1 ኦዴዴ ና ኣዛሪያሳ ቦላ ጾሳ ኣያናይ ዎꬊዴስ። 2 ኢዚካ ኣሳራ ጋይታናስ ቢዲ፥ «ኣሳ፥ ዩሁዳ ኣሳዉ! ቢኒያሜ ኣሳዉ ኢንቴ ኡባይካ ሲዪቴ! ኢንቴ ጎዳራ ኢሲፌ ዴኢኮ ኢዚካ ኢንቴናራ ዴኣና። ኢንቴ ኢዛ ኮይኮ ኢዚ ኢንቴስ ቤታና፤ ኢንቴ ኢዛ ኣጊኮ ኢዚካ ኢንቴና ኣጋና። 3 ኢስራኤሌ ኣሳይ ቱሙ ጾሲ፥ ታማርሲ ቄሴይኔ ዎጋይ ባይንዳ ዳሮ ዎዴ ዴኢዴስ። 4 ጊዶ ኣቲን ባንታና ሜቶይ ጋኪዳ ዎዴ ኢስቲ ጎዳ ኢስራኤሌ ጾሳኮ ሲሚዲ ኢዛ ኮዪን ኢዚ ኢስታስ ቤቲዴስ። 5 ሄ ዎዴ ቢታ ኡባ ቦላን ዳሮ ሺሮይ ዲዛ ጊሻስ ኣሲ ሳሮን ኬዚ ጌላናስ ኣማንꬄና። 6 ጾሲ ኢስታ ዱማ ዱማ ሜቶን ዬጊዳ ጊሻስ ዴሬይ ካዎቴꬃ ቦላ፥ ካታማይካ ካታማ ቦላ ዴንዲዲ ኢሶይ ኢሳ ꬋይሴስ። 7 ኢንቴ ጊዲኮ ኢንቴ ኦꬂዳ ኦሶስ ዎይቶይ ዴኢዛ ጊሻስ ሚኒቴ! ላፎፒቴ!» ጊዴስ።

8 ኦዴዴ ና ናቤ ኣዛሪያሲ ዮቲዳ ቃላ ሲዪዲ ኣሲ ሚኒዴስ። ኣሲ ዩሁዳኔ ቢኒያሜ ቢታታ ኡባፌኔ ኤፍሬሜ ጌዜን ኢዚ ኦሊ ኦይኪዳ ካታማታፔ ሃራሲዛ ኤቃ ሚስሌታ ꬋይሲዴስ። ሄሳፌ ጉዬ ጾሳ ኬꬃ ሲንꬃን ዴኢዛ ጎዳስ ያርሾ ያርሺዛሶሆዛካ ኦራꬂዴስ።

9 ጎዳይ ኢዛ ጾሲ ኢዛራ ዴኢዛይሳ ቤኢዳ ጊሻስ ዳሮ ኣሳይ ኢስራኤሌፔ ኢዛኮ ዪዴስ፤ ኣሲ ዩሁዳ ኣሳኔ ቢኒያሜ ኣሳ ኡባ፥ ኢስታራ ዴኢዛ ኤፍሬሜ ዛሬታ፥ ሚናሴ ዛሬታኔ ሲሞና ዛሬታ ሺሺዴስ። 10 ኣሲ ካዎቲዳ ታማኔ ኢቻሻንꬆ ላይꬃን፥ ሄꬓንꬆ ኣጊናን ሄ ኣሳይ ዬሩሳላሜን ሺቂዴስ። 11 ሄ ዎዴ ዲኢ ኤሂዳይሳፌ 700 ኮርማታ፥ 7,000 ዶርሲኔ ዴይሽ ጎዳስ ያርሺዳ። 12 ጎዳ ባንታ ኣዋታ ጾሳ ባንታ ኩሜꬃ ዎዚናፔኔ ባንታ ኩሜꬃ ሼምፖፌ ኮያናስ ቃላ ጌሊዳ። 13 «ጎዳ ኢስራኤሌ ጾሳ ኮዮንታ ኣሲ ጉꬅ ጊዲን ጊታ ጊዲን፥ ኣቱማ ጊዲን፥ ማጫ ጊዲን ሃይቆ» ጊዲ ጫቂዳ። 14 ሄሳ ቦላ ጉጂዲ ዛዬን፥ ዲንኬኒኔ ኢሊሊሳን ባንታ ቃላ ꬎቁ ሂስቲዲ ጎዳስ ጫቂዳ። 15 ኢስቲ ኩሜꬃ ዎዚናፔ ጫቂዳ ጊሻስ ሄ ጫቆዛን ዩሁዳ ኣሳይ ኡባይ ኡፋዬቲዴስ፤ ጾሳ ኢስቲ ላሞቲዲ ኮዪን ኢዚ ኢስታስ ቤቲዴስ። ጎዳይ ኢስታስ ኡባ ባጋራካ ዎፓ ኢሚዴስ።

16 ካዎ ኣሲ ባ ኣዋ ኣያ ማኢካ ኣሼሮ ጌቴቲዛ ጾሳይስ ሃራሲዛ ኤቃ ሚስሌ ሜꬊዳ ጊሻስ ኢዞ ካዎ ኣዬቴꬃ ቦንቾፌ ዲጊዴስ። ኣሲ ሄ ኤቃ ሚስሌዛ ቃንጼሬꬂ ሜንꬄሬꬂዲ፥ ቄዲሮኔ ዙሌን ጹጊዴስ። 17 ጎይኒዛ ꬎቃሶሆታ ኣሲ ኢስራኤሌ ቢታፌ ሙሌራ ꬋይሶንታ ኣጊኮካ ኢዚ ባ ዴኢዳ ላይꬅ ኡባን ጎዳስ ዎዚናፔ ኣማኔቲዛ ኣስ ጊዲዲ ዴኢዴስ። 18 ኢዚኔ ኢዛ ኣዋይ ጾሳስ ዱማሲ ዎꬂዳ ቢራ፥ ዎርቃኔ ዱማ ዱማ ሚሻታ ኤሂዲ ጾሳ ኬꬃ ጊዶን ዎꬂዴስ። 19 ኣሲ ካዎቲዳ 35 ላይꬅ ጋካናስ ኦላይ ዴና።