1 ጺሮሴ ካዎ ሁራሜይ ዳዊቴስ ካዎ ኬꬅ ኬጻና ማላ ኪታ ኣሳታ፥ ሹች ማሲዛይታኔ ኣናጼታ ዚጋ ሚꬃራ ዳዊቴኮ ዬዲዴስ። 2 ጎዳይ ኢስራኤሌ ቦላ ኢዛ ካዎꬂዳይሳኔ ባ ኣሳ ኢስራኤሌ ጊሻስ ኢዛ ካዎቴꬃ ꬎቁ ሂስቲ ቦንቺዳይሳ ዳዊቲ ኣኬኪዴስ።

3 ሄሳፌ ጉዬ ዳዊቲ ዬሩሳላሜን ሃራ ማቼታ ጉጂ ኤኪዲ ኣቱማ ናይታኔ ማጫ ናይታ ዬሊዴስ። 4 ዳዊቲ ዬሩሳላሜን ዬሊዳ ኣቱማ ናይቲ ሻሙኤ፥ ሾባቤ፥ ናታኔ፥ ሶሎሞኔ፥ 5 ኢያቤሄሬ፥ ኤልሹኤ፥ ኤልፓሌጼ፥ 6 ኖጋሄ፥ ኔፌጌ፥ ናፊያ፥ 7 ኤልሻማኤ፥ ቤኤልያዴኔ ኤልፋሌጼ። *ዳዊቴስ ዬሩሳላሜን ዬሌቲዳ ኣቱማ ናይታ ሱንꬂ 2ሳሜ 5፡14-16፥ 1ታሪ 3፡5-7ኔ 14፡4-7 ጻፌቲዴስ፤ ጊዶ ኣቲን ኢብራዌታ ማጻፋን ኢሶታ ኢሶታ ሱንꬃይ ኡባሶን ኢሲ ማላ ጊዴና።

8 ዳዊቲ ኢስራኤሌ ኡባ ቦላ ካዎ ጊዲዲ ቲዬቲዳይሳ ፊሊስጼሜ ኣሳይ ሲዪዲ ኡባይ ዳዊቴ ኦይካናስ ኬኢዴስ፤ ዳዊቲ ሄሳ ሲዪዲ ኢስታራ ኦሌታናስ ኬዚዴስ። 9 ፊሊስጼሜ ኣሳይ ኤራፋይሜ ዙሌዛ ዪዲ ዎራጂዴስ። 10 ዳዊቲካ፥ «ታኒ ባዳ ፊሊስጼሜታ ኦሎ? ኔኒ ኢስታ ታ ኩሼን ኣꬃ ኢማኔ?» ጊ ጾሳ ኦይቺዴስ።

ሂስቲን ጎዳይ ኢዛስ፥ «ኤ ባዳ ኦላ፤ ታኒ ኢስታ ኔስ ኣꬃ ኢማና» ጊዴስ።

11 ሂስቲን ዳዊቲኔ ኢዛራ ዲዛ ኣሳይ ባኣሊ-ፓራጺሜ ጌቴቲዛሶ ቢዲ ሄን ኢስታ ኦሊ ጾኒዳ፤ ዳዊቲ፥ «ዲኦ ሃꬂ ሾዲ ኤፊዛ ማላ ጾሲ ታ ሞርኬቲ ታ ኩሼን ሾዴታና ማላ ኦꬂዴስ» ጊዴስ፤ ሄሳ ጊሻስ ሄ ሶሆዛ ሱንꬂ ባኣሊ-ፓራጺሜ ጌቴቲዴስ። 12 ፊሊስጼሜቲ ባንታ ኤቃ ጾሳታ ሄን ዬጊ ቢዳ። ሂስቲን ዳዊቲ ኢስታ ኤቃ ጾሳታ ታማን ጹጋና ማላ ኣዛዚዴስ።

13 ፊሊስጼሜ ኣሳይ ናምኣንꬆ ዪዲ ሄ ሾባ ዎራጂዴስ። 14 ዳዊቲ ጾሳ ናምኣንꬆ ዛሪ ኦይቺዴስ፤ ሂስቲን ጾሲ ኢዛስ፥ «ኔኒ ኢስታ ቦላ ሲቲ ጋዳ ቦፓ። ኢስታ ጊዶꬃዳ ኤꬃ ሚꬃስ ሲንꬃ ባጋራ ኢስታ ኦላናስ ጊጌታ። 15 ኤꬃ ሚꬃዛ ጼራን ሳልፌ ጊሪስ ኔኒ ሲዪዳ ዎዴ ኦላናስ ኤሌ ኬዛ፤ ጋሶይካ ሄሲ ፊሊስጼሜ ኦላንቻታ ሾጫናስ ጾሳይ ኔፔ ሲንꬃን ኬዚዳ ጊሻሳ ጉሳ» ጊዴስ።

16 ሄሳ ጊሻስ ጾሳይ ኣዛዚዳ ማላ ዳዊቲ ኦꬂዴስ። ጌባኦኔፔ ቢዲ ጌዜሬ ጋካናስ ኢስራኤሌ ኣሳይ ፊሊስጼሜ ኦላንቻታ ዲፒ ሂስቲዴስ።

17 ሄሳ ጋሶን ዳዊቴ ጎባቴꬂ ቢታ ኡባን ናሼቲዴስ። ጎዳይ ካዎቴꬃቲ ኡባይ ዳዊቴስ ያያና ማላ ኦꬂዴስ።