22
Sarges xeeygetida asata leemiso
(Luqa 14:15-24)
Qasseka Yesusi hara leemiso “Salo Kawotethi ba naas sarge giigissida issi kawo misatawus. Kawoykka diggissas yootidayta xeeyganas ba ashkarata yeddides; xeeygettidaytikka ‘Nu bookko’ gida.
“Qasseka hara ashkarata ‘Kase istas yootidayta hekko ta sanga booratanne modhida meheta shukada diggisa giigissadis; wurikka giigettida gish sargeso haa yiite!’ giidi yootite. Xeeygettidayti gidikko iza xeeyssa wudan yeggonta aggidi issoy ba goshshaso, issoy ba zal7eso bides. Hanko attidayta, ashkarati oykkidi daro waayssidi wodhida.
“Kawoykka hanqettidi wotadarata yeddidi ashkara wodhidayta dhayssides; ista katama xuugides. Ba ashkarataka ‘Sargeza diggisey giigides; gido attin sargezaso xeeygettidayti sarges bessizayta gidibeetenna. Gede oge bolla kezidi inte demmida as wursi ha sarge diggisses xeygite’ gides. 10 Ashkaratikka oge bolla kezidi ba demmidayta lo7otaka iitataka wursi shiishshidi sargezaso imath kunthida.
11 “Kawoykka xeeygettida imatha beyanas so geliza wode sarge may7o may7onta as demmides. 12 ‘Haysso! Sarge may7o may7onta waanada hayssa gelanas dandayadii?’ gi oychin addezas zaarana qaalay dhayides. 13 Kawoykka ba ashkarata ‘Hayssa addeza tohonne kushe shiishshi qachidi heen karen diza dhuman kessi olite; heen yeehonne achcha garcech gidana.’ * Mato 8:12; 25:30; Luqa 13:28
14 “Xeeygettidayti darota; doorettidayti gidikko guuthata” gi yootides.
Giira qanxanas shiiqida oysho
(Mar 12:13-17; Luqa 20:20-26)
15 Hessafe guye Farsaaweeti kezi bishe “Iza duunappe bala qaala wosti demmi oykkinoo?” giidi zorettida. 16 Bana kaallizayta Herdoosa asatara izakko kiittidi “Astamare! Neni tumanchanne Xoossa oge tumappe tamarsizade gididayssanne oonaska dumma maado ooththonta wursaka issi mala ne xeellizayssa nu eroos. 17 Nees ay misatizakkone ane nuus yootaa? Qeesares giira qanxanas bessizee? Bessenee?” gida.
18 Yesusikka ista gene qofa eridi “Inteno qoodheppe qommon hanizayto tana yo7on baleththi oykkanas aazas koyetii? 19 Inte giira qanxiza miisha ane tana bessite” giin istika issi dinare geetettiza miish izas ehida. 20 Izikka “Hayssa miisha bolla diza misileynne xaafettida sunthay oonayssee?” gides.
21 Istika izas “Qeesareyssa” gida. Izikka istas zaaridi “Qeesareyssa Qeesares, Xoossayssa Xoossas immite” gides. 22 Hessa siyida wode malaletidinne iza aggi bida.
Hayqqidayta dentha gish shiiqida oysho
(Mar 12:18-27; Luqa 20:27-40)
23 “Hayqqidaytas dendoy baawa” giidi ammaniza Saduqaaweti he gallas Yesusakko shiiqidi, * Hawa 23:8 24 “Astamaare! Musey ‘Issadey macho ekkidi naa yelonta hayqqikko iza ishay hayqqidayssa macho ekkidi ba isha laattiza naa izas yelo’ gides. * Zaare 25:5 25 Nu achchan laapun ishati deettes shin koyro ishay macho ekkidi naa yelonta hayqqida gish kaalo ishay iza macheyo ekides. 26 Nam7antho ishayka hayqqida ishaatho naa yelonta hayqqides; hessathoka hanishin macasaya laapuntha isha geladus. 27 Wursethan macasaya hayqqadus. 28 Hessa gish laapunati wurikka izo ekkida shin hayqoppe dentha gallas macasaya laapuntappe awayssa macho gidanee?” gida.
29 Yesusikka istas zaaridi “Geeshsha Maxaafatanne Xoossa wolqa inte eronta gish baletteta. 30 Hayqoppe dendidappe guye asay salo kiitanchata mala gidana attin eketettenanne geletenna. 31-32 Hayqqidayta dentha gish gidikko Xoossi ‘Tani Abrahaame Xoossa, Yisaaqa Xoossa, Yaqoobe Xoossa’ giidi intes yootoyssa nababibekketii? Xoossi paxata Xoossa attin hayqethata Xoosse gidenna” gides. * Kessa 3:6 33 Dereyka hessa siydi iza timirtezan malalettides.
Wursoppe aadhdhiza azazo
(Mar 12:28-34; Luqa 10:25-28)
34 Yesusi Saduqaaweta co7u histidayssa siydi Farsaaweeti issi bolla shiiqettida. 35-36 Ista giddofe issi Muse woga lo7ethi erizadey Yesusa paaccanaas koydi “Aastamare! Muse wogata giddon ubbafe aadhdhizay awayssee?” giidi oychides. * Luqa 10:25-28
37 Izikka zaaridi “ ‘Ne Goda Xoossa ne kumeththa woznappe, ne kumeththa shempofe, ne kumeththa qofappe dosa.’ * Zaare 6:5 38 Hayssi koyronne ubbafe aadhdhiza azazo. 39 Nam7anthoykka iza misatees, hessika ‘Ne shooro ne hu7e mala dosa’ gizayssa. * Lewe 19:18 40 Muse wogaynne nabeta timirtey wurikka hayta nam7u azazotan qashettes” gides.
Kirstoosa gish shiiqida oysho
(Mar 12:35-37; Luqa 20:41-44)
41 Farsaaweeti issi bolla shiiqeti dishin Yesusi ista, 42 “Kirstoosa gish inte ay geetii? Izi oona naa?” gi oychides; Istika izas zaaridi “Izi Dawute naa” gida.
43-44 Izikka istas
“Histin Dawutey
Xillo Ayana wolqan
‘Xoossay ta Goda’ giidi waani xeygidee?
‘Ta ne morketa ne toho giddon gulbatissana gakkanaas ne ta ushachan utta!’
gides. * Maza 110:1 45 Hessa gish Dawutey iza ‘Ta Goda’ giidi xeygikko waanidi izas naa gidana dandayizee?”
gides. 46 Izas issi qaala zaarana dandayida asi woykko he gallassafe simmin iza oysho oychana xalida asi oonikka bettibenna.

*22:13 Mato 8:12; 25:30; Luqa 13:28

*22:23 Hawa 23:8

*22:24 Zaare 25:5

*22:31-32 Kessa 3:6

*22:35-36 Luqa 10:25-28

*22:37 Zaare 6:5

*22:39 Lewe 19:18

*22:43-44 Maza 110:1