1 ታ ኢሻቶ! ካሴ ኑ ኣዋቲ ሻራይ ኢስታፌ ቦላራ ጊዲዲ ካሌꬂዳይሳ ማላኔ ኢስቲ ዉሪካ ዞኦ ኣባ ፒኒዳይሳ ታ ኢንቴና ቆፍሳናስ ኮያይስ። ኬሳ 13፡21-22፤ 14፡22-29 2 ኢስቲ ሙሴራ ጊዳናስ ጊዲ ሻራኒኔ ኣባን ጻማቄቲዳ። 3 ዉሪካ ኢሲ ኣያና ቁማ ሚዳ። ኬሳ 16፡35 4 ዉሪካ ኢሲ ኣያና ኡሹ ኡዪዳ፤ ኢስቲ ኡዪዳይካ ባና ካሊዛ ኣያና ዛላፌ ፑልቲዳይሳፌ፤ ሄ ዛላይካ ኪርስቶሳ። ኬሳ 17፡6 5 ጊዶ ኣቲን ጾሲ ዳሮታን ኡፋዬቲቤና፤ ሄሳ ጊሻስ ኢስታ ኣሃይ ባዞን ኩንዲ ኣቲዴስ። ታይ 14፡29-30

6 ኢስቲ ኢታ ሚሽ ኣሞቲዳይሳꬆ ኑኒካ ኣሞቶንታ ማላ ኢስታ ሃኖይ ኑ ናጌታና ማላ ኑስ ሌሚሶ ጊዲዴስ። ታይ 11፡4 7 «ዴሬይ ማናሲኔ ኡያናስ ኡቲዴስ፤ ዬጻናስካ ዴንዲዴስ» ጌቴቲ ካሴ ጌሻ ማጻፋን ጻፌቲዳ ማላ ኢስታ ጋርሳፌ ኢሲ ኢሲ ኣሳቲ ኦꬆይሳꬆ ኢንቴካ ኤቃ ጎይኒዛይታ ጊዶፒቴ። ኬሳ 32፡6 8 ኢስታ ጋርሳፌ ኢሲ ኢሲ ኣሳቲ ላይማቲዲ ኢሲ ጋላስ 23,000 ኣሳይ ዲፒ ጊ ዉሮይሳꬆ ዉሮንታ ማላ ኑኒካ ኣኔ ላይማቶኮ። ታይ 25፡1-18 9 ኢስታ ጋርሳፌ ኢሲ ኢሲ ኣሳቲ ጎዳ ፓጪዲ ሾሻን ዱኬቲ ሃይቂ ꬋይዳይሳ ማላ ኑኒካ ኣኔ ጎዳ ፓጮኮ። ታይ 21፡5-6 10 ኢስታ ጋርሳፌ ኢሲ ኢሲ ኣሳቲ ዙዙሚዲ ꬋይሲዛ ቦሻ ኪታንቻን ꬋይዳይሳꬆ ኢንቴካ ꬋዮንታ ማላ ዙዙሞፒቴ። ታይ 16፡41-49

11 ሄሲ ዉሪ ኑስ ሌሚሶ ጊዳና ማላ ኢስታ ቦላ ጋኪዴስ፤ ዎዴ ዉርሴꬃን ዲዛ ኑስ ቲሚርቴ ጊዳና ማላ ኑስ ጻፌቲዴስ። 12 ሄሳ ጊሻስ ታ ሚና ኤቃ ዳይስ ጊዛዴይ ዲኮ ኩንዶንታ ማላ ባስ ናጌቶ። 13 ኣሳ ቦላ ጋኪዳ ፓጬፔ ሃራ ኣꬊዛ ፓጬይ ኢንቴ ቦላ ጋኪቤና፤ ጾሲ ኣማኔቲዛ ጾስ ጊዲዳ ጊሻስ ኢንቴ ዳንዳዮንታ ኢንቴ ዎልቃፌ ቦላራ ኢንቴ ፓጬቴና ማላ ኢዚ ኢንቴና ኣጋጌና፤ ጊዶ ኣቲን ኢንቴ ፓጬቲዛ ዎዴ ሄ ፓጬዛ ኢንቴ ዳንዳያና ማላ ዎልቃ ኢሚዲ ፓጬፔ ኢንቴ ኬሲ ኤካና ኦጌ ኢዚ ኢንቴስ ጊጊሳና።

