1 ታ ኢሻቶ! ሄሲ ሃናና ዎዴዛ ጊሻስ ኑ ኢንቴስ ጻፋናስ ኮሼና። 2 ካይሶይ ቃማን ዪዛ ማላ ጎዳ ጋላሲካ ሄሳ ማላ ያናይሳ ኢንቴ ኢንቴ ባጋራ ሎኤꬂ ኤሬታ። ማቶ 24፡43፤ ሉቃ 12፡39፤ 2ጴጽ 3፡10 3 ኣሳይ፥ «ጋዴይ ሳሮኔ ሎኦኮ» ጊሺን ሚጻይ ቃንꬃራ ዲዛ ማጫስ ኦይኪዛ ማላ ሄሳꬆካ ኣስ ꬋይሲዛይ ቆፖንታ ዲሺን ኣሳ ቦላ ጋካና፤ ኦኒካ ኬሲ ኤኬና።

4 ኢንቴኖ ኢሻቶ! ሄ ጋላሳይ ካይሶ ማላ ኢንቴና ዳጋንꬃናስ ኢንቴ ꬉማን ዴኬታ። 5 ኢንቴ ዉሪካ ፖኦ ናይታ፤ ኑኒ ꬉማ ዎይኮ ቃማ ባጋታ ጊዶኮ። 6 ሂስቲኮ ኣኔ ቤጎስ፤ ኣኔ ኑርካ ኑና ሃሮስ ኣቲን ሃንኮ ꬊስኪዛ ኣሳ ማላ ኑኒካ ኣኔ ꬊስኮኮ። 7 ꬊስኪዛይቲ ቃማራ ꬊስኬቴስ፤ ማꬆቲዛይቲካ ቃማራ ማꬆቴቴስ። 8 ኑኒ ጊዲኮ ጋላሳ ኣሳታ ጊዲዳ ጊሻስ ኣማኖኔ ሲቆ፥ ቲራን ማይኢዛ ጹሩሬ ማይኦ ማላ ማይኢዲ ኣቶቴꬃ ሂዶታ ሁኤን ዎꬂዛ ቢራታ ቆቤ ማላ ሁኤን ዎꬂዲ ኣኔ ኑናቴꬃ ሃሪዲ ዴኦስ። ኢሳ 59፡17፤ ኤፌ 6፡13-17 9 ጾሲ ኑ ጎዳ ዬሱስ ኪርስቶሳ ባጋራ ኣቶቴꬅ ዴማና ማላ ኣቲን ኑና ሃንቆስ ጼይጊቤና። 10 ኑ ሃይቂኮካ ዎይኮ ፓጻ ዲኮካ ኢዛራ ዳና ማላ ኢዚ ኑ ጊሻስ ሃይቂዴስ። 11 ሄሳ ጊሻስ ቱማፔ ኢንቴ ሃኢ ኦꬂዛይሳ ማላካ ኢሶይ ኢሳራ ሚኔቲቴኔ ሚንꬄꬂቴ።

12 ሂስቲኮ ታ ኢሻቶ! ኢንቴ ጊዶን ሚኒ ኦꬂዛይታ ጎዳን ኢንቴፌ ቦላራ ዲዛ ሃላቃታኔ ኢንቴና ዞሪዛይታ ኢንቴ ቦንቻና ማላ ኑ ኢንቴና ዎሶስ። 13 ኢስታ ኦሶ ጊሻሲካ ኢስታ ሲቆራ ሎኤꬂ ቦንቺቴ፤ ኢንቴ ኢንቴ ጊዶን ሳሮን ዲቴ።

14 ታ ኢሻቶ! ኑ ኢንቴና፥ «ኦሶ ኦꬆንታ ኣሳታ ሃንቄቲቴ፤ ባቢዛይታ ሚንꬂቴ፤ ዳቡራንቻታ ማዲቴ፤ ኣስ ኡባ ዳንዳይቴ» ጊ ዞሮስ። 15 ኦናስካ ኢታ ጊሻስ ኢታ ዛሮንታ ማላ ናጌቲቴ፤ ጊዶ ኣቲን ኢንቴ ኢንቴ ጊዶን ጊዲን ሃራ ኣሳራ ጊዲን ኡባ ዎዴ ሎኦ ጊዲዛይሳ ኦꬃናስ ባጼቲቴ።

16 ኡባ ዎዴ ኡፋዬቲቴ። 17 ቃንጾንታ ዎሲቴ። 18 ኣይ ሃኖንካ ጋላቲቴ፤ ጾሳ ሼኔይ ኢንቴስ ዬሱስ ኪርስቶሳ ባጋራ ሄሳ።

19 ጺሎ ኣያና ታማ ቶይሶፍቴ። 20 ቲንቢቴ ቃላ ካꬎፒቴ። 21 ዉርሲካ ፓጪ ጼሊቴ፤ ሎኦ ጊዲዳዝ ኦይኪቴ። 22 ኢታ ጊዲዳ ኣይ ሚሻፌካ ሃኪቴ።

23 ሳሮቴꬃ ጎዳይ ኢዚ ኡባ ሚሻን ኢንቴና ዱማሶ፤ ኢንቴ ኣያናይ፥ ኢንቴ ሼምፖይኔ ኢንቴ ኣሾይ ጎዳ ዬሱስ ኪርስቶሲ ዪዛ ዎዴ ዎሶይ ባይንዳ ናጌቶ። 24 ኢንቴና ጼይጊዳይሲ ኣማኔቲዳዴ ጊዲዳ ጊሻስ ኢዚ ሄሳ ኦꬃና።

25 ኑ ኢሻቶ! ኑ ጊሻሲካ ዎሲቴ። 26 ኣማኒዛይታ ኡባ ጌሻ ዬሬቴꬃን ሳሮኪቴ። 27 ሃ ኪታይ ኣማኒዛይታስ ኡባስ ናባቤታና ማላ ጎዳ ሱንꬃን ሃዳራ ጋይስ።

28 ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ።