1 ሶሎሞኔይ ዎሳ ፖሊዳ ማላ ሳሎፔ ታማይ ዎꬊዲ ጹጌቲዛ ያርሾዛኔ ሃራ ያርሾዛ ሚዴስ። ሂስቲን ጎዳ ቦንቾይ ጾሳ ኬꬃ ኩሚዴስ። ሌዌ 9፡23-24 2 ጎዳ ቦንቾይ ጾሳ ኬꬃ ኩሚዳ ጊሻስ ቄሴቲ ጾሳ ኬꬅ ጌላናስ ዳንዳይቤቴና። 3 ኢስራኤሌ ኣሳይ ኡባይ ታማይ ሳሎፔ ዎꬊሺኒኔ ጎዳ ቦንቾይ ጾሳ ኬꬃ ኩሚሺን ቤኢዲ ቢታን ጉፋኒዲ ጎይኒሼ፥

4 ሄሳፌ ጉዬ ካዎዚኔ ኡባ ኣሳይ ጎዳ ጾሳ ሲንꬃን ያርሾ ያርሺዴስ። 5 ካዎ ሶሎሞኔይ 22,000 ኮርማታኔ 120,000 ዶርሳታ ያርሺዴስ፤ ሂስቲዲ ካዎዚኔ ኡባ ኣሳይ ጾሳ ኬꬃ ኣንጂዴስ። 6 ቄሴቲካ ባንታስ ጊጊዳሶሆን ኤቂን ሌዌቲ ቃሴ ካዎ ዳዊቲ ጎዳ ሳባናስ ካሴ ኦꬂዳ ዬꬃ ዬጺዛ ሚሻ ኦይኪ ኢስታ ሲንꬃን ኤቂዲ፥ «ኢዛ ማሮቴꬂ ሜርናሳ» ጊ ዬጺሼ ጎዳ ጋላቲዳ፤ ቄሴቲ ሌዌታ ሲንꬃን ኤቂዲ ጹሩምባ ፑኒሺን ኢስራኤሌ ኣሳይ ኡባይ ኤቂዴስ።

7 ሶሎሞኔይ ጻርቂማላፔ ኦꬂዳ ያርሾ ያርሺዛሶዚ ጹጌቲዛ ያርሾ፥ ካꬃ ያርሾ፥ ሜሄ ሃንዳ ያርሾ ኦይካና ዳንዳዮንታ ጊሻስ ጾሳ ኬꬃ ሲንꬃን ዲዛ ዛጎዛ ጎዳስ ዱማሲዴስ፤ ሄ ሶሆዛን ጹጌቲዛ ያርሾ፥ ኢሲፌቴꬃ ያርሾኔ ሜሄ ሃንዳ ያርሺዴስ።

8 ሄ ዎዴ ሶሎሞኔይኔ ኢስራኤሌ ኣሳይ ኡባይ ላፑን ጋላስ ጋካናስ ባኣሌዛ ቦንቺዳ፤ ኢስራኤሌ ዛዋን ዲዛ ሃማቴ ፒኒዛሶፔ ቢዲ ጊብጼ ሻፋ ጋካናስ ዲዛ ጮራ ኣሳይ ሄን ሺቂዴስ። 9 ኣሳይ ያርሾ ያርሺዛሶዛ ላፑን ጋላስ ዱማሲዲኔ ቃሴ ላፑን ጋላስ ኣንጂሶ ባኣሌ ቦንቺዳፔ ጉዬ ኦስፑንꬃ ጋላስ ዉርሴꬃን ዱማ ሺቆ ሺቂዴስ። 10 ሄሳፌ ጉዬ ሶሎሞኔይ ላፑንꬃ ኣጊናን ናምኡ ታማኔ ሄꬓንꬆ ጋላስ ኣሳ ሞይዚዴስ፤ ጎዳይ ዳዊቴስ፥ ሶሎሞኔሲኔ ባ ኣሳ ኢስራኤሌስ ኦꬂዳ ኪያቴꬃን ኣሳይ ኡፋዬቲሼኔ ዎዚናፔ ፓሽኪ ጊዲ ባ ሶ ባ ሶ ቢዴስ።

