1 ሳኦሊ ፊሊስጼሜታ ኦሊ ሲሚዳፔ ጉዬ፥ «ቤኣ ዳዊቲ ኤን-ጋዴ ባዞን ዴስ» ጊዲ ኢዛስ ዮቲዳ። 2 ሄሳ ጊሻስ ሳኦሊ ኩሜꬃ ኢስራኤሌፔ ዶሬቲዳ 3,000 ኣስ ኤኪዲ ዳዊቴኔ ኢዛራ ዲዛ ኣሳታ ኮያናስ፥ «ዎራ ዴይሻታ ዛላ» ጌቴቲዛሶ ማታ ቢዴስ።

3 ሳኦሊ ኦጌ ዶናን ዶርሳቲ ኣቂዛሶ ጋኪዳ ዎዴ ሄን ጎንጎሎ ዴሚዲ ሼሽ ኡታና ጌሊዴስ፤ ዳዊቲኔ ኢዛ ካሊዛይቲ ጎንጎሎዛስ ጊዶን ቆቴቲ ኡቲዳ። ማዛ 57፤ 142 4 ዳዊቴ ካሊዛይቲ ዳዊቴስ፥ «ጎዳይ፥ ‹ኔ ዶሲዳይሳ ኦꬃና ማላ ኔ ሞርኬዛ ታ ኔ ኩሼን ኣꬃ ኢማና› ጊዲ ካሴ ኔስ ዮቲዳ ጋላሳያ ሃቻ» ጊዳ። ዳዊቲ ቲራን ጎሼቲ ቢዲ ሳኦሌ ማይኦ ጼራፔ ኦኒካ ኤሮንታ ቃንጺ ኤኪዴስ።

5 ጊዶ ኣቲን ዳዊቲ ሳኦሌ ማይኦ ጼራ ቃንጺዳይሳን ኢዛ ዎዚናይ ኬሂ ጬጪዴስ። 6 ኣሳታስካ፥ «ጎዳይ ቲይዳ ታ ጎዳ ቦላ ሄሳ ማላ ኦሶ ኦꬃናፔኔ ኢዚ ቲይዳይሳ ቦላ ታ ኩሼ ዴንꬃናፔ ጎዳይ ታና ናጎ» ጊዴስ። 1ሳሜ 26፡11 7 ዳዊቲ ኣሳ ሃ ቃላን ሴሪዴስ፤ ሳኦሌ ቦላካ ኢስቲ ሜቶ ጋꬃናይሳ ኮዪቤና፤ ሳኦሊካ ጎንጎሎዛ ጊዶፌ ኬዚ ቢዴስ።

8 ሄሳፌ ጉዬ ዳዊቲ ጎንጎሎዛ ጊዶፌ ኬዚዲ ሳኦሌ፥ «ታ ጎዳ ካዎ!» ጊ ጼይጊዴስ፤ ሳኦሊካ ጉዬ ሲሚ ጼሊሺን ዳዊቲ ባ ኩሼ ዴንꬂዲ ዚጊሺን ቤኢዴስ፤ 9 ዳዊቲ ሳኦሌስ፥ «ኣሳይ፥ ‹ቤያ ዳዊቲ ኔ ቦላ ኢታ ኦꬃና ኮዬስ› ጊሺን ኔ ኣይስ ኢስታ ሲያይ? 10 ሃች ጎንጎሎ ጊዶን ኔና ታ ኩሼን ዎስቲ ኣꬂ ኢሚዳኮ ሄኮ ኔኒ ኔ ኣይፌራ ቤኣዳሳ፤ ኢሲ ኢሲ ኣሳቲ ታ ኔና ዎꬋና ማላ ዴንꬄꬂዳ፤ ጊዶ ኣቲን ታኒ፥ ‹ጎዳይ ቲይዳ ታ ጎዳ ቦላ ታ ኩሼ ዎꬂኬ› ጋዳ ታ ኔስ ቃꬌታዲስ። 11 ታ ኣዋዉ ኔ ማይኦዛ ጼራፔ ቃንጼቲዳይሳ ሃይሳ ታ ኩሼን ቤኣ! ኔስ ማይኦ ጼራፔ ቃንጻ ኤካዲስ ኣቲን ኔና ዎꬋቤኬ። ሃኢካ ታኒ ኢታቴꬅ ዎይኮ ማካላቴꬅ ኦꬆንታይሳ ኔ ኤራ፤ ሄሳ ኔ ዎዚናን ዎꬃ፤ ታ ኔ ቦላ ኢታ ኦꬃቤኬ፤ ኔኒ ጊዲኮ ታ ሼምፖ ꬋይሳናስ ጎዳሳ።