14 ሄሳ ጊሻስ ታ ሲቆቶ! ኤቃስ ጎይኖፍቴ፤ ኢዛፔ ሃኪቴ። 15 ታ ኢንቴስ ሃይሳ ጊዛይ ዎዚናማ ጊዲዳ ጊሻሳ፤ ሄሳ ጊሻስ ታ ዮቲዛይሳ ኣኔ ኢንቴ ኢንቴርካ ፒርዲቴ። 16 ኑኒ ጾሳ ጋላቲዲ ኤኪዛ ኡሻይ ኪርስቶሳ ሱꬃራ ጋጎቴꬂ ዲዛይሳ ጊዴኔ? ሄሳꬆካ ኑ ባꬂ ባꬂ ጊሼቲ ሚዛ ኡኬꬃይ ኪርስቶሳ ኣሾራ ጋጎቴꬂ ዲዛይሳ ጊዴኔ?ማቶ 26፡26-28፤ ማር 14፡22-24፤ ሉቃ 22፡19-20 17 ኡኬꬃይ ኢሲኖ ጊዲዳ ማላ ኑኒካ ዳሮ ጊዲ ኡቲዲ ዉሪካ ኢሲ ኣሾ፤ ኑ ዉሪካ ኢሲ ኡኬꬃዛ ጊሼቲ ሞስ።

18 ኣኔ ኢንቴ ኢስራኤሌ ናይቲ ኦꬂዳይሳ ቆፒቴ፤ ሺቂዛ ያርሾዛፔ ሚዛይታስ ያርሾይ ሺቂዛሶራ ጋጎቴꬂ ዴኔ?ሌዌ 7፡6 19 ሂስቲን ኤቃስ ያርሼቲዳ ያርሾ ጊዲን ዎይኮ ኤቃይ ባ ባጋራ ጎኣራ ዴስ ጋዚና? 20 ጊዴና! ኣማኖንታ ኣሳይ ሺሺዛ ያርሾይ ጾሳስ ጊዶንታ ጻላኤሳ፤ ኢንቴስ ጻላኤራ ኢሲፌቴꬂ ዳና ማላ ታ ኮይኬ። ዛሬ 32፡17 21 ጻላኤ ኡሺኔ ጎዳ ኡሹ ኢንቴ ኢሲፌ ጋꬂ ኡያና ዳንዳዬኬታ፤ ጎዳ ማዳፌኔ ጻላኤ ማዳፌ ጋꬂ ማና ዳንዳዬኬታ። 22 ኑኒ ጎዳ ሃንቄꬂኖ? ኑ ኢዛፔ ሚኒዞኒ?ዛሬ 32፡21

23 ዉሪካ ታስ ኢሜቲዴስ ሺን ዉሪካ ታና ጎኢዛዝ ጊዴና፤ ዉሪካ ታሳ ሺን ዉሪካ ታና ማዴና። 1ቆሮ 6፡12 24 ኣሲ ዉሪካ ባ ላጌ ጎኣናዝ ጋꬂ ጼሎ ኣቲን ባና ጎኣናዝ ጻላላ ኮዮፖ።

25 ጊያን ባይዜቲዛ ኣሾ ኡባ ሲꬌይ ባይንዳ ሚቴ። 26 ቢታይኔ ቢታ ቦላ ዲዛይ ዉሪካ ጎዳይሳ።

27 ኣማኖንታ ኣሲ ኢንቴና ባሶ ጼይጊዲ ሺሺዳ ካꬅ ዉርሲ ኣይኮካ ሲꬎንታ ሚቴ። 28 ጊዶ ኣቲን ኢሳዴይ፥ «ሃይሲ ኤቃስ ያርሼቲዳ ካꬃ» ጊኮ ሄ ካꬃ ሄ ኣዴዛ ቆፋ ጊሻሲኔ ኢንቴና ሲꬊስኮ ሞፒቴ። 29 ታ ኢንቴስ ሄሳ ጊዛይ ሄ ዮቲዳዴ ቆፋ ጊሻስ ጋዲስ ኣቲን ኢንቴ ቆፋ ጊሻስ ጋቤኬ፤ ታ ጺሎ ጊዳ ዲሺን ኣዛስ ሃራ ኣሳ ቆፋ ጋሶን ታ ቦላ ፒርዴቲዜ? 30 ታ ጾስ ጋላታዳ ሚዛዴ ጊዳ ኡታዳ ኣዛስ ሃራ ኣሳን ፒርዴቶ?

31 ሂስቲኮ ኢንቴ ኣይ ሚኮካ፥ ኣይ ኡዪኮካ ዎይኮ ኣይኮ ኦꬂኮ ዉርሲካ ጾሳ ቦንቾስ ኦꬂቴ። 32 ኣይሁዳ ኣሳስ ጊዲን ኣይዛቤታስ ጊዲን ዎይኮ ጾሳ ዎሳ ኬꬃስ ኦናስካ ꬉጴ ጊዶፒቴ። 33 ታ ኣስ ዉርሳካ ኣይ ኦጌራካ ኡፋይሳና ኮይዛ ማላ ኢንቴካ ሄሳꬆ ኦꬂቴ፤ ዳሮቲ ኣታና ማላ ታ ታና ጎኢዛዝ ጊዶንታ ኢስታ ጎኢዛዝ ኮያይስ።