ዮሃኒሲ
ጻፊዳ ኮይሮ ኪታ
ጊዶ ቆፋ
ዮሃኒሲ ኮይሮ ዬዲዳ ኪታዛን ናምኡ ኣይፌ ዮቲ ዴቴስ፤ ሄይቲካ ሄ ኪታዛ ናባቢዛይታስ ጾሳራኔ ጾሳ ና ዬሱስ ኪርስቶሳራ ኢሲፌቴꬂ ዴኣና ማላ ኢስታ ሚንꬄꬃናሲኔ ሄሳ ሄ ኢሲፌቴꬃ ꬋይሲዛ ዎርዶ ቲሚርቴፌ ኢስቲ ናጌታና ማላሳ። ሃይሲ ኪታይ ጻፌቲዛ ዎዴ ሄ ኣላሜዛ ቦላ ኬሂ ኢታ ዎርዶ ቲሚርቴይ ዴስ፤ ሄ ቲሚርቴዚካ ኢሲ ኢሲ ኣማኒዛ ኣሳታ ኣማኖፔ ካሬ ኬሲዴስ፤ ሄ ዎርዶ ኣስታማሬቲ ታማርሲዛ ኢታ ቲሚርቴይ 1. «ጾሲ ኣያና ኣላሜ ጻላ ሜꬊዴስ። 2. ሃይሳ ሃ ኣላሜዛን ዲዛ ኣይፌን ቤቲዛ ሚሽ ኡባኔ ኑ ኣሳቴꬅ ጾሲ ሜꬊቤና፤ ሄሳ ጊሻስ ሄ ሜꬌቴꬃቲ ዉሪካ ኢታ ጻላ። 3. ሃይሲ ኣይፌን ቤቲዛ ኣላሜዚኔ ኑ ኣሳቴꬃይ ኑ ኣያና ቆሃናሲኔ ቱኒሳናስ ዳንዳዬና።» ሄሳ ጉሲ፥ «ኮይሮ ጾሳፌ ዪዳ ዬሱሳስ ኣሳ ኣሳቴꬂ ዴና፤ ቃሴካ ናምኣንꬆራ ኢሳዴይ ሃራ ኣሳ ቦላ ናጋራ ኦꬂኮኔ ኢዚ ሃራ ኣስ ኢጺኮ ሄሳዴ ኦሶዚ ኢዛ ኣያና ቆሃናሲኔ ቱኒሳናስ ዳንዳዬና» ጉሳ። ሄይቲ ሄ ኣስታማሬቲ፥ «ኣቶቴꬃ ጉሲ ሃይሳ ኣላሜዛ ዱሳስ ቆፖንታ ኣጎ ኮሼስ» ጊ ታማርሴቴስ። ሄሳራካ ጋꬂዲ፥ «ሎኦ ኦሶን ጊዲን ዎይኮ ኣሴ ሲቆይ ሙሌካ ኮሼና» ጊ ታማርሴቴስ።
ሄሳ ጊሻስ ዮሃኒሲ ባ ኪታን፥ «ሄሳꬆ ዎርዶ ቲሚርቴይ ቱሙ ኣማኖ ቲሚርቴፌ ካሬ ጊዲዳይሳ ታማርሴስ፤ ሄሳ ሄ ቲሚርቴዛ ኢጾን ዬሱስ ኪርስቶሲ ኩሜꬃራ ኣሴኮ፤ ዬሱሳን ኣማኒዛይቲኔ ጾስ ሲቂዛይቲ ዉሪካ ባ ጋርሳን ኢሶይ ኢሳራ ሲቄታናስ ቤሴስ» ጊዲ ኤሪሲዴስ። ቃሴካ ዬሱሲ ቱማፔ ኣሳ ኣሾ ማይኢዳይሳኔ ዬሌቲዳይሳ ካዲዛዴይ ጾሳፌ ዬሌቲቤና። (4፡2-3) ጎዳ ጾሳፌ ዬሌቶንታዴይ ቃሴ ጾሳፌ ጊዲዳዴ ሲቃናስ ዳንዳዬና፤ ጾሳፌ ዬሌቲዳዴይ ኡባ ዎዴ ናጋራን ዴኣናስ ዳንዳዬና። (3፡10)
