9
ሶሎሞኔ ቤያናስ ቢዳ ሳባ ካዎዮ
(1ካዎ 10፡1-13)
1 ሳባ ካዎያ ሶሎሞኔ ጎባቴꬃ ሲያዳ፥ ዴጾ ኦይሻታ ኤካዳ ኢዛ ፓጫናስ ሳዎ፥ ኬሂ ዳሮ ዎርቃኔ ኣልኦ ሹቻታ ጋሜላታን ጫናዳ ዳሮ ኣዣባራ ዬሩሳላሜ ጋካዳ ሶሎሞኔ ሲንꬅ ኣꬋዱስ። ሂስታዳ ባ ዎዚናን ዲዛይሳ ኡባ ሶሎሞኔስ ዮታዱስ። 2 ሶሎሞኔይ ኢዛ ኦይቺዳ ኡባ ኢዚስ ዮቲዴስ፤ ኢዚ ኢዚስ ቢርሾንታ ኢዛፔ ጌሚ ኣቲዳ ኣይ ሚሺካ ዴና። 3 ሳባ ካዎያ ሶሎሞኔ ኣꬎ ኤራቴꬃ፥ ኢዚ ኬጺዳ ካዎቴꬃ ኬꬃ፥ 4 ኢዛ ማዳን ሺቂዛ ቁማ፥ ኢዛ ሹሜቲ ኡቲዛ ኡቴꬃ፥ ኢዛ ኣሽካራቲ ኦꬂዛ ኦሶኔ ማይኢዛ ማይኦዛ፥ ኢዛ ኡሹ ቲጊዛይቲ ማይኢዛ ማይኦዛኔ ጎዳ ኬꬃን ኢዚ ጹጊዛ ያርሾዛ ቤኣዳ ኬሃ ማላሌታዱስ።
5 ሄሳፌ ጉዬ ኢዛ ካዎዛ፥ «ኔ ኦሶ ጊሻሲኔ ኔ ኣꬎ ኤራቴꬃ ጊሻስ ታኒ ታ ዴሬን ዳሼ ሲዪዳይሲ ቱማ። 6 ጊዶ ኣቲን ታኒ ያዳ ታ ኣይፌን ቤኣና ጋካናስ ኢስቲ ታስ ዮቲዳ ኡባ ኣማናቤኬ። ኔ ኣꬎ ኤራቴꬃፌ ባጋይካ ታስ ዮቴቲቤና፤ ቱማፔ ታኒ ሲዮይሳፌ ኔ ኣꬎ ኤራቴꬃይ ኬሂ ኣꬌስ። 7 ኡባ ዎዴ ኔ ሲንꬃን ኤቂዲ ኔ ኣꬎ ኤራቴꬃ ሲዪዛ ኔ ሹሜቲኔ ኔ ኣይሌቲ ኣይ ማላ ኣንጄቲዳ ኣሴ! 8 ኔናን ኡፋዬቲዲ ባ ካዎቴꬃ ኣራታን ኡቲሲዳ ኔ ጎዳይ ጋላቴቶ! ኔ ጾሳይ ኢስራኤሌ ኣሳ ሲቂዳ ጊሻሲኔ ሜርናስ ሚንꬂ ኤሳናስ ኮዪዳ ጊሻስ ሱሬ ፒርዳይኔ ጺሎቴꬂ ኣካና ማላ ኢስታ ቦላ ኔና ካዎꬂዴስ» ጋዱስ።
9 ሂስታዳ ካዎያ 4,000 ኪሎ ጊራሜ ጊዲዛ ዎርቃ፥ ኬሂ ዳሮ ሳዎኔ ኣልኦ ሹቻታ ካዎዛስ ኢማዱስ፤ ሳባ ካዎያ ካዎ ሶሎሞኔስ ኢሚዳ ሳዎ ሚሳቲዛ ሳዎይ ሙሌካ ዴና። ማቶ 12፡42፤ ሉቃ 11፡31
