27
ኢስራኤሌ ኦላንቻታ ካሌꬂዛይታ
1 ባንታ ቡቴን ቡቴን ላይꬅ ኩሜꬅ ኣጊናን ኣጊናን ካዎዛሲኔ ዴራስ ታራን ታራን ኦꬂዛ ኢስራኤሌ ኬꬃ ኣሳታ ሃላቃቲ፥ ሻላቃቲኔ ማቶ ሃላቃቲ፥ ኦላ ጋዳዋቲ ሃይሳፌ ካሊዛይታ፤ ኢሲ ኢሲ ቡቴን 24,000 ኣሲ ዴስ።
2 ኮይሮ ኣጊናን ኦꬂዛ ቡቴዛስ ኣላፌይ ዛብዲኤሌ ና ያሾቢኣሜ፤ ኢዛ ቡቴዛን 24,000 ኣሲ ዴስ። 3 ያሾቢኣሜይ ፓሬሴ ዛሬ፤ ኢዚ ኮይሮ ኣጊናን ኦላስ ኬኢዛ ሃላቃታስ ጋዳዋ።
4 ናምኣንꬆ ኣጊናን ኦꬂዛ ቡቴዛስ ኣላፌይ ኣሂሆሄ ዴሬ ኣስ ዶዴያ፤ ኢዛ ቡቴዛን 24,000 ኣሲ ዴስ፤ ሃ ቡቴዛ ኢዛፔ ጋርሳራ ካሌꬂዛይ ሚቂሎቴ።
5 ሄꬓንꬆ ኣጊናን ኦꬂዛ ቡቴዛስ ኣላፌይ ቄሴ ዮዳሄ ና ባናያ፤ ኢዛ ቡቴዛን 24,000 ኣሲ ዴስ። 6 ባናያይ 30 ኣሳታፔ ኣꬊ ኤሬቲዳ ሚኖ ኣስ ጊዲዳ ጊሻስ ኢዚ ኢስታ ቦላ ሃላቃ ጊዲዴስ፤ ኢዛ ና ኣሚዛባዴይ ኢዛፔ ጋርሳራ ኣዛዚዛዴ ጊዲዴስ።
7 ኦይዳንꬆ ኣጊናን ኦꬂዛ ቡቴዛስ ኣላፌይ ኢዮኣቤ ኢሻ ኣሳሄሌ፤ ኢዛ ቡቴዛን 24,000 ኣሲ ዴስ፤ ኢዛሶሆን ኣላፌቲዳይ ኢዛ ና ዛባዲያ።
8 ኢቻሻንꬆ ኣጊናን ኦꬂዛ ቡቴዛስ ኣላፌይ ዪጺራ ኣስ ሻሚሁቴ፤ ኢዛ ቡቴዛን 24,000 ኣሲ ዴስ።
9 ኡሱፑንꬆ ኣጊናን ኦꬂዛ ቡቴዛስ ኣላፌይ ቴቁሄ ኣስ ኢቄሻ ና ኢራ፤ ኢዛ ቡቴዛን 24,000 ኣሲ ዴስ።
10 ላፑንꬆ ኣጊናን ኦꬂዛ ቡቴዛስ ኣላፌይ ኤፍሬሜ ዛሬፔ ፒሎኔ ዴሬ ኣስ ሄሌጼ፤ ኢዛ ቡቴዛን 24,000 ኣሲ ዴስ።
11 ኦስፑንꬆ ኣጊናን ኦꬂዛ ቡቴዛስ ኣላፌይ ሁሼ ኣስ ሲቢካዬ፤ ኢዚ ዛራሄ ዛሬፔ ዪዴስ፤ ኢዛ ቡቴዛን 24,000 ኣሲ ዴስ።
12 ኡዱፉንꬆ ኣጊናን ኦꬂዛ ቡቴዛስ ኣላፌይ ቢኒያሜ ዛሬፔ ኣናቶቴ ኣስ ኣቢኤዜሬ፤ ኢዛ ቡቴዛን 24,000 ኣሲ ዴስ።
