9
ጎዳይ ሶሎሞኔስ ናምኣንꬆ ቆንጬꬅ
(2ታሪ 7፡11-22)
1 ሶሎሞኔይ ጎዳ ኬꬂኔ ካዎ ኬꬅ ኬጺ ጊጊዲ ባ ኦꬃናስ ኣሞቲዳ ኣሞ ኡባ ፖሊዳፔ ጉዬ፥ 2 ጌባኦኔ ካታማን ካሴ ቆንጪዳ ማላ ጎዳይ ናምኣንꬆ ኢዛስ ቆንጪዴስ። 1ካዎ 3፡5፤ 2ታሪ 1፡7 3 ሂስቲዲ ጎዳይ ኢዛስ፥ «ኔኒ ታ ሲንꬃን ዎሲዳ ዎሳኔ ሾቤꬃ ታኒ ሲያዲስ፤ ኔኒ ኬጺዳ ጾሳ ኬꬃይ ሜርናስ ታ ሱንꬃይ ኢዛን ጼይጌታና ማላ ኦꬃዳ ታኒ ጌሻዲስ፤ ታ ኣይፌይኔ ታ ዎዚናይ ኡባ ዎዴ ሃ ኬꬃን ዳና።
4 «ኔኒ ጊዲኮ ኔ ኣዋ ዳዊቲ ሲሜሬቲዳ ማላ ቦሬይ ባይንዳ ሱሬቴꬃን ታ ሲንꬃን ሲሜሬቲኮ፥ ታ ኣዛዞ ኡባ ኦꬂኮኔ ታ ዎጋኔ ታ ማራ ኔ ናጊኮ፥ 5 ታኒ ኔ ኣዋ ዳዊቴስ፥ ‹ኢስራኤሌ ካዎቴꬃ ኣራታን ኡቲዛ ኣስ ኔኒ ሙሌካ ꬋያካ› ጊዳ ማላ ኔ ካዎቴꬃ ኣራታ ኢስራኤሌ ቦላ ሜርናስ ሚንꬃ ኤሳና። 1ካዎ 2፡4
6 «ጊዶ ኣቲን ኔኒ ዎይኮ ኔ ናይቲ ታና ካሎ ኣጊዲ ጉዬ ሲሚኮ፥ ታኒ ኢንቴና ኣዛዚዳ ታ ኣዛዞኔ ታ ዎጋ ናጎንታ ኣጊኮ፥ ሃራ ጾሳታስ ኦꬃናሲኔ ጎይናናስ ቢኮ፥ 7 ኢስራኤሌ ዴራ ካሴ ታኒ ኢሚዳ ቢታፌ ꬎቃላና፤ ታኒ ታ ሱንꬃስ ዱማሲዳ ሃ ጾሳ ኬꬃካ ኣጋጋና፤ ሄሳፌ ጉዬ ኢስራኤሌ ኣሳይ ካዎቴꬃታ ኡባ ጊዶን ቂꬌሲኔ ሚቻስ ኣታና። 8 ሃይሲ ሃ ጾሳ ኬꬃይ ማላሊሲዛዝ ጊዲኮካ ላሌቲዲ ዶሬ ጊዳና፤ ቢዛይ ዪዛይ ዉሪ ሚጪሼ፥ ‹ሃኖ ፖራ! ጎዳይ ሃ ቢታኔ ሃይሳ ጾሳ ኬꬃ ኣይስ ሃይሳꬆ ኦꬂዴ?› ጊ ቂꬋና።2ካዎ 25፡9፤ 2ታሪ 36፡19 9 ኣሳይ፥ ‹ኢስታ ኣዋታ ጊብጼፔ ኬሲዳ ጎዳ ባንታ ጾሳ ኣጊዲ ኢስቲ ሃራ ጾሳታ ካሊዳ ጊሻሲኔ ኢስታስ ጎይኒዳ ጊሻስ ጎዳይ ኢስታ ቦላ ሃ ኢታ ሚሽ ኡባ ኤሂዴስ› ጊዲ ዛራና» ጊዴስ።
ሶሎሞኔይ ኦꬂዳ ሃራ ኦሶታ
(2ታሪ 8፡1-18)
10 ሶሎሞኔይ ጾሳ ኬꬃኔ ካዎ ኬꬃ ኬጺ ጊጊዳ ናምኡ ታማንꬃ ላይꬃ ዉርሴꬃን፥ 11 ጺሮሴ ካዎ ኪራሜይ ኢዛስ ኮሺዛ ጺዳ፥ ዚጋኔ ዎርቃ ኡባ ኢሚዳ ጊሻስ ጋሊላን ዲዛ ናምኡ ታሙ ካታማታ ሶሎሞኔይ ኢዛስ ኢሚዴስ። 12 ጊዶ ኣቲን ኪራሜይ ጺሮሴ ካታማፔ ኬዚዲ ሶሎሞኔይ ኢዛስ ኢሚዳ ካታማታ ቤኣናስ ቢዳ ዎዴ ኢዚ ካታማታን ኡፋዬቲቤና። 13 ሂስቲን ኪራሜይ ሶሎሞኔ፥ «ታ ኢሻዉ! ሃይቲ ኔኒ ታስ ኢሚዳይቲ ኣይ ካታማ?» ጊዴስ። ሄሳ ጊሻስ ኢዚ ሄ ካታማታ ካቡሌ ጊ ጼይጊዴስ፤ ሄ ሄራይ ሃች ጋካናስካ ሄ ሱንꬃን ጼይጌቴስ። *ካቡሌ ጉሲ ኢብራዌታ ቃላራ ፓꬆንታዛ ዎይኮ ጎኦንታዛ ጉሳ 14 ኪራሜይ 4,000 ኪሎ ጊራሜ ዎርቃ ካዎ ሶሎሞኔስ ዬዲዴስ።