10 ሁራሜ ኣሳቲኔ ሶሎሞኔ ኣሳቲ ኦፊሬፔ ዎርቃ፥ ሳንዳሌ ሚꬂኔ ኣልኦ ሹቻታ ኤሂዳ። 11 ካዎ ሶሎሞኔይ ሄ ሳንዳሌ ሚꬃፌ ጾሳ ኬꬃኔ ካዎቴꬃ ኬꬃ ጌሊዛሶ ꬌካታኔ ዬꬃ ዬጺዛይታስ ማሲንቆኔ ዲꬅ ኦሲሲዴስ። ሃይሳ ማላ ሚሺ ካሴ ዩሁዳ ቢታን ቤቲ ኤሬና።
12 ካዎ ሶሎሞኔይ ሳባ ካዎያ ኣሞቲዳይሳኔ ኢዛ ኦይቺዳ ኡባ ኢዚስ ኢሚዴስ፤ ኢዛ ሶሎሞኔስ ኤሂዳይሳፌ ዳሮ ኢዚ ኢዚስ ኢሚዴስ። ሄሳፌ ጉዬ ሳባ ካዎያ ባ ኣዣባዛራ ዴንዳዳ ባ ዴሬ ሲማዱስ።
ሶሎሞኔ ዱሬቴꬅ
(1ካዎ 10፡14-25)
13 ሶሎሞኔይ ላይꬃን ላይꬃን ኤኪዛ ዎርቃይ 23,000 ኪሎ ጊራሜ። 14 ሄሲ ዛልኣንቻታፔ ኤኪዳ ቃራጻ፥ ኣራቢያ ቢታ ካዎታ ኡባፌኔ ኢስራኤሌ ቢታ ሃሪዛይታፔ ኤኪዳ ዎርቃኔ ቢራ ጉጂቤና።
15 ካዎ ሶሎሞኔይ 200 ዎጋ ጎንዳሌታ ቆጺሲዲ ዎርቃፌ ሜꬊሲዴስ፤ ኢሲ ኢሲ ጎንዳሌን ላፑን ኪሎ ጊራሜ ጊዲዛ ዎርቃይ ጌሊዴስ። 16 ቃሴካ ኢዚ 300 ቄሪ ጎንዳሌታ ቆጺሲዲ ዎርቃፌ ሜꬊሲዴስ፤ ኢሲ ኢሲ ቄሪ ጎንዳሌን ናምኡ ኪሎ ጊራሜ ጊዲዛ ዎርቃይ ጌሊዴስ፤ ካዎይ ሄ ጎንዳሌታ፥ «ሊባኖሴ ዎራ ኬꬅ» ጌቴቲዛ ኬꬃን ዎꬂዴስ።
17 ቃሴካ ካዎዚ ዳንጋርሳ ዛሌፔ ኢሲ ጊታ ካዎ ኣራታ ኦሲሲዲ ሙሩታ ዎርቃን ሜሺዴስ። 18 ካዎቴꬃ ኣራታይ ዴኢዛሶ ፑዴ ኬኣናስ ዬꬊዛ ኡሱፑን ꬌካቲ ዴቴስ። ቶሆን ዬꬋናስ ካዎቴꬃ ኣራታራ ጋꬂዲ ዎርቃፌ ኦሴቲዳ ኦይዴይ ዴስ። ኣራታስ ናምኡ ባጋራካ ቄሴ ዜምፒሲዛ ሶሆቲ ዴቴስ፤ ሄ ናምኡ ሶሆታ ላንቄን ያ ባጋራኔ ሃ ባጋራ ኤቂዳ ኢሲ ኢሲ ጋሞ ሚስሌይ ዴስ። 19 ሄ ኣራታ ፑዴ ኬኢዛሶ ኡሱፑን ꬌካታን ያ ባጋራኔ ሃ ባጋራ ኢሲ ኢሲ ጋሞ ሚስሌይ፥ ሙሌራ 12 ሚስሌቲ ዴቴስ። ሄሳ ማላ ካዎቴꬃ ኣራታይ ሃራ ካዎቴꬃን ኣዋንካ ኦሴቲቤና።
