1 ሶሎሞኔይ ጎዳስ ጾሳ ኬꬃ ኦሶ ኡባ ፖሊዳፔ ጉዬ ኢዛ ኣዋ ዳዊቲ ጎዳስ ዱማሲ ዎꬂዳ ቢራ፥ ዎርቃኔ ሃራ ሚሻታ ኡባ ኤሂዲ፥ ጾሳ ኬꬃን ቡቁራ ሚሽ ዎꬂዛ ሚንጃ ኬꬃን ዎꬂዴስ።2ሳሜ 8፡11

2 ሄሳፌ ጉዬ ካዎ ሶሎሞኔይ ጎዳ ጾሳ ታቦታ ዳዊቴ ካታማን ጺዮኔፔ ኤሃና ማላ ኢስራኤሌ ጪማታ፥ ኮራፒኔታኔ ኬꬃ ኣሳ ዬሩሳላሜ ካታማ ሺሺዴስ። 2ሳሜ 6፡12-15፤ 1ታሪ 15፡25-28 3 ኢስራኤሌ ኣሳይ ኡባይ ላፑንꬃ ኣጊናን፥ ዳሴ ባኣሌይ ቦንቼቲዛ ዎዴ ካዎዛኮ ሺቂዴስ።

4 ኢስራኤሌ ጪማቲ ኡባይ ሺቂን ሌዌቲ ታቦታ ዴንꬂዳ። 5 ቄሴቴꬃን ኦꬂዛ ሌዌቲ ታቦታ፥ ጾሳ ዱንካኔኔ ዱንካኔዛ ጊዶን ዴኢዛ ጌሻ ሚሻታ ኡባ ቶኪዲ ኬኢዳ። 6 ካዎ ሶሎሞኔይኔ ኢዛራ ኢሲፌ ዴኢዛ ኢስራኤሌ ዱላታይ ኩሜꬅ ታቦታ ሲንꬃን ሺቂዲ ቆዳናስ ዳንዳዬቶንታ ጮራ ዶርሳታኔ ቦራታ ያርሺዳ።

7 ሄሳፌ ጉዬ ቄሴቲ ጎዳ ታቦታ ጾሳ ኬꬃን ኡባፌ ዱማቲዛ ጊዶ ቆልኣን ኤሂዲ ኪሩቤታ ሚስሌታ ቄፌታፔ ጋርሳን ዎꬂዳ። 8 ሚጬቲ ኡቲዳ ኪሩቤታ ቄፌቲ ታቦታኔ ታቦታ ቶኪዛ ካሶታ ካሚዳ። 9 ካሶቲካ ኬሂፔ ኣዱሳ ጊዲዳ ጊሻስ ኢስታ ጼራይ ኡባፌ ዱማቲዛ ጊዶ ቆልኣስ ሲንꬃ ባጋራ ቤቴቴስ፤ ጊዶ ኣቲን ጾሳ ኬꬃፌ ካሬራ ቤቴቴና። ኢስቲ ሃች ጋካናስ ሄን ዴቴስ። 10 ኢስራኤሌ ኣሳይ ጊብጼ ቢታፌ ኬዚዳ ዎዴ ጎዳይ ኢስታራ ጫቄቲዳ ኮሬቤ ዙማን ሙሴይ ዎꬂዳ ናምኡ ሎቻ ሹቻታፔ ኣቲን ታቦታ ጊዶን ሃራይ ኣይኮይካ ዴና። ዛሬ 10፡5

11 ቄሴቲ ጾሳ ኬꬃፌ ኬዚዳ፤ ሄን ዴኢዛ ቄሴቲ ኡባይ ባንቲ ኦꬂዛ ማራን ማራን ጊዶንታ ኣጊኮካ ኡባይካ ባንታና ጎዳስ ዱማሲዳ። 12 ዬꬃ ዬጺዛ ሌዌቲ ኡባይ፥ ኣሳፌይ፥ ሄማኔይ፥ ኤዶታኔይ፥ ኢስታ ናይቲኔ ኢስታ ዳቦቲ ኡባይ ሎኦ ላይኖ ማይኢዲ ዳላታ፥ ዲꬃታኔ ማሲንቆታ ኦይኪዲ ያርሾ ያርሺዛሶዛፔ ኣርሼይ ሞኪዛ ባጋራ ኤቂዳ፤ 120 ቄሴቲ ጹሩምባታ ፑናናስ ኢስታ ኣጃቢ ኤቂዳ። 13 ኢስቲ ኡባይ ጹሩምባ ፑኒሼ ዳላታ ቃꬂሼ፥ ዲꬃታ ዲጺሼኔ ሃራ ካኢዛ ሚሻታን ካኢሼ፥

ሄ ዎዴ ጾሳ ኬꬃ ሻራይ ኩሚዴስ። 1ታሪ 16፡34፤ 2ታሪ 7፡3፤ ኢዝ 3፡11፤ ማዛ 100፡5፤ 106፡1፤ 107፡1፤ 118፡1፤ ኤር 33፡11 14 ጎዳ ቦንቾ ሻራይ ጾሳ ኬꬅ ኩሚ ኡቲዳ ጊሻስ ቄሴቲ ባንታ ኦሶ ኦꬃናስ ዳንዳይቤቴና። ኬሳ 40፡34-35