15 ጎዳ ጾሳ ኬꬃ፥ ባ ኬꬃ፥ ኬላ፥ ዬሩሳላሜ ካታማ ጊምቤ፥ ሃጾሬ፥ ማጊዶኔ ጌዜሬ ካታማታ ጊምባናስ ካዎ ሶሎሞኔስ ጋባራቲ ዴቴስ። 16 ጊብጼ ካዎ ፓሮኔይ ካሴ ጌዜሬ ካታማ ቦላ ዳፋ ጋꬂዲ ኦሊ ኦይኪዴስ፤ ሂስቲዲ ካታማ ታማን ጹጊዴስ፤ ኢዚን ዲዛ ካናኔ ኣሳ ዎꬊዲ ሶሎሞኔ ጌሊዳ ባ ናይስ ዎይቶ ኢሚዴስ፤ 17 ሶሎሞኔይካ ጌዜሬ ካታማ ዛሪ ኬጺዴስ።
ሄሳꬆካ ቃሴ ሶሎሞኔይ ጋርሳ ቤቲ-ሆሮኔ፥ 18 ባኣላቴ፥ ዩሁዳ ባዞን ዴኢዛ ታጺሞሬ ካታማ ኤሲዴስ፤ 19 ሺንቄ ሚንጂ ዎꬂዛ ካታማታ ኡባ፥ ባ ፓራታኔ ፓራ-ጋሬታ ዎꬂዛ ካታማታኔ ዬሩሳላሜን፥ ሊባኖሴኒኔ ባ ሃሪዛ ቢታ ኡባን ኬጻናስ ኣሞቲዳ ኡባ ኬጺዴስ።
20 ኣሞሬታፔ፥ ሂቴታፔ፥ ፓሪዜታፔ፥ ሂዌታፔኔ ያቡሴታፔ ኣቲዳ ኣሳቲ ኡባይ ኢስራኤሌ ኣስ ጊዴቴና። 21 ኢስታ ኢስራኤሌ ኣሳቲ ቢታፌ ዉርሲ ꬋይሳናስ ዳንዳዮንታ ኣጊን ሄ ቢታን ኣቲዳ ኣሳታ ዜሬꬃታ፤ ሶሎሞኔይ ኢስታ ሻኪ ኣይሌሲዲ ጋባራቴꬃን ኦሲሲዴስ፤ ኢስቲ ሃች ጋካናስካ ኣይሌቴꬃን ኦꬄቴስ። 22 ጊዶ ኣቲን ሶሎሞኔይ ኢስራኤሌ ኣሳፔ ኦናካ ኣይሌቴꬃን ኦሲሲቤና፤ ኢስቲ ኢዛስ ኦሳንቻታ፥ ኦላንቻታ፥ ኦላንቻታ ሃላቃታኔ ጋዳዋታ፥ ፓራ-ጋሬታ ላጊዛይታ ሃላቃታኔ ፓራ ኣሳታ ጊዲዲ ኦꬂዳ። 23 ሄይቲካ ሶሎሞኔይ ኬጺሲዛ ኬꬃ ካሌቲ ኬጺሲዛይታ፤ ኢስታስካ ቆዳይ ኢቻሽ ጼታኔ ኢቻሽ ታማ።
24 ጊብጼ ካዎ ናያ ዳዊቴ ካታማፔ ሶሎሞኔይ ኢዚስ ኬጺሲዳ ኬꬃ ፑዴ ቢዳፔ ጉዬ ሶሎሞኔይ ኢዚስ ኬላ ኬሊዴስ።
25 ሶሎሞኔይ ጎዳስ ኦሲሲዳ ያርሾሶዛ ቦላ ጹጌቲዛ ያርሾኔ ኢሲፌቴꬃ ያርሾ ላይꬃን ሄꬑቶ ያርሼስ፤ ጎዳ ሲንꬃን ኤጻኔካ ጩዋሴስ፤ ሂስቲዲ ጾሳ ኬꬃ ኦሶ ፖሊዴስ። ኬሳ 23፡17፤ 34፡23፤ ዛሬ 16፡16
26 ሄሳፌ ጉዬ ካዎ ሶሎሞኔይ ኤዶሜ ቢታን ዞኦ ኣባ ዶናን ኤላቴ ጌቴቲዛ ካታማ ማታን ዲዛ ኤጺዮን-ጋቢሬን ማርካቤታ ሜꬊዴስ። 27 ካዎ ኪራሜይ ሶሎሞኔ ኣሳታራ ኦꬃና ማላ ማርካቤ ላጎን ሎሂዳ ባ ኣሳታ ኪቲዴስ። 28 ሂስቲን ኢስቲ ኦፊሬ ቢታ ቢዲ 14,000 ኪሎ ጊራሜፔ ዳሪዛ ዎርቃ ካዎ ሶሎሞኔስ ኤኪ ዪዳ።