3
1 Histikko Ayhuda as gideththas aaza go7ay dizee? Qaxxaray ay go7izee? 2 Awarakka gidin go7ay daro. Harappe koyro Xoossa qaalay hadara Ayhudatas imettides. 3 Istafe issi issades ammanoy baynda aggikko Xoossa ammanoteth diggizee? 4 Mulekka diggenna! Asi wurikka wordancha
“Neni ne qaalappe dendidayssan tumancha;
pirdanka xoonizade gidaasa” hessatho geetetti xaafettida mala Xoossi qasse tumancha. *Maza 51:4
5 Nu makala oosoy Xoossa xilloteth qoncen bessizayssa gidikko histin nu ay ganee? Coo asa woga mala palametanas Xoossi ba hanqo nu bolla ehizaysi nuus bessenna ganeyee? Hessaka ta gizay asatho qofanna. 6 Tumappe hessatho hanenna. Hessatho haniza gidikko Xoossi alame bolla wosti pirdandee?
7 Ta wordoteth Xoossa tumateth qoncisizayssan iza boncho gede gujizayssa gidikko histin ha7i gakkanaas wosti ta bolla nagarancha mala pirdetizee? giidi palamettana asi daana dandayees. 8 Hessa guussi “Lo7oy yaana mala ane iita ooththoos” geettes giidi issi issi asati nu bolla woresizayssa mala. Hayta asata bolla gakkiza pirday tumu pirda.
Asi wuri nagarancha
9 Histin nu ay giinoo? Nuni istafe aadhdhizonii? Mulekka aadhdhokko. Ayhudata gidikkoka Ayzaabeta gidikkoka wurikka nagarappe garsa baggara diza gish ta wursaka kasetada istas yootadis. 10 “Xilloy oonikka deenna; issadeykka deenna. 11 Yuushi qoppizadey baawa; Xoosse koyizay issadeyka baawa.
12 Wurikka balettidanne
issi bolla go7ontayta gidida.
Lo7o ooththizay oonikka baawa;
issadeykka deenna.
13 Ista duunay doya diza duufo mala;
ista duunay ubba wode baleththo haasayees;
ista metershay shoosha marzera dees. *Maza 5:9; 140:3
14 Ista duunan qangethinne camo miish kumides. *Maza 10:7
15 Ista tohoy suuth gussanas eesotes.
16 Ista ogen dhayoynne laafateth dees.
17 Isti sarotetha oge erettenna.
18 Ista ayfeson Xoossas baboy baawa” geetetti xaafettida mala. *Maza 36:1
19 Hessa gish duunay wurikka gordettana mala derey kumeth Xoossas zaaro immana mala wogay gizay wurikka wogappe giddora dizaytas gididayssa nu eroos. 20 Hessa gish wogay nagaray aazakkone erisees attin woga naagon oonikka iza achchan xillo geetettanas dandayenna.
Ammanon beettiza xilloteth
21 Ha7i qasse woga kase nabeti izas markattidays wogappe karera gidida Xoossa xillotethi qoncides. 22 Hessi Xoossa xillotethi Yesus Kirstoosa ammanon dummatethi baynda beettiza xillotetha. *Gala 2:16
23 Gaasoyka asi wurikka nagara ooththides. Xoossa bonchoyka asa naas paccides. 24 Asay Yesus Kirstoosi asa naa gish ooththida kiyatethafe dendidayssan coo mela xillides. 25 Iza suuthan gidida ammanon nagarappe maarettana yarsho histidi Xoossi Yesusa shiishshides. Izi hessa ooththiday kasetidi poletida nagara qaxayonta dandayan aadhdhida ba xilloteth bessanasa. 26 Izi hessa ha wodezan ooththiday ba xillotetha hessikka ba baggara xillo gidida Yesus Kirstoosan ammanizade xillisizayssa bessanassa.
27 Histin nuni izan ceeqqettiza miishi aazi dizee? Aykko miishanka ceeqqettokko. Nu ceeqqettana gaasoy aazee? Woga naagiza gishee? Gidenna, ammanonna. 28 Ay assikka ammanon attin woga naagon attontayssa nu geeshshi yootoos.
29 Xoossi Ayhudata Xoosse xalalaa? Ayzaabetaska Xoosse gidenee? Ee Ayzaabetaska izi Xoossa. 30 Qaxxaretidayssa ammanon qasse qaxxaretontayssakka he ammanonka xillisizaykka izi issi Xoossa xalla. *Zaare 6:4; Gala 3:20 31 Histin hessi hessa gidikko ammano geedon woga go7ay baynda miish ooththinoo? Mulekka hessatho hanenna; Woga nu minthana attin.