሳዊዛ ሚꬅ ኡባ፥ ዳንጋርሳ ዛሌ፥ ኣልዖ ሚꬃፌ፥ ፃርቂማላፔ ቢራታፔኔ ዎሊዎጆፌ ኦሴቲዳ ሚሺ ዉሪካ 13 ቃራፋ፥ ሳዎ፥ ሳዊዛ ሚꬂ፥ ካርቤ፥ ኤፃኔ፥ ዎይኔ ጫጄ፥ ዎጋራ ዛይቴ፥ ꬊሌ፥ ጊስቴ፥ ሚዝ፥ ዶርሳታ፥ ፓራታ፥ ፓራ-ጋሬታ፥ ኣይሌታኔ ሃራ ኣሳታኮ።

14 ዛልዓንቻቲ “ሃኔ ኔኒ ኣሞቲዳ ሎዖ ሚሻቲ ዉሪካ ኔፔ ሃኪ ቢ ጊዲዳ። ኔ ሃሮይካ ኔ ጌፄይካ ዉሪካ ꬋዪዴስ። ሃይሳፌ ጉዬ ኔኒ ሄይታንታ ሙሌካ ዛራ ዴማካ!” ጋና። 15 ሄይታንታ ዉርሲ ሻሚ ሻሚዲ ዱሬቲዳ። ዛልዓንቻቲ ኢዚ ቦላ ጋኪዳ ዋዬዛስ ባቢዲ ሃሆን ኤቃና፥ ዬኪሼኔ ሙዞቲሼ *ሂዚ 27፡31፥36 16 “ካሴ ሌዔ ማይዖኔ ጋላልዖ ማይዖ ቃሴካ ዞዖ ማይዖ ማይዒዛሪስ፥ ዎርቃኒኔ ቦንቾ ሹቻን፥ ኢንቁንካ ጶሊዳ ጊታ ካታማይስ ኣዬ ኣና! ኣዬ ኣና! 17 ሄሳ ማላ ሃሮይ ኢሲ ሳቴ ጋርሳን ꬋዪዴስ” ጋና።

ማርካቤ ኣዛዚዛይቲ ዉሪ ማርካቤን ቢዛይቲ ዉሪ ማርካቤ ጊዶን ኦꬂዛይቲ ዉሪካ ኣባ ጊዶን ዛልዓንቻቲ ዉሪካ ሃሆን ኤቃና። *ኢሳ 23፡14፤ ሂዚ 27፡26-30 18 ኢዛ ፁጌቲሺን ጩዋቲዛ ጩዋ ቤዪዲ “ሃኖ ሃ ጊታ ካታማዮ ሚሳቲዛ ካታማይ ሃራይ ኣዋን ዳንዴ?” ጊሼ ዋሲዳ። *ሂዚ 27፡32 19 ባ ሁዔን ጉዱላ ቆሊዲ ዬኪሼኔ ሙዞቲሼ “ኣባ ቦላ ማርካቤይ ዲዛይቲ ዉሪካ ኢዚ ሚሼን ዱሬቲዳይቲ፥ ሂና ጊታ ካታማያ ኢሲ ሳቴ ጊዶን ሙሌራ ꬋይዳ ጊሽ ኢዚስ ኣዬ-ኣና! ኣዬ-ኣና!” ጊ ዋሲዳ። *ሂዚ 27፡30-34 20 ሳሎዞ! ኢዚ ጌዶን ኔ ኡፋዬታ፤ ፆሲ ኢንቴ ጊሽ ኢዚ ቦላ ፒርዲዳ ጊሽ ኢንቴ ጌሻቲ፥ ሃዋሬቲኔ ናቤቲካ ኡፋዬቲቴ። *ዛሬ 32፡43፤ ኤር 51፡48

21 ሄሳፌ ጉዬ ኢሲ ሚኖ ኪታንቻይ ዎልቃማ ዎፃ ሹች ሚሳቲዛ ኢሲ ሹች ዴንꬂዲ “ጊታ ካታማያ ባቢሎና ሄሳꬆካ ዎልቃራ ሱጌታዳ ኩንዳና። ሃይሳፌ ጉዬ ሙሌካ ቤቱኩ። *ኤር 51፡63-64፤ ሂዚ 26፡21 22 ዲꬅ ሚሳቲዛ ባጋና ጌቴቲዛይሳ ሾጪዛይታኔ ዬꬅ ዬፂዛይታ ዬꬃ ሱሱልዔ ሱሱልዒዛ ኣሳይኔ ዲንኬ ፑኒዛይታ ጊሪስ ናምዓንꬆ ኔናን ሲዬቴና። ኣይ ማላ ኩሼ ሂላቴꬅ ኦꬂዛ ኤራ ኣሲ ሃይሳፌ ጉዬ ኔናን ቤቴና፤ ዎፃ ጊሪስ ሃይሳፌ ጉዬ ኔናን ሲዬቴና። *ኢሳ 24፡8፤ ሂዚ 26፡13 23 ታማ ፖዖይ ሃይሳፌ ጉዬ ኔናን ፖዔና። ኣዴኔ ማጫ ሚሺራ ቃላይ ሃይሳፌ ጉዬ ኔናን ሲዬቴና። ኔ ዛልዓንቻቲ ካሴ ኣላሜን ኤሬቲዳይታ። ኔኒ ቃስ ኣሳ ዉርሳ ሙሬኖን ባሌꬃዳሳ።

24 ኢዚ ጊዶን ናቤታ ሱንꬂ፥ ጌሻታ ሱንꬂኔ ቢታ ቦላ ኣሳ ኩሼን ሃይቂዳይታ ኡባታ ሱንꬂ ቤቲዴስ” ጊሼ ዱጌ ኣባ ጊዶ ዬጊዴስ። *ኤር 51፡49