3
ሶሎሞኔይ ኬጺዳ ጾሳ ኬꬅ
1 ሶሎሞኔ ኣዋ ዳዊቲ ጎዳ ጾሳ ኬꬅ ኬጼታና ሶሆ ሞሪያ ዙማ ቦላ ዬሩሳላሜን ጊግሲ ዎꬂዴስ። ሄ ሶሆይ ጎዳይ ዳዊቴስ ቆንጪዳ፥ ያቡሴ ኣስ ኦርናይ ካꬅ ቡኪዛ ባሌ። ሜꬌ 22፡2 2 ሶሎሞኔይ ባ ካዎቲዳ ኦይዳንꬆ ላይꬃን፥ ናምኣንꬆ ኣጊናን ናምኣንꬆ ጋላስ ጾሳ ኬꬃ ኬጻናስ ዶሚዴስ።
3 ሶሎሞኔይ ጾሳ ኬꬃ ኬጻናስ ዬጊዳ ዮቻይ ቤኒ ዎዴ ዋꬋን ኣዱሳቴꬃይ 60 ዋꬋ፤ ጎምፓይ 20 ዋꬋ። 4 ጾሳ ኬꬃ ጌሊዛሶን ዴኢዛ ዳራንቻ ጎምፓይ ኬꬃ ኬና 20 ዋꬋ፤ ጌሳይ 20 ዋꬋ። ኢዛስ ሶ ባጋራ ሙሩታ ዎርቃን ሜሺዴስ። 5 ጾሳ ኬꬃስ ዋና ኪፊሌዛ ጺዳ ጻላ ሊጪዲ ካሚዴስ፤ ሂስቲዲ ሙሩታ ዎርቃን ሜሺዴስ፤ ዛምባ ሚሳቲዛ ሚስሌኒኔ ሳንሳላታ ሚሳቲዛ ሚስሌን ኣሌቂሲዴስ። 6 ጾሳ ኬꬃካ ኣልኦ ሹቻን ኣሌቂሲዴስ፤ ኢዚ ኣሌቂሲዳ ዎርቃይ ፓሪዋይሜ ቢታፌ ዪዳ ዎርቃ። 7 ጎዳታ፥ ታጎታታ፥ ቆሲላꬃታኔ ፔንጌታ ዎርቃን ሜሺዴስ፤ ቃሴ ጎዳታ ቦላ ኪሩቤታ ሚስሌ ኦꬂዴስ።
8 ሶሎሞኔይ ኡባፌ ዱማቲዛ ጊዶ ቆልኣ ኬጺዴስ፤ ሄ ሶሆዛስ ኣዱሳቴꬃይ 20 ዋꬋ፤ ጎምፓይ 20 ዋꬋ። ሄ ሶሆዛ ጎዳ 20,000 ኪሎ ጊራሜ ሙሩታ ዎርቃን ሜሺዴስ። ኬሳ 26፡33-34 9 ኢስቲ ጎኤቲዳ ሚሲማሬይ 570 ጊራሜ ዎርቃፌ ኦሴቲዴስ። ፖቄዛን ዴኢዛ ኪፊሌታካ ዎርቃን ሜሺዴስ። 10 ሶሎሞኔይ ኡባፌ ዱማቲዛ ጊዶ ቆልኣን ናምኡ ኪሩቤታ ሚስሌ ጊግሲዲ ዎርቃን ሜሺዴስ። 11 ሄ ኪሩቤታ ቄፌይ ሚጬቲዲ 20 ዋꬋ፥ ኮይሮ ኪሩቤዛስ ኮይሮ ቄፌይ ኢቻሹ ዋꬋ ጊዲዲ ጾሳ ኬꬃስ ጎዳ ቦቼስ፤ ናምኣንꬆ ቄፌዚካ ኢቻሹ ዋꬋ ጊዲዲ ሃንኮ ኪሩቤዛ ቄፌ ቦቼስ። 12 ናምኣንꬆ ኪሩቤዛስ ኮይሮ ቄፌይ ኢቻሹ ዋꬋ ጊዲዲ፥ ጾሳ ኬꬃስ ጎዳ ቦቼስ፤ ናምኣንꬆ ቄፌይካ ኢቻሹ ዋꬋ ጊዲዲ ኮይሮ ኪሩቤዛ ቄፌ ቦቼስ። 13 ሃ ናምኡ ኪሩቤታ ቄፌይ ሚጬቲዲ 20 ዋꬋ ጊዲዴስ፤ ኢስቲ ባንታ ሲንꬃ ዋና ኪፊሌዛኮ ዛሪዲ ባንታ ቶሆን ኤቂዳ። ኬሳ 25፡18-20
14 ሶሎሞኔይ ሳሎ ሚሳቲዛ ማይኦፌ፥ ኦቻ ቴራ ሚሳቲዛ ማይኦፌ፥ ዞኦ ማይኦፌኔ ሌኤ ላይኖፔ ማጋላሻ ኦꬂዲ ኢዛ ቦላ ኪሩቤታ ሚስሌ ሜꬊዴስ።ኬሳ 26፡31
ጻርቂማላፔ ኦሴቲዳ ናምኡ ቱሳታ
(1ካዎ 7፡15-22)
15 ሶሎሞኔይ ጾሳ ኬꬃስ ሲንꬃን ኢሳ ኢሳ ጌሳይ 35 ዋꬋ ኣዱቂዛ ናምኡ ቱሳታ ሜꬊሲዲ ኢስታ ሁኤን 5 ዋꬋ ቁስቴ ዎꬂዴስ። 16 ቃሴ ሳንሳላታ ጊቴ ማላ ሜꬊሲዲ ቱሳታ ጼራ ኦይሴꬂዴስ፤ ሂስቲዲ 100 ኦሮማኔ ቴራ ሚስሌታ ሜꬊሲዲ ሳንሳላታ ቦላ ኦይሴꬂዴስ። 17 ቱሳታፔ ኢሳ ጾሳ ኬꬃስ ሲንꬃን ፑዴሃ ባጋራ፥ ናምኣንꬆዛ ዱጌሃ ባጋራ ኤሲዴስ፤ ዱጌሃ ባጋራ ዴኢዛ ቱሳ፥ «ያኪኔ»*ያኪኔ ጉሲ ኤሴስ ጉሳ። ጊ ሱንꬂዴስ፤ ፑዴሃ ባጋራ ዴኢዛ ቱሳ፥ «ቦኤዜ»†ቦኤዜ ጉሲ ዎልቃይ ኢዛን ዴስ ጉሳ። ጊ ሱንꬂዴስ።