12 «ጎዳይ ኔ ጊዶኒኔ ታ ጊዶን ፒርዶ። ኔኒ ኢታ ኦꬂዳ ጊሻስ ጎዳይ ኔ ቦላ ሃሎ ኬሶ ኣቲን ታ ኔ ቦላ ኩሼ ዎꬂኬ። 13 ካሴ ዎዴ ቶሴን፥ ‹ኢታ ኦꬂዛይታፔ ኢታይ ኬዜስ› ጌቴቲዛ ማላ ሃኢ ታ ኩሼይ ኔና ቦቼና።

14 «ኢስራኤሌ ካዎይ ኦና ቦላ ኬኢዴ? ኔኒ ኦና ጎዳይ? ሃይቂዳ ካና ዎይኮ ካስቶሌ ጎዳይ?1ሳሜ 26፡20 15 ሃኢካ ኑ ጊዶን ጎዳይ ዳና ጊዲ ፒርዶ። ታ ዮኦዛ ጼሊዲ ታ ጊሻስ ኢዚ ሞቴቶ። ታናካ ኔ ኩሼፔ ኬሲ ኤኪዲ ታ ቱማቴꬃ ኢዚ ቆንጪሶ» ጊዴስ።

16 ዳዊቲ ሄሳ ሃሳይዲ ዉርሲዳ ማላ ሳኦሊ፥ «ታ ና ዳዊቴ! ኣዳፌ ሃይሲ ኔ ቃላ?» ጊዲ ዬኪሼ ኦይቺዴስ። 17 ካሌꬂዲ ሳኦሊ ዳዊቴስ፥ «ታ ኔ ቦላ ኢታ ኦꬂሺን ኔ ታስ ሎኦ ኦꬂዳ ጊሻስ ኔ ታፔ ጺሎ። 18 ኔ ታስ ኦꬂዳ ሎኦ ሚሺ ሄኮ ታስ ዮታዳሳ፤ ጎዳይ ታና ኔ ኩሼን ኣꬂ ኢሚዴስ ሺን ኔ ታና ዎꬋቤካ። 19 ባ ሞርኬ ዴሚዲ ኢዛ ቦላ ቆሆ ጋꬆንታ ዲሼ ዬዲዛይ ኦኔ? ኔኒ ሃች ታስ ኦꬂዳ ኪያቴꬃ ኩሼ ጎዳይ ኔስ ዛሮ። 20 ቤያ ቱማፔ ኔኒ ካዎታናይሳኔ ኢስራኤሌ ካዎቴꬂ ኔ ኩሼን ሚናናይሳ ታ ኤራይስ። 21 ኔኒ ታ ዜሬꬃታ ꬋይሶንታ ማላኔ ታ ሱንꬅ ታ ኣዋ ኬꬃፌ ꬋይሶንታ ማላ ጎዳ ሱንꬃን ጫቃ» ጊዴስ።

22 ዳዊቲካ ሳኦሌስ ጫቂዴስ። ሄሳፌ ጉዬ ሳኦሊ ባ ሶ ሲሚ ቢዴስ፤ ዳዊቲኔ ኢዛ ካሊዛይቲ ካሴ ባ ቆቴቲዛ ሚጻን ሲሚ ኬኢዳ።