20 ካዎ ሶሎሞኔይ ኢስታን ኡሹ ኡዪዛ ሚሻቲ ኡባይ ዎርቃፌ ኦሴቲዳ፤ «ሊባኖሴ ዎራ» ጌቴቲዛ ኬꬃን ዴኢዛ ሚሻቲ ኡባይካ ሙሩታ ዎርቃፌ ኦሴቲዳ። ሶሎሞኔ ዎዴ ቢራይ ሙሌካ ጎኢዛ ሚሻ ማላ ቆዴቶንታ ጊሻስ ቢራፔ ኦሴቲዳ ሚሺ ሙሌካ ዴና። 21 ካዎዛስ ሁራሜ ኣሳቲ ላጊዛ ዛልኤ ማርካቤቲ ዴቴስ፤ ሄ ማርካቤቲ ዎርቃ፥ ቢራ፥ ዳንጋርሳ ዛሌ፥ ቃሬታኔ ጌሌሾታ ጫኒ ኤኪዲ ሄꬑ ላይꬃፌ ኢሲቶ ታርሴሴ ሲሜቴስ።
22 ካዎ ሶሎሞኔይ ዱሬቴꬃኒኔ ኣꬎ ኤራቴꬃን ሳኣን ዴኢዛ ካዎታ ኡባፌ ኣꬌስ። 23 ሳኣን ዴኢዛ ካዎቲ ኡባይ ኢዛ ሲንꬅ ኣꬋናሲኔ ጾሲ ኢዛ ዎዚናን ዎꬂዳ ኣꬎ ኤራቴꬃ ሲያናስ ኮዬቴስ። 24 ላይꬃን ላይꬃን ዪዛ ኡባይ ኢዛስ ኢማናስ ዎርቃኔ ቢራ ሚሻታ፥ ማይኦታ፥ ኦላ ሚሻታ፥ ዱማ ዱማ ሳዎ፥ ፓራታኔ ባቁሎታ ኤኪ ዬቴስ።
25 ሶሎሞኔ ፓራታሲኔ ጋሬታስ 4,000 ጋጻታይ ዴስ፤ ቃሴ 12,000 ፓራቲ ኢዛስ ዴቴስ። ሶሎሞኔይ ሄ ፓራ-ጋሬታ ካታማታኒኔ ባናራ ዬሩሳላሜን ዎꬂዴስ።1ካዎ 4፡26 26 ሶሎሞኔይ ኤፊራጺሴ ሻፋፔ ዶሚዲ ፊሊስጼሜ ቢታኔ ጊብጼ ዛዋ ጋካናስ ዴኢዛ ካዎታ ኡባ ሃሪዴስ። ሜꬌ 15፡18፤ 1ካዎ 4፡21 27 ካዎይ ዬሩሳላሜን ቢራይ ሹቻꬆ ኮሬታና ማላ፥ ዚጋይካ ሻራ ሜንꬆን ዲጪዛ ኤꬃꬆ ጮራታና ማላ ኦꬂዴስ። 28 ሶሎሞኔስ ፓራታ ጊብጼፔኔ ሃራ ቢታ ኡባፌ ኤሄቴስ። ዛሬ 17፡16
ሶሎሞኔ ሃይቆ
(1ካዎ 11፡41-43)
29 ኮይሮፔ ዉርሴꬅ ጋካናስ ሶሎሞኔ ካዎቴꬃ ላይꬃን ሃኒዳ ሃራ ሚሺ ኡባይ ቲንቢቴ ዮቲዛ ናታኔ ታሪኬ ማጻፋን፥ ቲንቢቴ ዮቲዛ ሴሎኔ ዴሬ ኣስ ኣካያ ማጻፋኒኔ ናባጼ ና ኢዮርባኣሜ ጊሻስ ቲንቢቴ ዮቲዳ ኢዶይ ቤኢዳ ኣጁታ ማጻፋን ጻፌቲ ኡቲዴስ። 30 ሶሎሞኔይ ኢስራኤሌ ኡባ ቦላ ዬሩሳላሜን 40 ላይꬅ ካዎቲዴስ። 31 ሄሳፌ ጉዬ ሶሎሞኔይ ሃይቂዲ ካሴ ባ ኣዋታን ጋይቲዴስ፤ ባ ኣዋ ዳዊቴ ካታማን ሞጌቲዴስ፤ ኢዛ ና ኤሮቢኣሜይ ኢዛሶሆን ካዎቲዴስ።