13 ታማንꬆ ኣጊናን ኦꬂዛ ቡቴዛስ ኣላፌይ ዛራሄ ዛሬፔ ናጾፌ ዴሬ ኣስ ማሂራዬ፤ ኢዛ ቡቴዛን 24,000 ኣሲ ዴስ።
14 ታማኔ ኢሲንꬆ ኣጊናን ኦꬂዛ ቡቴዛስ ኣላፌይ ኤፍሬሜ ዛሬፔ ፒራቶኔ ኣስ ባናያ፤ ኢዛ ቡቴዛን 24,000 ኣሲ ዴስ።
15 ታማኔ ናምኣንꬆ ኣጊናን ኦꬂዛ ቡቴዛስ ኣላፌይ ኦቲንኤሌ ዛሬፔ ናጾፌ ዴሬ ኣስ ሄልዳዬ፤ ኢዛ ቡቴዛን 24,000 ኣሲ ዴስ።
ኢስራኤሌ ኣሳ ጋርሳን ቆሞታ ቆሞታ ካሌꬂዛ ኦላ ጋዳዋታ
16 ኢስራኤሌ ኣሳ ጋርሳን ቆሞታ ቆሞታ ቦላ ሹሜቲዳ ኦላ ጋዳዋቲ ሃይሳፌ ካሊዲ ጻፌቲዳይታ።
ኦሮቤሌ ቆሞ ቦላ
ሱሚዳይ ዚኪሬ ና ኤልኤዜሬ።
ሲሞና ቆሞ ቦላ ሱሚዳይ
ማኢካ ና ሻፋጺያ።
17 ሌዌ ቆሞ ቦላ ሱሚዳይ
ቃሙኤሌ ና ሃሻቢያ።
ኣሮኔ ዛርኬ ቦላ
ሱሚዳይ ሳዶቄ።
18 ዩሁዳ ቆሞ ቦላ ሱሚዳይ
ዳዊቴ ኢሻ ኤሊሁ።
ዪሳኮሬ ቆሞ ቦላ
ሱሚዳይ ሚካኤሌ
ና ኦሚሬ።
19 ዛቢሎኔ ቆሞ ቦላ
ሱሚዳይ ኣብዲዩ
ና ዪሺማኤ።
ኒፍታሌሜ ቆሞ ቦላ
ሱሚዳይ ኣዛሪኤሌ
ና ያርሞቴ።
20 ኤፍሬሜ ቆሞ ቦላ
ሱሚዳይ ኣዛዚያ
ና ሆሴኤ።
ዮርዳኖሴ ሻፋፔ ኣርሼይ ዉሊዛ ባጋን ዲዛ ሚናሴ ቆሞ ባጋታ ቦላ ሱሚዳይ ፓዳያ ና ኢዩኤሌ።
21 ዮርዳኖሴ ሻፋፔ ኣርሼይ ሞኪዛ ባጋን ጋላኣዴን ዲዛ ሚናሴ ቆሞ ባጋታ ቦላ ሱሚዳይ ዛካራሳ ና ኢዶ።
ቢኒያሜ ቆሞ ቦላ ሱሚዳይ ኣቢኔሬ ና ያኢሲኤሌ።
22 ዳኔ ቆሞ ቦላ ሱሚዳይ ዪሮሃሜ ና ኣዛሪኤሌ።
ሃይቲ ኢስራኤሌ ኣሳ ጋርሳን ቆሞታ ቆሞታ ካሌꬂዛ ኦላ ጋዳዋታ።
