1 ኢንቴ ጋርሳን ዬላቺዛ ላይማይ ዲዛይሲ ዎሬቴስ፤ ሄሳ ማላ ቱናቴꬂ ኣማኖንታ ዴሬታ ኣቻንካ ዴና፤ ባ ኣዋ ማቾ ኤኪዳ ኣሲ ኢንቴኮን ዴስ። ዛሬ 22፡30 2 ሂስቲን ሄሳ ማላ ዬላቺዛ ሚሺ ኢንቴ ጊዶን ዲሺን ኣዛስ ኦቶሬቴቲ? ሄሳፌ ሄ ዮኦዛን ኢንቴ ሙዞታናስ ኢንቴስ ቤሴኔ? ሄሳ ማላ ኦꬂዳዴ ኢንቴ ጋርሳፌ ዲጊቴ።

3 ታ ኢንቴናራ ኣሾን ኢሲፌ ዶንታ ኣጊኮካ ኣያናን ቃሴ ኢንቴናራ ዳይስ፤ ታ ሃኢ ኢንቴናራ ዲዛ ማላ ሄሳ ኦꬂዳዴ ቦላ ፒርዳዲስ። 4-5 ኢንቴ ሺቂዛሶን ታ ኢንቴናራ ዲዛ ጊሻስ ጎዳ ዬሱሳ ሱንꬃኒኔ ኢንቴ ጊዶን ዲዛ ኑ ጎዳ ዬሱሳ ዎልቃን ሄ ሞራንቻዛ ኣሾይ ꬋዪን ኢዛ ሼምፖይ ጎዳ ጋላሳን ኣታና ማላ ሄሳ ማላ ኣሲ ጻላኤስ ኣꬊ ኢሜቶ።

6 ኢንቴ ጬቄቲዛይሲ ሎኦስ ጊዴና፤ ጉꬃ ኢርሾይ ዳሮ ቡኬሶ ዴንꬄꬂዛ ኤሬኬቲ?ጋላ 5፡9 7 ኢንቴ ሃኢ ኢርሾይ ባይንዳ ኦራꬃ ቡኬሶ ጊዳና ማላ ካሴ ጫላ ኢርሾዛ ኢንቴ ጊዶፌ ዲጊቴ፤ ኑ ፓዚጋ ዶርስ ጊዲዳ ኪርስቶሲ ኑስ ያርሼቲዴስ። *ፓዚጋ ቦንቺዛ ዎዴ ኣሳይ ጫላ ኢርሾ ጊዲዳ ሚሽ ካꬃን ዬጌና። ኬሳ 12፡5 8 ሄሳ ጊሻስ ኣኔ ኑኒ ፓዚጋ ባኣሌዛ ቆሆይኔ ኢታቴꬂ ኢዛን ኩሚዳ ካሴ ጫላ ኢርሾ ቦላ ጊዶንታ ኢርሾይ ባይንዳ ኡኬꬃን ሱሬቴꬃኒኔ ቱማን ቦንቾስ። ኬሳ 13፡7፤ ዛሬ 16፡3

9 ኢንቴስ ላይማቲዛ ኣሳታራ ኢሲፌቴꬂ ዶንታ ማላ ታ ኢንቴስ ካሴ ዳብዳቤ ጻፋዲስኮሺን። 10-11 ኢንቴ ኣማኖስ ጊሼ ላይማቲዛ ኣሳራ ጊዶንታ ዎይኮ ጮ ጋጲጋጲዛይታራ፥ ካይሶቲዛይታራ፥ ኤቃስ ጎይኒዛይታራ ጋጎፍቴ ጉስ ጊዶንታ ዲሺን ሃኢ ታ ጻፊዳይ ኣማናይስ ጊሼ ላይማቲዛይታራ ዎይኮ ማꬆቲዛይታራ፥ ጋጲጋጲዛይታራ፥ ኤቃስ ጎይኒዛይታራ፥ ኣሳ ሱንꬅ ሞሪዛይታራ ዎይኮ ጫዪዛይታራ፥ ኣሳ ሚሽ ቦንቂዛዴንታራ ኢንቴስ ኢሲፌቴꬂ ዶፖ፤ ሄይታንታ ማላራ ሃራይ ኣቶሺን ካꬂካ ኢሲፌ ሞፒቴ።

12 ሃንኮ ኣማኖንታ ኣሳ ቦላ ፒርዳናስ ታና ኣዚ ጋꬂዜ? ዎሳ ኬꬃን ዲዛይታ ቦላ ኢንቴ ፒርዴኬቲ? 13 ዎሳ ኬꬃፌ ካሬራ ዲዛይታ ቦላ ጊዲኮ ጾሲ ፒርዳና፥ «ኢንቴ ኢንቴ ጊዶፌ ኢታ ኣስ ዲጊቴ» ጌቴቲ ጌሻ ማጻፋን ጻፌቲዴስ።