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1-4
ፖኦኔ ꬉማ 1፡5—2፡29
ጾሳ ናይታኔ ጻላኤ ናይታ 3፡1-24
ቱማኔ ዎርዶ 4፡1-6
ቱሙ ሲቆ 4፡7-21
ጾኒዛ ኣማኖ 5፡1-21
1
ዴኦ ቃላ
1 ዴኦ ቃላ ጊሻስ ኮይሮፔ ዲዛይሳ ኑኒ ኑ ሃይꬃን ሲዪዳይሳኔ ኑ ኣይፌራ ቤኢዳይሳ ሎኤꬂ ጼሊዳይሳ፥ ኑ ኩሼራ ኦይኪ ቤኢዳይሳ ጊሻስ ሃሳዮስ። ዮሃ 1፡1 2 ዴኦይካ ቆንጪዴስ፤ ኑኒካ ኑ ኣይፌራ ቤኢዲ ማርካቶስ። ኢዛስ ኢዛ ኣዋ ኣቻን ዲዛይሳኔ ኑስካ ቆንጪዳ ሜርና ዴኦ ጊሻስ ኑ ኢንቴስ ዮቶስ። ዮሃ 1፡14 3 ኢንቴስካ ኑናራ ኢሲፌቴꬂ ዳና ማላ ኑኒ ቤኢዳይሳኔ ሲዪዳይሳ ኢንቴስ ዮቶስ፤ ኑ ኢሲፌቴꬃይካ ኣዋራኔ ኢዛ ና ዬሱስ ኪርስቶሳራ። 4 ኑ ኡፋይሳይ *ኑ ኡፋይሳይ፡ ኑ ኡፋይሳይ ጊዛይሲ ኢሲ ኢሲ ቢርሼꬃታን ኢንቴ ኡፋይሳይ ጌቴቲዴስ። ኩሜꬅ ጊዳና ማላ ኑ ሃይሳ ኢንቴስ ጻፎስ።
ፖኦን ሲሜሬቴꬅ
5 ኑ ኢዛፔ ሲዪዲ ኢንቴስ ዮቲዛ ኪታይ፥ «ጾሲ ፖኦ፤ ኢዛ ኣቻን ሙሌካ ꬉማይ ዴና» ጊዛይሳ። 6 «ኑ ꬉማን ሲሜሬቲሼ ኢዛራ ኑስ ኢሲፌቴꬂ ዴስ» ጊኮ ዎርዶቶስ ኣቲን ቱማን ዶኮ። 7 ጊዶ ኣቲን ኢዚ ፖኦን ዲዛ ማላ ኑኒካ ፖኦን ሲሜሬቲኮ ኑ ጋርሳን ኑስ ኢሲፌቴꬂ ዴስ፤ ኢዛ ና ዬሱስ ኪርስቶሳ ሱꬂ ኑና ናጋራ ኡባፌ ጌሼስ።
8 ኑኒ ኑናን ናጋራይ ባ ጊኮ ኑርካ ኑና ባሌꬆስ፤ ቱማይካ ኑናን ዴና። 9 ኑኒ ኑ ናጋራ ፓጺኮ ኢዚ ኑ ናጋራ ኣቶ ጋናሲኔ ኑ ቆሆፔ ኑና ዉርሲ ጌሻናስ ኢዚ ኣማኔቲዳዴኔ ጺሎ። 10 ኑኒ ናጋራ ኦꬂቤኮ ጊኮ ኢዛ ኑ ዎርዳንቻ ኬሶሲኔ ኢዛ ቃላይካ ኑናን ዴና።