11 ሶሎሞኔይ ጾሳ ኬꬃኔ ካዎቴꬃ ኬꬃ ኬጺዲ ዉርሲዴስ፤ ሶሎሞኔይ ጎዳ ኬꬃሲኔ ባ ካዎ ኬꬃስ ባ ዎዚናን ቆፒዳይሳ ኡባ ፖሊዴስ። 12 ሄሳፌ ጉዬ ጎዳይ ሶሎሞኔስ ኦማርስ ቆንጪዲ፥ «ታኒ ኔ ዎሳ ሲያዲስ፤ ታኒ ሃ ሶሆዛ ታስ ያርሾይ ያርሼቲዛ ኬꬅ ጊዳና ማላ ዶራዲስ። 13 ታኒ ኢራይ ቡኮንታ ማላ ሳሎ ጎርዲኮ ዎይኮ ሳኣ ካꬃ ማና ማላ ቦሌ ኣዛዚኮ፥ ዎይኮ ታ ኣሳ ጊዶን ኢታ ሃርጌ ታ ዬዲኮ፥ 14 ታ ሱንꬃን ጼይጌቲዳ ታ ኣሳይ ባንታናቴꬃ ካዉሺዲ ዎሲኮ፥ ኢስቲ ታና ኮዪዲ ባንታ ኢታ ኦጌፔ ሲሚኮ፥ ታኒ ሳሎን ዳዳ ኢስታ ዎሳ ሲያና፤ ሂስታዳ ኢስታ ናጋራ ኣቶ ጋና፤ ኢስታ ቢታካ ታ ፓꬃና። 15 ሃኢካ ሃ ሶሆን ዎሴቲዛ ዎሳ ታ ኣይፌይ ጼላና፤ ታ ሃይꬃቲካ ኤዝጊ ሲያና። 16 ታ ሱንꬂ ኢዛን ሜርናስ ዴኣና ማላ ሃ ኬꬃ ታ ዶራዳ ጌሻዲስ፤ ታ ኣይፌይኔ ታ ዎዚናይ ኡባ ዎዴ ሄን ዴኣና።

17 «ኔኒካ ካሴ ኔ ኣዋ ዳዊቴ ማላ ታ ሲንꬃን ሄሜቲኮ፥ ታ ኔና ኣዛዚዳ ኡባ ኔ ኦꬂኮ፥ ታ ኔስ ኢሚዳ ዎጋኔ ማራ ኔ ናጊኮ፥ 18 ታኒ ካሴ ኔ ኣዋ ዳዊቴስ፥ ‹ኢስራኤሌ ሃሪዛይ ኔ ዜሬꬃፌ ሙሌካ ꬋዬና› ጋዳ ታ ጫቂዳ ማላ ኔ ካዎቴꬃ ኣራታ ታ ሚንꬃና።1ካዎ 2፡4

19 «ጊዶ ኣቲን ኢንቴ ታና ካላናይሳ ኣጊዲ ጉዬ ሲሚኮ፥ ታኒ ኢንቴና ኣዛዚዳ ታ ኣዛዞታኔ ታ ዎጋታ ኣጊዲ ሃራ ጾሳታስ ኦꬃናሲኔ ጎይናናስ ኢንቴ ቢኮ፥ 20 ታኒ ካሴ ኢንቴስ ኢሚዳ ቢታፌ ኢንቴና ꬎቃላና፤ ታኒ ታ ሱንꬃስ ዱማሲዳ ኬꬃካ ዬጋ ኣጋና፤ ታኒ ኢዛ ካዎቴꬃታ ኡባ ጊዶን ቂꬌሲኔ ቂልጫስ ኬሳና። 21 ሃይሲ ጾሳ ኬꬃዚ ሃኢ ኬሂፔ ማላሊሲዛዝ ጊዲኮካ ኢዛ ማታራ ካንꬂ ቢዛ ኡባይ ዳጋሚዲ፥ ‹ጎዳይ ሃ ቢታዮኔ ሃ ኬꬃ ኣይስ ሃይሳ ማላ ኦꬂዴ?› ጋና። 22 ሂስቲን ኣሳይ፥ ‹ኢስታ ኣዋታ ጊብጼፔ ኬሲዳ ጎዳ ባንታ ጾሳ ኣጊዲ ኢስቲ ሃራ ጾሳታ ካሊዳ ጊሻስ፥ ኢስታስ ኦꬂዳ ጊሻሲኔ ኢስታስ ጎይኒዳ ጊሻስ ጎዳይ ኢስታ ቦላ ሃ ኢታ ሚሽ ኡባ ኤሂዴስ› ጊዲ ዛራና» ጊዴስ።