23 ጎዳይ፥ «ታኒ ኢስራኤሌ ኣሳ ሳሎ ጾሊንቴ ማላ ጮራሳና» ጊዲ ሂዶታ ቃላ ኢሚዳ ጊሻስ ዳዊቲ ናምኡ ታማኔ ሄሳፌ ጋርሳራ ጊዲዳ ኣሳ ቆዲቤና። ሜꬌ 15፡5፤ 22፡17፤ 26፡4 24 ጹሪያ ና ኢዮኣቤይ ኣሳ ቆዳ ዶሚዴስ ሺን ፖሊቤና፤ ኣሳ ቆዲዳ ጋሶን ጎዳይ ኢስራኤሌ ኣሳ ቦላ ሃንቄቲዴስ፤ ሄሳ ጊሻስ ኢስታ ቆዳይ ካዎ ዳዊቴ ታሪኬ ማዝጋባን ጻፌቲቤና። 2ሳሜ 24፡1-15፤ 1ታሪ 21፡1-14
ካዎ ኣቆታ ቦላ ኣዋቴꬃን ሱሚዳይታ
25 ካዎ ኬꬃን ቡቁራ ዎꬂዛ ሚንጃ ኬꬃ ኣላፌይ ኣዲኤሌ ና ኣዚሞቴ። ጋጻሬታን፥ ካታማታን፥ ሞꬃታኒኔ ናጌሶ ሚጻታን ዲዛ ሚንጃ ኬꬃታ ኣላፌይ ኦዚያ ና ዮናታኔ። 26 ጎሻንቻታ ኣላፌይ ካሉቤ ና ኤዚሬ። 27 ዎይኔ ሚꬅ ቶኪዛሶሆታ ኣላፌይ ኤራማቴ ዴሬ ኣስ ሺምኤ፤ ዎይኔ ኡሹ ሚንጂዛሶታ ኣላፌይ ሻፋሜ ዴሬ ኣስ ዛብዴ።
28 ሻራ ሜንꬆታን ዙምቡላታ ጻጶን ዲዛ ዎጋራ ሚꬂኔ ዎላ ሚꬃታ ናጋናስ ኣላፌቴꬂ ጋዴሬ ዴሬ ኣስ ባኣሊ-ሃናኔስ ኢሜቲዴስ፤ ዛይቴ ሚንጂዛ ኬꬃ ኣላፌቴꬂ ኢዮኣሳስ ኢሜቲዴስ። 29 ላሻሮኔ ዴምባን ሄሜቲዛ ዉዴ ሜሄታ ኣላፌቴꬂ ሳሮኔ ኣስ ሺጺራያስ ኢሜቲዴስ፤ ሾባን ሄሜቲዛ ዉዴ ሜሄታ ኣላፌቴꬂ ኣዲላያ ና ሳፋጼስ ኢሜቲዴስ። 30 ጋሜላታ ቦላ ኣላፌቴꬂ ኢስማኤሌ ኣስ ኦቢላስ ኢሜቲዴስ። ሃሬታ ቦላ ኣላፌቴꬂ ሜሮኖቴ ኣስ ዬሂዳዬስ ኢሜቲዴስ። 31 ዶርሳ ዉዴታኔ ዴይሻ ዉዴታ ናጋና ኣላፌቴꬂ ኣጋሪ ዛሬፔ ጊዲዳ ያዚዜስ ኢሜቲዴስ፤ ሃይቲ ኡባይ ካዎ ዳዊቴ ኣቆታ ናጋናስ ኣላፌቴꬅ ኤኪዳ።
ካዎ ዳዊቴ ዞሪዛይታ
32 ዳዊቴ ኣዋ ኢሻይ ዮናታኔይ ጻፌ፥ ኣኬካንቻ ኣሳኔ ዞሪዛ ኣሳ፤ ሃኪሞኔ ና ዪሂኤሌይ ካዎ ናይታ ዲቺዛዴ። 33 ኣክጾፌሌይ ቃሴ ካዎዛ ዞሪዛዴ፤ ኣርኬ ዴሬ ኣስ ሁሼይ ካዎስ ሲቆ ላጌ። 34 ኣክጾፌሌፔ ጉዬ ባናያ ና ዮዳሄይኔ ኣቢያታሬይ ካዎ ዞራንቻ ጊዲዳ፤ ኢዮኣቤይ ካዎ ኦላንቻታ ሃላቃታስ ጋዳዋ ጊዲዴስ።