1 ኢዮኣታሜይ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን 16 ላይꬅ ካዎቲዴስ፤ ኢዛ ኣያ ሳዶቄ ቢዮ ኢዬሩሶ ጌቴታዉስ። 2 ካሴ ኢዛ ኣዋ ኦዚያይ ኦꬂዳይሳ ማላ ኢዚካ ጎዳ ሲንꬃን ሱሬ ሚሽ ኦꬂዴስ፤ ጊዶ ኣቲን ኢዛ ኣዋይ ጾሳ ኬꬅ ጌሊዳ ማላ ኢዚ ጌሊቤና፤ ኣሳይ ጊዲኮ ናጋራ ኦሶ ኣጊቤና።

3 ኢዮኣታሜይ ጾሳ ኬꬅ ጌሊዛሶ ቆሞ ባጋ ፔንጌ ዛሬꬂዲ ኦꬂዴስ፤ ቃሴ ኦፌሌ ባጋራ ዲዛ ጊምቤዛ ዳሮ ሎኤꬆ ኦሶ ኦꬂዴስ። 4 ዩሁዳ ዙምቡላታ ቦላ ካታማታ ኦꬂዴስ፤ ዎራታ ጊዶን ሚጻታኔ ኣዱሳ ጊምቤታ ጊምቢዴስ።

5 ኢዮኣታሜይ ኣሞኔ ካዎራ ኦሌቲዲ ጾኒዴስ፤ ኣሞኔቲ ሄ ላይꬂ 3,400 ኪሎ ጊራሜ ዴጺዛ ቢራ፥ 10,000 ኮንታሌ ጊዲዛ ጊስቴኔ 10,000 ኮንታሌ ጊዲዛ ባንጋ ኢዛስ ጊሪዳ። ኣሞኔቲ ናምኣንꬆ ላይꬂኔ ሄꬓንꬆ ላይꬂ ሄሳꬆካ ኤሂዲ ኢዛስ ጊሪዳ። 6 ኢዮኣታሜይ ባ ጎዳ ሲንꬃን ኣማኔቴꬃን ሲሜሬቲዳ ጊሻስ ኬሂፔ ሚኒ ሚኒ ቢዴስ።

7 ኢዮኣታሜ ካዎቴꬃ ላይꬃን ሃኒዳ ሃኖቲ፥ ኢዚ ኦሌቲዳ ኦላቲ ኡባይኔ ኢዚ ኦꬂዳ ኦሶ ኡባይ ኢስራኤሌ ካዎታኔ ዩሁዳ ካዎታ ታሪኬ ማጻፋን ጻፌቲ ኡቲዴስ። 8 ኢዚ ካዎቲሺን ኢዛስ ላይꬃይ 25፤ ኢዚ ዬሩሳላሜን 16 ላይꬅ ካዎቲዴስ። 9 ኢዮኣታሜይ ባ ኣዋታꬆ ሃይቂዴስ፤ ዳዊቴ ካታማን ሞጌቲዴስ፤ ኢዛሶሆን ኢዛ ና ኣካዜይ ካዎቲዴስ።